SOQQAMAASINETE LOOSO 14
14
PHAAWULOOSINNA BARNABAASI IQOONIYAHO
1Phaawuloosinna Barnabaasi Iqooniyaho noohu Ayihudete xaadi minira e'u. Maganu qaaleno kulteenna, lowo Ayihudenna daga amma'nitu. 2Ammantinokki Ayihude kayinni daga kunni roduuwi aana kayisse gibbo kalaqqu. 3Phaawuloosinna Barnabaasi mittoreno bashshi assitukkinni Mootichunnire kultanni hakko lowo barra keeshshitu. Mootichuno angansa dhaggenna maalale loosantanno gede asse eltonnihu qaalisi halaalaancho ikkinota leellishi.
4Katamu giddo noo mannino lamewa garo baxxe, gamu Ayihudootu widira gamu qole soqqamaasinete widira higi. 5Daganna Ayihude gashshaanonsa ledo Phaawuloosinna Barnabaasi shetissaranna kinnatenni awwaaltara hasidhu. 6Phaawuloosinna Barnabaasi tenne gano macciishshite, Lisxiranna Derbe yinanniwa Liqooniyu Katamanna qooxeessisira noo gobba fulte ba'u. 7Hakkiichono Dancha Duduwo kultu.
PHAAWULOOSINNA BARNABAASI LISXIRAHONNA DERBE
8Lisxiraho mittichu lekka naafichu manchi no. Ilami waronni naaficha ikkino daafira, lekkatenni ha're diegennino. 9Kuni manchi Phaawuloosi coyi'rannore ofolle macciishshanni no. Phaawuloosino mancho xunse lae, hursitanno geeshshi amma'na noosita afe, 10«Koo mancho, gotti yite uurri!» yee jawaatu qaalinni coyi'ri. Manchuno kubbe kae lekkasinni ha'ri. 11Hakko songino manni Phaawuloosi assi dhagge lae, lowo qaalinni, «Maganna manna labbe ninkewa dirritino» yee Liqooniyu afiinni coyi'ri. 12Barnabaasira su'ma, «Diya» yite fushshitu. Coyeho umo ikkinohu Phaawuloosi ikkinohura isira su'ma, «Hermesi» yite fushshitu. 13Katamaho gobbaanni noohu Diya Galmi qeesichi boottanna daraaro haa're katamu waalcho abbe, manna sumuu yaanno gede assi're Phaawuloosiranna Barnabaasira kakkalara hasi'ri.
14Phaawuloosinna Barnabaasi kayinni konne coye macciishshituhu gedensaanni dadillite uddanonsa dartu. Raartanni mannu widira higge doddanni marte, 15«Manna, togo mayira assitinanni? Ninkeno ki'ne gedee mannaati. Ninke ki'ne kunni kaphu coyiwiinni faffine gordonna baatto, baaranna kuri giddo noore baala kalaqinohuwa Heeshshote Maganiwa higginara Hagiirru Duduwo kullammo'nera dangoommo» yitu. 16Leddeno, «Albi yannara Maganu mannu baalu hasi'ri doogo ha'rara facci asse agurino. 17Ikkollana shaqqado Magano ikkasi leellishannoha dancha looso loosa diagurino. Gordunni xeena soyanno'ne; gideno yannatenni aanno'ne; sagaletenninna hagiirrunni wodana kassi assanno'ne» yitu. 18Tenne kulte heedheennanni mannu qarriseennansa, kakkaltannonsakki gede hooltinohu lowo daafurinniiti.
19Ayihudootu kayinni Antsookiyunninna Iqooniyunni ka'e dagge manna kakkayisse, Phaawuloosi kinnatenni awwaallanni gede assitu; reyinoha laweennansa goshooshshe katamaho gobbaanni fushshitu. 20Rosaano dagge doyissite mulesi uurrituta, Phaawuloosi gotti yee kae katama ei. Layinki barra Barnabaasi ledo Derbe Katama ha'ri.
PHAAWULOOSINNA BARNABAASI SOORIYU ANTSOOKIYA HIGGU
21Phaawuloosinna Barnabaasi Derbe marte Dancha Duduwo kulteenna lowo manni ammani. Hakkunni gedensaanni Lisxirunna Iqooniyu widoonni higge Phisidiya yinanniwa Antsookiya martu. 22Martuwa baala ammanaano seejjitanninna jawaachishshanni, «Maganu gashshoote eate lowo qarra adha hasiissannonke» yitanni rosiissunsa. 23Beetekiristaannateno cimeeyye wortunsa. Ita aga agurte Magano huuccituhu gedensaanni, amma'nitino Mootichira eeggo uyitu. 24Phisidiyu widoonni higge Phinfiiliya yinanniwa martu. 25Pherge yinanniwa Maganu qaale kultuhu gedensaanni Axaaliyu gobba dirritu. 26Hakkiinni yowolote ofolte Sooriyu gobba Antsookiya higgu. Hakkiichino loossino loosira Maganoho eeggo uyitino dargaati. 27Martinowa ammanaano gamba assite, Maganu insa widoonni qole loosino loosonna dagate ammanate doogo asse faninonsa gara kultu. 28Hakkiicho noo ammanaano ledono lowo yanna keeshshitu.
Iliyochaguliwa sasa
SOQQAMAASINETE LOOSO 14: QulMax
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© The Bible Society of Ethiopia; Sidama Holy Bible BSE-UBS 262 P 2014
