Daniyeli 5
5
Pwando ya mwene Belisazare
1Siku nimohi mulombwana Belisazare, mwene wa Babiloniya, ohosakanyaga pwando. Liye aitana andimuwa andimuwa a mwilamboni mule fiyeda atu 1.000, liye roma ng'wa vinyu na ale aaitanile liye ale. 2Mwa enne mwene Belisazare agang'wile vinyu ule, oharumaga atu ira kadowe kazena makopo na matijela a oru na a parata jejo babaye Nabukodonozore jakumihile liye Nyumba ya Mulugu mwilamboni mwa Jeruzalemu ira liye vamohi na andimuwaye atene na ahiyanaye vamohi na amwendaye kang'welegemo vinyu. 3Evale aliwa kohozagana kopo da oru dedo dakumile Nyumba ya Mulugu mwilamboni mwa Jeruzalemu, aliwa roma ng'welamo vinyu. 4Kohong'waga vinyu katamalelaga amilugu ewa a oru, a parata, a mukuwa, a momba, a mitengo, na amilugu ewa a mabwe.
5Ora imohive yenne morurumutcha mmba mwa mwene mule mohooneyaga jibuno ja ndanda na mutu, roma lremba vantchihini vorebokariwa, nimburo vafiya wareya wa panti. Eto mwene Belisazare ule ohoonaga ndanda nne nilrembaga. 6Mwa enne kove yaye yohotchindjeya muwari moova eto joumbuwela jaye jali jomukukumula. Ohokalaga okukumuwene no ova, liye roma ngurumela mutu watene wenne romela muruni ante mendoni. 7Evale mwenole oharumaga atu mokuwa eraga: <<Kabaranyani tchineneva, mwaadowele aliba ing'ana jomoneya ja zulu, aBabiloniya owonga ja sogolro, na aliba visangwisangwi!>> Evale aliwa kagadoweliwe, mwenole ohawandelaga aliba toto a Babiloniya ale eraga: <<Mutu wenne unawande ileri yenno ilrembiwe va eto awanda diwandela yotapulela iwa, unowarihiwa jowara ja usalru wa kore ya musuzu wa bwanda, agali usalru wa peresu yokwima eto unowarihiwa kolare wa oru munikohini mwaye eto unokala mundimuwa waneraru muumweneni mwaga.>>
8Mwa enne kohovolowaga aliba toto atene a mwene, mbwenye kalivo nne mutu mmohi awandile ileri amala amutapulela mwene. 9Na mwasa wenne, mwene Belisazare ohokalaga okukumuwene, kove yaye yohotchindjeya muwari moova. Eto andimuwaye atene kohokalaga okukumuwene. 10Mwa enne mwenole Belisazare muhiyanaye na mwasa wa jowonga ja mwenole na jowonga ja andimuwale, ohozaga liye volowa mmba mwafwanyeyaga atu kadjaga pwando mule. Agavolowile, ohomuwongagana mwene Belisazare eraga: <<So mwene, umwene wenyu udowegeve sogolro kala no kala. Kamukukumuwe zela joumbuwela jenyu eto kove yenyu kikale yotchindjeyene. 11Mwasiwa muumweneni mwenyu ukalamo mulombwana mmohi unna munemba wa amilugu otchena. Eto liyene tempu yatongetcha babinyu Nabukodonozore, mulombwanoyo ooneya nnga mutu ozaleliwa wareya na toto, no iziwetchetcha, nnga iziwetchetcha wa amilugu.#5:11-12 mutu ozaleliwa wareya na toto, no iziwetchetcha, nnga iziwetchetcha wa amilugu: Ayo ba makalelo awonga mwadi mwene muwari mohoiziwa ibaribari. Tchoira akuda Babiloniya kafunaga wonga zela zelru da Daniyeli, kawongetcha ira liye ukana munemba wa amilugu. Nione 4:8,9,19, 5:11-12,14,23. Eto babinyu, mwene Nabukodonozore ohowanda muhambiha liye kala mundimuwa wa ang'anga okwima, aliba ing'ana jomoneya ja zulu, aBabiloniya owonga ja sogolro, aliba visangwisangwi. 12Mwasiwa mwa tempu yenne liye ohokana munemba wapama no iziwetchetcha no onelramo ira awande tapulela joroha nari masula jengo jorutcha onelramo eto owanda maliha jofuka jakana mutu. Liye gu Daniyeli wenno mwene anvahile liye nzina na Beltesazare. Mmuitane tchineneva, liyene aza, unowanda tapulela jejo jilrembiwe vantchihini va.>>
Daniyeli ohotapulela jolremba jotikiniha
13Mwa enne kohomudowelaga Daniyeli, aliwa muzana vamentoni va mwene. Agazile, mwenole ohowongaga eraga: <<Kodi weyo uli Daniyeli wenno unafwanyeya muwari mwa akuda Juda anno babaga aatukunle liye mwilamboni mwa Juda? 14Miyo nnovwetcha kawongaga zela weyo ira munemba wa amilugu uli na weyo eto nnovwetcha ira weyo unofwanyeyana wareya, iziwetchetcha, na zelru dohokala da masika. 15Miyo dohaitaniha aliba toto, aliba visangwisangwi ira kawande ileri jejo jilrembiwe eto kadiwandele yotapulela iwa. Mbwenye aliwa kagazile, nne mmohi kalivo uwandile tapulela mazu kalrembiwe ale. 16Miyo dihivwa zela weyo ira unowanda tapulela jengo eto unowanda maliha jofuka jinakana atu. Mbwenye tchineneva eni miyo nnauwandela ira weyo wawanda ileri yenno ilrembiwe va eto uwanda tapulela, unowarihiwa jowara ja usalru wa kore ya musuzu wa bwanda, jagali jowara ja peresu yokwima eto unowarihiwa kolare wa oru munikohini mwawo. Eto unokala mundimuwa waneraru muumweneni mwaga.>>
17Evale mulombwana Daniyeli ohowakulaga awongaga vamentoni va mwene kwi: <<Mivaho datene dedo dikale denyu, jotambilriha jenyu jo mwaavahege atu amohiwa. Miyo mbwenye nnafuna diileri jejo jilrembiwe va eto nnouwandelani yotapulela iwa. 18So mwene, Mulugu Okwaranya Jatene ohonvaha babinyu Nabukodonozore umwene na undimuwa na upama vamohi na kopolo. 19Atu a malogo matene, vilambo datene na viwongelo datene kongurumela eto koova vamentoni va mwene Nabukodonozore na mwasa wa undimuwa Mulugu anvahile liye! Eto mwene Nabukodonozore ompa wenno afuna liye mpa eto okoya ingumi ya wenno anfuna liye. Eto omuulukuliha wenno anfuna liye eto malringana wenno afuna liye muyeviha, omuyeviha! 20Mbwenye agaromile vitukulela mmirimani mwaye eto aroma vanda murima muwari movititimiha, ohotitihiwa vampandoni eto ohowakiwa undimuwa wanna liye! 21Noira eno, ohotamangihiwa vari va atu. Joumbuwela jaye johokalaga nnga joumbuwela ja mwanainyama, liye kalaga vamohi na aburu a mukokolani! Liye ohoroma dja malatchi nnga ng'ombe eto onyetihiwa maningo aye na ningame nokumela zulu ante liye fiyeda iziwa ira Mulugu Okwaranya Jatene uhukana utongi zela amwene atene a mwilamboni ya vati eto unowanda nvaha umwene mutu wenne unanfunana liye!>>#5:21 Mulugu Okwaranya Jatene… unowanda nvaha umwene mutu wenne unanfunana liye: Muwari mwa livuru na Daniyeli nnofwanya fendo pwi dowonga ira Mulugu gunaavaha amwene atene utongi wewa. Masiki muwari mwa atwaye aIzarayeli, nari atu ohokala aJudewu, nari atu ombalra, nari atu ohombalra, Mulugu gunanvaha kada mutu utongi unna liye. Nione 2:21, 4:17,32.
22Daniyeli ohowongagave eraga: <<Eto nyo mwanaye so mwene Belisazare, mwagaiziwileve jatene jejo kamufunile viyeviha. 23Eto nyo muhuirana jompokiha Nabwiya wa zulu. Mwasiwa mohowanda zihavo jengo jalabetcha muNyumbani mwaye, noira eno nyo vamohi na andimuwa enyu atene, ahiyaninyu na amwendinyu, nyo tukula, roma ng'welagamo vinyu! Eto hiya yenno bahi, nyo muhutamalela amilugu enyu a parata na oru, a mukuwa, momba, mitengo na amilugu a mabwe, anno kahanaona, kahanavwa nne kahaiziwile yengo ili yatene. Nyo kamufunile muriheda Mulugu wenno uwandile uvahani mwelra ira muvumege, Mulugu wenno unaukoyani mowenda mwinyu mwatene. 24Liyene guwandile rumiha ndanda nionile nyo nilrembaga vantchihini vale! 25Eto vantchihini vale vilrembiwe eni: MENE, MENE, TEKELI, PARIZIMI. 26Eto yotapulela iwa tchi ila: MENE ku tapulela Mulugu uhukontari malambo a umwene wenyu eto uonne ira malambo a umwene wenyu kohomala. 27TEKELI ku tapulela ira nyo muheliwa vabalansani, mbwenye mufwanyeyile ira kamukwakwanenle. 28PEREJI ku wonga umwene wenyu uhugawiwa, uhuvahediwa akuda Mediya na akuda Perisiya.>>
29Mwa enne mwene Belisazare agavwile enne, oharuma anamalabaye, aliwa muwariha mulombwana Daniyeli jowara ja usalru wa kore ya musuzu wa bwanda, agali jowara ja peresu yokwima eto kohomuwarihaga kolare wa oru nkohini mwaye. Eto mwenole ohonvaha mulombwana Daniyeli ira akale mundimuwa waneraru muumweneni mwaye.
30Siku nimohive nenne mahiyuni uwa mulombwana Belisazare mwene wa aBabiloniya ohopiwaga. 31Noira enne, mulombwana Dariyo nkuda Mediya ohogwelaga vampandoni. Ahambaga umwene ule anna wandamelana yaka 62.
Iliyochaguliwa sasa
Daniyeli 5: iLolo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral