SOQQAMAASINETE LOOSO 22
22
1«Annuwa'yanna roduuwa'ya, ku'leemmo'nere macciishshe"e!» yii. 2Ibiraawootu afiinni coyi'rita, wonawiinni roore sammi yitu. Phaawuloosino,
3«Ani Kiliqiyaho Xerseesi Katamira ilamoommo; ilama'yano Ayihudete. Lophoommohu kayinni kunni Yerusaalamete Katamiraati. Rosiisaanchi'yano Gamaaliyaaliiti. Annuwanke Seerano seekke rosoommo. Techo ki'nente gede Maganoho laalaate soqqameemmoho.#Soq 5:34-39 lai. 4Mootichu doogo hadhannore baala qarrise shaate hasi'reemmoho. Meyaa labbaaha amade usuru minira eesseemmoho. 5Kuni coyi halaale ikkinota qeesootu qarinna songo gudisante farcidhanno. Demaasiqote noo roduuwansa qorichishantanno gede amade Yerusaalame abbate borro adhoommohu insawiinniiti.#Soq 8:3; 26:9-11 lai.
PHAAWULOOSI KIRISTOOSIWA HIGINO GARA ODEESSI
(Soq 9:1-19; 26:12-18)
6«Ani Demaasiqo ha'ranni katama iilla rahummota, hedeweelcho barru taalootira lowo xawaabbi gordu iiminni mule'ya bilicci yii. 7Hakka woyite ani uulla uwe, ‹Saawuli, Saawuli, mayira xiiwattoe?› yitanno huuro macciishshummo. 8Anino, ‹Mooticha'ya, ati ayeti?› yee xa'mummo.
«Isi qole, ‹Xiiwattoehu ani Naaziretete Yesuusaati› yii. 9Ledo'ya noo manni xawaabballa afinona, ledo'ya hasaawanni noohu huuro dimacciishshino. 10Anino, ‹Mooticha'ya, ma asso?› yee xa'mummo.
«Mootichuno, ‹Gotti yite Demaasiqo ha'ri. Assattora hendoonnire baala hakkiicho kullannihena› yiie. 11Hakko bilicceessinni kainohunni ille la"a gibbeennae, ledo'ya noo manni massage Demaasiqo iillishie.
12«Hakkiicho Hanaaniya yinanni manchi no. Kuni manchi Demaasiqote heedhanno Ayihudooti ayirrissannoho. Seerano seekke agadhanno manchooti. 13Isi mule'ya daye uurre, ‹Rodoo'ya Saawuli, illekki galagalte fa'nito› yiie. Hakkawoyintenni ille'ya fa'nitu; isono laummo. 14Isi qole, ‹Annuwanke Magani isi hedinore afattora, Keeraancho Soqqamaanchosi afattoranna huurosi macciishshattora balaxe doorinohe. 15Hatto assinohuno, isire afoottorenna macciishshoottore mannu baalu albaanni farci'rattoha ikkatto gedeeti. 16Xa mayiraati keeshshattohu? Gotti yite su'masi gantanni cuuami; cubbokkino hayishshi'ri!› yiinoe.
PHAAWULOOSI DAGATE SONKOONNI
17«Hakkunni gedensaanni Yerusaalame hige Qullaawa Mine huucci'ranni hee're ajuuja afoommo. 18Mootichano, ‹Ati anere farci'ratto woyite macciishsha gibbannohe daafira, keeshshittokkinni rakke Yerusaalametenni fuli› yee coyi'ranna ille'yanni afoommo. 19Anino, ‹Mooticha'ya, xaadu minna ha'ranni ate ammantinore baala usursiisoommotanna ganoommota insa affino. 20Ate naqaashshe ikkinoha Isxifaanoosi kinnatenni ganne shini barra ani ledo noommo. Shituri uddanna agaroommohuno aneeti› yoommo. 21Mootichuno, ‹Ani xeertote noo dagawa soyemmohe daafira, kai ha'ri!› yiinoe» yii.
PHAAWULOOSI ROOMU QANSICHIMMA AFI'RINOTA EGENSIISI
22Tenne coyi're guda geeshsha hakko noori baalu sammi yite macciishshitu. Hakkunni gedensaanni qaalensa naggi assite, «Togoo manchi gobbate aaninni bao! Lubbotenni hee'ra dihasiissannoho» yite cancitu. 23Imaanansa hurguffanni buko iima qolte fincitanni cancitu. 24Olantote hajajaanchi, Phaawuloosi olantote qacha haadhe hadhanno gede hajaji. Mannu kageeshshi geeshsha isi aana mayira cancannoro afate, gannanni xa'minanni gede hajaji. 25Sunchunni wiqqi assite usurte gantara ka'uta, mulesi uurre nooha xibbuu olanto hajajaancho, «Ani Roomu qansicha ikke hee'reenna, assoommori nookkiha gana garaho?» yee xa'mi. 26Xibbuu olanto hajajaanchi, isira aliidihuwa mare, «Kuni manchi Roomu qansichaatina ma assiniro woyyate?» yii. 27Hakku olantote hajajaanchi Phaawuloosiwa shiqqi yee, «Koo mancho, ati Roomu qansichaati?» yee xa'mi. Phaawuloosino, «Ee hattoonti» yee qoli. 28Olantote hajajaanchino, «Ani tenne qansichimma afi'rate lowo woxe baaxxoommo» yii.
Phaawuloosi qole, «Ani isinni tenne qansichimma giddo ilamoommoho» yii.
29Kunnira, wona qortara qixxaabbe noori ka'a shiqqi yitu. Olantote hajajaanchino cagaagetenni usurrihu Phaawuloosi Roomu qansicha ikkinota huwati yannara waajji.
PHAAWULOOSI AYIHUDETE SONGO ALBIRA SHIQI
30Layinki soodo olantote hajajaanchi, Ayihude Phaawuloosi amaddinohu mayiraatiro afara hasi'ri. Qeesootu roorrootinna songo gudisante gamba yitanno gede hajaji. Phaawuloosino usurunni tire haa're insa albira massi.
Iliyochaguliwa sasa
SOQQAMAASINETE LOOSO 22: QulMax
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© The Bible Society of Ethiopia; Sidama Holy Bible BSE-UBS 262 P 2014
