UMI QORONTOOSI 12
12
QULLAAWU AYYAANI AANNO AFANSHA
1Roduuwa'ya, xa Qullaawu Ayyaani afanshi daafira baddine affinara hasi'reemmo. 2Ammantinoonnikki waro, batinyu garinni coyi'ra dandiitannokki maganna hoode hadhinoonnita egentinoonni. 3Maganu Ayyaaninni coyi'ranni Yesuusa rumannohu dino. Qullaawu Ayyaaninni ikka hoogiro, «Yesuusi Mootichaho» yaannohu mittuno nookkita affinara kuleemmo'ne.
4Addi addihu Qullaawu Ayyaani afanshi no. Qullaawu Ayyaani kayinni mittoho. 5Addi addi soqqansho no; soqqammanni Mootichi kayinni mittoho. 6Soqqammanni gari babbaxxinoho; baalanka looso wo'munku manni giddo loosanno Magani kayinni mittoho.
7Mittu mittunkura Qullaawu Ayyaani xawishsha uyinannihu wo'munku qiniitiraati. 8Qullaawu Ayyaani mitoho coye coyi'rate hayyo aanno. Hakko Ayyaaninni, mitoho egenno giddo afidhino sokka aanno. 9Hakko Ayyaaninni mitoho ammana, mitoho hursate wolqa, 10mitoho maalale loosate wolqa, woleho qole himana, woleho ayyaanna bade afate egenno, mitoho haaru afiinni coyi'rate dandaa, woleho addi addi afiinni coyi'noonni coye tire kulate dandaa aanno. 11Konne baala assannohu hakku mittu Ayyaani, mittu mittunkura afansha hedino garinni aanno.
MITTU MANNINATI ADDI ADDI BISO AFI'RINO
12Mittu manninati batinye biso afi'rino. Kuni baalu bisi, mittu manninati aana no. Kiristoosino hattooti. 13Ninke Ayihudeno dagano, borojje woy gobbate ayiddeno ikkino, mitto biso ikkinammora Qullaawu Ayyaaninni cuuammoommo. Ninke baalunku mitto Ayyaana angoommo.
14Mannimma addi addi bisinni ikkinnina, mittu bisi callunni dikalaqantino. 15Lekka, «Ani anga ikka hoogoommahura, manninatu biso di"ikkoomma» yituro, biso ikkase gattannoni? 16Maccano, «Ani ille ikka hoogoommahura, manninatu biso di"ikkoomma» yituro, biso ikkase gattannoni? 17Manninatu gudisame ille calla ikkoommero, mayinni macciishshinanni? Manninatu baalu macca calla ikkoommero, mayinni ulantanni? 18Maganu kayinni mitto mittonka biso manninatu giddo hasiisanno darga amade hee'ranno gede assino. 19Baalunku mitto biso calla ikkoommero, manninatu hiikko hee'ranno? 20Bisu batinye ikkirono, manninatu kayinni mittoho.
21Ille anga, «Ani ate dihasi'reemma» yite diaffanno. Umu lekka, «Ani ate dihasi'reemmo» yee diafanno. 22Mullare lawanno bisi baalu, wolunni roore hasiisanno. 23Minshoonni bisira, wolunni roore ayirrinye uyineemmo. La"ate saallanni biso, wolunni roore ayirrinse diphineemmo. 24Ayirrado lawe leellanno bisira kayinni kuri duuchu dihasiisanno. Maganu kayinni biso mimmitu ledo sufe, minshoonnirira roore ayirrinye uyino. 25Hatto assinohu, manninatu mereero babbadooshshu hee'rikkinni, ku'u bisi ko'onne mararanno gede hedeeti. 26Manninatu giddonni mittu bisi dhiwamiro, wolu bisi gudisame dhiwamanno. Mittu bisi ayirrinye afi'riro, wolu bisi qole hattennenni hagiidhanno.
27Ki'neno Kiristoosi manninateeti; mitti mitti'ne manninatisi bisooti. 28Kunnira, Maganu balaxe beetekiristaanete mito mito soqqamaasine, layinkita himanaano, sayikkita rosiisaano asse worino. Hakkiinni aanche, maalale loossannore, hursate wolqa afidhinore, manna kaa'litannore, gashshaanonna haaru afiinni coyidhannore worino. 29Ikkollana, baalunku soqqamaasine ikkitannoni? Baalunku himanaano ikkitannoni? Baalunku rosiisaano ikkitannoni? Baalunku maalale loossannoni? 30Baalunku dhiwantinore hursate wolqa afidhannoni? Baalunku haaru afiinni coyidhannoni? Baalunku qolte haaru afiinni coyi'noonniha tirtannoni? 31Baalanka roorino afansha afi'rate halche.
Wo'manka roortino doogono leellisheemmo'ne.
Iliyochaguliwa sasa
UMI QORONTOOSI 12: QulMax
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© The Bible Society of Ethiopia; Sidama Holy Bible BSE-UBS 262 P 2014