SOQQAMAASINETE LOOSO 11

PHEEXIROOSI DAGANNIWA MAYIRA HA'RINORO KULINSA

1Yihudu gobbara heedhanno soqqamaasinenna roduuwu, daga Maganu qaale adhitinota macciishshitu. 2Pheexiroosi galagale Yerusaalame ha'ri yannara barcintino ammanaano bushiishshannisi, 3«Barcimtinokkiri minira e'e insa ledo sagale mayira ititto?» yitu. 4Kunnira, Pheexiroosi ikkino coye baala gudise kulanninsa,

5«Ani Iyophe katamira huuccatto assi'ranni hee'reenna ajuuja leeltinoe. Ajuujatenni, mittu hala'ladu hocci shoole maddenni iiminni dirre anewa daanna afoommo. 6Isi widira qole buuxe laeemmo woyite, hoccu aana addi addi saada, godowunni ha'ranno kalaqaminna iima buubbanno cea no. 7Hakkawoyite, ‹Pheexiroosi, ka'e gorrite iti!› yitanno huuro macciishshoommo.

8«Ani kayinni, ‹Mooticha'ya! Di"ikkanno! Ani lagonnire woy batte ikkinore ite diegennoommo› yoommo. 9Layinkimeeshshono gordunni, ‹Maganu faansinoha ati battete yitooti› yitanno huuro macciishshoommo. 10Kuni coyi sase hige dayihu gedensaanni baalunkuri galagale gordo hige ha'rino. 11Hakkawoyintenni Qiisaariyunni anewa sonkoonniri sasu manni ani noommo minira ka'e daggu. 12Mittoreno moromummokkinni ledonsa ha'reemmo gede Qullaawu Ayyaani kulinoe. Kuri leyunku roduuwino ledo'ya no. Insa ledo Qornelewoosi yinanni manchi minira marre e'noommo. 13Isino Maganu sokkaasinchi minesi uurre nooha afinotanna, ‹Iyophe noohuwa Pheexiroosi yinanni Simiooniwa manna soqqi. 14Isi atinna minikki manni baalu gattinanni qaale kulannohe› yiinosita kulinonke.

15«Ani coyi'ra hanafummota, Qullaawu Ayyaani alba ninke aana dirrinte gede insa aanano dirrino. 16Hatte yannara, ‹Yohaannisi wayinni cuuino; ki'ne kayinni Qullaawu Ayyaaninni cuuantinanni› yee Mootichu coyi'rino qaali qulli yiie. 17Ninke Mooticha Yesuusa Kiristoosa amma'ninummo waro Maganu ninkera uyinke elto insara uyiro, Magano hoolate anera wolqa nooeni?» yiinsa.

18Insa konne coye macciishshitu yannara qoltannore hoogge Magano galattanni, «Xa Maganu dagate nafa aagintaabbe heeshsho afidhanno kaayyo uyinonsa» yitu.

ANTSOOKIYU BEETEKIRISTAANE

19Isxifaanoosi kinchunni ganne shini yannara kalaqamino qarrinni billaallitino ammanaano Foniqenna Qophiroosi, hattonni Antsookiyu geeshsha hadhu. Maganu qaaleno Yihudu mannira calla ikkinnina woleho dikultino. 20Ikkollana Qophiroosinna Qereenunni dagginori mite mite ammanaano Antsookiya daggu yannara, Giriikete manni nafa gatikkinni Mootichu Yesuusiha Dancha Duduwo dudubbino. 21Mootichu wolqasinni kaa'lanni noonsa daafira, lowo mannino amma'ne Mootichunniwa higi.

22Yerusaalamete noo Beetekiristaane ammanaano konne coye macciishshite Barinabaasi Antsookiya sokku. 23Isino mare Maganu mannaho uyino elto lae, lowo geeshsha hagiidhi. Baalunku wo'mu wodaninni kaajjite Mootichaho ammanante heedhanno gede kulinsa. 24Isi Qullaawu Ayyaaninna amma'na wo'mitinosiha dancha mancho ikkino daafira, lowo manni amma'ne Mootichunniwa higi. 25Hakkunni gedensaanni Barnabaasi Saawulinni xaadara Xerseesi ha'ri. 26Afisihu gedensaanni haa're Antsookiya abbi. Lamunku mitto diro wo'ma hakkiicho heedhanno ammanaano ledo mitteenni gamba yite lowo manna rosiissu. Ammanaano umo assine, «Kiristaana» yine woshshinoonnihu Antsookiyahooti.

27Hatte yannara mite mite himanaano, Yerusaalametenni Antsookiya hadhu. 28Insa giddonni mittu Agaboosi yinanni manchi Qullaawu Ayyaaninni gobbate aana wolqaataame hude ubbanno yaanni kae, gobba baalate coyi'ri. (Kuni ikkinohu Roomu Moote Qelawudewoosi yannaraati.) 29Kunnira Antsookiyaho heedhanno ammanaano Yihudaho heedhanno roduuwira noonsa wolqanni woxe fushshite sokkanno gede assitu. 30Woxe fushshite Barnabaasinna Saawuli anga worte beetekiristaanete cimeeyyera sokku.

Iliyochaguliwa sasa

SOQQAMAASINETE LOOSO 11: QulMax

Kuonyesha

Shirikisha

Nakili