Asat 11
11
Etong'oroyie Petero koon
1Nening Lkipaareta o lkulie ooiruko Yeso ootii mbat pooki e Yudea nchere, ketang'amaitie abaki ltung'ana lamara loo Lyiaudi rerei le Nkai. 2Kore payie eiliep Petero alo Yerusalem, nekusakan lolo ꞉Yiaudi ooiruko Yeso 3aajoki, <<Eji ichomo iyie nkaji ee ltung'ana leiching'a ninya ndaa o ninche!>>
4Kake neng'asu Petero anyaki ninche mbaa ana neikuna payie easai ejoki, 5<<Kaomonito apa te lkerenket le Yopa, naikonji atuwuana kaidetdet, nadol ntoki natuwuana nanka sapuk naitodoutae nkop eing'uaa chumata eibung'utae sarkuda pukura oong'uan, nelotu anyiku natii. 6Kore payie aaing'or atua asipu, nadol nkajijik pooki ee suom o nee ng'uesi naaju o naasipa, netii mpukunot pooki ee nkueeny. 7Naning ltoilo laajoki, <Petero inyuo, tara tama.> 8Kake najoki, <Laitoriani manya hooyia! Amu eitu aikata apik nkutuk ai ntoki nemeichiaakino nenyae o nemeisupat.> 9Naaitoki ilo toilo ooing'uaa chumata ajoki nkata e are, <Kore ntoki pooki naitaa ꞉Nkai supat, naa mijo mera supat.> 10Neasaia ana nkatitin uni, neyiatari taa inia anka o ntoki pooki natii aachuk chumata.
11<<Kore ake inia kata nebau lewa okuni inia aji nawuenie, laairruakaki eing'uaa Kaisaria. 12Naajoki Ltau Sinyati mairukurukore ninche maata lng'ach. Naairukurukore aitoki nanu kulo alachera ile, nikipuo aajing nkang e ilo tung'ani oirriwua ninche. 13Neliki iyioo ajo ketoduaa ꞉ninye lmalaika eitache taatua nkaji enye ejoki, <Rruai ltung'ana Yopa meeipotu Simon oitokini aajo Petero, 14naa ikiliki ꞉ninye lomon likintejeu iyie o nkang ino pooki.>
15<<Kore payie ang'asu airo, nedoki ninche ꞉Ltau Sinyati ana neikunakine apa iyioo ta ng'asunoto. 16#Asat 1:5Kore inia kata naparru natejo apa Laitoriani, <Keipatisa Yoana ta nkare, kake keipatisi ntae ta Ltau Sinyati.> 17Amaa naa tanaa keichoo ꞉Nkai ninche inia kichooroto ana naichoo apa iyioo payie kiruk Laitoriani Yeso Kristo, ng'ae naa ara nanu payie aany inia nayieu Nkai?>>
18Kore payie ening ninche ana, neing'uaa long'unyung'unyi neisis Nkai ejo, <<Keichoo naa ꞉Nkai ltung'ana lamara loo Lyiaudi meirriidu neibelekenya payie etum nkichon nemeiting.>>
Nkanisa natii Antiok
19 #
Asat 8:1–4
Kore apa lolo pooki oaatasachari aaisig tankaraki sina oitamitae looiruko Yeso, oatang'asua payie eri Sitepano metua, nepuo metabai nkop e Penisia o lkuran oji Saipiras o lkerenket le Antiok. Nemeatae hoo ltung'ani otilikita rerei le Nkai mara ake loo Lyiaudi. 20Kake kore lewa lbata loo lolo tung'ana ooing'uaa apa Saipiras o Kirene, oochomo Antiok, neng'asu aaliki ltung'ana loo Lgirriki Lomon Supati la Laitoriani Yeso. 21Naa ketii nkaina e Laitoriani tenebo o ninche, neiruk ltung'ana kumo oleng neibelekenyakino Laitoriani.
22Kore payie ebaki ele rerei nkanisa natii Yerusalem, neirruaaya ꞉ninche Barnabas mechomo Antiok. 23Kore payie ebaki ninye inie, nedol inia nataasa Nkai to munyani enye, neng'ida neitogol ninche pooki payie emut nabo taa ltauja lenche aawueni taatua Laitoriani. 24Kore apa Barnabas naa kera ltung'ani supat, obore Ltau Sinyati o nkurukoto. Neponikino ltung'ana kumo oleng atua ilo turrur la Laitoriani.
25Neinyuototo Barnabas alo Tarso ayiaya Saulo, 26kore payie etum, neya ninye Antiok. Netumore ninche nkanisa lari obo, neiteng'en ltung'ana kumo oleng. Naa ta Antiok apa eipotoki tekue looiteng'eni le Yeso aajo Le Kristo.
27Kore tee nenia perot, nepuonu loibonok le Nkai ooing'uaa Yerusalem Antiok. 28#Asat 21:10Kore lobo lenche oji Agabas, neinyuototo aibonu eutaa Ltau Sinyati, ajo kelotu nkolong kitok nkop pooki ee Rroman. Naa ketabayie apa ana te nkitoria e Kilaudio. 29Nechamaa looiteng'eni aajo kerewaki lalachera o nkanachera enche naatii Yudea reto, nemeata tee ninche lemeitai te nkidimata enye. 30Neas ninche inia natamakinete, neitanap Barnabas o Saulo inia reto meeyaki lpayiani le nkanisa.
Iliyochaguliwa sasa
Asat 11: saq
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2021, Bible Translation and Literacy
