Acts 4

Sa Nanumaḻyaanda Ḵan Da Peter Ḵan John

1Sissiya ḵade an-uguugud da Peter ḵan John atta tagu, dummatong da papadi, da Sadducee#4:1 Da Sadducee dida da grupu we ḵaaduwan da padi ye ampangat atte templo. Sa ḵasomsomḵanda'tta long-agda nangatngatuda nu da udume tagu ya da udume padi. Da patiyonda ḵan ḵoḵoḵḵonda nisabali'tta Pharisee. Amo ummanda pas-oman gubilnun da iRome ta naippun sumullagi'tta iRome ya da Judyu. ya sa kapitan da guwaḻda'tte templo. 2Summangada te intuttudun da Peter ḵan John we ummuli'ḵ Jesus ya iwwaḻagawagdae umuli da losane natoy. 3Gapu'tte sadi, dinoḵmaanda dida woḵ inniyoyda dida si babaḻḻudan te annae lumabi ta asida dida sumaḻyaon appigat. 4Yaḵon adu da nandodongngoḻ atte inugudda woḵ namatida. Sa belang da laḻaḵi umoye limallibu.

5Mabigat ḵad, nadagup da papangat, da pallakayon da Judyu ya da mimistulun ni lintog#4:5 Da mimistulun ni lintog, nibelangda bos atta amo mapatgane tagu'tta susunuddae iyIsrael te iniiggammuda lintog Moses. Naadaḻanda, ḵad dida angituttudu'tte Ugud Apudyus ya da aduadu we ugalin da danaḵḵoḻda mipanggob atta imbilin Apudyus we ḵoonda ḵan adida ḵoon. ad Jerusalem, 6nidoga'ḵ Annas we ḵangatuwane padi ya aḵ Caiaphas, John, Alexander ya da udume agin ni ḵangatuwane padi. 7Pun da Peter ḵan John pinataḵdogda dida si sinagungda woḵ ḵanandae nanumaḻya ḵan dida, “Dinu naḻpuwan ni ḵabooḻanyu ya ngai singngadan atte inusaryu we nangwa si anna?”

8Pun naittan aḵ Peter atte ḵabooḻan ni Ispiritu Santu woḵ ḵanana, “Diḵayu we papangat ya pallakayon, 9nu sumaḻyaonyu diḵani sinsadi mipanggob si ambaḻu we ḵingwani'tte annae napilay ya sa inonae naḵataddaḻan, 10dongngonyu ta ipaigammuḵ ḵan diḵayu ya da losane ganaḵ Israel. Sa annae tataḵdog si sinagungyu, nanaddaḻan gapu'tte ḵabooḻan Jesu Kristu we iNazareth. Siya sadi ye impattoḻyu'tte kros yaḵon tinagun Apudyus ḵasin.

11“ ‘Sa annae Jesus siya batu

we indiyanyu we nantaḵad aḵ boḻoy,

siya nambalinon Apudyus aḵ ḵapatogane batu

we amapagdot si boḻoy.’#4:11 Psalm 118:22.

12Abus aḵ Jesus aḵ Anagu ḵan ditaḵu. Te naippun udum aḵ ngadan si intero we lubung aḵ innatod Apudyus atta tagu'ḵ maḵwae anagu ḵan ditaḵu.”

13Innilan ḵad da ḵuḵunsisaḻ tuḻod da Peter ḵan John nataagda te igammudae nababa ḵasasaaddae tagu we adidapun naadaḻan. Pun immatunandae nibuḻubuḻunda ḵan Jesus. 14Yaḵon naippun maibagada te annae iillandae sisiḵad sadi ye laḻaḵi ye naḵaan pilayna si daḻnig da apostol. 15Pun pinaḻawada dida ta umabusdae ḵuḵunsisaḻ#4:15 Sa de Greek, da ḵuḵunsisaḻ ngannonda Sanhedrin. Sana isun ni korti ye andaḵdaḵngan da papangat da papadi, da papangat da Judyu ya da mimistulun ni lintog ta dida anḵuwis. aḵ an-uugud. 16Ḵananda, “Ngai ḵoon taḵu'tta annae tagu? Te igammun da losane tagu'd Jerusalem da nakaskasdaawe sinyale ḵingwada ḵad adipun maḵwae isilib taḵu. 17Yaḵon sa ḵoon taḵu ta adida ogon iyasaḵ atta tagu, ḵoḻḵogon taḵu dida ta adida pagapagatupane angug-uggud atta tagu si mipanggob si ngadan Jesus.”

18Pun inayaganda bos da Peter ḵan John woḵ binilinda dida ta adida ogon an-ugud baḵon nu antuttudu'tta ngaimane tagu we usaronda ngadan Jesus.

19Yaḵon ḵanan da Peter ḵan John we summongbat, “Ḵuwisonyu we mismu da long-agyu nu ustu si antotollong Apudyus we diḵayu tuttuwaonni baḵon nu aḵ Apudyus. 20Te diḵani ḵad, adipun maḵwae iginoḵni ye angibagabaga'tta innilani ya da dingngoḻni.”

21Nagangput ḵade ḵinoḻḵog da ḵuḵunsisaḻ dida, pinaoyonda dida te adidapun maḵaḵasḵasmoḵ nu ngai inondae anusa ḵan dida te adu da tagu we nandaydayaw ḵan Apudyus gapu'tte nakaskasdaawe naḵwa. 22Sa sadi ye tagu we naḵaan pilayna lummabose opatpuḻu tawonna.

Sa Luwaḻun Da Namati Ḵan Jesus

23Napuḵayan ḵad da Peter ḵan John, ummoyda'tta buḻundae namati woḵ imbagada ḵan dida da losane imbagan da papangat da papadi ya da pallakayon da Judyu. 24Dingngoḻ ḵad da buḻundae namati, nan-os-ossaandae nangidangsoḻe nalluwaḻu ḵan Apudyus, ḵananda, “Maḵabooḻe Apu we nangwa si langit, luta ḵan baybay ya da losane awad ḵan dida. 25Mipagapu si Ispiritu Santu, nan-ugudḵa mipagapu si daḵdaḵoḻ taḵu we aḵ Ari David we sammilume ḵanana,

“ ‘Ngaipa da Gentil ansasanga ḵan Apudyus?

Ḵad ngaipa da tagu ansomsomoḵ atta ippun anuda?

26Nansagana da ari si annae lutae maḵagubat

ya nandatdatong da papangate bumusuḻ

ḵan Apu ya sa Kristu we dinutuḵana.’#4:25-26 Psalm 2:1-2.

27Sadi imbagan Ari David te da Herod ḵan Pontius Pilate ya da Gentil ya da ganaḵ Israel nadagupda'd Jerusalem ta antutuḻagdae gongatonda'ḵ Jesus we nasantuwane sammilume dinutuḵam. 28Ḵad ḵingwada da ngaimane simsimmoḵnu si awe mipagapu'tte ḵabooḻam ḵan piome maḵwa. 29Sinsadi Apu, dongngom da sanae iḵoḻḵogda ḵan diḵani ye sammilum. Ittam ud diḵani'ḵ tuḻode angibagabaga si ugudnu. 30Ipailam ḵabooḻame angaan atta saḵit ya angwa'tta nakaskasdaaw mipagapu'tte ḵabooḻan Jesus we nasantuwane sammilum.”

31Nalluwaḻuda ḵad, nayyugayug boḻoye nadagupanda. Pun ummoy ḵabooḻan ni Ispiritu Santu ḵan dida woḵ tummuḻoddae nangiwaḻagawag si Ugud Apudyus.

Sa Nan-asibadangan Da Namati

32Losan atta namati nan-os-ossaan ḵasomsomḵanda. Adidapun ibelange ḵuwada da ḵuḵuwada yaḵon siya ḵoonda nan-aḵ-atodda. 33Gapu si amode ḵabooḻane naatod atta apostol, tinaḵdoḻandae ummuli'ḵ Apu Jesus. Ḵad amod de ḵinabaḻun Apudyus we naatod ḵan dida. 34Naippun maaminan ḵan dida te da awad da lutada baḵon nu boḻoyda, nan-inginada ya innatodda da nginada'tta 35apostol ta asida ḵigade angiwaḻas atta udume namati sigun si ḵasapuḻan ni sin-ossaossa.

36Inggaw aḵ Joseph we osae ganaḵ Levi we iCyprus we nginadanan da apostol aḵ Barnabas sa piona ḵanan Sumoḻgag. 37Ingnginana lutana woḵ innatodna nginana'tta apostol.

Iliyochaguliwa sasa

Acts 4: kml

Kuonyesha

Shirikisha

Nakili