KUTUHUKA 16
16
1O nikukatuka ku Elime ayile wenyi wo. Chikungulwila cheswe cha A-Izalele yichiheta ku puya ya Shini yili mukachi ka Elime ni Sinai. Ha tangwa kumi ni liamuchitano lia kakweji wamuchiali, nikwalula ku tangwa lize akatukile ku chifuchi cha Engitu. 2Chikungulwila cheswe cha A-Izalele chalinyenyetene ni Mose ni Arone mu puya. 3A-Izalele yamba kuli ayo ngwo, Kachi twafwile ni kwoko lia Yehova mu chifuchi cha Engitu muze twatwamine ku ndeho ja yifwo, muze twalile nikukuta. Mumu yenu hinwatuhetesa ku puya yino mukushiha ni zala chikungulwila chino cheswe.
4Henaho Yehova yamba kuli Mose ngwenyi, Mungukanunokesela mbolo ya kukatuka kwilu. Atu makatuhuka akalinge kulia cha tangwa ha tangwa hanga yami ngukaeseke, shina o makenda mu shimbi yami, shina ka. 5Mba muchikapwa ha tangwa liamuchisambano muze o makalulika kulia chize makakunga chikapwe chihanda cha kuheta matangwa aali, hi limuwika ko. 6Mose ni Arone yamba kuli A-Izalele eswe ngwo, Ha chingoloshi kumunukanyingika ngwenu, Yehova watuchijile ku chifuchi cha Engitu. 7Mba muze mu kucha kumunukamona ulemu wa Yehova, mumu iye kanevu kulinyenyeta chenu ni Yehova. Yetu aya? Munulinyenyeta ni yetu nyi? 8Mose yamba ngwenyi, Muze ha chingoloshi Yehova makanwaha yifwo nukalie; mba ha kucha mbolo nukakute mununyingika Yehova kanevu kulinyenyeta chenu ni iye. Yetu aya kevwe? Kunwalinyenyetene ni yetu, ka, alioze ni Yehova.
9Mose yamba kuli Arone ngwenyi, Ambulwila chikungulwila cheswe cha A-Izalele ngwe, Kundamenu kumeso ja Yehova mumu iye hevwa kulinyenyeta chenu. 10Chocho shimbu Arone machihanjika ni chikungulwila cheswe cha A-Izalele, o yatala ku puya, kumanyi ulemu wa Yehova te unasoloka mu lelwa. 11Yehova yamba kuli Mose ngwenyi, 12Kunevwa kulinyenyeta cha A-Izalele, hanjika no ngwe, Ha chingoloshi munukalia yifwo mba muze mu kucha, kumunukakuta ni mbolo. Munukanyingika ngwenu, Mwe Yehova, Zambi yetu.
13Chocho ha ngoloshi, ngwali yeza, o yapwa kweswe ku chilombo. Mba muze hikwacha mume wapwile hashi, kweswe kwa kujingilika chilombo. 14Muze mume uze wapwile hashi hiwalukumuka, kumanyi, haze ha puya hashi hapwile chuma chimwe chikepekepe cha chikendengele, chikepekepe ngwe chiwe hashi. 15Muze A-Izalele achimwene, yaliamba umwe kuli mukwo ni mukwo ngwo, Acho chika? Mumu kanyingikine chize chipwa. Mose yamba kuli ayo ngwenyi, Yino mbolo yize Yehova hanwaha nukalie. 16Achi chuma chino, Yehova hanwamba ngwenyi, Mutu mweswe akunge nikulita ni chize mahasa kulia, kachisoka hali mutu, kachisoka hali mutu, nikulita ni kwalula cha atu jenu. Mutu mweswe akungile waze ali mu mbalaka yenyi. 17Chocho alingile A-Izalele, amwe yakunga chinji, akwo chikepe. 18Muze achesekele ni kachisoka, kuli yoze wakungile chinji kukwasalile nichimwe, mba kuli yoze wakungile chikepe kukwapwile kuhona nichimwe. Mutu mweswe yakunga nikulita ni chize mahasa kulia. 19Mose yamba kuli ayo ngwenyi, Mutu niumwe kanda akahichika chihanda chacho ndo mu kucha. 20Chipwe chocho, kahalakanyine kuli Mose, ka, amwe yatulika chihanda ndo hikwacha mba chatuhwishile mavuno, yichinuka. Mba Mose yatenuka no. 21Chimene ha chimene o achikungile. Mutu mweswe nikulita ni chize mahasa kulia mba muze tangwa hiliatwa mwalwa, yichisangunuka.
22Mba ha tangwa liamuchisambano yakunga mbolo ya kuheta matangwa aali. Mutu mweswe tuyisoka twaali. Miata eswe a chikungulwila yaya kuli Mose yamwambulwilacho. 23Iye yamba kuli ayo ngwenyi, Achi chuma chino Yehova hanambe ngwenyi, Hamene hakapwe uhwimino ulemu, Sambata yisandu kuli Yehova. Musono ochenu cheswacho munwocha, telekenu cheswacho munuteleka. Chize muchilisalaho litulikilenucho ndo mu kucha. 24O yachitulika ndo hikwacha ngwe ambile Mose. Kuchanukine, ka, chipwe kumwapwile mavuno niamwe. 25Mose yamba ngwenyi, Lienucho musono mumu musono liapwa Sambata kuli Yehova. Musono kunuchi kachiwana hashi. 26Nukachikunge matangwa asambano alioze ha tangwa liamuchishimbiali hakapwe Sambata. Kuchichi kapwako nichimwe. 27Chocho ha tangwa liamuchishimbiali kwatuhukile amwe atu mukuchikunga. Kawanyine nichimwe. 28Yehova yamba kuli Mose ngwenyi, Ndo mwiji muka kunusolo kufunga yiyulo yami ni shimbi jami? 29Talenu! Mumu te Yehova hananwehe ye Sambata, kashika ha tangwa liamuchisambano hananwehe kulia cha matangwa aali. Mutu mweswe akatwame ku chihela chenyi. Ha tangwa liamuchishimbiali mutu niumwe kanda akakatuka ku chihela chenyi. 30Chocho ahwimine e atu ha tangwa liamuchishimbiali.
31Mba A-Izalele yachiluka jina, ngwo, Mana. Te yapwile ngwe mbuto ya koentru, yitoma. Kupanjika chayo ngwe likemba lia kuchinga ni wuchi. 32Mose yamba ngwenyi, Achi chuma chino ambile Yehova ngwenyi, Tulikilenu yisemuko yenu kachisoka ka tò nayo, hanga akatale kulia chino nanulishile mu puya muze nanuchijile ku chifuchi cha Engitu. 33Mose yamba kuli Arone ngwenyi, Anda ndeho, usemo maná kachisoka ka, tò ukayitulikile kumeso ja Yehova nukayifungile yisemuko yenu. 34Ngwe Yehova ambile kuli Mose chocho Arone yayitulikila kulutwe lia Shindakenyo akayifunge. 35Ha makumi awana a miaka A-Izalele alile maná ndo ahetele ku chifuchi kuze kwatwama atu, o alile maná ndo ahetele ku njiza ja chifuchi cha Kanana. 36Kumi lia tuyisoka twalita ni njongo yimuwika ya efa.#16.36 1 Efa—chisoka cha 30 kilos.
Iliyochaguliwa sasa
KUTUHUKA 16: Csa
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Chokwe Bible © Bible Society in Angola, 1975.
