Asat 14
14
Etilikoitie Paulo o Barnabas te lkerenket oji Ikoniam
1Kore apa inia nataase ta Antiok naa keinyiaka sii aasai te Ikoniam. Ketijing'a Paulo o Barnabas atua Sinagogi ee Lyiaudi nelikoo payie eiruk ltung'ana kumo, Lyiaudi o Lgirriki. 2Kake kore lolo Lyiaudi oaatanya eiruk, neinyoyie loreren meibaii looiruko Yeso. 3Newueni Paulo o Barnabas teinie aajo rra elikoo Lomon Supati te mpijan, eirichakino Laitoriani. Neitodol Laitoriani ninche sipata ajo, kore rerei le munyani enye naa kedede aicho ngolon naasie taa nkaik enche nkitodolunot naaitodolu nkitoo enye o mbaa e nking'asia. 4Neoro ltung'ana le ilo kerenket aajing lbata mbata ee Lyiaudi, nejing lkulikae mbata ee Lkipaareta. 5Nenyok Lyiaudi o lolo kulie oreren o larikok lenche aaitam Lkipaareta sina nejo entar too soito metuata. 6Kake kore payie eyielou inia, neisig aaya ltauja lenche, nepuo lkerenket le Lisitira o Derbe o nkopi naamanita inie, naatii mbata e Likaonia, 7nelikoo Lomon Supati te inie.
Etilikoyie Paulo o Barnabas te lkerenket le Lisitira o le Derbe
8Kore apa te lkerenket le Lisitira, naa ketii lpayian otiiwuaki etigiligile leitu aikata elo tee nkejek. 9Naa kore eirorita Paulo, newur nkiyiaa ainining ninye, neing'or ꞉Paulo ilo tung'ani nedol ajo keata nkurukoto naidim neichiunyieki. 10Nebuaaki ajoki, <<Inyuo ntacho tee nkejek inono!>> Nejo dum, neng'asu alo.
11Kore payie edol ltung'ana inia nataasa Paulo, nebuak lturrur to nkutuk ee Likaonia aajo, <<Etodokita iyioo nkaitok te nkitanyanyukoto ee ltung'ana!>> 12Neipot Barnabas aajo nkai enche naji Seus, nejo Paulo Ermes nkae ai aitoki enche, amu kore tee ninche pukurare naa Paulo oirorita. 13Kore nkaji e inia ai naji Seus naa ketii oriong e ilo kerenket. Neyau ꞉laitainoni lenye la lasar lmong'i o ntapuka naairina tee mbene nkutuk e ltim payie eitai lasar tenebo o ltung'ana, aaitaki Paulo o Barnabas. 14Kake kore payie ening lolo Kipaareta inia, nekij nankan nekuetiki lolo tung'ana ejoito, 15#Nai 20:11; SNk 146:6<<Lolewa, aanyo payie iasitata ana? Kore iyioo naa ltung'ana ake kira tana ntae. Ikitilikita ntae Lomon Supati, payie ing'uaa kuna aitok nemeata tipat, nimbelekenyakinono Nkai naichu naitibira chumata o nkop o mpaso o ntokitin pooki naatii. 16Kore too ntowuon naaicha, naa keichoo loreren meima nkoitieii enche, 17kake keitodolua ake koon nkata pooki easita mbaa supati. Keichoo ntae nchan naing'uaa keper, neiteleng larin neitiemu ntae ta ndaa, neiput ntae ng'ida ltauja.>> 18Kake kore abaki eirorie ꞉Paulo ninche aiko nejia, pecheu eibooitie lolo tung'ana eitu eitaki ninche lasar.
19Nepuonu lkulikae Yiaudi ta Antiok o Ikoniam nerrepaki lolo tung'ana metara Barnabas o Paulo. Nenang Paulo aar too soito, neikurtutaa aaipung'ie taatua ilo kerenket ejo ketua. 20Kake kore payie epuonu looiteng'eni aaigilu ninye, neinyuototo nerrinyo alo ilo kerenket. Neikenyu nelo o Barnabas, lkerenket le Derbe.
Etuchukote Paulo o Barnabas Antiok e Siria
21Kore payie elikoo Paulo o Barnabas Lomon Supati te Derbe, neaku lkumo looiteng'eni, nechuko ninche aailiep aapuo Lisitira neitoki aapuo Ikoniam o Antiok e Pisidia. 22Neitogol ninche ltauja loo lolo ooiteng'eni aarreten payie ewueni taatua inia nkurukoto ejoki, <<Meata ajo mikiimaa atua mbaa naagol oleng payie kijing atua inia nkitoria e Nkai.>> 23Negelu ꞉Paulo o Barnabas larikok tee nenia anisani neen nkutukie aaomonoki, nepiki atua nkaina e Laitoriani ilo otipika ꞉lolo arikok nkurukoto. 24Neimaa Pisidia, nepuo aabaki mbata e Pampilia. 25Kore payie eidip aatilikoi Lomon Supati te lkerenket le Perga otii inie, nedoyio aapuo lkerenket le Atalia.
26Neitoki aapuo te inie te meli, nelang'aki Antiok e Siria. Naa te ilo kerenket apa etipikaki ninche nkaina e Nkai, meing'ura ninche to munyani enye payie etum aataas ilo siaai oidipa. 27Kore payie ebaki ninche inie, neiturrurru nkanisa pooki tenebo, neliki ntoki pooki naitaasa ninche ꞉Nkai, neliki aajoki, ketoboloka ꞉ninye lkulie oreren nkoitiei payie etum aairuko laitoriani. 28Nebik te inie aajo rra o looiteng'eni.
Iliyochaguliwa sasa
Asat 14: saq
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2021, Bible Translation and Literacy
