โยนา 1
1
เอาซาง ไล โยนา เริล เมือง นีนะเว
1มี ครำ อิซราเอล มี ล็อง ซือ ตัก โยนา นำ เป็น ควัน อามิดไท ทาเน เอาซาง ก็ โตะ ไล โยนา เริล เมือง นีนะเว เมือง นีนะเว นะ เป็น เมือง จ็อง#คอ 1 เมือง นีนะเว นะ อุ ตัก ปะเทด อาซีเรีย ดอม แพนที เอาซาง ก็ ไล โยนา คือเน 2“มัห ทอก เจ็น อิซราเอล เน ดาย มัห เริล ไล ครำ เมือง นีนะเว เมือง จ็อง นัน ดาย มัห เพีย ไล อัห เค็ย เอิญ อง ลงโทด อัห เอิญ เม็จ แลว อัห แอง ไอ มี เลาะ ซัก มี ติด เอิญ ต็อง ลงโทด อัห มัห เพีย ไล อัห จังนะ ดาย” เอาซาง อัง
โยนา ปัด เจ็น เอาซาง
3แต โยนา ไอ มี ซีรอก เริล เมือง นีนะเว นัน เตาะ นำ ซีรอก ปัด เริล เยอะ ซะ ระ ปน แอ็ม เจ็น มัด เอาซาง นำ ก็ ปัด เริล เมือง ยาฟา นเซ็บ ฮัก เล็ห ตัก ยาฟา แลว นำ ก็ เม็จ เฮือ มี ลำ บัก และ เริล เมือง ทาซิด นเซอะ นำ ก็ ต็อห ญิม เฮือ ลด ต็อก เฮือ นัน เริล เลิม เคิบ อัห
4-6ทาเน อัห ก็ ต็อก เฮือ เริล ติกๆ โยนา ก็ จูล อวย อุ ตัก จัน ลัห เซ็บ นัน เจ็นนะ เอาซาง ก็ แอง ระ เล็ห งกริม ลุกพุก จ็อง แร็ง ซีเละ นทูด โตะ ตัก ทะเล นัน นอก ก็ มพัห นโดน มพัห นแด็ห ครำ คับ เฮือ ก็ แร็ง นเจิก ซีเละ อัห นเจิก แตก เฮือ อัห นเจิก ออ เปิล อัห ก็ เอิด ซะ ตี อัห ตาง ตัก เฮือ นัน กวาง แอ็ม ตัก นอก ระ นซึล เล็ห เฮือ มี ติด อัห ก็ ครอ พะ ครอ วะ คอง ออ ตี อัห ทือ นัน จวย ออ แต โยนา ควะ ลิงลัก อวย อุ ลัห เซ็บ นัน ฮัวนา เฮือ เม็จ นำ อวย อุ นัน นำ ก็ โตะ พร็อห โยนา “มัห วาง อวย อุ อังวะ เต็ห มัห ร็อห ครอ ซะ ตัก มัห ทือ ออ กา จับ อัน มัห จวย แอ กุญ แอ ก็ ไอ มี เปิล ฮุ” นำ อัง
7อัห วาง แอง จังนัก ก็ ไอ มี เลาะ งาล งกริม เตาะ ทาเน อัห ก็ ไล นอย เญ็บ ซะลาก “แอ เญ็บ ซะลาก แอ็ห อ็อญ เจือ เป็น ซีเอ แอง ระ มี ปันฮา เน” อัห อัง อัห ก็ ลด เญ็บ ซะลาก โยนา ก็ กุญ ซะลาก นัน 8อัห ก็ ไล โยนา ฮุนเน “เลือง เน ซีเอ แอง พิด ก็ ไล นทึห เตาะ” อัห อัง อัห ก็ ที ซ็วน นำ “มัห ไล อิห กา มัห โตะ แอง ซีวะ ตัก เน มัห เป็น ครำ ปะเทด นเดย มัห เป็น ครำ กรอก ซีวะ” อัห อัง 9-10โยนา ก็ ไล อัห คือเน “เอิญ เป็น ครำ ฮีบรู#ค 9 ฮีบรู เป็น ซือ เครม กรอก อิซราเอล อัห จ็อก ออ อัห เค็ย จ็อก แญง ฮีบรู เอิญ ทือ งกีจ็อง ตัก แอง วาง แอง แพนซิก แอง นอก ทะเล เน มานะ เน เอิญ กำลัง ปัด แอ็ม เจ็น เอาซาง งกีจ็อง นัน” โยนา อัง
อัห กวาง แอ็ม โยนา ตัก นอก ทะเล
อัห เม็จ โยนา ปัด แอ็ม เจ็น งกี ซิก งกี นอก นัน อัห ก็ นเจิก ซีเละ อัห ก็ ลด โป โยนา คือเน “ปาโท็ห มัห แอง ลุห ไบ ลุห เบอ อังวะ จังเน เต็ห” อัห อัง
11ทาเน งกริม ก็ เฮง แร็ง เล็ห ติกๆ อัห ก็ ซ็วน โยนา คือเน “บัห อิห แอง จังนัก เคิบ มัห เลาะ บ็อห ซัง งเกิ๊ด งกริม ซัง ทะเล งเกิน อุ” อัห อัง 12โยนา ก็ ไล อัห คือเน “แป กวาง แอ็ม เอิญ ตัก นอก กา งกริม ก็ เค็ด งาล นอก ก็ งเกิน อุ เอิญ เม็จ แลว โตะ งกริม จ็อง เน ก็ ญอน เอิญ ไอ มี ปัง แญง เอาซาง” โยนา อัง นำ ไล อัห คือนะ แต อัห ไอ มี จบ ฮาน กวาง แอ็ม นำ เตาะ 13อัห ก็ เฮง พาย เฮือ และ ซับ ตัก ซะร็อห ติกๆ แต อัห พาย จังนัก ก็ ไอ มี แป อัง งกริม งกริม ก็ เฮง เคริบ แร็ง เล็ห ติกๆ
14เจ็นนะ อัห ก็ ตกลง นอย อง กวาง แอ็ม โยนา ตัก นอก ฮุน นำ ไล นัน วาล อัห กวาง นำ นัน อัห ก็ ครอ เคิบ เอาซาง คือเน “เอาซาง เฮย ครอ เคิบ มัห อำ มัห ลงโทด ซิห อิห ตี อิห มเบิล แอ็ม ครำ ไอ มี เลาะ เน ดาย มัห แอง ระ เล็ห งกริม จ็อง เน ก็ มัห แอง ซิห โยนา ฮัก เป็น ตัก นำ พิด ฮัก ไอ แมน พิด อิห เตาะ” อัห อัง
15เจ็นนะ อัห ก็ ลด นเด็ว กวาง แอ็ม โยนา ตัก นอก ท็อบ อัห กวาง โยนา นะ งกริม ก็ ลด เค็ด งาล แอ็ม นอก ก็ ลด เค็ด งเกิน อุ 16อัห เม็จ งาล งกริม อัห ก็ แร็ง นเจิก อัง เอาซาง อัห ก็ เฮง ทือ เอาซาง วัล อัห ลด บน ระ นัง ออ ตัก เอาซาง อัห ก็ ทวาย ซะ อน ตัก เอาซาง วัล
17ทาเน เอาซาง ก็ แอง ระ เล็ห คา จ็อง นัง โตะ คลืด โยนา โยนา ก็ อุ ตัก มพุล คา นัน แพะ งิ แพะ แจ็ล
Iliyochaguliwa sasa
โยนา 1: Prai
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Global Partners