Asat 16
16
Eirukurukore ꞉Timoti Paulo o Silas
1Nebaya Paulo o Silas lkerenket le Derbe neitoki sii aapuo le Lisitira. Netii inie loiteng'eni oji Timoti, oara ng'otonye ntito ee Lyiaudi nairuko Yeso, nera papa lenye loo Lgirriki. 2Kore lolo ooiruko Kristo otii lkerenket le Lisitira o lolo otii Ikoniam, nelimu mbaa supati naaipirita Timoti. 3Naa kore amu keyieu apa Paulo nelo o Timoti, nemurat tankaraki Lyiaudi otii nenia bat, amu keyielo aajo kore papa lenye naa loo Lgirriki. 4Kore naa epuoito aidachaa lolo kerenketi, neitarasaki ltung'ana le nkanisa ootii lolo kerenketi nkitanapat naaimie lkipaareta o larikok le nkanisa e Yerusalem payie eibung. 5Nerrapai nenia anisani to nkurukoto, neponunye ltung'ana mparri pooki.
Eipoto ꞉Nkai Paulo mechomo alikoo te Makedonia
6Neim Paulo o lboitieii lenyena inia kop e Paragia o ne Galatia, amu keibooyie ꞉Ltau Sinyati payie melikoo rerei to nkop e Asia. 7Kore payie enyikaki lkirre le mbata e Masia, nejo entijing mbata e Bitinia, kake neitu eicho laduo Tau Sinyati le Yeso metijing'a inie. 8Neim Masia, nedoyio, nebaki lkerenket le Tiroa. 9Kore kuarie nedol ꞉Paulo to nduata ltung'ani le Makedonia oitache aomon ajoki, <<Talang'u mpaso wou Makedonia tereto iyioo.>> 10Kore eidipa Paulo atoduaa inia duata, nikinyok nabokata aapuo Makedonia, kitoduaa aajo Nkai naipoto iyioo matiliki ninche Lomon Supati teinie.
Eiruko ꞉Lidia Yeso te Pilipi
11Kore payie kinyuototo te Tiroa nikidir meli nikimpidari aapuo lkuran le Samotarase, neikenyu nikipuo lkerenket le Niapolis. 12Nikintoki aapuo te inie Pilipi lkerenket lekue le inia bata e Makedonia otechata ꞉Rroman. Nikiwueni nkuti mperot te inie.
13Kore mparri e Sabato, nikimpung taatua lkerenket aapuo sere, kijo kebaki nikitum nikiomonie. Nikiwueni te inie, niking'asu airorie ntomonok naaotuo tenebo aatumo te inie. 14Kore nabo taatua ninche naa ntomononi naji Lidia naing'uaa lkerenket le Tiatira nera nkamirani ee nankan mugiein naagol nkinyang'a. Neurie ꞉ninye Nkai, nebol Laitoriani nkue enye metining'u lomon ojoito Paulo. 15Neipatisi ninye o ltung'ana le nkang enye, nelej iyioo ajo, <<Kore naa tanaa ikinkena aajo kairuko Laitoriani, woutu naa entewueni ta nkaji ai.>> Neitirrichaki iyioo oleng machom nkang enye.
Eitejewuaki larriponi le jila
16Kore mparri nabo kipuoito nadei ng'oji neomonieki, nenang'are iyioo nkaisiaayiani nabo naitoria ꞉lairirua le naibon. Naa kore apa to nkoibono enye neyaka lkutuaa lenyena dikir kitok oleng. 17Neirukurukore ꞉ninye Paulo o iyioo ebuakita ajo, <<Kore kulo tung'ana naa laisiaayiak le Nkai naisul pooki, nelikita ntae nkoitiei e njeunoto.>> 18Neas ana too mperot kumo ana metogoroi Paulo, neiwuatuwuatakino ilo oirirua nejoki, <<Kore ta nkarna e Yeso Kristo, mpung'u taatua ninye!>> Kore ake inia kata neipung.
19Kore payie edol lolo kutuaa lenyena aajo mekure eata lderro le inia dikir chiaake natumuto, neibung Paulo o Silas, neikirtitoo ana metabaki sokoni netii lkutuaa loo Rroman. 20Kore payie eyau ninche tekue laing'uanak le ilo kerenket nejoki, <<Kore kulo tung'ana naa keyeutua ng'olng'ol ele kerenket lang nera ninche loo Lyiaudi, 21nelikita iyioo mairukurukore lkerreti lemeichiaakino iyioo kira loo Rroman, nimiking'amaa iyioo inia!>>
22Nejing sii ꞉ltung'ana le ilo kerenket ilo arrabal aarare Paulo o Silas, neitoki laaduo aiguanak aajo meitaini ninche nankan, neidong'i. 23Kore payie eidong'i oleng, nenang'akini jila neitaarriyianakini lkitok le jila meirrita oleng. 24Kore payie ening ana, neirriki ninche lgilata le atua jila, nepik pukura lororoi nkejek.
25Kore etaa keaku kiji kuarie, neranyaki ꞉Paulo o Silas Nkai sinkoliotin le nkisisa eomon, neinining'ito lkulie tung'ana oena tenebo o ninche. 26Kore ake inia kata neikirikiro nkop oleng meikirikirai nkitamanyunoto e jila. Nebolo nabokata nkutukie pooki e inia jila, nelaa senke naainikino lolo ltung'ana pooki oena. 27Kore payie echutunye larriponi le jila too njuo, nedol ajo kebolo nkutukie e jila nechutu lalem ajo tara koon amu ketejo keisiga lmampuusi. 28Kake nebuaaki ꞉Paulo ajoki, <<Miar koon, ikitii ene pooki!>>
29Neipotu lkilang'ilang'eta, nekuetiki atua ilo gilata le jila nerriakino tekue nkejek e Paulo o Silas eikirikira. 30Neipung'unyie boo nejoki ninche, <<Lapayiani, nyo sa eyiere naas payie ajeu?>> 31Newoliki aajoki, <<Iruko Laitoriani Yeso, naa ikintejeuni iyie o nkang ino pooki.>> 32Nepuo Paulo o Silas aaliki ninye o lolo pooki otii atua nkaji enye rerei la Laitoriani. 33Neya Paulo o Silas inia kata kuarie aiwuang'ie, neituk nenia arat naatipikaki. Neipatisi inia kata o nkang enye pooki. 34Neitidir nkaji enye, neitoomon aicho ndaa, neng'ida o nkang enye pooki tankaraki nairuko ꞉ninye o nkang enye Nkai.
35Kore payie eikienyu nerewaki ꞉laaduo aiguanak le ilo lkerenket sikarini netii larriponi le jila nejoki, <<Talaai lolo tung'ana mechomo.>> 36Nejoki naa ꞉ninye Paulo o Silas, <<Kejo larikok lo lkerenket payie kilaaya ntae enchom, naaku naa empung'u enchom te seriani.>>
37Kake nejoki ꞉Paulo lolo sikarini, <<Keidong'o ninche iyioo tekue ltung'ana eitu edung'oki iyioo Nkiguana, neirrik iyioo atua jila abaki kira iyioo ltung'ana loo Rroman, eji naa kore taata keyieu ninche nelaaya iyioo meyieloi? Meaku inia! Ncho meotu ninche aalaaya iyioo maipung'o.>>
38Nepuo sikarini aitabaki laaduo aiguanak lolo omon. Kore payie ening aajo kera ninche ltung'ana loo Rroman, neiputukuny oleng. 39Nepuonu aaomon ninche mpalikinoto, neipung'ie taatua jila, neomon payie epuo aing'uaa ilo kerenket. 40Kore payie eipung'u te jila, nepuo nkaji e Lidia, netumo o lolo ooiruko Kristo nerreten ninche, nepuo aaing'uaa.
Iliyochaguliwa sasa
Asat 16: saq
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2021, Bible Translation and Literacy
Asat 16
16
Eirukurukore ꞉Timoti Paulo o Silas
1Nebaya Paulo o Silas lkerenket le Derbe neitoki sii aapuo le Lisitira. Netii inie loiteng'eni oji Timoti, oara ng'otonye ntito ee Lyiaudi nairuko Yeso, nera papa lenye loo Lgirriki. 2Kore lolo ooiruko Kristo otii lkerenket le Lisitira o lolo otii Ikoniam, nelimu mbaa supati naaipirita Timoti. 3Naa kore amu keyieu apa Paulo nelo o Timoti, nemurat tankaraki Lyiaudi otii nenia bat, amu keyielo aajo kore papa lenye naa loo Lgirriki. 4Kore naa epuoito aidachaa lolo kerenketi, neitarasaki ltung'ana le nkanisa ootii lolo kerenketi nkitanapat naaimie lkipaareta o larikok le nkanisa e Yerusalem payie eibung. 5Nerrapai nenia anisani to nkurukoto, neponunye ltung'ana mparri pooki.
Eipoto ꞉Nkai Paulo mechomo alikoo te Makedonia
6Neim Paulo o lboitieii lenyena inia kop e Paragia o ne Galatia, amu keibooyie ꞉Ltau Sinyati payie melikoo rerei to nkop e Asia. 7Kore payie enyikaki lkirre le mbata e Masia, nejo entijing mbata e Bitinia, kake neitu eicho laduo Tau Sinyati le Yeso metijing'a inie. 8Neim Masia, nedoyio, nebaki lkerenket le Tiroa. 9Kore kuarie nedol ꞉Paulo to nduata ltung'ani le Makedonia oitache aomon ajoki, <<Talang'u mpaso wou Makedonia tereto iyioo.>> 10Kore eidipa Paulo atoduaa inia duata, nikinyok nabokata aapuo Makedonia, kitoduaa aajo Nkai naipoto iyioo matiliki ninche Lomon Supati teinie.
Eiruko ꞉Lidia Yeso te Pilipi
11Kore payie kinyuototo te Tiroa nikidir meli nikimpidari aapuo lkuran le Samotarase, neikenyu nikipuo lkerenket le Niapolis. 12Nikintoki aapuo te inie Pilipi lkerenket lekue le inia bata e Makedonia otechata ꞉Rroman. Nikiwueni nkuti mperot te inie.
13Kore mparri e Sabato, nikimpung taatua lkerenket aapuo sere, kijo kebaki nikitum nikiomonie. Nikiwueni te inie, niking'asu airorie ntomonok naaotuo tenebo aatumo te inie. 14Kore nabo taatua ninche naa ntomononi naji Lidia naing'uaa lkerenket le Tiatira nera nkamirani ee nankan mugiein naagol nkinyang'a. Neurie ꞉ninye Nkai, nebol Laitoriani nkue enye metining'u lomon ojoito Paulo. 15Neipatisi ninye o ltung'ana le nkang enye, nelej iyioo ajo, <<Kore naa tanaa ikinkena aajo kairuko Laitoriani, woutu naa entewueni ta nkaji ai.>> Neitirrichaki iyioo oleng machom nkang enye.
Eitejewuaki larriponi le jila
16Kore mparri nabo kipuoito nadei ng'oji neomonieki, nenang'are iyioo nkaisiaayiani nabo naitoria ꞉lairirua le naibon. Naa kore apa to nkoibono enye neyaka lkutuaa lenyena dikir kitok oleng. 17Neirukurukore ꞉ninye Paulo o iyioo ebuakita ajo, <<Kore kulo tung'ana naa laisiaayiak le Nkai naisul pooki, nelikita ntae nkoitiei e njeunoto.>> 18Neas ana too mperot kumo ana metogoroi Paulo, neiwuatuwuatakino ilo oirirua nejoki, <<Kore ta nkarna e Yeso Kristo, mpung'u taatua ninye!>> Kore ake inia kata neipung.
19Kore payie edol lolo kutuaa lenyena aajo mekure eata lderro le inia dikir chiaake natumuto, neibung Paulo o Silas, neikirtitoo ana metabaki sokoni netii lkutuaa loo Rroman. 20Kore payie eyau ninche tekue laing'uanak le ilo kerenket nejoki, <<Kore kulo tung'ana naa keyeutua ng'olng'ol ele kerenket lang nera ninche loo Lyiaudi, 21nelikita iyioo mairukurukore lkerreti lemeichiaakino iyioo kira loo Rroman, nimiking'amaa iyioo inia!>>
22Nejing sii ꞉ltung'ana le ilo kerenket ilo arrabal aarare Paulo o Silas, neitoki laaduo aiguanak aajo meitaini ninche nankan, neidong'i. 23Kore payie eidong'i oleng, nenang'akini jila neitaarriyianakini lkitok le jila meirrita oleng. 24Kore payie ening ana, neirriki ninche lgilata le atua jila, nepik pukura lororoi nkejek.
25Kore etaa keaku kiji kuarie, neranyaki ꞉Paulo o Silas Nkai sinkoliotin le nkisisa eomon, neinining'ito lkulie tung'ana oena tenebo o ninche. 26Kore ake inia kata neikirikiro nkop oleng meikirikirai nkitamanyunoto e jila. Nebolo nabokata nkutukie pooki e inia jila, nelaa senke naainikino lolo ltung'ana pooki oena. 27Kore payie echutunye larriponi le jila too njuo, nedol ajo kebolo nkutukie e jila nechutu lalem ajo tara koon amu ketejo keisiga lmampuusi. 28Kake nebuaaki ꞉Paulo ajoki, <<Miar koon, ikitii ene pooki!>>
29Neipotu lkilang'ilang'eta, nekuetiki atua ilo gilata le jila nerriakino tekue nkejek e Paulo o Silas eikirikira. 30Neipung'unyie boo nejoki ninche, <<Lapayiani, nyo sa eyiere naas payie ajeu?>> 31Newoliki aajoki, <<Iruko Laitoriani Yeso, naa ikintejeuni iyie o nkang ino pooki.>> 32Nepuo Paulo o Silas aaliki ninye o lolo pooki otii atua nkaji enye rerei la Laitoriani. 33Neya Paulo o Silas inia kata kuarie aiwuang'ie, neituk nenia arat naatipikaki. Neipatisi inia kata o nkang enye pooki. 34Neitidir nkaji enye, neitoomon aicho ndaa, neng'ida o nkang enye pooki tankaraki nairuko ꞉ninye o nkang enye Nkai.
35Kore payie eikienyu nerewaki ꞉laaduo aiguanak le ilo lkerenket sikarini netii larriponi le jila nejoki, <<Talaai lolo tung'ana mechomo.>> 36Nejoki naa ꞉ninye Paulo o Silas, <<Kejo larikok lo lkerenket payie kilaaya ntae enchom, naaku naa empung'u enchom te seriani.>>
37Kake nejoki ꞉Paulo lolo sikarini, <<Keidong'o ninche iyioo tekue ltung'ana eitu edung'oki iyioo Nkiguana, neirrik iyioo atua jila abaki kira iyioo ltung'ana loo Rroman, eji naa kore taata keyieu ninche nelaaya iyioo meyieloi? Meaku inia! Ncho meotu ninche aalaaya iyioo maipung'o.>>
38Nepuo sikarini aitabaki laaduo aiguanak lolo omon. Kore payie ening aajo kera ninche ltung'ana loo Rroman, neiputukuny oleng. 39Nepuonu aaomon ninche mpalikinoto, neipung'ie taatua jila, neomon payie epuo aing'uaa ilo kerenket. 40Kore payie eipung'u te jila, nepuo nkaji e Lidia, netumo o lolo ooiruko Kristo nerreten ninche, nepuo aaing'uaa.
Iliyochaguliwa sasa
:
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2021, Bible Translation and Literacy