Daniyeli 8
8
Yoroha ya Daniyeli zela nibila vamohi na mbuzi
1Yaka yaneraru yatonga mwene Belisazare, miyo dagali mulombwana Daniyeli dagaonihiwe joroha joroma jile, dohowelela onihiwa jimohi jiwa mmuruni mwaga. 2Muwari mwa jengo jaonihiwa miyo mmuruni mwaga, akala nnga dili sidadi ya Suzani, pandi umangiwe ja umwene ja porovinsiya ya Elamu, dagali muhindje wa Ulayi. 3Mwa enne dagavenyihile meso aga diing'anaga, mobaranya dohoonaga nibila na mulombwana nagaimenle tcherela ya muhindje. Nibila nne nanna manyanga menli. Manyangale kali olapetchetcha. Mbwenye muwari molapa mule, nohokalavo nnyanga nimohi nali nolapa bure mukwaranya nfwaye. Eto nnyanga nolapa nne nali nowelela mela nfwaye agamelile. 4Muwari moing'ana, dohoonaga nibila nne nitamangaga muwari moagondjiha atu a mavirelo wa nzuwa, nomala pandi ya norti, nomala pandi ya suli. Kalivo mwanainyama uli watene awanda wana na liye fiyeda mugondjiha. Kalivo awanda avunela aliba gondjihiwa. Liye oirana yatene yafuna liye eto kopolo daye dodowave musogolro.
5Mwa enne miyo diumbuwelaga ejile, mobaranya dohomuonaga nakoro wa mbuzi akumelaga mavirelo wa nzuwa, aviraga ilambo ya vati ahasakwinyile teya. Mbuzi ile yohokana nnyanga nooneya pama vari va meso aye. 6Mbuzile yohotamangaga na uwali wohokala wa masika na kopolo izaga wa nibila nanna manyanga menli nne, neno daonne miyo nagaimenle wandamelana mwiko mule. 7Dohoonaga mbuzile ifiyaga wandamelana vafwanyeya nibila nne, no takaleliwa waye wene. Evale ohobubudaga nibila nne, liye mala kotolawo manyangaye amenlene anne. Evale nibila nne kananna kopolo ira niwande vivunela. Evale mbuzile yohogwiheda nibila nne vati, liye ninyingala na manyalo aye. Eto kalivo afuna za ira avunele nibila nne muwari mwa kopolo da mbuzi. 8Mwa enne mbuzile yohokalave yolimbene na makalelo ohokala a masika. Mbwenye yagalive muwari mwa kopolo daye, nnyanga naye nlukulu nne nohokotoliwagavo. Eto vamalroni va nnyanga nimohi vale, vohomelaga manyanga mamohiwa mannayi olapa, anno kaulukula kalimbelaga pandi dannayi dene da ilambo.
9Eto mwa manyanga mannayi ale, vannyangani nimohi vohomelaga nnyanga nimohi niwa ning'ining'ini, aliwa ulukula na makalelo ohokala a masika nilimbelaga pandi ya suli na pandi ya makumelo wa nzuwa eto nilimbelaga ilambo yotitimihiwa ya Izarayeli. 10Evale nnyanga nne nohoulukulaga ante aliwa fiyeda nikuru na zulu.#8:10 nikuru na zulu: Mazwala ba mazu orutcha tapulela. Afwase anawongiwa ba atu a Mulugu. Nione Daniyeli 12:3. Ku tapulela ira nnyanga neno nnokana kopolo doapa atu a Mulugu aye. Eto nagafiyile zulu ule, nnyanga nne nohamoriheda vati atu amohiwa kafwanyeya muwari mwa nikuru na zulu nne vamohi na nyenyedi dimohi diwa. Jagamorenle vati, liye ohonyingalelaga. 11Na ibaribari nnyanga nne nohoviulukulihaga fiyeda jofuna lingana na musogolrelri wa nikuru na zulu nne. Nnyanga nne nohomaliha mikuto dotumeya da malambo matene daveleliwetcha wa musogolrelri ule eto nohokarakasulaga nimburo naye notchena. 12Na mwasa wa jotega ja atu a Mulugu, mikuto dotumeya da malambo matene#8:12 mikuto dotumeya da malambo matene: Malambo a mundulrimu Mulugu ohawandela aIzarayeli ira kada siku, pandi ya mabebehi na tchiguwo, kavelelege mukuto wa nibila na utu na azeti. (Numero 28:3-6) vamohi na nikuru natene na wewule nohovahediwa mmandani mwa nnyanga nne. Nnyanga nne nohotukulaga ibaribari, moriheda vati.#8:12 Navwa ira: Nnyanga nne nohotukulaga ibaribari, moriheda vati, ku wonga ira mwene ule unerege funa joaholotcha atu ira kahawandege hara ibaribari. Eto nodowave sogolro nigondjihaga.
13Noira eno, dohovwaga mutu mmohi otchena awongaga. Evale mutu otchena mmohiwa ohonfukaga wenno awongaga, liye ira: <<Kodi jengo jionihiwe nfwihu zela goma wa mikuto dotumeya da malambo matene eto yotega yomaliha mabasa a Nyumba ya Yehova eto nyumbele na nikuru na zulu jinyingaliwaga, jatene ejo jinafuna jimale malambo mangasi?>> 14Mwa enne dohonvwaga mungelro nfwaye ule adiwandelaga eraga: <<Jeji jinaza jimale vagamanle mahiyu na ntana 2.300.#8:14 mahiyu na ntana 2.300: Mazwala podi za tapulela malambo 2.300 owu hehi mikuto da mahiyu na ntana 2.300, ku wonga malambo 1150. Era eno Nyumba ya Yehova inotchenihiwa akoka!>>
Mungelro Gabiriyeli ohomuwandela Daniyeli yotapulela ya yoroha
15Miyo Daniyeli dagaonihiwe jejile, dohosakaga iziwelamo. Mwa enne ukala azilege vasogolro vaga akalaga nnga mutu. 16Evale dohovwaga nizu na mutu nakumelaga mmambalo mwa muhindje Ulayi mule, akuwaga eraga: <<Gabiriyeli, kamuiziwihe jatene eji mutula!>> 17Mwa enne Gabiriyeli ohozaga adiwandamelaga vevo vaimenle miyo. Evale miyo dagamuonile, dohokagana ova wohokala wa masika eto dohogwelaga vati na koveni. Mbwenye liye ohodiwandelaga eraga: <<Kavuruwana we mwana wa mutu. Inafwanela uiziwe ira jejo jionihiwe we, jinawonga zela tempu yogomiheda!>>
18Evale liye awongaga na miyo, dohogonelagavo kove dohokala da masika dagaing'anihileve kove yaga vati. Eto liye ohodihindaga, liye diimeliha. 19Eto ohodiwandelaga eraga: <<Kaing'ana. Miyo nnafuna duiziwihe uwali wa Mulugu unafuna za ireya malambo ogomiheda! Mwasiwa jeji jinafuna jize jiireye malambo ogomiheda nnga mwabalrele Mulugu wanle! 20Nibila na mulombwana naonne we nne, neno nanna manyanga menli, manyanga ayo ba amwene a Mediya na Perisiya.
21<<Mbwenye nakoro wa mbuzi ya mawoya umuonne we, gu umwene wa Geresiya. Eto nnyanga nindimuwa nafwanyeya vari va meso aye, gu mwene oroma. 22Zela nnyanga nimohi nakotoliwe eto vamalroni vaye kamelagavo manyanga mannayi, ku tapulela ira mwene oroma ule unokotoliwa eto vamalroni vaye vinoza vivenye amwene annayi a munlogoni mwaye, kagane umwene waye, kakale maumwene mannayi. Mbwenye kopolo diwa kannakala nnga kopolo da mwene oroma ule. 23Magomelo wa umwene wewa wawandamelaga, joira jiwa jabure jaroma fiyavo pama pama, unoza avenye eto mwene mmohiwa owopiha eto mwinnya owonga ja ungongomwa. 24Liye utongi waye unoza ukale wa kopolo, mbwenye kopolo diwa kannakala daye. Liye unerege tatamula bwanyula wohokala wa masika, unerege atolotcha atu a kopolo na atu otchenihiwa. Liye unerege irana jatene jinafunege liye. 25Muwari mwa joxangaxanga jaye, jonyenga jaye jinerege muwendela pama, jidowegeve musogolro. Liye vamentoni vaye unavionege nnga mutu ohokala wa masika. Unoatolotcha atu oindjiva morurumutcha mwene. Eto unovenya ira awane na Musogolrelri wa Asogolrelri Atene. Mbwenye unoza akotoliwe. Eto kotoliwa waye unafuna mukotola kanakala mutu. 26Eto zela ja mahiyu na ntana okwakwana 2.300 uwandeliwe we, tchi yengo ya ibaribari. Weyo mbwenye kumuwandele mutu uli watene zela jeji. Mwasiwa jeji kahi jengo jinafuna ireya tchineneva. Jinaireya malambo madjindji a sogolro.>>
27Kagamanle diwandela enne, miyo mulombwana Daniyeli dohokalaga lohulo eto dohomalaga malambo madjindjene dagali murenda. Noira eno, dohovulumuwaga, miyo roma labaga mabasa a mwene. Mbwenye masiki davulumuwileve, dohokalave okukumuwene zela joroha daona miyo jile eto kadawanda onelramo yotapuleliwa.#8:27 kadawanda onelramo yotapuleliwa: Daniyeli ali mwinnya otapulela joroha. Fwanyeya ira mungelro wa Mulugu eriwa Gabiriyeli ohoza wa liye ira amuwandele yotapulela ya yoroha yaye. Masiki eno, Daniyeli kawandile tapulela jatene ja yoroha yenno. Mazwala anatapulela ira Mulugu kananivaha yotapulela ya joroha jatene jinakana hiyo. Inafwanela niwendegena mazu a Mulugu anafwanyeya mBibiliyani hiyaniha no umbuwela ira joroha jinoniwandela jengo pwi. Tchoira joroha jimohi jiwa, Mulugu unonikuwa yotapuleliwa. Afuna, unoniwandela yotapuleliwa sogolro. Nione Koloso 2:18-19; Judaji 1:8.
Iliyochaguliwa sasa
Daniyeli 8: iLolo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral