MARKU 5
5
1O ahetele mu sali lia Chitende, ku chifuchi cha A-Ngandara. 2Muze te hatuhuka mu ulungu, haze hene umwe lunga kali ni Spiritu ya luchisa watukanyine nenyi kanakatuka ku mafuka. 3Mwenawo wapwile ni mahienyi hakachi ka chifuka: mba niumwe wahashile kumukasa nawa chipwe ni malenge, ka; 4mumu kanji amukashile kulu ni kuli ni malenge, alioze malenge apatukile pundu kuli iye, ni kuli japulikile tuyihanda. Kahashile kumuhombola, niumwe. 5Matangwa eswe, ufuku ni mwalwa, wapwile ha milundu ni mukachi ka chifuka nikukololoka, nikulipula ni mawe. 6Muze amwene Yesu kusuku, wazombokele, wamuwayilile; 7mba nikukololoka ni liji linene ngwenyi, Kuchi yami ni yena, Yesu mwe Mwana wa Zambi Chitunda? Lishinge mu jina lia Zambi kuli yami kuchi kungupinjisa. 8Mumu wambile kuli iye ngwenyi, Yena spiritu ya luchisa tuhuka muli mwe lunga. 9Iye wamuhulile ngwenyi, Jina lie, yena iya? Yamba kuli iye ngwenyi, Jina liami Tununu; mumu tuli anji. 10Waliumbile kuli iye chikolo kanda aakatwisa ku chifuchi. 11Achi, kwapwile kuze hakachi ha mulundu chendo chinene cha ngulu, kanali. 12O akumbile kuli iye ngwo, Tutume kama kuli ngulu, hanga tunjile muli ayo. 13Haze hene Yesu waatayijile. Ni maspiritu a luchisa atuhukile, anjilile muli ngulu, ni chendo alundumukine ha mbongo mu Chitende, ngwe tununu aali; afwile mu Chitende.
14Mba waze aalishile achinyine, achambulwile mu limbo, ni ku minda. O atuhukile mukumona chize alingile. 15Yeza kuli Yesu, yamona mukwa ndemoniu, yoze wapwile kushi ni tununu, kanatwama, kanazala hina, hapwa ni mana: no evwile woma. 16Waze achimwene, aambulwilile ngwe chize chapwile kuli mukwa ndemoniu, ni ha kutwala kuli ngulu. 17O aputukile kuliumba kuli iye, akatuke ku manjiza jo. 18Shimbu anjilile mu ulungu, yoze wapwile kushi ni andemoniu, waliumbile kuli iye hanga akapwe hamwe nenyi. 19Iye kamutayijileko, alioze yamba kuli iye ngwenyi, Yako ku mahienu kuli usoko we, ukaambulwile yize yuma yinene hanakulingila Mwene, ngwe chize akuvwilanga keke. 20Iye wayile, waputukile kwambujola mu Ndekapoli yize yuma yinene amulingilile Yesu: ni eswe akomokene.
21Muze te Yesu hazauka cheka nawa mu ulungu mu sali, mbunga yinene akungulukile kuli iye; iye wapwile ku sesa lia Chitende. 22Mba, umwe wa kuli akwa kuyula sunangonga, jina lienyi Yaru, yeza; iye ha kumumona, yafulamana ku yiliato yenyi. 23Yaliumba kuli iye chikolo ngwenyi, Mwanami mukepe wa pwo kanahuzu: tweya kama, usayike moko je hali iye, hanga akapwe mungunu, akatwame ni mwono. 24Iye wayile hamwe nenyi.
Ni mbunga yinene amukawile, no amushinjiekele. 25Mba kwapwile umwe pwo, yoze wapwile ni musongo wa kuhita manyinga kumi lia miaka ni miaka yiali. 26Wevwile kulu yikola yinji kuli mbuki anji, te wahwishile kulu upite weswe wapwile nawo, kamukwashile nichimwe, alioze Wayijile kuhiana. 27Iye se hanevu ha kutwala kuli Yesu, wejile hakachi ka mbunga kunyima, wasele minwe ku hina lienyi. 28Mumu wambile ngwenyi, Chipwe mungusa munwe ku hina lienyi wika mungupwa mungunu. 29Ni haze hene kuhita cha manyinga chapatukile; iye wanyingikine mu mujimba wenyi ngwenyi, Hinahinduka ku upupilo wami. 30Mba haze hene Yesu, se kananyingika muli iye mwene ngwenyi, Tachi hijatuhuka muli yami, watewulukile mu mbunga, wambile ngwenyi, Iya wakwata ku hina liami? 31Tumbaji twenyi ambile kuli iye ngwo, Unamono mbunga, anakushinjieka, hindu unambe ngwe, Iya wangukwata, nyi? 32Iye wakengesele hanga amone yoze halinga chino chuma. 33Alioze pwo wakundamine nikwivwa woma, nikuchikima, nikunyingika chize halinga muli iye, wafulamanyine kumeso jenyi, wamwambulwilile umwenemwene weswe. 34Iye wambile kuli pwo ngwenyi, Mwanami, Ufulielo we hiwakupwisa mungunu, uye kanawa ukahinduke ku upupilo we.
35Shimbu achili nikuhanjika, amwe a ku zuwo lia mukwa kuyula sunangonga yeza, yamba ngwo, Mwané hafwa, kuchi te mukatalisa Longeshi nawa? 36Alioze Yesu ha kwivwa liji lize ahanjikile, yamba kuli mukwa kuyula sunangonga ngwenyi, Kanda wivwa woma, fuliela. 37Iye katayijile niumwe kuya hamwe nenyi shina Petulu ni Tiangu ni mwanakwo Yoano. 38O yeza ku zuwo lia mukwa kuyula sunangonga; iye yamona kupinda, ni atu nikulila nikutetwoka chikolo. 39Muze te hanjila, yamba kuli ayo ngwenyi, Kuchi te nunaneha zungo, nunalili? Mwana-pwo kafwileko, alioze mu tulo ali. 40O amusehele, alioze muze te haatuhwisa eswe, yatwala hamwe nenyi tato ni naye ya mwana-pwo, ni waze apwile hamwe nenyi, yanjila muze apwile mwe mwana-pwo. 41Iye wakwachile mwana-pwo ku kwoko, yamba kuli iye ngwenyi, Talita kumi; chinalumbunuka, Mwana-pwo, ngunambe kuli yena ngwami, Hinduka. 42Haze hene mwe mwana-pwo wahindukile, wendele; mumu wapwile ni kumi lia miaka ni miaka yiali. O alishikishilile haze hene ni kulishikishila chinene. 43Iye waakanjishile chikolo ngwenyi, Niumwe kanda akachinyingika; iye wambile amwehe chimwe cha kulia.
Iliyochaguliwa sasa
MARKU 5: Csa
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Chokwe Bible © Bible Society in Angola, 1975.
