यहून्ना 14

ईसु परमेसर कनै जाबा को गेलो ह

1ईसु आपका चेलाऊँ बोल्यो, “मन म चिंत्या कर उदास मना होवो , पण परमेसर अर मेर प बी बिस्वास करो। 2म ईस्बर नगरी म थारै रेह्बा की झघा बणाबा जार्यो हूँ। परम-पिता का घर म घणिई झघा ह ज अंय्यां नइ होतो तो म थानै कोनी बोलतो। 3बठै थारै ताँई झघा बणाया पाछै म थानै लेबा आस्युं। बिकै पाछै आपा सागैई रेहस्यां। 4म जठै जार्यो हूँ, बठै पुगबा को गेलो थे जाणो हो।”

5थोमा बाऊँ बोल्यो, “परबु, थे कठै जार्या हो म्हें कोनी जाणा। जणा बठै जाबाळा गेलानै म्हें कंय्यां जाण सकां हां?”

6ईसु बिऊँ बोल्यो, “सच, जीवन अर गेलो मई हूँ। मेरै बिना कोई परम-पिता कनै कोनी जा सकै।” 7बो बाऊँ बोल्यो, “इब ज थे मनै जाणग्या हो जणा परम-पितानै बी जाणस्यो। अर इबऊँ थे बिनै जाणो अर देखो हो।”

8फलिपूस बाऊँ बोल्यो, “परबु, म्हानै परम-पिता का दरसण करा, अत्तो तो म्हारै ताँई घणो।”

9ईसु बोल्यो, “मनै कितना दिन तो होगा थारै सागै रेह्ता पाछै बी फलिपूस तू हाल ताँई कोनी जाण सक्यो क, म कूण हूँ? जखो बी मनै देख्यो ह बो बापनै बी देख्यो ह अर तू बोलै ह क, म्हानै बाप का दरसण करा दे। 10फलिपूस, तू के इ बात प बिस्वास कोनी करै क म परम-पिता म अर परम-पिता मेर म बास करै ह?”

ईसु आपका चेलानै बोल्यो, “जखी बाता म थारूँ बोलुँ हूँ, अ बाता मेर कानिऊँ नइ, पण परम-पिता कानिऊँ ह, जखो मेर म होर आपको काम करै ह। 11जदकी म बोलुँ हूँ क, म परम-पिता म अर परम-पिता मेर म ह जणा बिस्वास करो, अर ज नइ करो जणा कमऊँ कम मेरा करमानै देखर तो करल्यो। 12म थारूँ सच बोलुँ हूँ, जखो बी मेर म बिस्वास करै ह, बो बे सगळा काम करसी जखा म करूं हूँ। बो आऊँ बी बडा काम करसी, क्युं क म परम-पिता कनै जाऊँ हूँ। 13अर थे जोक्यु बी मेरा नामऊँ माँगस्यो म करस्युं, क्युं क परम-पिता की मेमा बेटा क जरिए दिखाई ज्यासी। 14ज थे मेरूँ मेरा नामऊँ क्युंबी माँगस्यो, जणा म बिनै करस्युं।”

पबितर आत्मा देबा को करार

15ईसु आपका चेलाऊँ बोल्यो, “ज थे मेरूँ परेम करो हो, जणा थे मेरै हुकमा प चालज्यो। 16म थारै ताँई परम-पिताऊँ एक मददगार की माँग करस्युं, जखो सदाई थारै सागै रेह्सी। 17बा पबितर आत्मा ह, जखी परमेसर की सचाई थार प परगट करसी। बा इ दुनियानै कोनी मिल सकै, क्युंक आ दुनिया बिनै नइ तो देख सकै अर नइ जाण सकै, पण थे बिनै जाणस्यो, क्युंक बा थारै सागै थारै मांयनै रेह्सी। 18म थानै अनाथ की जंय्यां एकलो कोनी छोडूँ। म थारै कनै पाछो आस्युं। 19क्युंक टेम पाछै आ सरस्टि मनै कोनी देखसी, पण थे मनै देखस्यो। क्युं क म जीऊँ हूँ, अर थे बी जिस्यो। 20बो दिन आसी जणा थे जाण जास्यो, क म परम-पिता म अर थे मेर म, बंय्‍यांई म थारै म हूँ। 21जखा बी मेरा हुकमानै मानर बिपै चाली हीं, बे बामै हीं जखा मेरूँ परेम करी हीं, जखा मेरूँ परेम करी हीं बाऊँ परम-पिता परेम करसी अर म बी बाऊँ परेम करस्युं। अर खुदनै बापै परगट करस्युं।”

22दुसरो यहूदा, जखो यहूदा इस्करोती कोनी हो बो बोल्यो, “परबु ओ कंय्यां हो सकै ह क, थे म्हानै दिखस्यो पण इ दुनिया का मिनखानै कोनी दिखो?”

23ईसु बिऊँ बोल्यो, “जखा मेरूँ परेम करी हीं, बे मेरा खयानै मानसी। परम-पिता बाऊँ परेम करसी अर म्हें आर बाकै सागै रेहस्यां। 24अर जखा मेरूँ परेम कोनी करै, बे मेरा खयानै कोनी मानै। अर जखी सीख थे मेरा मुंडाऊँ सुण्या हो बा मेरी कोनी ह, बा तो मनै भेजबाळा परम-पिता की ह।

25“थारै सागै रेह्तासोता म अ बाता बोल दि ह। 26मदद करबाळी पबितर आत्मा, जिनै परम-पिता मेरा नामऊँ भेजसी थानै सगळी बाता सीखासी। अर जखी बाता म थारूँ बोल्यो हो बे सगळी थानै याद दिवासी। 27थानै चिंत्या करबा अर डरबा की जुर्त कोनी, क्युं क म थानै स्यांती देस्युँ। आ इ दुनिया की स्यांती की जंय्यां की कोनी, आ बा स्यांती ह, जखी मई दे सकूँ हूँ।

28“थे मनै अंय्यां बोलता सुण्या हो, ‘म जार्यो हूँ, पण म थारै कनै ओज्यु आस्युं।’ ज थे मेरूँ परेम करो हो जणा थे इ बातऊँ राजी होस्यो क म परम-पिता कनै जार्यो हूँ क्युं क बो मेरूँ बडो ह। 29अ सगळी बाता होबाऊँ पेली म थानै आकै बारां म बता दिओ हूँ, अर जद अ बाता घटसी जणा थे बिस्वास करस्यो। 30इब ओर बेत्ती म थारूँ बात कोनी कर सकूँ क्युं क इ दुनिया को राजा सेतान आर्यो ह, पण मेर प बिको बस कोनी चालै। 31जद बो आसी जणा इ जगत का मिनख जाणसी क म परम-पिताऊँ परेम राखूँ हूँ, अर बे सगळी बाता करूं हूँ, जखी करबा ताँई बो मनै हुकम दिओ ह।

“आओ ल्यो आपा अठैऊँ चालां।

Iliyochaguliwa sasa

यहून्ना 14: एस डब्लु वी

Kuonyesha

Shirikisha

Nakili