มัดทิว 9
9
เยซู จวย ครำ แว็ล
มาระโก 2:1-12, ลูกา 5:17-26
1ทาเน เยซู ก็ พระ แอ็ม อัห นัน นำ เคิบ ลูกนอง ก็ ต็อก เฮือ คาม นอก วัล เจิง ออ 2เจ็นนัน ก็ มี ครำ มี ปึง นะ อัห งโกง ซับ ครำ อำมาพาด มี ล็อง ระ เยซู รักซา อัห งโกง ซับ นำ มด ตึง มเบิน ตี นำ อวย ออ นัน เยซู เม็จ อัห ซับ ล็อง นะ ระ ออ รักซา นำ ก็ เคาใจ เค็ย อัห กิว เจือ ออ ซีเละ เยซู ก็ ไล ครำ อำมาพาด นัน คือเน “เลาะใจ นทึห เตาะ ควัน เอิญ ญ็อก แอ็ม ตี ลุห มัห แลว เอิญ ไอ มี ทือ ลุห มัห เตาะ” เยซู อัง
3ทาเน ก็ มี อาจาน ไล กด เอาซาง แกด ล็อง อัห โตะ ตัก นัน อัห โตะ ปัง เยซู อุ ตัก นัน เลิม อัห เม็จ เยซู เค็ย ญ็อก แอ็ม ตี ลุห ครำ อำมาพาด นัน อัห ก็ กึด ใน ใจ ออ คือเน “บัห เยซู เน นำ โป ดูทูก เอาซาง ซีเละ เอาซาง มี ล็อง เดียว ตี ญ็อก แอ็ม ตี ลุห ครำ กุญ” อัห กึด จังเน
4อัห กึด จังนัน เยซู ก็ เม็จ มด นำ ก็ ซ็วน อัห คือเน “เอ เป็น ตัก ซีวะ แป กึด ไอ มี เลาะ ฮุนนัน ไอ มี แคระ ดาย 5-6เอิญ เน ตี เอาซาง ระ เกิด เป็น ครำ ตัก โลก เน เอิญ มี แร็ง มี อำนาด ญ็อก แอ็ม ตี ลุห ครำ กุญ ซำรับ เอิญ เน ไอ มี ซีวะ ญาก เตาะ เอิญ ญ็อก แอ็ม ตี ลุห อัห ก็ กุญ เอิญ ระ ล็อง เน ร็อห ญ็อง นจาง เริล ก็ กุญ ไอ มี ญาก เตาะ มานะ เน เอิญ แอง มี ยาง ระ แป เม็จจึด เค็ย เอิญ มี แร็ง มี อำนาด ญ็อก แอ็ม ตี ลุห ล็อง เน กุญ” เยซู อัง เจ็นนัน เยซู ก็ มบิด มัด ดอม ครำ อำมาพาด นัน ลด ไล นำ ร็อห ญ็อง เพล็ว มเบิน วัล เจิง 7ล็อง นัน ก็ ลด ร็อห ญ็อง นำ ก็ นจาง วัล เจิง 8ปึง อัห เม็จ เยซู จวย ล็อง นัน อัห ก็ เลอะ นเจิก เลอะ งึด อัง เยซู มด อัห ก็ ลือ เอาซาง ตี นำ ระ ครำ มี แร็ง มี อำนาด แอง มอก นัน กุญ
เยซู มพอล มัดทิว เริล เคิบ ออ
มาระโก 2:13-17, ลูกา 5:27-32
9มี มี งิ นัน เยซู ก็ นจาง เริล นำ เม็จ เอิญ เน เอิญ ซือ ตัก มัดทิว#ค 9 มัดทิว เน ซือ ตัก “เลวี” วัล เอิญ เน เป็น ครำ เก็บ พาซี อน ตัก รัดทะบาน โรม เอิญ คุด อุ ตัก ดาน เก็บ พาซี นัน เยซู ก็ มพอล เอิญ เริล เคิบ ออ เยซู ไล เอิญ ฮุนเน “เอิญ มพอล มัห เป็น ลูกนอง เอิญ ดาย มัห เริล เคิบ เอิญ นอ” เยซู อัง เอิญ เม็จ เยซู มพอล ออ จังนะ แลว เอิญ ก็ ร็อห เริล เคิบ เยซู
10แทะ นัน วัล เอิญ ก็ มพอล เยซู เคิบ ลูกนอง นำ โตะ ป็อง จะ ตัก เจิง เอิญ เอิญ ก็ มพอล ครำ ซอ ดก ล็อง โตะ ป็อง จะ เลิม นัน มี ครำ เก็บ พาซี แด มี ครำ ซอ ตี ไอ มี บอ แอง ตาม กด ครำ ยิว ครำ ยิว อัห เค็ย ปึง เน เป็น ครำ ลุห จ็อง เอิญ มพอล อัห โตะ ป็อง จะ ตัก เจิง ออ เลิม มด 11ทาเน ครำ ฟาริซี อัห เม็จ เยซู ป็อง จะ เลิม เคิบ ครำ ตี อัห เค็ย เป็น ครำ ลุห นัน อัห เม็จ นำ ป็อง จะ เลิม เคิบ ครำ เก็บ พาซี นัน อัห ก็ ซ็วน ลูกนอง เยซู คือเน “เอิก ซีวะ เยซู จบ ป็อง จะ เลิม เคิบ ครำ ลุห เคิบ ครำ เก็บ พาซี มอก นัน แอ ป็อง จะ เลิม เคิบ อัห ก็ ไอ มี แคระ ดาย” อัห อัง ลูกา 15:1-2
12-13เยซู เม็จ อัห จ็อก ฮุนนัน นำ ก็ มเบิด ไล อัห คือเน “ครำ เลาะใจ อุ อัห ไอ มี เริล และ มอ ครำ โซะ ซัง เริล และ มอ เอิญ เน ก็ เป็น มอก มอ นัน เอิญ โตะ ตัก โลก เน ก็ เอิญ โตะ จวย ครำ ตี แป เค็ย ลุห เค็ย เพอะ นัน เอิญ โตะ มพอล ครำ ตี เคาใจ นัง ออ ลุห ตี ต็องกาน ระ เอิญ จวย ออ นัน ไอ แมน เอิญ โตะ มพอล ครำ ตี กึด เค็ย นัง ออ เลาะ แลว นัน
ทาเน ก็ มี แญง เอาซาง มี คอ ไล อน ฮุนเน ‘ตี เอิญ ต็องกาน ดก ทีซุด เอิญ ซีรอก ระ แป ตึ อัง นอย แอง ใจ ดัว ซิห นอย เลือง ทวาย ซะ ก็ เป็น เลือง แย็ด วัล’ แญง เอาซาง ไล จังนะ โฮเซยา 6:6
เจ็นนัน ก็ ครอ ระ แป ที นเจ็น แญง เอาซาง คอ เน เลาะๆ แญง เอาซาง คอ เน เค็ย ซีวะ กิว ซำคัน ทีซุด ซีเละ” เยซู ไล ปึง ฟาริซี จังนะ
อำ เอิด เลือง แมะ ซุน เคิบ เลือง เครม
มาระโก 2:18-22, ลูกา 5:33-39
14มี มี งิ นัน ลูกนอง ยอน ตี จุบ อัห ตัก นอก อัห ก็ โตะ ซ็วน เยซู คือเน “ซีวะ ลูกนอง มัห ไอ มี อด จะ อิห ก็ อด จะ ครำ ฟาริซี ก็ อด จะ ซีวะ ลูกนอง มัห ไอ มี อด จะ มอก อิห” ลูกนอง ยอน ซ็วน เยซู จังนะ
15เยซู ก็ ซวัล อัห คือเน “ครอ มเบิด ไล แป เลือง แตงงาน ดาย จู ล็อง ตี โตะ ตัก งาน แตงงาน อัห ก็ ต็อง ซะลอง อุ เลิม เคิบ เจาบาว นัน อัห ไอ มี จบ ตุกใจ เซียใจ เตาะ ไอ มี อัห อด จะ ญาม นัน เตาะ แต กัน มี ครำ โตะ เอิด แอ็ม เจาบาว นัน เริล ญาม นัน ซัง อัห เซียใจ ซัง อัห อด จะ มานะ เน เอิญ ควะ อุ เลิม เคิบ ลูกนอง ออ อัห ก็ ไอ มี จำเป็น อด จะ เตาะ
16เอิญ ครอ มเบิด เลือง ครำ ตาบ โกบ วัล กัน อัห ตาบ โกบ อัห ไอ มี เอิด พา แมะ ตาบ โกบ เครม เตาะ พา แมะ นัน กัน แอ พุห แลว ก็ อี งคด อี แอง ระ โกบ เครม นัน นเท็จ จ็อง กวา เครม วัล 17เลือง ปุจ องุน ก็ เมือนนอย กัน มี ปุจ องุน แมะ ก็ ไอ มี จบ เลาะ ซิห ตัก ทง ซวัห เครม เตาะ ทง ซวัห เครม นัน งแกร็บ กัน ซิห ปุจ องุน แมะ ตัก ทง ซวัห เครม นัน ก็ แตก แอ็ม เซีย แอ็ม มด เพาะวา ปุจ องุน แมะ นัน อี พู ปุจ องุน แมะ อัห ต็อง ซิห ตัก ทง ซวัห แมะ ฮัก ทง ซวัห แมะ ก็ ไอ มี แตก ปุจ องุน ก็ ไอ มี เซีย เตาะ เจ็นนัน ก็ อำ เอิด เลือง เครม ซุน เคิบ เลือง แมะ เตาะ ไอ มี เลาะ ดาย”#ค 17 “ทง ซวัห” อัห ทก เอิด ซวัห แกะ ซวัห แปะ แอง ทง ซิห ปุจ องุน อัห นซุ ปุจ องุน ตัก นัน เป็น เล็ห ปุจ องุน
เยซู จวย ครำ ตี เจือ
มาระโก 5:21-43, ลูกา 8:40-56
18เยซู จ็อก เคิบ อัห ไอ มี ตัน จบ ก็ พด โตะ ฮัวนา ฮ็อง พซุม ครำ ยิว มี ล็อง นำ โตะ กราบ ไว เยซู นำ ลด ไล เยซู คือเน “อาจาน ควัน เอิญ เปิล แลว เปิล นำ มันเน วะ กัน มัห เริล คอบ ซิห นัง นำ นำ ก็ รีด เล็ห วัล ครอ เคิบ มัห เริล จวย นำ ดาย” นำ อัง 19เยซู ก็ เริล เคิบ นำ ลูกนอง เยซู ก็ เริล เลิม 20-21ญาม อัห เริล ออ นัน ก็ มี อัหเม มี ล็อง นำ เป็น รึดู ซิบซอง ปี แลว เล็ห เมียม อุ ตลอด ไอ มี งเกิ๊ด เตาะ ทาเน อัหเม ล็อง นะ ก็ ติ โตะ ไล ลอล เยซู นำ กึด เค็ย กัน นำ กุญ เปลิบ ซิห นทัล โกบ เยซู ตีดต็อง นำ ก็ เลาะ เล็ห นำ กึด จังเน เจ็นนัน นำ ก็ ติ โตะ ไล ลอล เยซู ปาโท็ห นำ เปลิบ ซิห นทัล โกบ เยซู 22เยซู ก็ ลด มบิด มัด ดอม นำ เยซู ก็ ไล นำ คือเน “เลาะใจ อุ นทึห เตาะ ดาย ควัน มัห งาล ญอน มัห เจือ เอิญ นัน” เยซู อัง อัหเม ล็อง นะ ก็ ลด เลาะ เล็ห
23ทาเน เยซู ก็ เริล เจิง ฮัวนา ล็อง นัน เยซู เล็ห ตัก เจิง แลว นำ ก็ เม็จ ดก ครำ อุ นัน ทึดๆ นำ เม็จ อัห ญุง นำ เม็จ อัห เญ็ม นำ เม็จ อัห ปิล มบูมบลี รัง ซบ อุ นัน 24เจ็นนัน นำ ก็ ไล อัห ปัด “แป ทอก อุ บัดซะ มด ดาย ควัน แย็ด ล็อง เน ไอ มี เปิล ซัง นำ อวย นไท ฮัก” เยซู อัง ปึง ครำ ดก นัน เม็จ เยซู ไล ออ คือนะ อัห ก็ เซด เยซู 25แต เยซู ไล อัห ปัด แอ็ม มด แลว อัห ทอก ปัด อุ บัดซะ มด แลว เยซู ก็ กุด ฮ็อง ตี อัห ระ ซบ ควัน แย็ด นัน เยซู ก็ ทาก ที นำ ร็อห นำ ก็ ร็อห ญ็อง 26แลว เยซู แอง ระ อัหเม ล็อง นัน รีด เล็ห แลว อัห ก็ เลอะ เม็จ คาว เลือง เน ทัว มด
เยซู จวย ครำ บอด มัด เปียะ ล็อง
27แลว เยซู จวย อัหเม ล็อง นัน รีด เล็ห แลว นำ ก็ ทอก เริล ออ เจ็นนัน ก็ มี ครำ บอด มัด เปียะ ล็อง เคริบ เยซู เริล ปาม ก็ งกรอ เยซู จวย ออ ปาม งกรอ แร็งๆ คือเน “ควัน งา พะเจายูฮัว ดาวิด เฮย ครอ ตึ อัง เยอะ ดาย”#ค 27 ตี อัห เค็ย เยซู เป็น ควัน งา พะเจายูฮัว ดาวิด ซีแล็ม เค็ย นำ เป็น พะเจายูฮัว ตี เอาซาง ซันญา ระ อน นัน ดอม มัดทิว บด ที 1:20 ปาม อัง 28ทาเน เยซู ก็ กุด ควังใน เจิง ปาม ก็ กุด และ เยซู ตัก เจิง ตี เยซู พัก อุ นัน โตะ ควังใน เจิง แลว เยซู ก็ ซ็วน ปาม “ปา เจือ อัน เค็ย เอิญ เน แอง ระ ปา ตาด มัด วัล กุญ ปา เจือ เค็ย เอิญ แอง กุญ อัน” เยซู ซ็วน ปาม ฮุนนัน
“เออะ อาจาน เยอะ เจือ ซีเละ” ปาม อัง 29เจ็นนัน เยซู ก็ คอบ ซิห มัด ปาม นำ ก็ ไล ปาม คือเน “ปา เจือ เอิญ เน ปา ก็ ลด ตาด มัด” เยซู อัง 30ท็อบ นำ ไล ปาม จังนะ ปาม ก็ ลด งาล บอด มัด ดอม ซะ กุญ เยซู ก็ มบราง ปาม ไล อัห นำ ไล ปาม คือเน “อำ ไล ซีเอ เค็ย เอิญ เน แอง ระ ปา ดอม ตาด กุญ ดาย” เยซู อัง 31แต ปาม ไอ มี ปัง แญง เยซู เตาะ ปาม เริล ไล อัห มด เค็ย เยซู จวย ปาม ระ ตาด มัด กุญ เจ็นนัน ครำ ทัว พานัน ก็ เลอะ เม็จ คาว มด
เยซู จวย ครำ ตี ไอ มี จางรู จ็อก
32แลว เยซู จวย ครำ บอด มัด นัน แลว อัห ก็ ซับ ครำ ปรอง กุด มี ล็อง ระ เยซู จวย นำ เอา ล็อง นะ ปรอง แอง ระ นำ จ็อก ไอ มี กุญ 33เยซู ก็ มบรึห ปรอง ทอก แอ็ม เอา นัน ก็ ลด จ็อก กุญ ปึง ครำ ดก ตี ดอม อุ นัน อัห เม็จ ล็อง นัน จ็อก กุญ อัห ก็ ญ็อก งึด ญ็อก เงอ อัห ก็ ไล นอย คือเน “ตัก ปะเทด อิซราเอล แอ เน แอ ไอ มี เกย เม็จ เลือง มอก เน นอ” อัห อัง 34แต ปึง ฟาริซี ตี ไอ มี เจือ นำ อัห ก็ เค็ย “ปรอง จ็อง อน แร็ง ตัก นำ ฮัก ซัง นำ มบรึห ปรอง กุญ” อัห อัง#มัดทิว 10:25, 12:24, มาระโก 3:22, ลูกา 11:15
เลือง ต็อง มี ครำ จวย งาน เอาซาง
35ทาเน เยซู ก็ เริล แอว อัห ดก ตี นำ แอว อัห มด จู งวัล จู เมือง นำ เริล งวัล นเดย นำ ก็ โละ ไล คาว เลาะ คาว แลม อน ตัก พซาซน ปัง มด นำ ไล คาว เลาะ เลือง เอาซาง บัก และ โตะ ปกคอง อัห นัน นำ ไล อัห ตัก ฮ็อง พซุม ครำ ยิว นัน มี ครำ โซะ เพะ ดก มบลึ นำ ก็ รักซา อัห ระ เลาะ เล็ห มด#มัดทิว 4:23, 12:24, มาระโก 1:39, ลูกา 4:44
36ญาม เยซู เริล ออ นัน นำ ก็ ดอม พซาซน นำ เม็จ ดก ครำ อุ นัน อัห มี ปันฮา จวย นัง ออ ไอ มี กุญ อัห มอก แกะ ตัก ไอ มี ซีเอ เลียง นำ เม็จ อัห จวย นัง ออ ไอ มี กุญ มอก นัน นำ ก็ ตึ อัง อัห 37นำ ลด มเบิด ไล ลูกนอง ออ คือเน “บา นอ ซา เอาซาง ก็ ดก แคร็ห แลว แต ไอ มี ดก ครำ เกียว 38แป ต็อง ครอ เคิบ เอาซาง ตัก เป็น งกี ระ นำ จวย และ ครำ ดกๆ ล็อง โตะ จวย เกียว ซา นำ” เยซู อัง#อุ ตี แลง 27:17, 1 ปึง กซัด 22:17, 2 ปะวัด 18:16, เอเซเคียน 34:5, เซคารียา 10:2, มาระโก 6:34, ลูกา 10:2
Iliyochaguliwa sasa
มัดทิว 9: Prai
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Global Partners
