UPUTUKILO 26
26
1Kwapwile kapunga mu chifuchi helu lia kapunga yoze mutangu wa mu matangwa a Apalahama. Kashika Izake wayile kuli Apimeleke mwanangana wa A-Filistea mu Ngerare. 2Yehova yasoloka kuli iye ngwenyi, Kanda upalumuka ku Engitu, twama mu chifuchi ngunakulweze. 3Twama njize mu chifuchi chino mba mungupwa hamwe ni yena, mungukuwahisa. Mumu munguhana yifuchi yino yeswe kuli yena ni munyachi we. Mungukolesa shingo lize nalishingile nalio kuli tatenu Apalahama. 4Mungukokesa munyachi we ngwe matongonoshi a mwilu. Ku munyachi we mungukahana yifuchi yino yeswe, mba mu munyachi we mavungu eswe a hashi makawaha. 5Mumu Apalahama wononokene ku liji liami, wafungile shiko liami, ni shimbi jami, ni yiyulo yami, ni yilakenyo.
6Izake Watwamine mu Ngerare. 7Mba malunga enyembo yamuhula ha kutwala kuli mukwo-pwo. Iye yamba ngwenyi, Ndumbwami. Mumu woma evwile wakwamba ngwenyi, Mukwetu-pwo kuchina malunga a chifuchi hanji mamushiha akazuke Rebeka mumu iye mupema ku meso. 8Kwapwile muze hatwamako shimbu linene Apimeleke mwanangana wa A-Filistea yatala haze ku kapenda kenyi yamona kumanyi Izake kanahehe ni mukwo-pwo Rebeka. 9Apimeleke yasanyika Izake, yamba ngwenyi, Pundu iye mukwenu-pwo, mba kuchi te yena wa-mbile ngwe, Ndumbwami? Izake yamba kuli iye ngwenyi, Mumu nambile ngwami, Kuchina makangushiha ha mukunda wa iye. 10Apimeleke yamba ngwenyi, Chuma chino walinga kuchi chinalumbunuka? Mumu chashi kuli umwe hakachi ka atu kupomba ni mukwenu-pwo. Nyi chocho kachi yena watukokelele mulonga. 11Mba Apimeleke yahana shimbi kuli atu eswe ngwenyi, Mweswe masunga yono lunga hanji mukwo-pwo, mamushiha lume.
12Izake yalima mu chifuchi chize, yacha mwaka uze wene ha chimuwika kulakaji, ha chimuwika kulakaji. Yehova yamuwahisa, 13mba iye wapwile mutu munene, yaliwezela ndo hapwa munene chikolo. 14Te kali ni upite wa mapanga ni ngombe ni akwa zuwo lienyi anji, mba A-Filistea yamuvwila chipululu. 15Chocho mashima aze eswe a meya ngamba ja tato ashimine ha matangwa a tato Apalahama, A-Filistea haajika, te haashikila ni mavu. 16Apimeleke yamba kuli Izake ngwenyi, Katukenu kuli yetu, mumu nwatuhiana ni tachi.
17Mba Izake yakatuka kuze, yajika mbalaka jenyi mu chikulo cha Ngerare, yatwamako. 18Izake yashikulula nawa mashima a meya aze te ashimine ha matangwa a tato Apalahama, mumu A-Filistea haajika muze Apalahama hanafu. Iye yaaluka majina nikulita ni majina aze tato haaluka. 19Ngamba ja Izake yashima mu chikulo, yawana fuji lia meya a kuvwelwoka. 20Mba tufunga twa Ngerare yalitachika ni tufunga twa Izake ngwo, Meya ninyetu. Kashika yaluka shima lize ngwenyi, Eseke, mumu ha kulitachika nenyi. 21Yashima shima likwo. Yalitachikilalio nawa. Yaliluka jina ngwenyi, Shitena. 22Yakatukako, yashima likwo, alioze ha lize kalitachikile. Kashika yaliluka jina ngwenyi, Rehombote, mumu ngwenyi, Yehova hanatusela chihela, mba mutwima mihuko yinji.
23Yakatukako, yakanduka ku Mbia-shipa. 24Mba Yehova yasoloka kuli iye ufuku uze wene nikwamba ngwenyi, Yami nguli Zambi ya tatenu Apalahama. Kanda wivwa woma mumu nguli hamwe ni yena. Mungukakuwahisa, mungukokesa akwa munyachi we ha mukunda wa kavumbi kami Apalahama. 25Iye yatunga kuze chilumbilo, yasanyika ha jina lia Yehova; yatungako mbalaka yenyi; mba ngamba jenyi yashimako shima lia meya.
26Mba Apimeleke yakatuka ku Ngerare yaya kuli iye hamuwika ni sepa lienyi Ahuzata, ni Fwikole kapitau ka tujita twenyi. 27Izake ngwenyi, Kuchi te nuneza kuli yami se kole nwanguvwila, nwanguhuma hakachi kenu? 28O yamba ngwo, Hitwamona pundu ngwetu, Yehova kwali hamuwika ni yena. Kashika twamba ngwetu, Tukalikunde ni shingo hakachi ka yetu ni yena, tukakolese usendo, 29ngwetu, Kuchi kutulinga chipi, se yetu kutwakusungile, kutwakulingile nichimwe shina chipema wika. Twakukatwishile ni sambukila. Haliapwila yena uli mwe mukwa kumuwahisa kuli Yehova. 30Iye waalingilile chiwanyino, alile, anwine. 31Yalimeneka chimenemene akalishinge umwe kuli mukwo ni mukwo. Chocho Izake yaatwala mu jila, o yakatuka kuli iye ni sambukila. 32Tangwa lioliene ngamba ja Izake yeza yamulweza ha kutwala ku shima lize anafulu. Yamba ngwo, Hitwawana meya. 33Iye yaliluka ngwenyi, Shipa, kashika jina lia chihunda chize ngwo, Mbiashipa ndo musono.
34Muze Esau te hapwa ni makumi awana a miaka yambata Yutate mwana wa Ka-Hete Mberi. Yambata nawa Mbazemate mwana wa Ka-Hete Eione. 35Wano alumukine yipikalo ku mbunge ya Izake ni ya Rebeka.
Iliyochaguliwa sasa
UPUTUKILO 26: Csa
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Chokwe Bible © Bible Society in Angola, 1975.