UPUTUKILO 48
48
1Mba kulutwe lia yino yuma umwe wambulwilile José ngwenyi, Tatenu kanayiji, mba iye yatwala anenyi aali a malunga Manase ni Eframe. 2Mba umwe wambulwilile Yakomba ngwenyi, Mwané José kaneza kukutala. Kashika Izalele yalikoleza, yatwama ha muhela. 3Yakomba yamba kuli José ngwenyi, Zambi Mukwa-Ndundo-Jeswe wasolokele kuli yami ku Luze mu chifuchi cha Kanana, yanguwahisa. 4Yamba kuli yami ngwenyi, Mungukakupwisa semi, mungukakwokesa. Kuli yena mungukasemesa mbunga ya mavungu. Mungukahana chifuchi chino ku munyachi we chikapwe chihinga cha mutolo. 5Haliapwila ana je aali a malunga waasemene mu Engitu shimbu kanda nguchiheta kuli yena mu Engitu, ngwami, Eframe ni Manase ninyami chimuwika ngwe Rupene ni Simeone. 6Mba ana je aze musema kulutwe o mapwa ninye. O matambula jina lia ayayo mu chihinga. 7Alioze ha kutwala kuli yami, muze nakatukile ku Panda, Rakele wafwile kumeso jami mu chifuchi cha Kanana, mwe mu jila te kwasala kachipinji wika kuheta ku Efrata. Namufunjile kuze kwene mu jila ya kuya ku Efrata (kwe ku Mbeteleme kwenako).
8Mba Izalele yamona ana ja José, yamba ngwenyi, Wano aya? 9José yamba kuli tato ngwenyi, Ana jami Zambi wanguhelo kuno. Iye yamba ngwenyi, Anehe kuno kama nguawahise. 10Meso a Izalele hanalá ni ushinakaji, kashika kahashile kumona. José yaakundamisa kuli iye mba yaaha mbeju, yalizewilo. 11Izalele yamba kuli José ngwenyi, Chanyongene ngwami, Mungumona meso je, kumanyi Zambi hangutayiza hinamona meso ja ana je nawa. 12José yaachiza hakachi ka makungunwa jenyi, yafulamana hashi. 13José yaanda eswe aali, Eframe ku chindume chenyi akapwe ku chimeso cha Izalele; Manase ku chimeso chenyi akapwe ku chindume cha Izalele, chocho yaakundamisa.
14Izalele yazoza kwoko lienyi lia chindume, yalisa ha mutwe wa Eframe, mwe kanuke, kwoko lia chimeso ha mutwe wa Manase, nikusepekenya moko jenyi, mumu Manase mwe kapula-jimo. 15Yawahisa José ngwenyi,
Zambi akaawahise. Mwe Zambi atata
Apalahama ni Izake endele kumeso jenyi,
Mwe Zambi hanangulisa mwono wami weswe ndo musono.
16Mwe mungelo hanangupulula ku yipi yeswe, akawahise wano akweze,
Jina liami likapwe muli ayo, ni jina lia atata Apalahama ni Izake.
Akoke ndo mapwa chihuji hashi.
17Muze José hamona ngwe tato masa kwoko lienyi lia chindume hali Eframe chamupihila. Kashika yakwata kwoko lia tato alichize ha mutwe wa Eframe alise ha mutwe wa Manase. 18José yamba ngwenyi, Hi chocho ko tata, kapula-jimo yono, sako kwoko lie lia chindume ha mutwe wenyi. 19Tato kasolo. Yamba ngwenyi, Ngunachinyingika mwanami, ngunachinyingika, iye nawa masema vungu, kumakapwa munene nawa, alioze mwanakwo mahiana, munyachi wenyi muukapwa mbunga ya mavungu. 20Chocho yaawahisa tangwa lize ngwenyi,
Mu jina lie Izalele mawahisa ngwenyi,
Zambi akakupwise ngwe Eframe ni Manase.
Yasa Eframe kulutwe Manase kunyima. 21Mba Izalele yamba kuli José ngwenyi, Tala mu kufwa nguli, alioze Zambi kumakapwa hamwe ni yena, kumakakuneha ku chifuchi cha atatenu. 22Chikwo nawa hinakwaha chihanda chimwe helu lia ayayenu. Nachitambwile kuli A-Amore ni katana kami ni uta wami.
Iliyochaguliwa sasa
UPUTUKILO 48: Csa
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Chokwe Bible © Bible Society in Angola, 1975.