2 Korinto 10
10
Mazu otanda muselu wa kapitulu 10 na 11
Muwari mwa kapitulu 10 na 11, Pawulo unawonga mazu oaruniha ale kafuna jomululuviha. Tchoira kohokalawo anamarumiwa onama kavitukulela vamentoni va aKorinto, aliwa vikalihaga nnga anamarumiwa a ibaribari, aliwa mululuvihaga mulombwana Pawulo. Pawulo afuna awonge mazu ira aKorinto kakayena ibaribari zela imela wa Pawulo vamohi no imela wa atu onamale ira aKorinto kahanyengiwege na atu onamale.
Zela atu onama ale Pawulo ohowonga eraga aliwa ba anamarumiwa onama anno anafwanyeya kagali anamalaba onyenga, anavikaliha nnga anamarumiwa a Kiristu. (2 Korinto 11:13)
Ku wonga atu onamale kawenda muwari mwa atu omuroromela Yesu mbwenye tchali atu omuroromela Yesu. Aliwa kafwanyeya kagali anamalaba a Satana. (2 Korinto 11:13-15)
Pawulo ohawandela ibaribari aKorinto zela makalelo aye
1-2Nyo munaona ira miyo Pawulo dakala na nyo nnakaletcha mutu oviyeviha, mbwenye dakala olapela wene, dalrembaga karta, nnalremba nnga mutu orutcha. Miyo mbwenye nnafuna duvepeni ira mwaumbuwela pwaseya na tangaranga da Kiristu, daza wa nyo kamukayena makalelo oira daona, dikale mutu orutcha wa nyo. Mwasiwa dihikana ibaribari ira daza, nnokala orutcha zela atu anne anaumbuwela ira hiyo nnalaba na kopolo da maningo.#10:1-2 kamukayena makalelo oira daona, dikale mutu orutcha wa nyo: Ku wonga Pawulo afuna aKorinto katwaruwe ahanafiye ira ahakayena mabasa oatonga na makalelo orutcha. Nione 1 Korinto 4:21; 2 Korinto 13:2.
3Tchoira masiki niwendege na maningo, hiyo mbwenye kannawana na kopolo da maningo. 4Tchoira jowanana jinna hiyo kahi jowanana ja maningo, mbwenye ti jowanana jinna kopolo da Mulugu dowanda gondjiha mabazi a Satana.#10:4 Jowanana jinna hiyo… ti jowanana jinna kopolo da Mulugu: Zela jowanana jinawongiwa va, inafwanela nifwanye Efezo 6:11-17 na 2 Korinto 6:7. Fwanyeya ira muwari mwa jowanana Mulugu unanivaha liye, nnowanda gondjiha mabazi a Satana. Ku wonga nnowanda dowa wewo uli atu muumweneni mwa Satana, hiyo laba ira kakumemo, kavolowe muUmweneni mwa Mulugu. 5Hiyo nnotolotcha jowonga na zelru dovitukulela datene nnalabana atu kaahiyihaga afwiwa ira kahaiziwe ibaribari ya Mulugu. Hiyo nnogondjiha youmbuwela ili yatene ira ikale yonvwelela Kiristu.#10:5 Hiyo nnogondjiha youmbuwela ili yatene ira ikale yonvwelela Kiristu. Ku wonga Pawulo afuna atukule joumbuwela jatene johokala pama, agondjihe ira ikale youmbuwela ya ibaribari yonvwelela Yesu Kiristu. Ku wonga akala atu kawonga nkani otelana, Pawulo afuna atu kaiziwe zela telana Yesu unafuna liye. Akala atu katapanya zela mirombwe diwa dobarela ukwa, Pawulo afuna aagondjihe ira kamuroromele Yesu Kiristu. Akala atu katapanya zela ineliwa, Pawulo awonga ira kakayena ibaribari zela ineliwa ofwanela vamentoni va Yesu Kiristu. Ku wonga Pawulo kabalra jawonga makolo a wanle. So liye afuna joumbuwela jatene ja atu jikale jofwanela vamentoni va Mulugu. Pawulo anna kondo ira atolotche jonama jili jatene. 6Mbwenye vwelela wenyu wakala wokwakwanela, hiyo nnokala okozeyene ira nivirege muwari mwa nyo, nitongege yohovwelela ili yatene inafwanye hiyo.#10:6 nivirege muwari mwa nyo, nitongege yohovwelela ili yatene: Pawulo mabasaye ali aiziwiha atu ibaribari ya Mulugu vamohi no gondjiha youmbuwela yatene ira ikale yonvwelela Kiristu. Mbwenye voira akuda Korinto kali atu oiziwa ibaribari ya Mulugu eto kali atu kaoneya nnga atu owenda na youmbuwela yonvwelela Kiristu, Pawulo ohowonga ira liye ali okozeyene ira aasumululege aliba wenda na makalelo ohonvwelela Yesu ira katchindje. Hiyaniha no garati wene agaiziwile zela jotega jaireyavo.
7Nyo munaing'ana makalelo kanna atu undeve bahi.#10:7 munaing'ana makalelo kanna atu undeve bahi: Ing'ana makalelo unna mutu unde ku ing'ana akala uwendjela nari akala uwara pama, wahaumbuwelaga muselu unalaleya liye. Pawulo unanikokomeza ira nahakukumuwele uyesa unna mutu muwari mowara nne muwari molaleya nne muwari moimba. So inafwanela nikukumuwele iziwa akala joira ja mutu na jowonga jaye ti jengo jofwanela vamentoni va Mulugu. Akala ukala muwari mwa nyo mutu unawanda wonga ira: <<Miyo dili wa Kiristu>>, inafwanela aumbuwele eto ira: <<Sawasawa nnga miyo dili wa Kiristu, na aPawulo anne ba a Kiristu.>> 8Akala dawongaga eno nnasimbwa vititimiha zela utongi wehu, miyo kannanyaswa. Tchoira Nabwiya univahile utongi oira nuulukuliheni, hiya ira nutolotcheni.
9Kamuumbuwele ira miyo nnalremba makarta ira mudiovege. 10Tchoira miyo nnovwa atu anawonga ira: <<Makarta analremba Pawulo bonyemela, bokana kopolo. Mbwenye wamuona mutuwa, govuta. Awongaga, jowonga jaye ti jowonga jolramwiseya.>>#10:10 jowonga jaye ti jowonga jolramwiseya: Pawulo kafunne ira atu kamulramwise na jowonga jaye. Tchoira kamulramwisaga Pawulo, ku wonga eto aliwa kohomulramwisa Mulugu mwasiwa Mulugu gwamurumile Pawulo. 11Inafwanela mutu wenno unaumbuwela ejo, aiziwe ira jinawonga hiyo mukartani nagali olapela wene, vamohi na jejo jinawonga hiyo nagagumanne na nyo, ti jimohive. 12Hiyo kannakukumuweletcha jovisakulrelra vamohi na jovihiyanihaga na atu amohiwa kalaga nnga jejo jinakukumuweletcha atu anno anavikalihetcha nnga atu ohokala a masika. Aliwa mbwenye kavipimaga oka oka, kavihiyanihaga oka oka, kiiziwile inera atu.#10:12 kavihiyanihaga oka oka, kiiziwile inera atu: Atu onama kampeta Pawulo kohokana jowonga jidjindji muwari mwa aliwa oka vihiyanihagavo iraga kodi mutu guvi uli mundimuwa kwaranya. Pawulo mbwenye kaanna tempu yovihiyaniha liye na atu amohiwa kavihiyaniha na afwiwa. Mwasiwa liye abalra ira rumeliwa nnga mutu olaba pama kahi viulukuliha mbwenye ku ulukulihiwa na Nabwiya Mulugu. Nione 2 Korinto 10:18; 1 Korinto 4:3-4.
13Hiyo kannavititimiha kwaranyiha marka. So nnavititimiha zela mabasa olaleya, Mulugu univahile liye bahi. Tchoira muwari mwa mabasa ehu olaleya Mulugu univahile liye, nihiwanda fiya wa nyo. 14Nona navititimiha zela ulaleyani wehu, kahi ira nihikwaranyiha marka, tchoira oroma ulaleyani Muselu Wapama wa Kiristu ali hiyene.#10:14 oroma ulaleyani Muselu Wapama wa Kiristu ali hiyene: Pawulo kafunne ira aKorinto kadiwale ira aalaleyile ali liyene, tawiha ira anaze kamuhiye liye, kadowe kaaharege atu amohiwa olaleya jonama.
15-16Hiyo kannakwaranyiha marka, hiyo roma vititimihaga zela mabasa alabile atu amohiwa. So yofuna yehu ili ira nroromelo nenyu niulukule ira mabasa naromile hiyo laba muwari mwa nyo kadowegeve sogolro. Era eno hiyo nnowanda dowa laleya vilambo dimohi diwa nnafwanyeya olapela wene na nyo.#10:15-16 nroromelo nenyu niulukule ira mabasa naromile hiyo laba muwari mwa nyo kadowegeve sogolro: Mabasa a Pawulo kali ovalihana nnga munlo. Nroromelo na aKorinto nadowaga sogolro, atu oindjiva amohiwa kerege kana ibaribari zela mazu a Mulugu. Eto aliwa kerege kana kopolo dowanda ahiya ira kadowege sogolro, hiya akukumuwelagave aliwene. Eto Pawulo awongaga ira: hiyo nnowanda dowa laleya vilambo dimohi diwa nnafwanyeya olapela wene na nyo, ku wonga Pawulo kawandege dowa ira alaleye vilambo dimohi diwa aKorinto kahanakale olimbene muwari mwa nroromelo newa. Tapulela ira nikuru na atu omuroromela Yesu nagalimbile, inafwanela kaoneye atu okumela nikuru neno odowiha mazu sogolro. Inafwanela eto maliba laleya akayena makalelo oalimbiha ale analaleyiwa hiyaniha no umbuwela ja sogolrove. Nairaga eno kannafwanyeyana vititimiha zela mabasa alabile afwihu amohiwene. 17So mbwenye mutu wenne unafuna vititimiha, avititimihe muwari mwa Nabwiya.#10:17 unafuna vititimiha, avititimihe muwari mwa Nabwiya: Ku wonga inafwanela mutu avititimihe zela jinaira liye muwari mwa kopolo da Mulugu hiya kopolo daye. Evale amala wonga zela mabasa alabile liye, afwaye kakayena youmbuwela ira kamutitimihe Mulugu hiya mutitimiha mutuwa. 18Tchoira mutu olaba pama kahi wenno unavititimiha ekave, mbwenye gwenno Nabwiya unamurumela liye nnga mutu olaba pama.
Iliyochaguliwa sasa
2 Korinto 10: iLolo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral