UPUTUKILO 44
44
1José yatuma kaselo ka zuwo lienyi ngwenyi, Zalisa njeke ja malunga wano ni kulia cheswe mahasa kumbata, ukase mbongo ja mutu mweswe kwilu lia njeke yenyi. 2Sako nawa musenge wami wa prata mu njeke ya mwe kasulasongo hamuwika ni mbongo jenyi ja mbuto. Iye yalinga nikulita ni liji lia José. 3Muze hikwacha chimene yalishika ni malunga, o yakatuka, yaya ni yimbulu jo. 4Muze hatuhuka mu limbo alioze kandaya kusuku, José yamba kuli kaselo kenyi ngwenyi, Katuka, ukaule waze malunga. Muze mwawana amba ngwe, Kuchi te hinwangulinga yipi ha yipema yami? 5Uno ngwami musenge mwata wami akunwinamo. Chipwe kutaha kakutahilamo ngombo. Chino nwalinganga, chipi.
6Iye yaawana, yahanjika no maliji ano. 7O yamukumbulula ngwo, Mwata kuchi te unambe maliji apwa haha? Chikapwe kusuku ni yetu ngamba je kulinga chuma chino. 8Mbongo jize twajiwanyine mu njeke jetu twajinehene kuli yena, chize ku chifuchi cha Kanana. Mba kuchi mutuhasa kwiya prata hanji oru ku zuwo lia mwata we? 9Mweswawo hakachi ketu ngamba je mumuwana nawo, akafwe lume, mba yetu akwo eswe mutupwa tupinji kuli mwe mwata. 10Iye ngwenyi, Chikapwe chocho ngwe hinwamba. Mweswawo mutumuwana nawo mapwa kapinji kami; akwo eswe masamba. 11O yalipupwisa, yachiza mutu ni mutu njeke yenyi, yajisa hashi, yajitula mutu ni mutu njeke yenyi. 12Iye yapolongoza, putu kuli mukulwana ndo kuli kanuke. Yawana musenge mu njeke ya Mbenjamine. 13O yapula mazalo jo, mutu ni mutu yatwika yimbulu jo, yahiluka ku limbo.
14Yunda ni akwo yeza ku zuwo lia José, yamuwana te kwali. O yafulamana hashi kumeso jenyi. 15José yamba kuli ayo ngwenyi, Chuma chino nwalinga kuchi chinalumbunuka? Te kunwanyingikine mutu chize napwa yami mahasa kutaha, nyi? 16Yunda yamba ngwenyi, Kuchi mutwamba kuli yenu mwata? Tuhanjike kuchi? Kuchi mutuhasa kulisambisa? Zambi hatuwa uhenge wa yetu ngamba jenu. Tuli tupinji twa yenu mwata. Ni yetu ni yoze wamuwana ni we musenge. 17Iye yamba ngwenyi, Chikapwe kusuku ni yami kulinga chocho. Mwe mutu twamuwana ni musenge iye mapwa kapinji kami. Alioze yenu akwo, yénu ni sambukila kuli tatenu.
18Aho Yunda yakundama kuli iye, yamba ngwenyi, Mwata wami, ngutayize kama kuhanjika liji limuwika mu matwi ja yenu mwata, yami nguli ngamba yenu. Utenu wenu kanda usasaminya hali yami ngamba yenu, mumu yenu chimuwika wapwa ni Falau. 19Enu mwata watuhulile yetu ngamba jenu ngwenu, Tatenu nuri nenyi? Mwanakwenu nuli nenyi nyi? 20Etu yitukumbulula kuli yenu mwata ngwetu, Tata tuli nenyi, kashinakaji, ni mwe kasulasongo wa ukulwana wenyi, iye kanuke. Yayo hafwa, iye wika wasala wa naye, kashika tato kamuzanga chinji. 21Enu nwambile ngwenu, Numunehe kuli yami hanga ngumutale kama. 22Etu twambile kuli yenu mwata ngwetu, Mukweze kahashile kuhichika tato mumu nyi mamuhichika tato kumafwa. 23Alioze yenu nwambile ngwenu, Nyi mwanakwenu kasulasongo kunwejile nenyi kunuchi kangumona meso jami. 24Muze twayile kuli ngamba yenu tata, yitumwambulwila maliji a yenu mwata. 25Tata ngwenyi, Yénu nawa, nukatulanjile kakulia. 26Twambile ngwetu,. Kutwahashile kuya. Nyi mwanakwetu maya mba ni yetu mutuya. Mumu kutuchi kuhasa kumona meso ja mwe lunga ndo ni mwanakwetu mutuya nenyi. 27Mba ngamba yenu tata wambile kuli yetu ngwenyi, Nunanyingika pwo liami wangusemenene ana-malunga aali. 28Umwe yangukatuka mba nambile ngwami, Hanamupapulula. Chamumwene nawa. 29Nyi mununguta-mbula yono nawa mba chimwe chuma chipi muchimuwana, kambu jami jitoma munujikoka ni chinyengo ku Shiole. 30Kashika muze munguya kuli ngamba yenu tata ni mwana wakuhi hamwe ni yetu, se mwono wenyi unalinungu ni mwono wa mwana; 31muze mamona mwana wakuhi, kumafwa. Mba yetu ngamba jenu kumututwala kambu ja ngamba yenu tata ku Shiole ni chinyengo. 32Mumu yami ngamba yenu nalisele chifungo hali mwana kuli tata, ngwami, Nyi chamunehene kuli yena mba mulonga mungutwama nawo wa mutolo kuli tata. 33Kashika, ngutayize kama, yami ngamba yenu, ngusalakane mwe mukweze mu undungo kuli mwata. Mwe mukweze akaye ni akwo. 34Mumu kuchi munguhasa kuya kuli tata nyi mukweze chayile nenyi? Kuchina mungumona che chipi muchiwana tata.
Iliyochaguliwa sasa
UPUTUKILO 44: Csa
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Chokwe Bible © Bible Society in Angola, 1975.