Galasiya 6
6
Jokokomeza zela limbihana
1Abalaga mwamuona nfwinyu ira ugwana yotega, inafwanela ira ule unasogolrelriwa na Munemba Otchena adowe anvenyihe muwari mofwasa. Mbwenye polre polre tawiha ira na nyenne munaze mugwe na yotega. 2Eto inafwanela ira kada mutu awande dowa muwatchela nfwaye mutolro unna liye ira awandege kwakwaneliheda nlamulo na Kiristu.#6:2 nlamulo na Kiristu nnawongiwa ti neno Yesu awongile liye mahiyu anne afuna liye gulihiwa ira: Miyo nnafuna duvaheni nlamulo nixa. Nlamulo nixa nnafuna miyo uvahani ti ni. Muzivelanege mmohi na nfwaye. Na makalelo nnga duzivenleni miyo nyo, na nyenne, muzivelanege mmohi na nfwaye na makalelo mamohive. (Juwawu 13:34, 15:12)
3Mbwenye mutu wenno unaviona ira: <<Miyo kadili wa masika>>, aalramwisaga afwaye agali liye kahi yengo, unavinyenga ekave. 4Inafwanela kada mutu avitonge eto aviing'ane pama mabasa analaba liye. Era eno unowanda ziveliwa mabasa alabile liye hiyaniha no ziveliwa ira: <<Miyo kadili nnga uluwole.>> 5Tchoira kada mutu unokana mutolro waye ira atukule.
6Inafwanela ira mutu wenne unafundjihiwa mazu a Mulugu awande mukamiheda na makalelo matene wenne unanfundjiha.
7Kamunyengiwe, Mulugu kanapetiwa. Tchoira inazala mutu, tcheniyo inafuna liye za handa. 8Mutu wenne unafuna zala ja maningo, handa waye unagomela nongeya. Mbwenye mutu wenne unazala mwa Munemba, mwa Munemba wenno yohanda yaye unaza agomele vahiwa ingumi yohomala.
9Kanigomeni irana jengo japama mwasiwa sogolro ukala handa. Malringana nahahiye irana japama, nnoza nihandeni. 10Inafwanela niwande akamiheda atu atene na makalelo anawanda hiyo. Eto muwari moakamiheda atu atene mule, inafwanela nisimbwege kamihedana mukalele hiyo atu okana nroromelo.
11 Kaing'anani maletira mandimuwa ala nnalremba miyo na ndanda naga. # 6:11 nnalremba… na ndanda naga : Mazwala Pawulo alrembile ira aGalasiya kaiziwe ira: <<Na ibaribari ulrembile mazwala gu mulombwana Pawulo.>> Ku wonga Pawulo kalrembile karta natene na ndanda naye. So agafiyile magomo uwa, liye ohela asinatura. Ali ira kahawanganyede ira: <<Karta ni kanikumile wa Pawulo.>> Nione Roma 16:22; 1 Korinto 16:21; Koloso 4:18.
Mazu ogomiheda
12Ale anaukanyihedani ira muineliwe so anafuna kateteliwe zela joira jiwa eto anatawa ira kafundjiha vulusiwa muwari mwa ukwa wa Kiristu, anaze kaharahariwege. 13Eto ale anaineliwa kinawanda kwakwaneliheda malamulo. So aliwa anafuna ira nyo muineliwe ira kawande vititimiha zela nyo.
14Kilivo yengo nnafuna miyo vititimihana. So titimiha waga, nnamutitimiha Nabwiya wehu Yesu Kiristu na ukwa waye vamuradini. Muwari mwa ukwa wa Kiristu, dihimwalana na jengo ja mwilamboni ya vati#6:14 dihimwalana na jengo ja mwilamboni ya vati: Inawonga Pawulo eva, liye kanabalra ja ilambo ya vati eto nne ja ilambo ya vati kajinamutonga. eto jengo ja mwilamboni ya vati jihimwalana na miyo. 15Tchoira ineliwa, nari haineliwa, ejo kajinna mabasa. Inna mabasa ku pandutchiwa ira nikale atu axa. 16Murendele na tangaranga da Mulugu jikale na atu atene anno anawenda muwari mokana ibaribari zela eji na atu anno anafwanyeya kagali aIzarayeli a Mulugu.#6:16 atu atene anno anawenda muwari mokana ibaribari zela eji… anafwanyeya kagali aIzarayeli a Mulugu: Malambo a mundulri aIzarayeli kafwanyeya kagali atu a Mulugu. Mbwenye peno atu a Mulugu kahi ale kabaliwe muzizani mwa aIzarayeli. AIzarayeli a ibaribari a mano banno kapandutchiwe fendo mbinli, ku wonga atu omuroromela Yesu. Nione Juwawu 3:3,14-17; Roma 9:6,7.
17Kuma peno dowa sogolro, kakalevo mutu mmohiwa unafuna dizuzumiha mwasiwa mmaningoni mwaga mu muhukala madamba zela bubudeliwa nzina na Yesu.
18Abalaga sayi da Nabwiya wehu Yesu Kiristu dikale muwari mwa minemba denyu. Ame!
Kukala mazu a karta nalrembiwele atu omuroromela Yesu a Galasiya.
Iliyochaguliwa sasa
Galasiya 6: iLolo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral