UPUTUKILO 20
20
1Apalahama yakatuka kuze yatalikisa ku chifuchi cha Negeve, yatwama hakachi ka Kandeshe ni Shure. Chocho atwamine njize ku Ngerare. 2Apalahama yamba ha kutwala kuli mukwo-pwo Sara ngwenyi, Iye ndumbwami. Mba Apimeleke mwanangana wa Ngerare yatuma asake Sara. 3Alioze Zambi yeza kuli Apimeleke mu chilota ha ufuku ngwenyi, Tala, uli mufu lume mumu hali pwo yoze watambulanga, mumu iye pwo lia mbala. 4Alioze Apimeleke te kanda achimukundama. Yamba ngwenyi, Mwene, mushiha vungu lia ululi nyi? 5Te kambile kuli yami ngwenyi, Iye ndumbwami, nyi? Ni mwe pwo nawa mwene te kambile kuli yami ngwenyi, Iye ndumbwami nyi? Mu kutuwika cha mbunge yami ni kusamba cha moko jami nachilinga. 6Zambi yamba kuli iye mu chilota chenyi ngwenyi, E, ngunanyingika ngwami wachilinga mu kutuwika cha mbunge ye, ni yami nawa nakuchinda kuchina mukanguvulumuna. Kashika chakutayijile kumusunga. 7Haliapwila kashika hilwisa pwo lia yono lunga, mumu iye profeta, kumakakulembela ukatwame ni mwono. Nyi kwamuhilwishile, nyingika pundu kumuofwa, ni yena ni atu je eswe.
8Apimeleke yalimeneka chimenemene, yasanyika ngamba jenyi eswe, yaambulwila yino yuma yeswe mu matwi jo. Malunga yevwa woma wunji. 9Mba yasanyika Apalahama yamwamba ngwenyi, Yika watulingila chize? Mulonga uka nakuvulumwine kama, wangunehena mulonga upwa haha ni yami ni atu jami? Ena wangulinga yuma keshi kuyilinga. 10Apimeleke yamba kuli Apalahama ngwenyi, Yika wamona mba walinga chuma chino? 11Apalahama yamba ngwenyi, Mumu nanyonga ngwami, Akuno kukushi woma wa Zambi, kashika mangushiha mumu hali pwo liami. 12Chikwo nawa iye ndumbwami mumu mwana wa tata alioze hi mwana wa mama ko, mba hapwa pwo liami. 13Muze Zambi yanguchiza ku zuwo lia tata ngukendangane, yingwamba kuli iye ngwami, Ukangulinge vumbi lino, kweswako mutukaheta ukambe ha kutwala kuli yami ngwe, Iye ndumbwami. 14Mba Apimeleke yanda mapanga, ni ngombe, ni ndungo ja malunga, ni ndungo ja mapwo, yaahana kuli Apalahama, yamuhilwisa Sara pwo lienyi. 15Apimeleke yamba ngwenyi, Tala, chifuchi chami cheswe chili kumeso je, twama kweswako kunakuwahila. 16Yamba kuli Sara ngwenyi, Hinahana kuli ndumbwe kanunu ka mbongo ja prata jikapwe chifuko cha meso je kumeso ja atu eswe uli no. Ha kutwala ku yuma yeswe hinakutomesa. 17Mba Apalahama yalemba kuli Zambi, Zambi yawuka Apimeleke, ni mukwo-pwo, ni ndungo jenyi a mapwo, yasema ana. 18Mumu te Yehova hajika ngoji ja atu eswe a Apimeleke ha mukunda wa Sara, pwo lia Apalahama.
Iliyochaguliwa sasa
UPUTUKILO 20: Csa
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Chokwe Bible © Bible Society in Angola, 1975.