Luke 1
1
1-2Angellemni Theophilus, Uglalghiim yugem igaquqaqiit tawaten pillghet akulemnni. Igaquqiit taakunguut ataasit nagaquqaput esghapakaneng tawaten pillghistun ima piinlillghitneng. Ellngitallu qepghaatkaqaat Kiyaghneq ungipaqelleghmegteggun ungipaq Christ‑ameng ayuqelghii. 3Nagatkaqanka apellghit, atightughwaaqaqankallu igaqullghit piinlillghitneng. Enkaam igaqughyuganka elpenun tawatetngwaaghluki pillghistun. 4Tawaten liisimakelleqaten ipangutangi tamaakut apeghtuutkat elpenun.
John‑em Paaptaayestem Allgellghan Apellgha
5Herod umiilkengnguluku Judea‑m, tamaanteftuq priest‑a, aatgha Zechariah. Qepghalgutkegkangi priest‑et atilqelghiit Abijah priest‑et. Nulighhan aatgha Elizabeth‑nguuq, Aaron‑em kingunghan priest‑em paniga. 6Kiyaghneghmun elqughutngalutek kiyaghtaaghek. Qaatkepigtekangik Atanghem qelghusiillu Liilightuusiillu, avutnginnalutek. 7Taawanginaq taghnughhiilnguuk, qayughllak Elizabeth qumingepagningilnguq, tawaveklu qamagllutek siivanlleghughtekak.
8Ataasimi aghneghmi, Zechariah, qepghaamalghii Temple‑mi, qayughllak Abijah priest‑et qepghalleghqaat kaallghii. 9Nangaghneghmeng pillghistun priest‑et ateghtiiraalleghqun nakmikegkaat Zechariah. Enkaam iteghluni Atanghem Temple‑nganun paneghreghaqaq incense‑meng. 10Tawani aflungani incense‑meng paneghreghallghem, qakma yulghuteghllaget yughaatet. 11Tawani Atanghem yaqulgan aliighvikegkaa nekevghaghmi aghenqigneghanilluni aghqefigan incense‑em. 12Zechariah upuqaq esghaghyamigu yaqulek, alingruughllakaqlu. 13Iwernga yaqulgem pikaa, “Alingegpenang Zechariah, yughaghten nagaqullengumaat. Nuliighpek Elizabeth‑em ighnengunnaqngwaaten, atighlleqan John‑meng. 14Enkaam quyaghllagllequten, uglamllu quyakelleqaat allgellgha, 15qayughllak ellnga qepghaghtekeghllaglleqaa Atanghem. Meghyaghqaanghituq wine‑meng, nalighmeng suumnalghiimeng aqimlemeng, imighngayaghqaaguqlu Agleghnalghiigneng Taghneghagneng talwa allgellghilluni. 16Israel‑eghmiilghutetlu uteghtesqughlleqii Ataneghmun Kiyaghneghitnun. 17Ellnga sivukluni qepghaghllequq, taagken Ataneq qepghaghllequq. Ellnga ataasigneng taghneghalgullequqlu aghtughyaghqaanghillelgullequqlu uuknaliqistetun Elijah‑tun. Atanun sumeghtaghaatkesagutesleqii avaqutiit, qaatkusigalnguutlu nallghusaghnaqngwii peghqinelleghmun Kiyaghneghem elqughutngallghanun. Enkaam yataaghqelleqii yuget Atanghem tagilleghqaanun.”
18Zechariah‑m pikaa yaqulek, “Naten liisimakelleqsikun apellghen? Nanevgaghllagumaanga, nulighqallu aghnalqwaalghii.”
19Yaqulgem pikaa, “Gabriel‑nguunga, nekevghalghii Kiyaghneghem nayuutngallghani. Elpenun kayagtaagunga, ungipaasaghtuugamken whaken pinilghiimeng ungipameng. 20Nagataghten, taawa akuzinanighnaquten kenlanga aapqanka elpenun apeghiightuutellghitnun, qayughllak ugpeqenghilketen akuzitenka, apeghiighyaghqat pilleghqiit kaaskata.”
21Yuget utaqiilghiit Zechariah‑meng sumeghtaghaqat sangami muluughllagutanga Temple‑mi. 22Aanyalghiimi aleghqughpagningitkii, enkaam liigikegkaat esghawaaghumaniluku Temple‑mi. 23Enkaam qepghalleni apeghiighyamigu neminun aglaqaq.
24Mulunghituq taakut aghneghet kingungitneng nulighha Elizabeth qumingegkaq, enkaam tallimat tanqit aananiqaq whaten pimaghmi, 25“Qenwatlu Atanghem nangllegyagutaanga, iqitaa kayngusaghaatelqa taghnughhangenghitellemneng.”
Jesus‑em Allgegnaqellghan Apellgha
26Aghvinliitangani tanqim Kiyaghneghem kayagtekaa yaqulek Gabriel Nazareth‑mun, Galilee‑melngughmun. 27Yugmun atuqesimangilngughmun aghnaghaghmun, aangꞌghutngwaaqamun Joseph‑mun, kingunghanun David‑em. Yugmun atuqesimangilnguum aghnaghaam aatgha Mary‑nguftuq. 28Yaqulgem takuluku pikaa, “Nekeggmelleq elpenilli! Atanghem nakmikumaaten aghnat akulngitneng.”
29Iwernga Mary‑m seghleliighutkeghllakaa nagalluku tawaten pillgha, sumeghtaghaatkegkaallu sangami tawaten quyakutni. 30Yaqulgem pikaa, “Alingegpenang Mary, qayughllak efqughnaghtuten Kiyaghneghmi. 31Nagataghten, taawa qumingnaqnguuten, ighnengellequten enkaam atighlleqan Jesus‑meng. 32Aangellequq, atighyaghqaaguqlu Ighnegha Kiyaghneghllagem; enkaam Atanghem Kiyaghneghem umiilgughtesleqaa sivunghatun David‑etun. 33Igleghutillequq Jacob‑em kingunghitneng Israel‑eghmiineng quunperugllak; Ataneghpagullghallu kenlengituq.”
34Mary‑m pikaa yaqulek, “Naten una piyaghqaawa yugmun atuqesigalnguunga?”
35Yaqulgem pikaa, “Agleghnalghiim Taghnegham takulleqaaten, enkaam Kiyaghneghem aghtughyaghqaanghillghan taghneghangullghiistun alkwaaghlleqaaten. Taana apalluqluku taghnughhaq agleghnaghllequq aatqesaghqaqaallu Kiyaghneghem Ighnegha. 36Nagataghten, ilakwaaghen Elizabeth, aghnalqwaaghllagluni qumingumaaq, ighnengnaqnguuq. Una whaa aghvinliitkaa tanqiq, piiqsaqangat avanginniluku, 37qayughllak Kiyaghneghmi sangwaa qamaglluni piyaqniituq.”
38Mary‑m pikaa, “Taawa whanga, Atanghem qepghaghtekaanga; legan tawaten pinaqnilleghpetun apeghiighhaaq.” Taagken yaqulgem unitkaa.
Mary Laalighlleghhii Elizabeth‑mun
39Mulunghituq Mary, yataaghqelluni taayughqemmeng aglaqaq neghllagmun, akulngitnilngughnun qemilghutngan Judea‑m. 40Mary kaalluni Zechariah‑nkunun iteghluni quyakegkaa Elizabeth. 41Legan Elizabeth‑em nagaqughaa Mary‑m quyakillgha, taghnughhaq qumiga qapragaghtekaq, Agleghnalghiimllu Taghnegham imiqaa Elizabeth, 42iglagtuluni pikaq, “Quyastekaaguten akulngitni aghnat, quyastekaaguqlu taghnughhaq ighniyaghqan! 43Quulvallengepestaaghtunga qayughllak Ataneghma naangan laalighfikegkanganga! 44Legan quyakillghen nagaqughaqa, taghnughhaq qama quyam qapragaghtuq. 45Quyanaghhalek Atanghem akuzitanga ugpeqegken apeghiighlleqniluku elpenun!”
Mary Ilagaatkun Usuqilghii
46Mary pikaq,
“Unguvasigma usuqaa Ataneq,
47taghneghagkallu quyaghllaguuk Kiyaghneghmi, Yugulighistemni,
48qayughllak ellngan esghaghlunga nakmikaanga,
ukalighpigaq qepghaghteni.
Whaken kenlekluku yugem kinguliighaam qamaglluni atighyaghqaqaanga quyastekaalunga,
49qayughllak Aghtughyaghqaanghiteghllagem Kiyaghneghem apeghiighuteghllagaanga. Aatgha agleghnaghtuq.
50Nangllekaqaa yuuk qamagtengngwaaghluku ellmineng talluqilghii, kinguliighaghneng tuunglighhiitnun.
51Iknaqepiglleghiikun aghtughyaghqaanghilleghmikun kayaalqaqii qukaayuglleghhiit sumeghtaghalleghmegteggun.
52Umiilegllaget ateghtaqii aqumutiitneng, enkaam quulvaghaqii ukalighpigaat.
53Iyatalghiit neqnilghiimeng kepsughtaqii, enkaam aklungilnguut aghulaqestaqii avangunaki.
54Kayusighaqii qepghaghteni Israel‑eghmiit, qayughllak nangllegtalghii,
55Abraham‑emunllu kingunghanunllu quunperugllak akeqelleghmitun sivuneput.”
56Mary‑m nayuqegkaa Elizabeth pingayut tanqit, taagken neminun aglaqaq.
Allgellgha John‑em Paaptaayestem
57Elizabeth‑em ighnilleghqaa kaalluni, ighnengegkaq. 58Uvilighneghitallu nalleqliitallu nagaqughluku Atanghem nangllekeghllallgha Elizabeth, quyakusaghtuqaat. 59Pingayuneng inglulek aghneq atughluku yuget tagilaghaatkat circumcise‑enaluku taghnughhaq, atighnaqsaghaatlu Zechariah‑meng, atangan aatghaneng. 60Iwernga naangan pikii, “Nakaa, aatgha John‑nguuq.”
61Yuget pikaat, “Nalighhiiniit nalleqlitek taagken aatghitut.” 62Taagken apaqumeng atanga aaptekaat kitumeng atighnaqutanga.
63Zechariah igaghyaghqameng tungsighluni, igaqegkaa, “Aatgha John‑nguuq.” Tawanlenguut qamaglluteng allaaghlluwhaghyukat. 64Tawaninginaq Zechariah akuziyaqlegughtekaq, usuqegkaallu Kiyaghneq. 65Qamaglluteng uvilighneghit tallughyukat. Judea‑mi ungipaq mingitkaat yugnun tamaani kiyaghlleghhiinun akulngitni qemit. 66Qamaglluteng nagaquutkat tawaten pilleghneng sumeghtaghaatkelluki pikat, “Taghnughhaq una sastengunaqngwaatuq anglikumi?” Qayughllak ipa nalluniitkaalghii Atanghem aghtughyaghqaanghillgha ellnganilnguq.
Zechariah‑m Uuknaliqellgha
67John‑em atanga Zechariah, Aleghnalghiim Taghnegham imighluku uuknaliqegkaq,
68“Yeqay usuqelteggu Ataneq Kiyaghnegha Israel‑em, qayughllak itemusaghtughii yuni.
69Yataaghqutiinkut Yugulighisteghllagmeng, qepghaghtemi David‑em kingunghaneng.
70Tawaten neghighluku akeqikaaguq agleghnalghiitgun uuknaliqistemikun,
71yuguliyaghqaaluta anguyamnneng, tamaghhiitnengllu ugumikistemnneng.
72Nagneghutkaqaa nangllegtalleni sivunemnnun, apeghiighlleqnilukullu agleghnalghii akequsani.
73Akequsangllaqaaguq sivunemnnun Abraham‑emun.
74Akeqiinkut yugulilleqniluta anguyamnneng, enkaam qepghaalleqaghput alingegpenaamta anguyamnneng,
75tuunꞌngwaaghluta ellnganun, qaatkullutallu piyukellghanun unguvalleghput qamagtiiluku.
76Enkaam elpek taghnughamni, atighyaghqaaguten uuknaliqistenga Aangepiglleghhiim Kiyaghneghllagem.
Kayaggnaqngwaaten sivutghulluku Ataneq yataaghqesqelluki yuget tugukliisqelluku tagikan.
77Ungipaalleqaten Kiyaghneghem yugi yugulilleghmeng seghevutillghakun seghleghqellghitneng,
78qayughllak Kiyaghneghput nangllegtaghllagtuq.
Kayaglleqaa Yugughlighista, ellnga siqinghem piitekestallghatun ayuqsaghqaaguq
79qilagmeng kukeggnaluki tamaakut kiyaghlleghhiit taghneghangutellghanilnguut tuqullghem,
maghyaghqughnaluta tuumnganun nekeggmellghem.”
80Taghnughhaq anglikaq, iknaqughtekaqlu taghneghamikun. Kilgaanitkaq kenlanga ungipaghyaghtulleghminun Israel‑eghmiinun.
Iliyochaguliwa sasa
Luke 1: ess
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018, Wycliffe Bible Translators, Inc. All rights reserved.
