UPUTUKILO 35
35
1Zambi yamba kuli Yakomba ngwenyi, Katuka, ukanduke ku Mbetele ukatwa meko. Lingako chilumbilo kuli mwe Zambi wasolokele kuli yena muze wachinyine kumeso ja yayenu Esau. 2Kashika Yakomba yamba kuli akwa zuwo lienyi ni waze eswe apwile no ngwenyi, Mbilenu mahamba a tundaka nuli no hakachi kenu, lipemesenu, zalenu mazalo eka, 3tuyenu, tukandukenu ku Mbetele. Mungutungako chilumbilo kuli mwe Zambi wangukumbulwile ha tangwa lia lamba liami, wendele ni yami jila yize nayile. 4Mba yahana kuli Yakomba mahamba eswe a tundaka apwile no, ni yingelengele apwile nayo mu matwi jo. Yakomba yayivumbika mushi lia mutondo wa carvalho ku Shekeme.
5Chocho yaya, mba woma wunji wapwile ha membo eswe a kwajingilika. Kakawile ana ja Yakomba. 6Mba Yakomba yaheta ku Luze mu chifuchi cha Kanana (kwe ku Mbetele kwenako) ni ive ni atu eswe ejile no. 7Watungileko chilumbilo, yalukaho jina ngwenyi, Ele-mbetele, mumu kwenako Zambi walisolwele kuli iye muze wachinyine kumeso ja yayo. 8Debola, ndeji ya Rebeka, wafwile, yamufunda ku mwanda wa Mbetele mushi lia mutondo wa carvalho. Yalukaho jina Alone-bakute.
9Zambi yasoloka cheka nawa kuli Yakomba muze akatukile ku Panda-narame. Yamuwahisa. 10Zambi yamba kuli iye ngwenyi, Jina lie Yakomba, alioze jina lie kulichi kupwa Yakomba nawa, jina lie mulipwa Izalele. Yamuluka jina ngwenyi, Izalele. 11Zambi yamba kuli iye ngwenyi, Yami nguli Zambi Mukwa-Ndundo-Jeswe. Useme, uliwezele; vungu ni chendo cha mavungu makasemuka kuli yena; mianangana makasemuka ku mitanda ye. 12Chifuchi nahanyine kuli Apalahama ni kuli Izake, munguchihana kuli yena ni ku munyachi we kulutwe lie. 13Chocho Zambi yakatuka kuze yahanjika nenyi, yazezuka mwilu. 14Mba Yakomba yamika liwe kuze Zambi wahanjikile nenyi liwe lia kumika. Yazujilaho mulambu wa kunwa, ni maji nawa. 15Yakomba yaluka jina kuma kuze Zambi wahanjikile nenyi ngwenyi, Mbetele.
16O yachiza wenyi wo ku Mbetele, kwasalile kapinji nikuheta ku Efrata muze Rakele yaputuka misongo ya kusema mba yikola yinji chikolo apwile nayo. 17Mba shimbu machipinda ni misongo chifunguji wambile ngwenyi, Kanda wivwa woma, mumu haliapwila mwana mukwo wa lunga muopwa nenyi. 18Mba kwapwile muze mwono wenyi muusutuka (mumu wafwile) yamuluka jina ngwenyi, Mbenoni. Alioze tato yamuluka jina ngwenyi, Mbenjamine. 19Chocho Rakele yafwa, yamufunda mu jila ya kuya ku Efrata (likwo Mbeteleme). 20Yakomba yamika liwe ha fuka lienyi. Liwe lia fuka lia Rakele kulili ndo musono. 21Izalele yaya mu jila yenyi, yajika mbalaka yenyi sali lize lia kaposhi wa Edere.
22Kwapwile shimbu Izalele Watwamine mu chifuchi chize Rupene yaya, yapomba ni Mbila *konkubina ya tato, mba Izalele yachivwa. Mba ana ja Yakomba te kumi ni aali. 23Ana ja Liya, Rupene, mutangu wa Yakomba, ni Simeone, ni Levi, ni Yunda, ni Isaka, ni Zapulone. 24Ana ja Rakele, José ni Mbenjamine. 25Ana ja Mbila ndungo ya Rakele, Ndane ni Napatali. 26Ana ja Zelupa ndungo ya Liya, Ngate ni Ashe. Wano e ana a malunga a Yakomba asemukine kuli iye mu Panda-narame.
27Yakomba yeza kuli tato Izake ku Mamare, ku Kiriate-Arpa (likwo Heprone) kuze kwatwamine ni Apalahama ni Izake. 28Miaka ya Izake yapwile kulakaji lia miaka ni makumi nake a miaka. 29Mba Izake yasutuka, yafwa, yamutwala kuli tulamba twenyi, te mukulwana, matangwa hoka. Ana jenyi Esau ni Yakomba yamufunda.
Iliyochaguliwa sasa
UPUTUKILO 35: Csa
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Chokwe Bible © Bible Society in Angola, 1975.