यहुन्ना 10

गवाळ अन वींका गारा की केणी

1पछे ईसू ओरी क्यो, “मूँ थाकाँऊँ हाँची केऊँ हूँ, ज्यो गारा का बाड़ा का बारणाऊँ ने पण बाड़ा की कोट कूदन में जावे हे, वीं चोर-डाकू हे। 2पण ज्यो बाड़ा में बारणाऊँ आवे हे, वो गारा को गवाळ हे। 3वाँका वाते चोकीदार बारणो खोल देवे हे, अन गारा वाँकी बोली ने ओळके हे। वो आपणाँ गारा ने नामऊँ बलावे हे अन बारणे ले जावे हे। 4जद्याँ वो आपणाँ गारा ने बारणे काड़ नाके, तो वीं गारा वींका पाछे-पाछे चाले हे, काँके वीं गारा वींकी बोली ओलके हे। 5पण गारा कणी पराया का पाच्छे ने जावे हे, पण वीं तो वाँकाऊँ दरपे, काँके वीं पराया की बोलीने ने ओळके हे।”

6ईसू वाँकाणी या केणी क्यो, पण वीं हमज ने सक्या के, वीं वाकाँऊँ कई केरिया हे।

ईसू हव गवाळ हे

7जद्याँ ईसू वाँने क्यो, “मूँ थाँकाऊँ सई-सई केवूँ हूँ, गारा का वाते बारणो मूँ हूँ। 8जतरा माराऊँ पेल्याँ आया वीं हाराई चोर अन डाकू हा, पण गारा वाँकी बातने ने मानी। 9बारणो मूँ हूँ, यद्याँ कुई मारी हुणन परवेस करे हे, तो वो बंचायो जाई। अन मयने आया जाया केरी अन वटे धपायो जाई। 10चोर कणी दूजाँ काम के वाते ने, पण बेस चोरी करबा, मारबा अन नास करबा ने आवे हे। पण मूँ ईं वाते आयो के, थाँ भरपूर जीवन पा सको।

11“मूँ हव गवाळ हूँ। हव गवाळ आपणाँ गारा का वाते आपणो जीव भी दे देवे हे। 12पण दानकी पे गारा ने चराबावाळो ने तो हव गवाळ्यो वेवे हे अन ने गारा को मालिक वेवे हे। ईं वाते जद्याँ बरगड़ा ने आतो देके, तो गारा ने हुन्ना छोड़न भाग जावे हे अन बरगड़ो वाँने पकड़बा का वाते जपटा मारन वाँने बखेर देवे हे। 13दानकी पे आयो तको गवाळ्यो ईं वाते भाग जावे हे, काँके वो दानकी पे काम करे हे अन वो गारा की परवा कोयने करे हे। 14#मत्ती 11:27; लूका 10:22हव गवाळ मूँ हूँ, मूँ मारा गारा ने ओळकूँ हूँ अन मारा गारा मने ओळके हे। 15जस्यान बापू परमेसर मने ओळके हे अन मूँ बापू परमेसर ने ओळकूँ हूँ। अन मूँ गारा के वाते आपणो जीव देवूँ हूँ। 16मारे ओर भी गारा हे, ज्यो ईं बाड़ा में ने हे। मने वाँने भी लाणा घणा जरूरी हे। वीं मारी बोली ओळकी, तद्याँ एकीस रेवड़ वेई अन एकीस गवाळ्यो वेई।

17“बापू परमेसर माराऊँ ईं वाते परेम करे हे, काँके मूँ मारी मरजीऊँ मारो जीव देबा का वाते त्यार रेवूँ हूँ, ताँके मने मारो जीवन पाछो मल सके। 18कुई भी माराऊँ मारो जीवन ने ले सके, पण मूँ खुदई दी देऊँ हूँ। मने ईंने देबा को हक हे अन पाछो लेबा को भी हक हे। परमेसर मने अस्यान करबा का वाते आग्या दिदी हे।”

19अणा बाताँ केड़े पाच्छी यहूदी लोग-बागाँ में एक दाण ओरी फुट पड़गी। 20वणा मूँ घणा बोलबा लागा, “वींमें हुगली आत्मा हे, अन वो बेण्डो वेग्यो हे, वींकी काँ हुणो हो?”

21दूजाँ लोग-बागाँ क्यो, “ईं बाताँ अस्या मनक की ने हे जिंमें हुगली आत्मा वे। हाँची में कुई हुगली आत्मा आंदा की आक्याँ ने खोल सके हे?”

यहूदी मनकाँ को ईसू ने नकारणो

22वीं दाण हियाळो को टेम हो अन यरूसलेम में मन्दर की थापणा को तेवार मनायो जारियो हो। 23ईसू मन्दर में सुलेमान का बणाया तका बरामदा में गुमरिया हा। 24तद्याँ यहूदी लोगाँ वाँके च्यारूँमेर ऊबा वेन अन वाँकाऊँ क्यो, “थूँ कटा तईं माँने भेंम में राकी? यद्याँ थूँ मसी हे तो माने सई-सई बता दे।”

25ईसू वाँने क्यो, “में थाँने के दिदो, पण थाँ विस्वास ने करो हो। ज्यो काम मूँ मारा बापू परमेसर का नामऊँ करूँ हूँ, वीं हाराई मारा गवा हे। 26पण थाँ विस्वास ने करो हो, काँके थाँ मारा गारा मेंऊँ ने हो। 27मारा गारा मारी बोली हुणे हे। मूँ वाँने ओळकूँ हूँ, अन वीं हाराई मारा पाछे-पाछे चाले हे। 28अन मूँ वाँने अनंत जीवन दूँ हूँ। वाँको कदी भी नास ने वेई अन ने कुई वाँने मारा हाताऊँ कोस सकी। 29मारा परमेसर, जणी वाँने मने हुप्याँ हे, वो हाराऊँ मोटो हे अन कुई वाँने परमेसर का हाताऊँ कोस ने सकी। 30मूँ अन मारा बापू परमेसर एकीस हाँ।”

31तद्याँ यहूदी अदिकारियाँ ईसू के भाटा मारबा के वाते पाच्छा भाटा तोक लिदा। 32ईंपे ईसू वाँने क्यो, “में थाँका बचमें घणा हव काम किदा ज्याँने परमेसर मने करबा का वाते दिदा हा। वाँका मेंऊँ कणी काम का वाते थाँ मारा ऊपरे भाटा मारबा का वाते तोक्या हे?”

33वणा वाँने क्यो, “हव कामाँ का वाते माँ थाँरे भाटा ने ठोका, पण परमेसर की नन्दयाँ करबा का वाते ठोका हा। अन ईं बात का वाते के, थूँ मनक वेन आपणाँ खुद ने परमेसर को दरज्यो देवे हे।”

34 # भज 82:6 ईसू वाँने जवाब दिदो, “कई थाँका सास्तरा में ने लिक्यो हे के परमेसर क्यो, ‘थाँ हाराई परमेसर का जस्यान हो’? 35परमेसर वणा मनकाँ ने परमेसर का जस्या क्यो हे ज्याँने परमेसर को बचन दिदो ग्यो। अन आपाँ जाणा हाँ के, पवितर सास्तर की बाताँ कदी जूट ने वे सके हे। 36तो जद्याँ में क्यो के, मूँ परमेसर को बेटो हूँ। तो थाँ क्यो, ‘मूँ परमेसर की नन्दयाँ करूँ हूँ।’ पण मूँ तो वोईस हूँ, जिंने परमेसर चुणन ईं दनियाँ में खन्दायो हे। 37यद्याँ मूँ आपणाँ परमेसर का काम ज्याँने वीं छावे हे, ने करूँ, तो थाँ मारो विस्वास मती करो। 38पण यद्याँ मूँ वाँने करूँ हूँ, तो भी थाँ मारो विस्वास ने करो हो, पण थाँ वणा कामाँ को तो विस्वास करो, जणीऊँ थाँ जाण जावो अन हमजो के, बापू परमेसर मारा में हे अन मूँ बापू परमेसर में हूँ।”

39ईंपे वणा यहूदी मनकाँ एक दाण ओरी ईसू ने पकड़बा की कोसीस किदी, पण वो वाँका हाताऊँ बंचन निकळग्यो।

40 # यहु 1:28 पछे ईसू यरदन नंदी का पेले पाल्ड़े वीं जगाँ में परोग्यो, जटे यहुन्नो पेल्या बतिस्मो देतो हो अन ईसू वटेईस रियो। 41नरई लोग-बागाँ वाँके नके आता अन केता हा, “यहुन्ने कई परच्यो ने बताया, पण ज्यो कई यहुन्नो ईं मनक का बारा में केतो हो, वो हारोई हाँचो हो।” 42अन वटे नरई लोग-बाग ईसू पे विस्वास किदो।

Iliyochaguliwa sasa

यहुन्ना 10: एम टी आर

Kuonyesha

Shirikisha

Nakili