อิซราเอล ญาย 17
17
งกีจ็อง แอง นอก โตะ เจ็น เกียง
1เจ็นนัน ครำ อิซราเอล ก็ ทอก เริล เจ็น ตี แลง ซิน อัห ญาย เริล อุ เป็นตีๆ แลว แต เยโฮวา ไล อัห เริล ลบ เน อัห โตะ พัก อุ ตัก เรฟีดิม ตัก เรฟีดิม นัน ก็ ไอ มี ออก 2อัห ก็ โป ซิห โมเซด วัล “มัห และ ออก อน อิห ออก กา” อัห อัง โมเซด ก็ ซวัล อัห คือเน “แป โป เอิญ อังวะ เต็ห ซีวะ แป ลอง ใจ เยโฮวา จังเน บ็อห” นำ อัง 3แต ปึง อัห แร็ง โซะ ออก อัห ก็ โป โมเซด คือเน วัล “มัห ซับรวง อิห ทอก เจ็น ปะเทด อียิบ อังวะ มัห ซีรอก ระ ปึง อิห เปิล ก้า มัห ระ อิห เปิล โซะ ออก มด ตึง ควัน ตึง แปะ แกะ งัว ลา คอง อิห มด ก้า” อัห อัง 4โมเซด เม็จ อัห โป ออ ฮุนนัน นำ ก็ ครอ เคิบ เยโฮวา คือเน “เยโฮวา เฮย มัห ไล เอิญ แอง จังนัก เลาะ บ็อห อัห บัก และ เอิด เกียง นดืม เอิญ แลว” โมเซด อัง
5เยโฮวา ก็ ไล โมเซด คือเน “มัห เริล วาล มัด พซาซน นัน ดาย มัห มพอล อัหแกะ ครำ อิซราเอล แกด ล็อง เริล ตัก ญวัง งคม เลิม เคิบ มัห ดาย เจ็นนัน มัห ก็ เอิด งเกราะ ตี มัห ไจ คัล นอก นำไน นัน เริล เลิม 6เอิญ ก็ ญ็อง อุ เคิบ มัด มัห ตัก เกียง งุก ไล ทึห ตัก ญวัง โฮเรบ นัน มัห ต็อง เอิด งเกราะ คัล ซิห เกียง งุก นัน ดาย นอก ก็ ทอก โตะ เจ็น เกียง ระ แป ออก” งกีจ็อง อัง
โมเซด ก็ แอง ฮุน งกีจ็อง ไล อน นำ ก็ คัล ซิห เกียง งุก เคิบ มัด อัหแกะ ครำ อิซราเอล นัน 7โมเซด ก็ ลด แทก ตี นัน เค็ย มาซา มาซา ซีแล็ม เค็ย “ลอง ใจ นอย” นำ ก็ มพึ ซือ ตัก นัน เค็ย เมรีบา วัล เมรีบา ซีแล็ม เค็ย “โป นอย” เป็น ตี อัห ลอง ใจ เยโฮวา อัห โป เค็ย นำ ไอ มี กิว อุ เคิบ ออ
อัห ฮบ ครำ อามาเลก
8ทาเน ก็ มี ครำ โตะ ฮบ อัห เป็น ครำ อามาเลก อัห โตะ ฮบ ครำ อิซราเอล เคิง เรฟีดิม นัน 9ทาเน ก็ มี ครำ อิซราเอล มี ล็อง ซือ ตัก โยซูวา โมเซด ก็ ไล นำ คือเน “มัห เลือก เอิด อัหคล็อง ตี แร็งๆ เริล ฮบ เคิบ ครำ อามาเลก งิ กรัก ดาย เอิญ ก็ ญ็อง ก็อง งเกราะ ตี งกีจ็อง อน เน อุ ตัก ญวัง ทึห นัน ดาย” โมเซด อัง
10โยซูวา ก็ แอง ฮุน โมเซด ไล อน นำ ก็ เอิด ปึง อัหคล็อง เริล ฮบ เคิบ ครำ อามาเลก แต โมเซด อาโรน เคิบ เฮอ อัห ก็ ก็อห เริล อุ ตัก ญวัง ทึห โมเซด ก็ ญ็อง ญ็อก งเกราะ อุ ตัก ญวัง ทึห นัน โยซูวา ก็ ฮบ ครำ อามาเลก อุ เซ็บ นัน 11กัน โมเซด ญ็อก งเกราะ ลบ นเดย ครำ อิซราเอล ก็ แร็ง ลบ นัน กัน นำ พระ ที นเซ็บ ครำ อามาเลก ก็ แร็ง เล็ห วัล ครำ อิซราเอล ก็ กาน แอ็ม 12ทาเน โมเซด ก็ แร็ง งโค ลา อาโรน เคิบ เฮอ ก็ เอิด เกียง อน ตัก โมเซด คุด นำ ก็ คุด ปาม ก็ จวย นอย ญ็อก ที นำ มี เพียห มี ล็อง ปาม ก็อง ลา นำ อุ เคิง นัน จำปอ เทิ๊บ งิ 13โยซูวา ก็ ฮบ เคิบ ครำ อามาเลก จำปอ อัห กาน อัง นำ มด
14แลว อัห ฮบ นอย แลว เยโฮวา ก็ โตะ ไล โมเซด คือเน “เลือง แป ฮบ เคิบ ครำ อามาเลก เน มัห จด ระ อน ตัก นังซือ ดาย ต็อง เก็บ ระ อน ตัก ควัน นจะ ควัน ลาน จำ นเดย จำ กวา นโดน มัห ก็ ต็อง เลามุน อน ตัก โยซูวา เค็ย บัดนะ นโดน เอิญ ก็ มเบิล แอ็ม ครำ อามาเลก ซุด มด เอิญ ไอ มี ระ ควะ เลือ ซัก มี ล็อง เตาะ” งกีจ็อง อัง
15เจ็นนัน โมเซด ก็ แอง ฮุน งกีจ็อง ไล อน นำ ก็ ลด กอ ตี ทวาย ซะ อน ตัก งกีจ็อง นำ มพึ ซือ เคิง นัน เค็ย เยโฮวา นิดซี ซีแล็ม เค็ย “เยโฮวา จวย ระ เอิญ ซะนะ” 16โมเซด ก็ จ็อก ฮุนเน วัล “ญ็อก ทงไซ คอง เยโฮวา งกีจ็อง ทึหๆ ดาย เยโฮวา เน นำ เค็ย ฮบ เคิบ ครำ อามาเลก ตลอด จำ นเดย จำ กวา นโดน” โมเซด อัง
Iliyochaguliwa sasa
อิซราเอล ญาย 17: Prai
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Global Partners
