Efezo 4
4
Inafwanela atu omuroromela Yesu kawendege vamohi
1Na mwasa wenno, miyo Pawulo dagali munyakadeya na mwasa omuhara Nabwiya nnafuna dukokomezeni ira mutukule mawendelo Nabwiya aniitanele liye ira niiregena. 2Muwendege na makalelo matene oviyeviha, opwaseya na afwinyu. Mukale ovilela na afwinyu. Mukale okurumuwelana muwari mozivelana.
3Muzuzumelege ira muwandane no wandana okumela wa Munemba Otchena. Tchoira Munemba Otchena unanisogolrelra ira niwendege vamohi na murendele. 4Hiyo atu omuroromela Yesu nili maningo mamohive. Nihikana Munemba mmohive. Mulugu uniitana ira nikayena yoing'anela imohive inadediha hiyo. 5Hiyo atene nihikana Nabwiya mmohive, inaroromela hiyo tchi imohive, batiziwa wehu ku umohive. 6Nihikana eto Mulugu mmohi wenno uli Baba wa jatene. Liye gunatonga jatene, gunafwanyeya mwatene mwene, gunakalihawo jatene.
7Muwari mwa hiyo atu omuroromela Yesu, kada mutu ukana yolemelela Kiristu invahile liye vasayi.#4:7 Fwanyeya ira kada mutu omuroromela Yesu ukana yolemelela Kiristu invahile liye. Nione Roma 12:6-8 na 1 Korinto 12:4-11. Jolemelela jinawongiwa ji, jinalaba ira kada mutu akayena makalelo oirana yengo malro oakamiheda afwaye. 8Kalaga nnga ilrembiwe mMazuni ira:
<<Agwelaga zulu ohatukula anamwindji a atu ohindiwa. Kohokalawo atu amohiwa eto aavahile liye jovaha.>> #
Salmu 68:18
9Mazu anafwanyeya mMazuni oira: <<Agwelaga zulu.>> ku wonga nni? Mazwale anawonga ira Yesu aromile titela ilambo ya vati. 10Agatitile, ohogwela dowaga ilambo ya zulu ante ilambo ya zulu-zulu ira awande mwada matongelo aye mwatene mwene.
11Ikala Yesu inivahile liye hiyo atu otchenihiwa. Inivahile liye, ba anamarumiwa, anamafiyiheda, anamalaleya, na anamakumbuza onifundjiha mazu 12ira muwari mwa atu anne, aliwa kawandege alimbiha atu otchenihiwa ira kalabege mabasa matene a Mulugu. Hiyo atene otchenihiwa nalabaga mabasa a Mulugu, pa evo vanafuna za ulukulihiwa maningo a Kiristu.
13Ulukulihiwa wa maningo a Kiristu ku wonga ira hiyo atene omuroromela Yesu wendaga vamohi movwanana muwari mokana yororomela imohive eto ku wonga ira nnawenda muwari momuiziwa mutu mmohive, wenno unafwanyeya agali Yesu Mwana Mulugu eto ku wonga hiyo atene nnakala vamohi nnga sawa mmohive eka wa vande vaye eto ku wonga zaleliwa makalelo unna Kiristu. 14Inafwanela nizaleliwe makalelo a Kiristu ira hiyo nahakaleve ahima eto nahakaleve nnga yengo yondunyiwa na mahindje omanganyeya na nipevo. Ku wonga kannanyengiwege na mafundjihelo ohiyana-hiyana, nari jonyenga jinawonga atu jomudowana mutu ndila dohokala pama.
15Hiya nyengiwa na jonama, inafwanela ira kada mutu awonge ibaribari na nfwaye na makalelo ozivelana. Inafwanela niirena eno ira nisanduwe, nitukule makalelo matene a muru wehu Kiristu. 16Hiyo nili jano ja maningo a Yesu. Liye ohonivaha mafarafadju onigumaniha hiyo jano vamohi ira niwendege nnga maningo mamohive. Kada yano yalabaga mabasa avahiwe liye, yalabaga na makalelo ozivelana, pa evo vanaza ulukula maningo a Yesu.
Makalelo maxa ofwanela ira atu omuroromela Yesu kawendegena
17Peno va, nnafuna duwandeleni, dukokomezeni mwa nzina na Nabwiya ira kamusazihegeve mawendelo a atu ohomuroromela Yesu#4:17 Owu hehi atu ohokala aJudewu. anno anawenda na joumbuwela jewa johokana mabasa. 18Aliwa kinawanda onelramo yengo ili yatene. Na mwasa wa uvuruvuru unna atu eto na mwasa okana mirima dovanda, anawenda olapela wene na ingumi inavaha Mulugu. 19Komala limba na jabure jinera atu. Anovivelela irana makalelo matene otakala, gonihana burebure vamohi na joira jimohi jiwa jotakala pwi. Kaona jotakala jatene jinera afwiwa, anosilrilra ira: <<Na hiyene nnga niiregena.>>
20Nyo mbwenye mumala fundjihiwa ira makalelo a Kiristu kahi eno! 21Tchoira nyo muhumala vwa zela Yesu eto muhumala fundjihiwa mafundjihelo a ibaribari anafwanyeya na liye. 22Muhufundjihiwa ira muwungule mawendelo enyu a wanle, anno kanongeyile eto anasimbwave nongeya muwari mwa jofuna jinaninyenga ira niiregena jotega. 23Mufundjihiwe ira murumele ira Mulugu atchindje joumbuwela jenyu, jikale joumbuwela jixa. 24Muware eto mawendelo maxa Mulugu apandutchile liye ira nifwalrafwanege na liye, nikayena makalelo apama a ibaribari eto otchena.#4:22-24 muwungule… muware: Ku wonga mawendelo ehu a wanle ali nnga kamiza yovunda. Inafwanela mutu omuroromela Yesu awungule kamiza ya wanle, aware kamiza ixa, ku wonga mawendelo maxa anafuna Mulugu.
25Nona, kakalevo unafuna munyenga nfwaye. Mbwenye kada mutu awongege ibaribari na nfwaye. Tchoira nili jano ja maningo mamohive. 26Mwatakaleliwa, kamutegege. Kamuhiye nzuwa vira mwagalive otakaleliwene. 27Kammuhiye Diyabo kana makalelo ovolowa muwari mwenyu. 28Wenno abetcha, ahiye umbava waye, adowe alabe mabasa a ibaribari na mandaye ira akayena yengo ira adowe anvahe ule unna makatamiho. 29Muwari mwa milomo dinyu kamufwanyeyege jowonga joatakaleliwiha atu mbwenye inafwanela muwongege japama ira afwinyu kalimbihiwege. Muwari mwa jowonga jenyu jatene muwongege japama ira ale anavwa kakokomeziwe.
30Kammukumbanyihe Munemba Otchena wa Mulugu. Tchoira nyo muhudindiwa na Munemba Otchena fiyeda siku nnafuna nyo za womboliwa.#4:30 Kammukumbanyihe Munemba Otchena: Voira Munemba Otchena uli mmaningoni mwa mutu omuroromela Yesu, mutule adowa, airana yotega, inokala nnga unamudowana Munemba Otchena mategelo. Evale Munemba Otchena unokana kumbanya zela joira jaye jile. Pawulo eto ohowonga ira: Tchoira nyo muhudindiwa na Munemba Otchena fiyeda siku nnafuna nyo za womboliwa. Ku wonga roma ora inaroma mutu muroromela Yesu fiyeda siku nnafuna liye womboliwa, Munemba Otchena uli mmirimani mwaye. Kahi ira mutule ategaga, Munemba Otchena unoroma susavo, nari. Nona Munemba Otchena unokana kumbanya undimuwa zela mutu omuroromela Yesu ategaga. (1 Korinto 3:16, 6:15,19) 31Nyo mbwenye muhiye makalelo matene onyunya, uwali, kangana, ruwana, luluvihana. Muhiye eto makalelo matene oidana. 32Kada mutu inafwanela amuirelege nfwaye upama. Kada mutu ankumbanyege nfwaye. Mulevelelanege kada mutu na nfwaye nnga eto Mulugu uulevelenleni liye muwari mwa Yesu Kiristu.#4:32 Mulevelelanege kada mutu na nfwaye nnga eto Mulugu uulevelenleni liye: Ku wonga mutu kanafundja joira jaye moing'ana jinera nfwaye. So mbwenye inafwanela mutu afundje joira jaye moing'ana makalelo Mulugu unawenda liye na hiyo. Sawasawa nnga Mulugu uwanda nilevelela hiyo atu otega, na hiyene inafwanela naalevelelege ale ananitegela. Ku wonga naruwaniwa, kaniwelihede ruwaniwa mbwenye nilevelele. Nione Roma 12:14-21; 1 Peduru 3:9.
Iliyochaguliwa sasa
Efezo 4: iLolo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral