MATEU 25
25
1Hohene makapwisa wanangana wa malilu ngwe kumi lia ana-mapwo, aze anjile ndeya jo, akatuhuke mukupatwiza sandungi. 2Atano a kuli ayo apwile yikanyame, ni atano apwile yihepuke. 3Mumu yihepuke, muze ambachile ndeya jo, kambachile maji hamwe no: 4alioze yikanyame ambachile maji mu tusaji two hamwe ni ndeya jo. 5Achi, shimbu sandungi ashimbwile, o eswe anongwokene, ayile tulo. 6Alioze ha muchima ufuku hapwile liji linene ngwo, Talenu sandungi! tuhukenu numupatwize. 7Hohene waze ana-mapwo eswe ahindukile, akendele ndeya jo. 8Yihepuke ambile kuli yikanyame ngwo, Twehenu kama amwe a ku maji jenu; mumu ndeya jetu jinajimajima. 9Alioze yikanyame akumbulwile ngwo, Hi chocho ko, kuchina hanji kechi kaheta hali yetu ni yenu: yénu Shinaho kuli waze akulanjisa, nukalilanjile yenwene. 10Alioze shimbu ayile mukulanda, sandungi wejile; ni waze alulikile anjilile hamwe nenyi ku ulungi; mba ajilile pito. 11Kulutwe, ana-mapwo akwo yeza nawa, ngwo, Mwene, Mwene, twazulwile kama. 12Alioze iye wakumbulwile ngwenyi, Pundu ngunambe kuli yenu ngwami, Chanunyingikine. 13Lenu kashika, mumu kunwanyingikine tangwa, chipwe ola.
14Mumu chinapu ngwe mutu, ha kukatuka kuya mu ungeji ku chifuchi chikwo, watambikile ndungo jenyi waakunjikile yikumba yenyi. 15Kuli umwe wahanyine mbongo jitano, ni kuli mukwo jiali, ni kuli mukwo umuwika: kuli mweswe nikulita ni kuhasa chenyi, mutu ni mutu; neye wakatukile, wayile mu ungeji wenyi. 16Haze hene yoze watambwile mbongo jitano wayile nikusepa najo, mba wafumbwile mbongo jikwo jitano. 17Chizechene nawa yoze watambwile jiali, wafumbwile mbongo jikwo jiali. 18Alioze yoze watambwile lumbongo umuwika wayile akafule hashi, mba waswekele lumbongo wa mwene wenyi. 19Kulutwe lia shimbu linene mwenya ndungo waze, yeza yalulika no. 20Yoze watambwile mbongo jitano, wejile nikuneha mbongo jikwo jitano, ngwenyi, Mwene, yena wangukunjikile mbongo jitano: talenu, hingunatambula mbongo jikwo jitano. 21Mwene wenyi ngwenyi, Hiunalingi kanawa, ndungo mupema, wamwenemwene, hiunashishika ha yuma yikehe, mungukakusela helu lia yuma yinji; njila mu uwahililo wa mwene we. 22Yoze nawa watambwile mbongo jiali, wejile ngwenyi, Mwene, yena wangukunjikile mbongo jiali; talenu, hingunatambula mbongo jikwo jiali. 23Mwene wenyi ngwenyi, Hiunalingi kanawa, ndungo mupema, wamwenemwene, hiunashishika ha yuma yikehe, mungukakusela helu lia yuma yinji; njila mu uwahililo wa mwene we. 24Yoze nawa watambwile lumbongo umuwika, wejile ngwenyi, Mwene, ngunanyingika uli mutu mukalu, wakucha kuze kwakuwileko, wakukunga kuze kwamwangineko. 25Nevwile woma, mba nayile, naswekele lumbongo we hashi: tala, hiwazuka niwe. 26Alioze mwene wenyi wakumbulwile ngwenyi, Yena ndungo chingulungulu, chileya, wanyingikine ngwe nakucha kuze chakuwileko, nakukunga kuze chasandwileko. 27Shinaho kashika kachi wahanyine lumbongo wami kuli akwa kusumbakenya mbongo, mba ha kwiza chami kachi natambula yoze niwami hamuwika ni mbwezo. 28Chizenu kashika lumbongo kuli iye, numuhane kuli yoze uli ni kumi lia mbongo. 29Mumu mweswe ukwete kumakamwaha, neye kumakapwa nayo ya kulumbama: alioze yoze keshi nacho, chipwe chize ali nacho kumakamuchizacho. 30Alioze mbilenu yono ndungo wamokomoko mu milima ya haze: kumukukapwa malilo ni kulikopola ku mazo.
31Alioze muze mwe Mwana Mutu meza mu uhenya wenyi, ni angelo asandu eswe hamwe nenyi, hohene makatwama ha ngunja yenyi ya uhenya: 32mavungu eswe makakunguluka kumeso jenyi: iye makaahandununa umwe kuli mukwo, chizechene ngwe kafunga mahandununa mapanga kuli pembe. 33Masa mapanga ku chindume, alioze pembe masa ku chimeso. 34Hohene Mwanangana makamba kuli waze ali ku chindume ngwenyi, Tweyenu, kunwawaha kuli Tata, nutunge wanangana anululikililewo chize ku kusela cha fundamentu ya hashi: 35mumu nevwile zala, mba nwanguhele kulia; nevwile pwila, mba nwanguhele meya; napwile chilambala, mba nwanguzumbwile; 36napwile ni uvu, mba nwangujikile; nayijile, mba nwangunangishine; napwile mu zuwo lia ususu, mba nwejile kuli yami. 37Hohene akwa ululi makamukumbulula ngwo, Mwene, mwiji muka twakumwene ni zala, twakuhele kulia? Hanji ni pwila, twakuhele meya? 38Mwiji muka twakumwene chilambala, twakuzumbwile? Hanji ni uvu, twakujikile? 39Mwiji muka twakumwene ni kuyiza, hanji mu zuwo lia ususu, twejile kuli yena? 40Mwanangana makaakumbulula ngwenyi, Pundu ngwami, Mumu te nwachilingile kuli umwe wa kuli akepe ahiana eswe a kuli wano mandumbu jami, nwachilingile kuli yami. 41Hohene makamba nawa kuli waze ali ku chimeso ngwenyi, Katukenu kuli yami, yenu kunwashingiwa, nuye ku kahia ka mutolo kaze alulikile hali Ndiapu ni angelo jenyi. 42Mumu nevwile zala, kunwanguhele kulia; nevwile pwila, kunwanguhele meya; 43napwile chilambala, kunwanguzumbwile; napwile ni uvu, kunwangujikile; nayijile, napwile mu zuwo lia ususu, kunwangunangishine. 44Hohene o nawa makakumbulula ngwo, Mwene, mwiji muka twakumwene ni zala, hanji ni pwila, hanji chilambala, hanji ni uvu, hanji ni kuyiza, hanji mu zuwo lia ususu, kutwakuvumbikile? 45Hohene makaakumbulula ngwenyi, Pundu ngwami, Mumu te kunwachilingile kuli umwe wa kuli wano akepe ahiana eswe, kunwachilingile kuli yami. 46Wano kumakaya ku lamba lia mutolo, alioze akwa ululi ku mwono wa mutolo.
Iliyochaguliwa sasa
MATEU 25: Csa
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Chokwe Bible © Bible Society in Angola, 1975.
