Efezo 6
6
Makalelo ovwanana a ahima omuroromela Yesu na ababiwa
1Nyo ahima, inafwanela mwaavwelelege ababinyu na amminyu nnga munafunela Nabwiya, tchoira avwelela ababinyu tchi yengo yofwanela. 2Tchoira nlamulo noira: <<Umurihedege babawo na mmawo.>>, nnafwanyeya nagali nlamulo noroma nokana nipangano. 3Tchoira mazu anawonga ira:
<<Umurihedege babawo na mmawo ira jawo juwendele pama eto umalemo malambo madjindjene mwilamboni.>>
4Nyo ababi kamwairelege ahiminyu jengo jofuna atakaleliwiha. Inafwanela mwawendaga na ahiminyu, mwaalelege na makalelo anafuna Nabwiya, mwaafundjihaga ja Nabwiya.
Makalelo ovwanana zela azari omuroromela Yesu na apatarawu ewa
5Nyo azari, inafwanela mwaavwelelege apatarawinyu a ilambo ya vati na makalelo apama moariheda, muwari moaova. Mwaavwelelege mwa ibaribari na mmirimani mwenyu mwatene nnga munanvwelela nyo Kiristu. 6Kamulabege japama patarawinyu akalavo, mbwenye avenyavo, nyo labaga jovuza, nne kamulabege ira patarawu aziveliwe bahi. Mbwenye mulabege nnga mutu omulaba Kiristu, muiragana jofuna ja Mulugu na mmirimani mwenyu mwatene. 7Mulabege mabasinyu mohowanganyeda nnga mutu alabaga mabasa a Nabwiya hiya mulaba mutu nfwaye. 8Tchoira nyo mumala iziwa ira mabasa matene apama mutu uli watene unalaba liye, unafuna mutambilriha gu Nabwiya. Akala weyo uli muzari nari akala kuli muzari, unafuna utambilriha gu Nabwiya.
9Na nyenne apatarawu inafwanela mwaarihedege azarinyu eto muhiye makalelo owonga jotutcha, tchoira mumala iziwa ira wenno unamulabiha nyo mabasa, vamohi na nyo mwa apatarawu, atene mbwiyinyu gu mmohive. Liye unakala zulu eto kanna nsakulro.
Jowara jatene ja anyakondo
10Yengo yogomiheda inafuna miyo dukokomezeni tchi ila. Mulimbihiwe muwari momuroromela Nabwiya eto muwari mwa kopolo daye dilukulu. 11Inafwanela muwarege jowara jatene ja anyakondo jejo Mulugu juvahileni liye ira mwahagwe na malrango anna Diyabo. 12Tchoira hiyo kannawana na atu okana maningo na sangiri. Mbwenye nnawana na minemba dabure, vamohi na andimuwiwa, na amweniwa anno anasogolrelra tempu ya isi inawenda hiyo ila. Hiyo nnawana na anno eto nnawana na anamwindji a angelro abure, anafwanyeya mamburo a zulu-zulu.
13Nona nyo mutukule jowara jatene ja anyakondo jejo Mulugu juvahileni liye, muware ira siku nabure naza mwahagondjihiwe eto ira kondo yavira, mukaleve oimelene. 14Nyo eto muimele pama mwagawarile sintu. Sintu nnawonga miyo ku wenda na ibaribari. Muware kamiza ya momba. Kamiza inawonga miyo ku irana makalelo apama. 15Muware eto sapato ira manyalo enyu kakale pama. Sapato nnawonga miyo, ku kala okozeyene ira mulaleye Muselu Wapama oazelana atu murendele. 16Muwari mwa jatene jinafwanyeyegena nyo, inafwanela mutukule defeza ira Mutu Wabure avokaga mafumo a munlo, muwande timihana. Defeza inawonga miyo, ti nroromelo nenyu. 17Mutukule eto kapaseti ozela vulusiwa,#6:17 kapaseti ozela vulusiwa: Mutu kana ibaribari zela vulusiwa unomukamiheda ira aimele pama. Nione 1 Tesalonika 5:8. muware. Mutukule eto supada na Munemba. Supada nnawonga miyo ba Mazu a Mulugu.
18Muwari mwa jatene jinafwanyeyegena nyo, inafwanela mulobelege na makalelo Munemba unausogolrelrani liye. Mulobelege zela miselu dili datene eto mwaalobelelege afwinyu. Muwari molobela, mukale orurumuwene eto kamugomena alobelela atu atene otchenihiwa.
19Nyo mwalobelaga, na miyene mudilobelelege ira Mulugu adivahe wonga, adivahe laleya mohoova dilaleyaga yengo yokoyeya agali Muselu Wapama. 20Malambwala miyo nnafwanyeya omangiwene na makurenti na mwasa olaleya mazu. Mudilobelelege miyo ira diwandege laleya Muselu Wapama mohoova nnga munafunela Mulugu.
Mazu ogomiheda
21Ira nyo muiziwe makalelo anna miyo vamohi na jinera miyo malambwala, nnomuruma mbalihu uneriwa Tikiko ira aze wa nyo auwandeleni jatene. Tikiko gu mbalihu unamuziveliwa hiyo eto gu mutu ororomeleya muwari mohinda mabasa muUmweneni mwa Nabwiya. 22Miyo nnomuruma ira aze wa nyo auwandeleni makalelo anna hiyo eto ira awande ulimbihani.
23Murendele akale na nyo abalaga eto nyo mwagannave nroromelo, mukayena zivelana wokumela wa Mulugu Baba na Nabwiya Yesu Kiristu. 24Sayi da Mulugu dikale na atu atene anamuziveliwa Nabwiya wehu Yesu Kiristu mwa ibaribari malambo matene kala no kala.
Kukala mazu a karta nalrembiwele atu omuroromela Yesu a Efezo.
Iliyochaguliwa sasa
Efezo 6: iLolo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral
Efezo 6
6
Makalelo ovwanana a ahima omuroromela Yesu na ababiwa
1Nyo ahima, inafwanela mwaavwelelege ababinyu na amminyu nnga munafunela Nabwiya, tchoira avwelela ababinyu tchi yengo yofwanela. 2Tchoira nlamulo noira: <<Umurihedege babawo na mmawo.>>, nnafwanyeya nagali nlamulo noroma nokana nipangano. 3Tchoira mazu anawonga ira:
<<Umurihedege babawo na mmawo ira jawo juwendele pama eto umalemo malambo madjindjene mwilamboni.>>
4Nyo ababi kamwairelege ahiminyu jengo jofuna atakaleliwiha. Inafwanela mwawendaga na ahiminyu, mwaalelege na makalelo anafuna Nabwiya, mwaafundjihaga ja Nabwiya.
Makalelo ovwanana zela azari omuroromela Yesu na apatarawu ewa
5Nyo azari, inafwanela mwaavwelelege apatarawinyu a ilambo ya vati na makalelo apama moariheda, muwari moaova. Mwaavwelelege mwa ibaribari na mmirimani mwenyu mwatene nnga munanvwelela nyo Kiristu. 6Kamulabege japama patarawinyu akalavo, mbwenye avenyavo, nyo labaga jovuza, nne kamulabege ira patarawu aziveliwe bahi. Mbwenye mulabege nnga mutu omulaba Kiristu, muiragana jofuna ja Mulugu na mmirimani mwenyu mwatene. 7Mulabege mabasinyu mohowanganyeda nnga mutu alabaga mabasa a Nabwiya hiya mulaba mutu nfwaye. 8Tchoira nyo mumala iziwa ira mabasa matene apama mutu uli watene unalaba liye, unafuna mutambilriha gu Nabwiya. Akala weyo uli muzari nari akala kuli muzari, unafuna utambilriha gu Nabwiya.
9Na nyenne apatarawu inafwanela mwaarihedege azarinyu eto muhiye makalelo owonga jotutcha, tchoira mumala iziwa ira wenno unamulabiha nyo mabasa, vamohi na nyo mwa apatarawu, atene mbwiyinyu gu mmohive. Liye unakala zulu eto kanna nsakulro.
Jowara jatene ja anyakondo
10Yengo yogomiheda inafuna miyo dukokomezeni tchi ila. Mulimbihiwe muwari momuroromela Nabwiya eto muwari mwa kopolo daye dilukulu. 11Inafwanela muwarege jowara jatene ja anyakondo jejo Mulugu juvahileni liye ira mwahagwe na malrango anna Diyabo. 12Tchoira hiyo kannawana na atu okana maningo na sangiri. Mbwenye nnawana na minemba dabure, vamohi na andimuwiwa, na amweniwa anno anasogolrelra tempu ya isi inawenda hiyo ila. Hiyo nnawana na anno eto nnawana na anamwindji a angelro abure, anafwanyeya mamburo a zulu-zulu.
13Nona nyo mutukule jowara jatene ja anyakondo jejo Mulugu juvahileni liye, muware ira siku nabure naza mwahagondjihiwe eto ira kondo yavira, mukaleve oimelene. 14Nyo eto muimele pama mwagawarile sintu. Sintu nnawonga miyo ku wenda na ibaribari. Muware kamiza ya momba. Kamiza inawonga miyo ku irana makalelo apama. 15Muware eto sapato ira manyalo enyu kakale pama. Sapato nnawonga miyo, ku kala okozeyene ira mulaleye Muselu Wapama oazelana atu murendele. 16Muwari mwa jatene jinafwanyeyegena nyo, inafwanela mutukule defeza ira Mutu Wabure avokaga mafumo a munlo, muwande timihana. Defeza inawonga miyo, ti nroromelo nenyu. 17Mutukule eto kapaseti ozela vulusiwa,#6:17 kapaseti ozela vulusiwa: Mutu kana ibaribari zela vulusiwa unomukamiheda ira aimele pama. Nione 1 Tesalonika 5:8. muware. Mutukule eto supada na Munemba. Supada nnawonga miyo ba Mazu a Mulugu.
18Muwari mwa jatene jinafwanyeyegena nyo, inafwanela mulobelege na makalelo Munemba unausogolrelrani liye. Mulobelege zela miselu dili datene eto mwaalobelelege afwinyu. Muwari molobela, mukale orurumuwene eto kamugomena alobelela atu atene otchenihiwa.
19Nyo mwalobelaga, na miyene mudilobelelege ira Mulugu adivahe wonga, adivahe laleya mohoova dilaleyaga yengo yokoyeya agali Muselu Wapama. 20Malambwala miyo nnafwanyeya omangiwene na makurenti na mwasa olaleya mazu. Mudilobelelege miyo ira diwandege laleya Muselu Wapama mohoova nnga munafunela Mulugu.
Mazu ogomiheda
21Ira nyo muiziwe makalelo anna miyo vamohi na jinera miyo malambwala, nnomuruma mbalihu uneriwa Tikiko ira aze wa nyo auwandeleni jatene. Tikiko gu mbalihu unamuziveliwa hiyo eto gu mutu ororomeleya muwari mohinda mabasa muUmweneni mwa Nabwiya. 22Miyo nnomuruma ira aze wa nyo auwandeleni makalelo anna hiyo eto ira awande ulimbihani.
23Murendele akale na nyo abalaga eto nyo mwagannave nroromelo, mukayena zivelana wokumela wa Mulugu Baba na Nabwiya Yesu Kiristu. 24Sayi da Mulugu dikale na atu atene anamuziveliwa Nabwiya wehu Yesu Kiristu mwa ibaribari malambo matene kala no kala.
Kukala mazu a karta nalrembiwele atu omuroromela Yesu a Efezo.
Iliyochaguliwa sasa
:
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral