Galasiya 3
3
Upama wa Mulugu unakuma mwa nroromelo hiya muwari moharihamo malamulo
1Nyo akuda Galasiya muhutabwa kana uvuruvuru! Kodi uulowileni bani? Nyo mohowandeliwa pama pama vatando vene ira Yesu Kiristu ohokomeliwa vamuradini ira mukale pama.#3:1 muhutabwa kana uvuruvuru! Akuda Galasiya kagamanle iziwa ira upama wehu unazela muwari mwa Yesu, aliwa kohoroma venda ipama yewa muwari mwa jengo jimohi jiwa. 2Miyo nnafuna dufukeni yengo imohi bahi. Ira nyo muwatchele Munemba Otchena, kodi muwatchenle muwari moharihamo malamulo owu hehi muwatchenle mwasiwa mwagavwile mazu, muhukana nroromelo? 3Nyo mohoroma pama na kopolo da Munemba Otchena. Kodi peno munafuna murungunuwe, mulabegena kopolo denyu da maningwinyu ira mukale apama? Akala tchi eno uvuruvuru wenyu utabwa.
4Kodi nyo muire diwala goyi datene duireyeleni? Kodi ejo jauireyelani vasayi?#3:4 goyi datene duireyeleni: Ku wonga wanle aGalasiya kohoonihiwa goyi muwari mokala atu omuroromela Yesu. Akala kagaonne goyi kafuna kawelele mundulri, goyi datene kadakana mpindu para aliwa. 5Nyo mwaona Mulugu auvahagani Munemba Otchena eto airagana jotikiniha muwari mwa nyo, kodi ejo Mulugu unauirelani mwasiwa muli atu okwakwaneliheda malamulo owu unairana mwasiwa nyo mwagavwile mazu, munokana nroromelo?#3:5 kodi ejo Mulugu unauirelani mwasiwa muli atu okwakwaneliheda malamulo: Va Pawulo unaawandela ira: <<Japama jatene Mulugu jinauirelani liye, kanauirelani mwasiwa munoakwakwaneliheda malamulo mbwenye unauirelani muwari mwa nyo kana nroromelo mwagavwile mazu.>>
6Kalaga nnga Abarahamu. Liye ohomuroromela Mulugu. Nona Mulugu ohomuona nnga wapama mwasiwa liye ohomuroromela. 7Inafwanela muiziwe ira peno atu atene okana nroromelo banafwanyeya kagali ana Abarahamu.
8MMazuni eto Mulugu ohowonga na Abarahamu ira: <<Muwari mwa weyo, atu a malogo matene anoza karelihiwe.>>#3:8 mwa weyo, atu a malogo matene anoza karelihiwe: Mazwala kakumile Jenesesi 15:6. Mulugu awongela eno moiziwa ira: <<Vasogolro Namatikeliwa unaza abaliwe muzizani mwa Abarahamu. Muwari mwa Namatikeliwa wenno, atu a maziza matene anoza karelihiwe.>> Kawongaga eni, ku tapulela ira Abarahamu wanle olaleyiwa Muselu Wapama ira vasogolro atu ohokala aJudewu okana nroromelo anoza karumeliwe na Mulugu. 9Nona sawasawa nnga mulombwana wa nroromelo Abarahamu ohorelihiwa, na hiyene atu okana nroromelo nihirelihiwa.
Atene ororomela hara malamulo kohomala tembelrelreya
10Atu atene ananyindela joira jiwa mohara malamulo kohomala tembelrelreya. Tchoira ilrembiwa mMazuni ira:
<<Atu atene kahanaharihamo malamulo, kahanairana jengo jatene jeji jilrembiwe Livuru na Malamulo, atu anno kohomala tembelrelreya.>>
11Mwa eno, inoiziweya pama pama ira kalivo unafuna kala wapama vamentoni va Mulugu muwari moharihamo malamulo. Tchoira: <<Ule uli wapama unokana ingumi mowenda na nroromelo.>>#3:11 Ule uli wapama unokana ingumi mowenda na nroromelo. Mazwala kakumile Habakuki 2:4 eto anomuwandela mutu zela mawendelo ofwanela para mutu omuroromela Yesu. Inafwanela mutu wenno uli wapama vamentoni va Mulugu awendeve na nroromelo naye. 12Mbwenye kana nroromelo kahi harihamo malamulo.#3:12 kana nroromelo kahi harihamo malamulo: Ku wonga mutu alimbiheda malamulo ira avulusiwe, kanakana nfwaye unamuroromela liye. Akala uwanda, uwanda. Kawandile, kawandile. Jinohiyana na makalelo a nroromelo tchoira mutu okana nroromelo ukana nfwaye unamuroromela liye. Ule unna nroromelo ukana nfwaye unamukamiheda. Akala kawandile eka, nfwaye gunamuwandiha. Tapulela, waroromela malamulo, wahawande harihamo, kunna unafuna za ukamiheda. Unagoma eno ogwene. Mbwenye wankana unamuroromela we agali Yesu Kiristu, liye gunafuna laba ira uwande leveleliwa jotega jawo. Tchoira <<Mutu wenno unaharihamo malamulo, liye gunafuna kana ingumi muwari moharihamo mwaye mule.>>#Levitiku 18:5
13Kiristu uwandile niwombola ira nahatembelrelreye zela hakwakwaneliheda wehu malamulo. Liye ohoniwombola muwari motembelrelreya vamalroni vehu. Kalaga nnga ilrembiwe mMazuni ira: <<Otembelrelreya gu mutu wenno unatomeyiwa vaimirini.>>#3:13 Otembelrelreya gu mutu wenno unatomeyiwa vaimirini. Ku wonga ora yakomeliwa Yesu vamuradini, liye otembelrelreya vamalroni vehu. Yesu mbwenye katembelrelreyile na mwasa wa jotega jaye, tchoira kuma vabaliwe liye ante ukwa waye kamutegele Mulugu. Mbwenye muwari mowatchela jotega jehu, Yesu owatchela tembelrelreya wafuna hiyo watchela na mwasa ohowanda harihamo malamulo. Nione Detoronomiyo 21:23. 14Yesu Kiristu uhuniwombola ira atu ohokala aJudewu kawande relihiwa na mareliho anno Mulugu awongile liye na Abarahamu. Yesu eto uhuniwombola ira muwari mwa nroromelo niwande muwatchela Munemba Otchena nnga mwalumbenle liye.
Upama wehu unakuma mwa nroromelo hiya muwari moharihamo malamulo
15Abalaga, miyo nnafuna diwonge yofwalrafwaniha zela ja ilambo ya vati. Atu kapangana yopanganiwa, kagamanle pangana, nfwaye kanavungulavo nne kanawendjedelavo. 16Mulugu apanganne mapangano na Abarahamu na mwana mmohi afuna za baliwa muzizani mwaye. Mazu kinawonga ira Mulugu ohosakanya mapangano aye na ahima atene a Abarahamu. So mazu a Mulugu anawonga zela mwana mmohi afuna za baliwa muzizani mwaye. Mwa eno, mutu awongiwa gu Kiristu. 17Inawonga miyo tchi ila. Mulugu agamanle nvaha Abarahamu nipangano naye, vohovira yaka 430 Mulugu ahanaavahe aIzarayeli malamulo. Mbwenye ja malamulo jile kajinatimiha yopangana Mulugu apanganne liye wanle na Abarahamu ira nipangano na Mulugu nahakayena mabasa, nari. 18Tchoira akala Mulugu unanvaha mutu japama jaye muwari mwa malamulo, nipangano na Mulugu kaninna mabasa. Mulugu mbwenye ohopangana na Abarahamu ira anvahe japama jaye muwari mwa nipangano bahi, hiya mwa malamulo.
Mabasa a malamulo
19Ki eto malamulo kazele nni? Kalaba ira kamutonyihede mutu jotega jaye fiyeda za wa mutu wenno Mulugu apanganne liye na nipangano naye. Malamulo kavahediwile muwari mwa angelro eto vari viwa vohokala mutu mmohiwa alivo. 20Akala ohokala mutu vari viwa, ku wonga kohokalawo atu angasi angasi hiya mutu mmohi. Mbwenye Mulugu gu mmohi.#3:19-20 Malamulo kavahediwile muwari mwa angelro eto vari viwa vohokala mutu mmohiwa alivo. Mutu wenno ali vari va angelro na atu ali mulombwana Mozeji. Ku wonga angelro kohotukula ja Mulugu, aliwa nvaha Mozeji. Mozeji eto ohotukula javahiwa liye na angelro, liye dowa awandela aIzarayeli. Mozeji ohotukula malamulo dowa fiyiha wa aIzarayeli. Yeniyo mbwenye yohiyaniheya na yopangana yapanganne Nabwiya Mulugu na Abarahamu. Tchoira so Mulugu mwinnya gwavirile dowa wonga na Abarahamu ahanna mutu vari na vari.
21Kodi malamulo anoruniha mapangano a Mulugu? Kavali wandeya. Tchoira wahakale nlamulo nowanda nvaha mutu ingumi, atu kerege kala apama vamentoni va Mulugu muwari mwa malamulo. 22Mbwenye mazu a Mulugu kohomala afungela atu atene mukadeya na mwasa wa jotega. Ili ira mutu agaiziwile ira uli mukadeya na mwasa wa jotega, amuroromele Yesu Kiristu ira awande kana jengo japama Mulugu apanganne liye ira anvahe mutu wenno unna nroromelo.
23Tempu ya nroromelo yahanaze, hiyo nohindiwa ira niwendegena malamulo. Nali mukadeya fiyeda tempu yaoneyihiwe nroromelo.#3:23 Tempu ya nroromelo yahanaze: Ku wonga tempu yovulusiwa muwari momuroromela Yesu yahanaze. Eto zela mazu oira nohindiwa ira niwendegena malamulo, Pawulo unawonga nnga wenda na malamulo ali yengo ya wanle mwasiwa wenno uiziwile ibaribari zela muroromela Yesu kahi mutu ohindiwa ira awendegena malamulo. Tempu ila tchi tempu yowenda na sayi da Mulugu hiya wenda na malamulo a Mulugu. (Roma 6:14; Galasiya 5:18) Muwari mowenda na sayi da Mulugu, mutu kanairana jabure mbwenye unoirana upama. (Roma 8:3-4) 24Fwanyeya ira malamulo kaniwendiha nnga mboziye, ira Kiristu agazile, niwande kala apama muwari mwa nroromelo. 25Na mwasa oira peno mutu unorumeliwa kala wapama muwari mwa nroromelo, hiyo peno kannatongiwa na mboziye. 26Tchoira na nyenne, na mwasa wa nroromelo nenyu, muli muwari mwa Yesu Kiristu eto nyo mwatene muli ana Mulugu.
27Tchoira nyo mwatene mubatiziwe muwari mwa Kiristu muhumala muwara Kiristu.#3:27 muhumala muwara Kiristu: Ku wonga tempu ili hiyo ila vamentoni va Mulugu atu omuroromela Yesu anafwanyeya kagali maningo a Yesu. Ku wonga mabasa a Yesu Kiristu anadowa sogolro muwari mwa aliwa. Nona inafwanela atu kaaona atu omuroromela Yesu, kaone joira na joumbuwela ja Yesu Kiristu. 28Peno eni muwari mwa Kiristu kavali muJudewu nne muGerego. Kavali muzari nne mutu ahali muzari. Kavali mulombwana nne muhiyana. Tchoira muwari mwa Yesu Kiristu, hiyo atene nili amohive.#3:28 amohive owu hehi yengo imohive. 29Muwari moira nyo muli a Kiristu aye, na nyenne muli ahima a Abarahamu. Na nyenne munoza mutambilre japama japanganne Mulugu.
Iliyochaguliwa sasa
Galasiya 3: iLolo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral