Markuji 11

Volowa wa Yesu sidadi ya Jeruzalemu

Matewuji 21:1-11; Lukaji 19:28-40; Juwawu 12:12-19

1Yesu na anamamuharaye kagakwivenle Jeruzalemu, kagali vakwikwi ira kafiye tatamo ya Betifaji na Betaniya, wewo uli Mwango wa Mitengo da Azeti, oharumaga anamamuharaye ambinli eraga: 2<<Dowani tatamo nnafwanyeya sogolro. Mwavolowaga wene, munofwanya mwana buru agamangeleliwe, wenno uli ahanarome gweliwa. Mwanfwanya mmutapule, mmuzena uno. 3Eto akalavo mutu unafuna ufukani ira: <Mwasiwa gwa nni mutapulaga buruyo?>, muire: <Nabwiya gunafuna ira alabena. Amala unomuzana.> >> 4Evale anamamuharaye kohodowaga, aliwa nfwanya mwana buru agamangeleliwe unde, mmambalo mwa ndila, va mulango eni. Evale kohomutapula. 5Mbwenye atu kaligi vevale kohafuka keraga: <<Munamutapulela nni buruyo?>> 6Aliwa kohowakula nnga Yesu mwawongele liye. Vevale kohorumeliha. 7Anamamuharaye kagamutukunle buru ule, kagadowilena vali Yesu, kohela kapa diwa vazulu va buru ule, Yesu liye gwelavo.

Yesu ohowatcheliwa nnga mwene

8Atu adjindji kotandelaga kapa diwa mundila eto amohiwa kohokana tambi dokana matakuru dakasile atu mmindani, aliwa mwadaga mundila ira Yesu avire mwemule. 9Eto mwindji wa atu atene roma ale kaligi sogolro vamohi na ale kaligi mundulri, kokuwaga keraga: <<Hozana!#11:9 Hozana! Atu kamuwatchelaga Yesu keraga: <<Hozana!>>, kamuwatchela nnga mwene. Hozana ku wonga Nabwiya munivuluse. Muwari mowonga: <<Hozana! Hozana!>>, kahi ira atwale kafuna nnga kaleveleliwe jotega jiwa. Ku wonga aliwa kafuna Yesu akale mwene wewa ira kahatongiweve na aRoma. Orelihiwa gu Mwene wenno unaza na nzina na Nabwiya! 10Orelihiwa akale umwene wa babihu Davi unaza.#11:10 umwene wa babihu Davi: Nafwanya 2 Samuweli 7:11-13, nnovwa ira malambo a mundulrimu Mulugu oholumbela na Davi ira: <<Muwari mwa weyo munoza mukume umwene ohomala.>> Mulugu awonga zela Namatikeliwa wenno afuna za unafwanyeya agali Yesu Kiristu. Muwari mwa jowonga ja atwale, aliwa kohoona ira: <<Peno mbwenye Namatikeliwa amuwonga Mulugu umala za.>> Aliwa eto kaumbuwela ira: <<Tchineneva hiyo kannatongiwegeve na aRoma. So nnafuna nitongiwe na Namatikeliwa wenno.>> kahaiziwaga ira tempuwa yali yahanafiye. Hozana Mulugu Okwaranya Jatene!>>

11Yesu ohovolowa muJeruzalemu, liye dowa Nyumba ya Yehova#11:11 Nyumba ya Yehova tchali nyumba yolobelamo nne tchali nyumba yoimbamo nnga vigereja da mano. Nyumba ya Yehova yalingana na makalelo a Musasa wa Yehova. Yohokana vatando valukulu bure na nyumba dimohi diwa eto yohokana sala mbinli. Sala yoroma yali Nimburo Notchena. Afiya Nimburo Notchena nne ali anamakuta bahi. Aliwa kohokana mabasa ohindiha lampada ora ya tchiguwo eto kotumeya jonukela eto va kada sumana kotchindja pawu dafwanyeya vameza vale. (Ezodu 27:21, 30:7-8; Levitiku 24:5-9) Sala yanembinli yali Nimburo Notchenetchetcha. Wewule afiyawo akala mundimuwa wa anamakuta atene, va yaka fendo imohi bahi. Eto vatando va Nyumba ya Yehova vale afiyavo ali aJudewu bahi ira kalobele no kuta mikuto da anavinyama. Mbwenye atu ohokala aJudewu tchafiyavo. (Joira ja Anamarumiwa 21:28-29) aing'anaga jatene jali mmambalo. Mbwenye voira nzuwa nohovira, ohodowa tatamo ya Betaniya na anamamuharaye kumi na ambinli.

Yesu ohotembelrelra mutengo mmohi wa mufigera

Matewuji 21:18-19

12Mmetcheloni muwa kawelagawo Betaniya, Yesu ohokana ndala. 13Evale ohoonaga olapela wene mutengo mmohi wa mufigera#11:13 mufigera: Gu mutengo nnga ha Nantambu eto hiyana uwa unavaha jovaha joziva pama. aganna matakuru gubu gubu gubu, liye dowa wewule ira aone akala vohokala jovaha. Mbwenye agawandamenlevo, afwannye matakuruve bahi, mwasiwa mutengole tempwaye yovaha yali yahanafiye. 14Evale Yesu ohomuwandela mutengole eraga: <<Kalivo mutu unafuna za welela dja jovaha jawo.>> Yesu awongaga enne anamamuharaye kohovwa ejile.

Yesu ohatamangiha aliba malronda Nyumba ya Yehova

Matewuji 21:12-17; Lukaji 19:45-48

15Yesu na anamamuharaye kagafiyile Jeruzalemu, liye ohovolowaga vatando va Nyumba ya Yehova, liye roma atamangihamo anamagula na anamaguliha atene. Ohogwihaga meza da aliba tchindja kobiri na kadera da aliba guliha kangayiwa. 16Eto kamuhiya mutu vira vatando va Nyumba ya Yehova vale aganna jengo jaye joguliha. 17Eto oafundjiha atu eraga: <<Ihilrembiwa ira: <Nyumba yaga inaitaniwege: <<Nyumba yolobelamo para atu a malogo matene.>>>#Izaiya 56:7 Mbwenye nyo muhuisandutcha kala nifukwe noakoyamo ambava!>>#Jeremiya 7:11

18Andimuwa a anamakuta na anamafundjiha malamulo kagavwile jairile Yesu, kohoroma saka zelru tivi ira kampena. Mbwenye komuova Yesu, tchoira atu adjindji kotikiniheya zela mafundjihelo aye. 19Nzuwa nagavirile, Yesu na anamamuharaye kohovenyamo musidadi mule.

Umma wa mutengo wa mufigera

Matewuji 21:20-22

20Mmetcheloni muwa na mabebehene, Yesu na anamamuharaye kaviraga wandamelana vamutengoni va mufigera vale, kamuonnege mutengole uhumala umma na mitchitchi diwa dene. 21Evale Peduru ohoumbuwela jawongile Yesu munziloni muwa, liye wonga na Yesu eraga: <<Kaing'anani Namafundjiha! Mutengo wa mufigera mwamutembelrelre nyo nzilo uhumala umma.>> 22Yesu ohomuwakula eraga: <<Mmuroromele Mulugu. 23Mwasiwa mwamuroromela Mulugu, na ibaribari nnouwandelani ira wawonga na mwangola ira: <Katchikuwavo udowe wamorele bara>, wahanna yowanganyeda mmirimani mwawo, waroromela ira inoireya yenno iwongile we, na ibaribari inoireya. 24Na mwasa wenno nnouwandelani ira jatene jinavepe nyo molobela inafwanela muroromelege ira: <dihimala vahiwa.> Mwera eno, jinoireya. 25Eto mwalobelaga, mubabihege akurumuwela anno kauireleni yabure ira Babinyu uli zulu awande kurumuwela jotega jenyu. 26Tchoira nyo mwahaakurumuwele afwinyu, babinyu uli zulu na liyene kanakurumuwela jotega jenyu.>>

Andimuwa a aJudewu kohonfuka Yesu zela utongi anna liye

Matewuji 21:23-27; Lukaji 20:1-8

27Nomala enne, kohowelela Jeruzalemu akoka. Yesu awendaga vatando va Nyumba ya Yehova, andimuwa a anamakuta, anamafundjiha malamulo na andimuwa a aJudewu kohozaga valigi Yesu vale, 28kanfukaga keraga: <<Jatene jinaira we ji, unairana na utongi waani? Uurumile bani ira uiregena eji?>> 29Yesu ohawakulaga eraga: <<Na miyene eto nnafuna dufukeni yengo imohi. Mwadiwakula pama, na miyene nnouwandelani mutu wenno udivahile utongi ira diiregena jinera miyo. 30Kodi anvahile Juwawu utongi ira aabatizege atu, ali ani? Ali Mulugu uli zulu owu ali atu? Kadiwakuleni!>>

31Evale aliwa kohoroma wonga oka oka keraga: <<Kodi mutula nimuwakule avi? Nera niwonge ira: <Anvahile utongi ali Mulugu uli zulu>, liye unofuka ira: <Nnga mwasiwa gwa nni nyo muza mwaharoromelaga jawonga Juwawu?> 32Teto nawonga ira: <Anvahile Juwawu utongi ali atu>, nnaaova anamwindji anafwanyeya eva ala mwasiwa atene anna kohoiziwa ira na ibaribari Juwawu ali namafiyiheda wa Mulugu.>> 33Na mwasa wenne, kohomuwakulaga Yesu keraga: <<Kanimuiziwile amurumile Juwawu.>> Evale Yesu ohowonga eraga: <<Bahi eto, na miyene kannamuwonga mutu udivahile utongi zela jinairana miyo ji!>>

Iliyochaguliwa sasa

Markuji 11: iLolo

Kuonyesha

Shirikisha

Nakili