SOQQAMAASINETE LOOSO 18
18
PHAAWULOOSI QORONTOOSI KATAMA HA'RI
1Hakkunni gedensaanni Phaawuloosi Ateenunni kae Qorontoosi Katama ha'ri. 2Hakkiicho Aqiila yinannihunni Phaanxoosi gobba Ayihudichinni xaadi. Aqiili galtesi Phirisqilla ledo Ixaaliyunni mulella daye no. Hakkiira dayinohu, Roomunnihu jawu moote Qelawudewoosi Ayihude Roomunni fultanno gede hajajinohuraati. Phaawuloosino insa ledo egennami. 3Isino insante gede dukkana gowannoha ikkinohura, ledonsa loosi'ri. 4Ayihudete Fooliishsho Barra baala xaadu mine Ayihudootunna Giriikootu ledo hasaawanni coye seekke kulinsa.
5Silaasinna Ximootewoosi Meqedooniyunni daggu woyite Phaawuloosi, «Yesuusi Kiristoosaati» yaanni isire Ayihudootaho farci'ranninna rosiisanni hosanno. 6Ikkollana, Ayihudootu gibbusitanna xontusita, uddanosi buko giggishshi're, «Xaate ani halaale gudoommo; kunni ka'a xa'mantinanniri ki'neeti. Ani xa daganniwa ha'reemmo» yiinsa. 7Hakkiinni kae, Magano magansi'rannohuwa mittu Tiito Iyosixoosi yinanni manchi minira ha'ri. 8Qerisiphoosi yinanni Ayihudichihu xaadu mini roorrichi minisi manni ledo Mooticha ammani. Phaawuloosi coyi'ranna macciishshihu Qorontoosi manni baalu ammane cuuami. 9Hashsha Mootichu Phaawuloosi ajuujatenni, «Waajjitooti; coyi'ri; sammino yitooti! 10Ani ledokki noommo daafira, gawajjannohehunna miicannohehu dihee'rannona waajjitooti. Anera kunni katami giddo lowo manni nooe» yiisi. 11Kunnira, Phaawuloosi Maganu qaale rosiisanni mitto dironna darate hakkiicho keeshshi.
12Galiyoosi Akayu gobbara shoomami yannara, Ayihudootu gamba yite Phaawuloosi huntara ma'lite ka'u. Yoote dargira haadhe massite, 13«Kuni manchi seeraho nookki doogonni mannu Magano magansi'ranno gede assanno» yitu. 14Phaawuloosi qolara hede hee'reennanni Galiyoosi Ayihudootaho, «Ki'ne Ayihude! Saonna jaddo iillitino'neha ikkoommero, coye'ne cince macciishsheemmo. 15Qaaleho, su'muwatenna seeri'ne daafira coyi'rama ki'ne hajaati. Ani kunni coyira mittoreno diyeemmo» yii. 16Hatto yee kae insa yoote darginni ha'risi. 17Hatte yannara xaadu mini roorricha Sostenisi songote albaanni gantu. Galiyoosi kayinni mittoreno yiikkinni sammi yee lai.
PHAAWULOOSI ANTSOOKIYA HIGI
18Phaawuloosi lowo barra roduuwu ledo Qorontoosi hee'rihu gedensaanni insa keerunni yee Sooriya ha'ri. Aqiilanna Phirisqilla ledosi no. Xano noosi daafira, Kinikiriya yinanniwa mare umo meexxi. 19Efesooni iillituta, Aqiilanna Phirisqilla hakko agure, xaadu minira e"e Ayihudootu ledo hasaawi. 20Insa lowo yanna ledonsa keeshshanno gede xa'mitinosi. Isi kayinni dihasi'rino. 21Ikkirono, «Maganu yiiro wole yannara galagale dayemmo» yee Efesooninni fule yowolote ofolle ha'ri. 22Qiisaariya iille, hakko noo ammanaasine keere haa're kae, galagale Antsookiya dirri. 23Hakkiicho marinowa shiima barra keeshshi. Hakkunni gedensaanni Galaatiyunna Firigiyu gobbara dargunni darga sa"anni ammanaasine jawaachishi.
APHILOOSI EFESOONI MAGANU QAALE KULI
24Mittu Alekisaanderiyaho ilaminohu Aphiloosi yinanni Ayihudichi Efesooni dayi. Isi qullaawa borro xunse afinoho; qoleno seekke coyi'ra egennino manchooti. 25Mootichu doogore buuxe egenninoho; lowo geeshsha laalaate Yesuusire seekke kulanni rosiisi. Ikkollana isi Yohaannisi cuuare calla egennino. 26Isi ruxxi yiikkinni xaadu minira e"e coyi'ri. Aqiilinna Phirisqilla isi coyi'rinore macciishshituhu gedensaanni, iso haadhe mininsara massite Maganu doogore isi afinohunni roorsite garunni kultusi. 27Aphiloosi Akaya ha'rara hasi'rita, roduuwuno hedosi baxxe hakkiichi roduuwi haadhannosi gede borro borreessitusi. Hakkiira iille Maganu eltonni ammanaasine ikkitinore lowo geeshsha kaa'linsa. 28Yesuusi, Kiristoosa ikkinota qullaawa borro giddonni fane kulanni, jawaatu hasaawinni Ayihude mannu albaanni gari.
Iliyochaguliwa sasa
SOQQAMAASINETE LOOSO 18: QulMax
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© The Bible Society of Ethiopia; Sidama Holy Bible BSE-UBS 262 P 2014
