1 ಕೊರಿಂಥ್ಯೆರೆಗ್ 2
2
ಕ್ರಿಸ್ತನ ಮರಣದ ವಿಷಯ
1ಸಹೋದ್ರೆರೇ, ಯಾನ್ ನಿಕ್ಲೆನಡೆ ಬತ್ತ್‌ದುಪ್ಪುನಗ ದೇವೆರೆ ಸಾಕ್ಷಿನ್ ನಿಕ್ಲೆಗ್ ಮಲ್ಲ ಪಾತೆರೊಡಾವಡ್ ಮಲ್ಲ ಬುದ್ಧಿಡಾವಡ್ ಸಾರಿಯೊಂದು ಬೈದಿಜಿ. 2ಯಾನ್ ಕ್ರುಸ್ಸುಗು ಪತ್ತಾದಿನಾಯೆ ಆದುಪ್ಪು ಯೇಸು ಕ್ರಿಸ್ತನೇ ಅತ್ತಂದೆ ಬೇತೆ ಒವೆನ್ಲಾ ಪನಂದೆ, ನಿಕ್ಲೆ ನಡುಟು ಉಪ್ಪುವೆ ಪಂಡ್ದ್ ತೀರ್ಮಾನ ಮಲ್ತೊಂಡೆ. 3ಬೊಕ್ಕ ಯಾನ್ ನಿಕ್ಲೆ ಕೈತಲ್‌ ಬತ್ತ್‌ದುಪ್ಪುನಪಗ ಬಲದಾಂತಿನಾಯೆಲಾ ಪೋಡಿಗೆದಾಯೆಲಾ ದಿಂಜ ನಡುಗುನಾಯೆಲಾ ಆದಿತ್ತೆ. 4ಎನ ಪಾತೆರೆಲಾ ಪ್ರಸಂಗಲಾ ನರಮಾನಿನ ಗೇನದ ಪೊರ್ಲು ಪಾತೆರೊಲೆನ್ ಪನಂದೆ, ಐತ ಪಗತೆಗ್ ದೇವೆರಾತ್ಮೊಡ್ದುಲಾ ಬಲೊಡ್ದುಲಾ ದಿಂಜಿದಿತ್ತ್ಂಡ್. 5ದಾಯೆಗಂದ್ಂಡ ನಿಕ್ಲೆನ ನಂಬಿಕೆ ನರಮಾನಿನ ಗೇನೊಡು ಆಧಾರ ಮಲ್ಪಂದೆ ದೇವೆರೆ ಬಲೊಟು ಆಧಾರ ಮಲ್ಪೊಡು ಅಂದ್‌ದ್ ಎನ ಉದ್ದೇಶ ಆದಿತ್ತ್ಂಡ್.
6ಆಂಡ ನಂಬಿಕೆಡ್ ದೃಢ ಆದುಪ್ಪುನಾಕುಲೆಡ ಎಂಕುಲು ಗೇನೊಡೇ ಪಾತೆರ್‌ವ; ಆಂಡ ಈ ಲೋಕದ ಗೇನೊಡತ್ತ್; ನಾಶಾದ್ ಪೋಪಿನ ಈ ಲೋಕದ ಅಧಿಕಾರಿಲೆ ಬುದ್ಧಿವಂತಿಕೆಡ್ಲಾ ಅತ್ತ್. 7ಈತ್‌ನೆಟ್ಟ ಮದೆ ಆದಿತ್ತಿನ ದೇವೆರೆ ಗೇನೊನೇ ಪಾತೆರ್‌ವ; ಅವು ಒವ್ವು ಪಂಡ ನಮ ಮೈಮೆಗಾದ್ ಯುಗೊಲೆಡ್ದ್ ದುಂಬೇ ನೇಮಕ ಮಲ್ತ್‌ದ್ ಮದೆ ಮಲ್ತಿನ ಗೇನನೇ ಆದುಂಡು. 8ಉಂದೆನ್ ಲೋಕದ ಅಧಿಕಾರಿಲೆಡ್ ಏರ್ಲಾ ತೆರಿಯೊಂಡಿಜೆರ್; ತೆರಿಯೊಂದ್ವೆರ್ಡ ಮೈಮೆದ ಕರ್ತವನ್ ಕ್ರುಸ್ಸುಗು ಪಾಡ್ದ್‌ವಯೆರ್.
9ಆಂಡ ಗ್ರಂಥೊಡು ಬರೆದುಪ್ಪುಲೆಕ್ಕ
“ದೇವೆರ್ ತನನ್ ಪ್ರೀತಿ ಮಲ್ತೊಂದು ಉಪ್ಪುನಾಕುಲೆಗ್ ತಯಾರ್ ಮಲ್ತಿನೆನ್ ಏರ್ಲಾ ತೂತುಜೆರ್; ಏರ್ಲಾ ಕೇಂಡ್ದಿಜೆರ್,
ಅವು ನರಮಾನಿ ಉಡಲ್‌ಡ್ ಸೇರ್ದಿಜಿ.”
10ಎಂಕ್ಲೆಗಾಂಡಲಾ ದೇವೆರ್ ತನ ಆತ್ಮೊಡ್ದು ಅವೆನ್ ತೋಜಾದ್ ಕೊರಿಯೆ. ಆ ಆತ್ಮೆ ಮಾತ ವಿಷಯೊನ್ಲಾ ದೇವೆರೆ ಮದೆ ಆದಿತ್ತಿನ ವಿಷಯೊನ್ಲಾ ನಾಡ್ ಪತ್ತುಂಡು. 11ನರಮಾನಿನ ಉಲಯಿದ ಆಲೋಚನೆಲು ಆಯಡೊಪ್ಪ ಉಪ್ಪುನ ಆತ್ಮೊಗು ಅತ್ತಂದೆ ಬೇತೆ ಏರೆಗ್ ತೆರಿಯು? ಅಂಚೆನೇ ದೇವೆರೆ ಆಲೋಚನೆಲೆನ್ಲಾ ದೇವೆರೆ ಆತ್ಮೆ ಅತ್ತಂದೆ ಬೇತೆ ಏರೆಗ್ಲಾ ತೆರಿಯಂದ್. 12ಎಂಕುಲು ಲೋಕದ ಆತ್ಮನ್ ಪಡೆಯಂದೆ ದೇವೆರ್ ನಂಕ್ ದಯ ಮಲ್ತಿನ ವರೊಕ್ಲೆನ್ ತೆರಿಯೊನಿಯೆರೆ ದೇವೆರೆಡ್ದ್ ಬೈದಿ ಆತ್ಮೊನೇ ಪಡೆವೊಂದ. 13ಉಂದೆನ್ ಎಂಕುಲು ನರಮಾನಿನ ಬುದ್ಧಿ ಪಾತೆರೊಲೆಡ್ದ್ ಪನಂದೆ ದೇವೆರಾತ್ಮೆ ಕಲ್ಪಾಯಿನ ಪಾತೆರೊಲೆಡೇ ಪಂಡ. ಇಂಚ ಆತ್ಮದ ಸತ್ಯೊನು ಆತ್ಮಭಾವದಾಕುಲೆಗ್ ಯೋಗ್ಯವಾಯಿನ ರೀತಿಡ್ ತೆರಿಪಾವ. 14ಲೋಕದ ನರಮಾನಿ ದೇವೆರೆ ಆತ್ಮದ ಸಂಗತಿಲೆನ್ ಬೊಡ್ಚಿ ಪನ್ಪೆ. ಅವು ಆಯಗ್ ಹೆಡ್ಡೆರೆ ಪಾತೆರದ ಲೆಕ್ಕ ತೋಜುಂಡು; ಆಯೆ ಅವೆನ್ ತೆರಿಯೊನುಜೆ. ದಾಯೆಗಂದ್ಂಡ ಅವೆನ್ ದೇವೆರೆ ಆತ್ಮಭಾವೊಡ್ದೇ ಪರೀಕ್ಷೆ ಮಲ್ತ್‌ದ್ ಸರಿಯಾದ್ ತೆರಿಯೊನಿಯೆರೆ ಸಾದ್ಯ. 15ದೇವೆರಾತ್ಮೊಡ್ದು ನಡಪುನಾಯೆ ಮಾತೆನ್ಲಾ ಪರೀಕ್ಷೆ ಮಲ್ತ್‌ದ್ ತೆರಿಯೊನ್ವೆ. ಆಂಡ ಆಯನ್ ಪರೀಕ್ಷೆ ಮಲ್ಪೆರೆ ಏರೆಡ್ದ್‌ಲಾ ಆವಂದ್. 16“ಕರ್ತವ ಮನಸ್‌ನ್ ಏರ್ ತೆರಿದುಲ್ಲೆ? ಕರ್ತವಗ್ ಉಪದೇಶ ಮಲ್ಪುನಾಕುಲು ಏರುಲ್ಲೆರ್?” ಪಂಡ್ದ್ ಗ್ರಂಥೊಡು ಬರೆದುಂಡು. ನಂಕಾಂಡಲಾ ಕ್ರಿಸ್ತನ ಮನಸ್ ಉಂಡು.
Iliyochaguliwa sasa
1 ಕೊರಿಂಥ್ಯೆರೆಗ್ 2: ತುಳು
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
New Life Literature