Luke 2
2
Allgellgha Jesus‑em
1Kingunganeng John‑em allgellghan, tamaani pilleghni Rome‑em Umiilegpigaan Augustus‑em, qelqaa yuuk qamagtengngwaaghluku, aatghit igaqestesaghtiisqelluki igalghutmikun. Tawaten pistekii kesnaluki yuget uglaghtalangit igleghutkaminilnguut nunani. 2Taana sivulighpigaalghii yugmeng kestilleq, Quirinius governor‑kengnguluku Syria‑m. 3Qamagtengngwaaghluteng yuget ellmeng katam allgeghvigmeggnun aglaghtuutkat ateteng igaqesqelluki.
4Nazareth‑meng, Galilee‑melngughmeng, Joseph‑llu aghulaqegkaq Bethlehem‑emun, Judea‑melngughmun, umiilgem David‑em allgeghviganun. Tamaavek pikaalghii qayughllak kingunqegkanga David‑em. 5Joseph‑em ateni igaqestesaghtuqaa, nuliighqani Mary kelqelluku, aqsaliighlluni ayuqelghii. 6Tamaansimalukek ighniyaghqaaghtekaq. 7Aantekaa ighneqsuwhaani, enkaam qiipaghaghqun yuungiilluku, aghsukaa neghqusitagnekun, qayughllak nekaghqiilnguuk aqelqalghutami.
Penniighniightetlu Yaqulgetlu
8Unugmi tawani, nunivagmi penniighniightet aflengakingulghiit penniighmeggneng. 9Atanghem yaqulgan aliighvikegkii, nighughqellghanllu Atanghem kukegtekii, enkaam alingruughuteghllakat. 10Yaqulgem pikii, “Alingegpenasi nagataghtek, pinilghiimeng ungipameng tagitaqamsi quyanapiglleghhiimeng yugnun tamaghhaanun. 11Aghneghmi whani elpesinun allgeghaquq Yugulighista, neghllagani David‑em, Christ‑anguuq Ataneq. 12Whaten liisimakelleqaghsi; esghaghlleqaghsi taghnughhaq qiipaghaghqun yuungiilluni, aghsugngaaq neghqusitagnekun.”
13Nuuskagan ilatqaghtaatkat yaqulegmun qilagem pilluwaghtelghuteghllagi yaqulelghutet, usuqegkaat Kiyaghneq, pikat,
14“Usuqnaghhalek Kiyaghneghmun,
qilagem uusqalleghpigaanilngughmun,
nekeggmellelgulitlu nunamelnguut efquqegkii!”
15Yaqulget mayughtuusata qilagmun, penniighniightet ellmeggneng pikat, “Bethlehem‑emun esghaghyaghtuulteggu taghnughhaq allgelghii, Atanghem liisimakestekanga whangkunnun.” 16Enkaam aglaragkiighluteng esghaqiit Mary‑nkut, Joseph‑enkut, taghnughhaqlu aghsugngalghii neghqusitagni. 17Penniighniightet esghaghyamegteggu taghnughhaq, tamanganun aapqaat tamaana yaqulgem apellgha ellmeggnun. 18Penniighniightet ungipaqellghitneng nagaquullghiit qamaglluteng allaaghlluwhaghyukat. 19Iwernga Mary‑m qaalkaghpenani ilumikegkii tamaakut pillghet, awen sumeghtaghaatkaqegkangi. 20Penniighniightet uteghniqat usuqumaan, quulvamaan Kiyaghneq, qayughllak nagaquqaatlu esghaqaatlu yaqulgem apellghatun ayuqegkaq.
Jesus Atiitkangat
21Pingayuneng inglulek aghneq atughluku, taghnughhaq circumcise‑eyan atiqaat, Jesus‑meng. Yaqulgem tuunegkaa ateq Mary‑mun salin qumingellghilluku.
Mary‑nkuk Joseph‑enkuk Aglaaskangak Jesus Temple‑mun
22Moses‑em Liilightuusaan qelellghatun pelungighsalleghqaak kaatkaq. Enkaam Jerusalem‑emun aglaatkaak taghnughhaq Ataneghmun tuunaluku. 23Liilightuusaani Atanghem igaqngaaq, “Tamaghhaghmi aghnam ighneqsuwhaagha aafsaghqaaguq Ataneghmun.” 24Atanghem Liilightuusaan qelghutellghatun aghqutkesaghqaalghiik maalghuk dove‑ek, nalighmeng maalghuk pigeon‑aaghaak.
25Jerusalem‑emeteftuq yuuk, aatgha Simeon. Qaatkutngalghiillu maniguutkayuklu Kiyaghneghmun. Utaqiingulghii Kiyaghneghmun yugulisqelluki Israel‑eghmiit. Agleghnalghiik Taghneghak ellnganilnguuk. 26Agleghnalghiim Taghnegham akeqegkaa tuqunaanghinniluku kenlanga esghalleghqaanun Messiah Atanghem akequsaqegkaa. 27Taghnegham maghyaghqullghakun iteghyaghtuqaq Temple‑mun. Liilightuusat pisqellghistun angayuqagkenka taghnughhaq Jesus itghutkaak Temple‑mun. 28Simeon‑em tuguluku taghnughhaq iqamsiqayugvikegkaa Kiyaghneq, pikaq,
29-30“Ataneq, yeqay maaten qepghaghten aghulaqestigu nekeggmelluku, qayughllak akeqelleghpetun,
whanga katam iyegemneng esghaghaqa kayagtekan Yugulighistenguluku.
31Yataaghqegkaqan yugnun tamaghhaanun esghiisqelluku.
32Nighuguuq Gentile‑enun liigikestilghii Kiyaghneghmeng,
ellnga apalluqluku yugten Israel‑eghmiit quulvallengeghllagllequt.”
33Taagken taghnughhaam atanganllu naanganllu saghiighayagutkaak tawaten akuzitkesagu. 34Simeon‑em Kiyaghneghmun tungsiitkakek quyastesqellukek. Enkaam naanga Mary pikaa, “Nagataghtinga, una taghnughhaq Kiyaghneghem nakmikegkaqaa. Ilangi Israel‑eghmiilghutet nanqiglleqii aghyuughyaghqaaluki, ilangi yuguliyaghqaaluki. Kiyaghneghem kayagtengngwaa ellminun ungipaghtenguluku, iwernga yulghutet ighsakelleqaat, 35enkaam tawaten pilleghmegteggun liitesleqiit aksaqngalghiit sumeghtaghalleteng. Enkaam elpek Mary, qivghum kagimlleqaak unguvasigken, katam tawaten savigpagem kaapellghatun.”
36Taawallunguq uuknaliqista aghnaq, aatgha Anna, Phanuel‑em paniga, Asher‑em ramkenganeng pi. Aghnalqwaaghuftuq, ugilgukaaftuq maaghragvinlek ayumiqulleq. 37Taagken ugingiitelleghmineng 84‑ngughtekangi ayumiqullghet. Awen tagiiqelghii Temple‑mun, aghneghuyaghngaan, unuguyaghngaan Kiyaghneq manigughaqegkanga, fast‑aaqlunillu yughaghaqlunillu. 38Tawani ataasimi aflumi, Anna‑m takuluki Kiyaghneq iqamsiqayugvikegkaa. Taghnughhaq akuzitkegkaa tamaghhiitnun utaqiilghiinun Messiah‑meng, ellnganun itemutesqelluku Jerusalem.
Uteghnilleq Nazareth‑mun
39Joseph‑enkuk Mary‑nkuk qamaglluki apeghiighyamegneki Atanghem Liilightuusiita pisqellghit, uteghniqak Nazareth‑mun, Galilee‑melngughmun. 40Taghnughhaq anglikaq, iknaqughtekaqlu, imighngaghmi peghqinelleghmeng; Kiyaghneghem kayusiqaallu quyastekaallu.
Mekelghiiq Jesus Temple‑mi
41Ayumiqulleq tamaghhaan angayuqakek Jerusalem‑etaqelghiit, neqenghaghqellghanun Passover‑em. 42Jesus‑em uksughtulanga qula maalghugughsan, piiqelleghmegetun neqenghaghqelleghmun pikak kelqelluku Jesus. 43Neqenghaghqelleq apeghiighyan uteghniqak, iwernga mekelghiiq Jesus unegtekaq Jerusalem‑emi. Angayuqagkenka nallukegkangak. 44Sumeghmegni igleghalgutegmegninniluku aghnelqusiq igleghtekak. Taagken ivaqaak ilakwaaghmegnillu ilakumtaaghmegnillu. 45Naalkenghisamegnegu Jerusalem‑emun ivaghyaghtuqaak. 46Pingayut aghneghet atughluki naalkegkaak uvitanganilluku Temple‑em, aqumluni apeghtughistet akulngitni, nagataqeftiillu aapqughaaghaqeftiillu. 47Qamaglluteng nagatullghiit ellnganeng saghiighayagutkaat liigikingallghanengllu kiimsightughillghanengllu. 48Angayuqagkenka esghaghluku saghiighayagutkaak. Naangan pikaa, “Ighnemni, esghaqaghqung, sangan whaten aneghsikung? Atagpeklu whangallu elngaatall ivanghiighutamken, repall pengꞌgiilluten.”
49Kiimsiqakek, “Sangan ivaghestegnenga? Nallukestegneguu Atama mangteghaanisaghqapestaaghulghiinga?” 50Iwernga liigikumangilkangak sameng tawaten pingutanga. 51Taagken maligllukek uteghniqaq Nazareth‑mun, qaatkutngakaalghiillu elkegkenun. Naangan tamaana qamaglluku umyugaghmikegkaa.
52Jesus anglitkelluku peghqinghughtekaq, efqughnaghtengnginaqaq Kiyaghneghmillu yugnillu.
Iliyochaguliwa sasa
Luke 2: ess
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018, Wycliffe Bible Translators, Inc. All rights reserved.
Luke 2
2
Allgellgha Jesus‑em
1Kingunganeng John‑em allgellghan, tamaani pilleghni Rome‑em Umiilegpigaan Augustus‑em, qelqaa yuuk qamagtengngwaaghluku, aatghit igaqestesaghtiisqelluki igalghutmikun. Tawaten pistekii kesnaluki yuget uglaghtalangit igleghutkaminilnguut nunani. 2Taana sivulighpigaalghii yugmeng kestilleq, Quirinius governor‑kengnguluku Syria‑m. 3Qamagtengngwaaghluteng yuget ellmeng katam allgeghvigmeggnun aglaghtuutkat ateteng igaqesqelluki.
4Nazareth‑meng, Galilee‑melngughmeng, Joseph‑llu aghulaqegkaq Bethlehem‑emun, Judea‑melngughmun, umiilgem David‑em allgeghviganun. Tamaavek pikaalghii qayughllak kingunqegkanga David‑em. 5Joseph‑em ateni igaqestesaghtuqaa, nuliighqani Mary kelqelluku, aqsaliighlluni ayuqelghii. 6Tamaansimalukek ighniyaghqaaghtekaq. 7Aantekaa ighneqsuwhaani, enkaam qiipaghaghqun yuungiilluku, aghsukaa neghqusitagnekun, qayughllak nekaghqiilnguuk aqelqalghutami.
Penniighniightetlu Yaqulgetlu
8Unugmi tawani, nunivagmi penniighniightet aflengakingulghiit penniighmeggneng. 9Atanghem yaqulgan aliighvikegkii, nighughqellghanllu Atanghem kukegtekii, enkaam alingruughuteghllakat. 10Yaqulgem pikii, “Alingegpenasi nagataghtek, pinilghiimeng ungipameng tagitaqamsi quyanapiglleghhiimeng yugnun tamaghhaanun. 11Aghneghmi whani elpesinun allgeghaquq Yugulighista, neghllagani David‑em, Christ‑anguuq Ataneq. 12Whaten liisimakelleqaghsi; esghaghlleqaghsi taghnughhaq qiipaghaghqun yuungiilluni, aghsugngaaq neghqusitagnekun.”
13Nuuskagan ilatqaghtaatkat yaqulegmun qilagem pilluwaghtelghuteghllagi yaqulelghutet, usuqegkaat Kiyaghneq, pikat,
14“Usuqnaghhalek Kiyaghneghmun,
qilagem uusqalleghpigaanilngughmun,
nekeggmellelgulitlu nunamelnguut efquqegkii!”
15Yaqulget mayughtuusata qilagmun, penniighniightet ellmeggneng pikat, “Bethlehem‑emun esghaghyaghtuulteggu taghnughhaq allgelghii, Atanghem liisimakestekanga whangkunnun.” 16Enkaam aglaragkiighluteng esghaqiit Mary‑nkut, Joseph‑enkut, taghnughhaqlu aghsugngalghii neghqusitagni. 17Penniighniightet esghaghyamegteggu taghnughhaq, tamanganun aapqaat tamaana yaqulgem apellgha ellmeggnun. 18Penniighniightet ungipaqellghitneng nagaquullghiit qamaglluteng allaaghlluwhaghyukat. 19Iwernga Mary‑m qaalkaghpenani ilumikegkii tamaakut pillghet, awen sumeghtaghaatkaqegkangi. 20Penniighniightet uteghniqat usuqumaan, quulvamaan Kiyaghneq, qayughllak nagaquqaatlu esghaqaatlu yaqulgem apellghatun ayuqegkaq.
Jesus Atiitkangat
21Pingayuneng inglulek aghneq atughluku, taghnughhaq circumcise‑eyan atiqaat, Jesus‑meng. Yaqulgem tuunegkaa ateq Mary‑mun salin qumingellghilluku.
Mary‑nkuk Joseph‑enkuk Aglaaskangak Jesus Temple‑mun
22Moses‑em Liilightuusaan qelellghatun pelungighsalleghqaak kaatkaq. Enkaam Jerusalem‑emun aglaatkaak taghnughhaq Ataneghmun tuunaluku. 23Liilightuusaani Atanghem igaqngaaq, “Tamaghhaghmi aghnam ighneqsuwhaagha aafsaghqaaguq Ataneghmun.” 24Atanghem Liilightuusaan qelghutellghatun aghqutkesaghqaalghiik maalghuk dove‑ek, nalighmeng maalghuk pigeon‑aaghaak.
25Jerusalem‑emeteftuq yuuk, aatgha Simeon. Qaatkutngalghiillu maniguutkayuklu Kiyaghneghmun. Utaqiingulghii Kiyaghneghmun yugulisqelluki Israel‑eghmiit. Agleghnalghiik Taghneghak ellnganilnguuk. 26Agleghnalghiim Taghnegham akeqegkaa tuqunaanghinniluku kenlanga esghalleghqaanun Messiah Atanghem akequsaqegkaa. 27Taghnegham maghyaghqullghakun iteghyaghtuqaq Temple‑mun. Liilightuusat pisqellghistun angayuqagkenka taghnughhaq Jesus itghutkaak Temple‑mun. 28Simeon‑em tuguluku taghnughhaq iqamsiqayugvikegkaa Kiyaghneq, pikaq,
29-30“Ataneq, yeqay maaten qepghaghten aghulaqestigu nekeggmelluku, qayughllak akeqelleghpetun,
whanga katam iyegemneng esghaghaqa kayagtekan Yugulighistenguluku.
31Yataaghqegkaqan yugnun tamaghhaanun esghiisqelluku.
32Nighuguuq Gentile‑enun liigikestilghii Kiyaghneghmeng,
ellnga apalluqluku yugten Israel‑eghmiit quulvallengeghllagllequt.”
33Taagken taghnughhaam atanganllu naanganllu saghiighayagutkaak tawaten akuzitkesagu. 34Simeon‑em Kiyaghneghmun tungsiitkakek quyastesqellukek. Enkaam naanga Mary pikaa, “Nagataghtinga, una taghnughhaq Kiyaghneghem nakmikegkaqaa. Ilangi Israel‑eghmiilghutet nanqiglleqii aghyuughyaghqaaluki, ilangi yuguliyaghqaaluki. Kiyaghneghem kayagtengngwaa ellminun ungipaghtenguluku, iwernga yulghutet ighsakelleqaat, 35enkaam tawaten pilleghmegteggun liitesleqiit aksaqngalghiit sumeghtaghalleteng. Enkaam elpek Mary, qivghum kagimlleqaak unguvasigken, katam tawaten savigpagem kaapellghatun.”
36Taawallunguq uuknaliqista aghnaq, aatgha Anna, Phanuel‑em paniga, Asher‑em ramkenganeng pi. Aghnalqwaaghuftuq, ugilgukaaftuq maaghragvinlek ayumiqulleq. 37Taagken ugingiitelleghmineng 84‑ngughtekangi ayumiqullghet. Awen tagiiqelghii Temple‑mun, aghneghuyaghngaan, unuguyaghngaan Kiyaghneq manigughaqegkanga, fast‑aaqlunillu yughaghaqlunillu. 38Tawani ataasimi aflumi, Anna‑m takuluki Kiyaghneq iqamsiqayugvikegkaa. Taghnughhaq akuzitkegkaa tamaghhiitnun utaqiilghiinun Messiah‑meng, ellnganun itemutesqelluku Jerusalem.
Uteghnilleq Nazareth‑mun
39Joseph‑enkuk Mary‑nkuk qamaglluki apeghiighyamegneki Atanghem Liilightuusiita pisqellghit, uteghniqak Nazareth‑mun, Galilee‑melngughmun. 40Taghnughhaq anglikaq, iknaqughtekaqlu, imighngaghmi peghqinelleghmeng; Kiyaghneghem kayusiqaallu quyastekaallu.
Mekelghiiq Jesus Temple‑mi
41Ayumiqulleq tamaghhaan angayuqakek Jerusalem‑etaqelghiit, neqenghaghqellghanun Passover‑em. 42Jesus‑em uksughtulanga qula maalghugughsan, piiqelleghmegetun neqenghaghqelleghmun pikak kelqelluku Jesus. 43Neqenghaghqelleq apeghiighyan uteghniqak, iwernga mekelghiiq Jesus unegtekaq Jerusalem‑emi. Angayuqagkenka nallukegkangak. 44Sumeghmegni igleghalgutegmegninniluku aghnelqusiq igleghtekak. Taagken ivaqaak ilakwaaghmegnillu ilakumtaaghmegnillu. 45Naalkenghisamegnegu Jerusalem‑emun ivaghyaghtuqaak. 46Pingayut aghneghet atughluki naalkegkaak uvitanganilluku Temple‑em, aqumluni apeghtughistet akulngitni, nagataqeftiillu aapqughaaghaqeftiillu. 47Qamaglluteng nagatullghiit ellnganeng saghiighayagutkaat liigikingallghanengllu kiimsightughillghanengllu. 48Angayuqagkenka esghaghluku saghiighayagutkaak. Naangan pikaa, “Ighnemni, esghaqaghqung, sangan whaten aneghsikung? Atagpeklu whangallu elngaatall ivanghiighutamken, repall pengꞌgiilluten.”
49Kiimsiqakek, “Sangan ivaghestegnenga? Nallukestegneguu Atama mangteghaanisaghqapestaaghulghiinga?” 50Iwernga liigikumangilkangak sameng tawaten pingutanga. 51Taagken maligllukek uteghniqaq Nazareth‑mun, qaatkutngakaalghiillu elkegkenun. Naangan tamaana qamaglluku umyugaghmikegkaa.
52Jesus anglitkelluku peghqinghughtekaq, efqughnaghtengnginaqaq Kiyaghneghmillu yugnillu.
Iliyochaguliwa sasa
:
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018, Wycliffe Bible Translators, Inc. All rights reserved.