नेवताळा ना काम 7
7
स्तीफनुस नु परच्यार
1डायलो पुंजारो स्तीफनुस ने पुछ्यो, “आहयी वात ह़ाचली से ह़ु?”
2तत्यार स्तीफनुस केदो, ए डाह-डाहा अने भायु! मारी वात ह़मळो। जत्यार अमारो बाह अब्राहम, हारान मे वहवा सी पेले मीसुपुताम्या मे रेतो हतो, ता तीने ह़ेक भर्यो भगवान देखाव पड़्यो, 3अने केदो, तारु देस अने तारु घोराणु सोड़ दे, अने तीहया देस मे जा, जे देस मे तने देखाड़ही। 4एतरे अब्राहम कसद्यान देस सोड़ीन हारान मे वही ज्यो। तीनो बाह मर ज्यो अने अळतेण भगवान तीने तां गेथो आहया देस मे लायो, जा तमु हमणे री र्या। 5आहया देस मे भगवान तीने कानी जागा नी आप्यो, आञे लग के पोग मेलवा करीन बी जागो नी आप्यो। बाखीन तीहयो वायदो कर्यो के मे आहयु देस तने अने अळतेण तारी अवल्यात ने आपही तीहयी टेमे अब्राहम नो एक बी सोरो नी हतो। 6भगवान अब्राहम ने आहयु बी केदो, तारी अवल्यात नी अवल्यात पारका देस मे पारकान तेम रेहे। अने तीहया तीने पावर्यो बणावहे, अने च्यार ह़ोव साल लग वेला पाड़हे। 7अळी भगवान केदो, जोर जबराये काम करावीन वेला पाड़न्या आड़जात्या माणहु ने, मे नीयाव करीन डंड आपही, अने अळतेण काम करन्या ने तीना देस गेथो नीकाळ लावही अने आहयात जागा मे मारी भक्ती करीन सेवा करहे। 8अने भगवान अब्राहम जुगु खतना नी बोली कर्यो; अने आसम करीन तीहयो ईसाक नो बाह बण्यो अने आंठवा दाड़े तीनु खतनु कर्या। ईसाक, याकुब नो बाह बण्यो, अने याकुब बारे कुल धणी नो बाह बण्यो।
9कुल धण्या, युसुफ पोर कुहरायत्ला, एतरे तीहया युसुफ ने मीसर देस जाण्या वेपारी ने वेच देदा; पण भगवान युसुफ ह़ाते हतो। 10तीहयो आखी गरा गेथो युसुफ ने बचाड़्यो। अने भगवान युसुफ ने मीसर ना राजा फीरोन अगळ दया अने अक्कल आप्यो; अने तीहयो राजा युसुफ ने आह़फा ना घोरबार नो हकदार्यो बणाय देदो। 11तत्यार मीसर देस अने कनान देस मे काळ पड़्यो; अने भारी गरा आवी, अने आपणा आड़ा-बुड़ा ने खावा करीन अन नी जड़्यु। 12जत्यार याकुब आहयु ह़मळ्यो के मीसर देस मे अन जड़े, ता तीहयो अमारा आड़ा-बुड़ा ने पेली कावा मोकल्यो। 13अने तीहया बीजी कावा तां मीसर मे ज्या, ता युसुफ आह़फा ना भाय ने आह़फा नी ओळखाण करायो, अने फीरोन ने बी युसुफ नी कुळी नो पतो चाल्यो। 14तत्यार युसुफ आह़फा ना बाह याकुब अने तीना आखा घोरबाल्या ने बोलाव्वा मोलक्यो। तीहया आखा मेळीन पीचोतर माणहु हता। 15याकुब मीसर देस हेटो ज्यो। ता तीहयो अने तीना सोरा बी मर ज्या। 16अळतेण तीमना धोड़ सकेम मे लाया, अने तीहया मड़ाट्या मे वगे कर्या, जां अब्राहम सकेम मे हामोर ना बेटा पांह चांदी आपीन वेचातु लेदलो।
17भगवान अब्राहम ह़ाते जे वायदो करलो हतो, तीहयो वायदो पुरो हयवा नी टेम ह़ाते आय री हती, ता आपणा माणहु मीसर मे घण-जबर हय ज्या। 18अळतेण मीसर मे एक नवलो राजा पयदा हयो, तीहयो युसुफ ना बारा मे कंय नी जाणतो हतो। 19तीहयो आपणी जाती ना माणहु ने वेला पाड़्यो। एतरे आपणा आड़ा-बुड़ा ने आपणा सोरा ने मरवा करीन बारा नाखवा पड़्या 20तीहयी टेमे मुसो पयदा हयो। भगवान तीने घण घटाळो घड़लो हतो, अने तीन मयना लग तीना बाह ना घोर मे पोहायो। 21अने जत्यार सोरु ने बारा नंदी मे नाख देदा, ता फीरोन राजा नी बेटी तीने चुट लेदी, अने तीने आह़फी ना सोरान तेम पाळी-पोही। 22अने मुसा ने मीसर देस नी आखी वीद्या भणाया। अने मुसो वात मे अने काम मे जोरभर्यो बण ज्यो।
23जत्यार मुसो चाळीह साल नो हय ज्यो, ता तीना मन मे वीच्यार आयो के मे मारा ईस्रायली भाय-बेन्या ने भेटु। 24तीमनी मे गेथा एक जणा ने वेला पाड़त्लो देखीन मुसो तीनी वगो वळ्यो, अने मीसर देस वाळा ने मारीन वेला पाड़वा नो बदलो लेदो। 25मुसा नो वीच्यार आहयो हतो के मारा माणहु ह़मजी जहे के भगवान आनी लारे आमने छुटकारो आपहे बाखीन तीहया तेम नी ह़मज्या। 26बीजा दाड़े बे ईस्रायली भाय-बेटा ने झुमायत्ला देख्यो, ता तीहयो तीमनीन्तां आवीन तीमने मेळ कराव्वा करीन तीमने केदो, ए भायु, तमु ते भाय-बेटा से, तमु काहा आंबा-सांबा झुमाय्न एक-बीजा ह़ाते गलत वेहवार कर र्या? 27पण आहयो अदमी आह़फा ना भाय-बेटा ह़ाते झुमाय्न गलत वेहवार कर र्यो, तीहयो मुसा ने धकली देदो, अने केदो, कोय तने अमारो मुखी अने नीयाव करन्यो बणावलु से? 28काले ते, तु मीसर देस वाळा ने मार नाख्यो। तेमेत मने बी मारवा हींड र्यो ह़ु? 29आहयी वात ह़मळीन मुसो तां गेथो नाह ज्यो अने मीद्यान देस मे पारको बणीन रेवा बाज ज्यो। अने तीहया मीद्यान देस मे तीना बे सोरा हया।
30जत्यार तां रेते-रेते चाळीह साल वीत ज्या, ता भगवान नो ह़रगदुत, सीने बड़ा पोर एक धपत्ला कटाळा झाटवा मे देखाव पड़्यो। 31आहयु देखीन मुसो वहराय ज्यो, अने धपत्ला झाटवा ने देखवा करीन ह़ाते ज्यो, ता तीहयो मालीक भगवान ने आहयु केत्लो ह़मळ्यो, 32मे तारा आड़ा-बुड़ा नो भगवान से, हाव, अब्राहम नो, अने ईसाक नो, अने याकुब नो भगवान से। आहयु ह़मळीन मुसो थुरु-थुरु कापवा बाज ज्यो अने तीने तीहयु धपत्लु झाटवु अळी देखवा नु मन नी हयु। 33तत्यार मालीक भगवान मुसा ने आहयु केदो, तु तारा पोग मे पेरला चाट्या नीकाळ दे, काहाके तु जां उबो हय र्यो, तीहयो जागो चोखलो से। 34मे मीसर देस मे रेण्या मारा माणहु नी वेला ने देखलो से; अने तीमनु कंजारणु अने रड़णु ह़मळ्ळो से; एतरे मे तीमने छोड़ाव्वा करीन उतरीन आवलो से। हाव तीयार हय जा मे तने मीसर देस मे मोकलही।
35तीहया मुसा ने माणहु आहयु केता जाय्न तीनो नीकारो करला, कोय तने अमारो मुखी अने सोड़ाव्वा वाळो बणावलु से? तीहयात मुसा ने भगवान मुखी अने नीयाव करन्यो बणावीन तीहया ह़रगदुत ना लारे तीमनीन्तां मोकल्यो, जे तीने धपत्ला कटाळा झाटवा मे देखाव पड़लो। 36तीहयोत मुसा तीमने मीसर देस मे अने रात्ला दर्या मे अने जंगल मे चाळीह साल लग सेल-भात्या जुदा-काम अने सेलाण्या देखाड़ीन तीमने नीकाळ लायो। 37आहयो तीहयोत मुसा से, जे ईस्रायली माणहु ने आहयु केदो, भगवान तमारात भायु मे गेथो तमारी जुगु मार ह़रको एक भगवान वगे गेथी वात केण्यो माणेह उबो करहे। 38मुसो जंगल मे आपणा माणहु नी मंडळी वगो उबो हय्न आपणा आड़ा-बुड़ा अने तीहया भगवान ना ह़रगदुत ना वच मे भांजड़्यो बण्यो, जे सीने बड़ा पोर तीनी ह़ाते वाते लाग्यो। तीने जीवत्ला भगवान नी बोली जड़ी, तीनी सी तीहयो तीहयी भगवान नी बोली आपणु ने ह़मळावे तेम।
39बाखीन आपणा आड़ा-बुड़ा तीनी वात मानवा नी हींड्या; अने तीहया मुसा नी वात ने टाळ देदा। अने मीसर देस भणी आह़फा नु मन लगाड़्या। 40अने तीहया हारुन ने केदा, अमारी जुगु एवो देवता बणाव, जे अमारी अगळ-अगळ चाले तेम; काहाके मुसो आमने मीसर देस गेथो काडीन लावलो, तीनु ह़ु हयु अने ह़ु नी जाणे आमने मालम नी हय? 41तीहया दाड़ा मे तीहया केड़ा नी मुर्ती बणावीन तीनी अगळ जानवर मारीन बादा चड़ाया; अने तीनी पुजा-पाट कर्या; अने तीहया हात सी बणावली मुर्ती नो तीवार वाळीन खुस हय ज्या। 42एतरे भगवान तीमनी गेथो आडो भाळ लेदो,
अने तीहयो तीमने ह़रग ना तारा नी भक्ती कराव्वा करीन रेवा देदो, जीसम भगवान भणी गेथी वात केण्या माणहु नी कीताप मे बी लीखलु से:
ए ईस्रायली माणहु ना घोराणा,
तमु चाळीह साल लग मारी पुजा-पाट करवा करीन नेत जानवरु मारीन बादा चड़ावला ह़ु?
43तमु मोलेक देवता नु तम्बु ने अने रेफान देवता
ना तारा ने आह़फाम नी खांद पोर उचलीन लीजला,
अने तमु तीहयी मुरत्या ने बी ह़ाते लीजला तीमने पुजवा अने वांदवा करीन बणावला हता।
एतरे मे तमने बेबीलोन मुलक गेथा बी नाम्बे मोकल देही।
44जंगल मे अमारा आड़ा-बुड़ा पांह गवा ना तम्बु हता। भगवान मुसा ने आहया तम्बु ना बारा मे आहयो हुकम आपलो हतो, मे जे तम्बु नी सेलाणी तने देखाड़लो से, तीहयी सेलाणी नी अनसारे तम्बु बणावजे। 45तीहया तम्बु ने अगली पीड़ी ना आपणा आड़ा-बुड़ा यहोसु नी अगवाय मे आञे ली आया। जे टेमे तीहया आड़जात्या पांह आहयी धरती हापकी लेदला, काहाके भगवान आड़जात्या ने आपणा आड़ा-बुड़ा अगळ गेथु नीकाळ देदलु; अने आसम करीन तीहयु तम्बु दावुद नी टेमे लग आपणा आड़ा-बुड़ा ना ह़ात मे र्यु। 46आहया दावुद पोर भगवान दया कर्यो, अने दावुद आहयी हेर कर्यो के मे याकुब ना भगवान जुगु एक रेवा नो जागो बणावही। 47बाखीन सुलेमान याकुब ना भगवान जुगु घोर बणायो।
48ते बी आखाम उचे रेण्या भगवान, माणेह ना लारे बणावला घोर मे नी रेय, जीसम भगवान वगे गेथी वात केण्यो माणेह केय,
49ह़रग मारी राजगादी से, अने
धरती मारी पोग नी पयड़ी से,
तमु मारी जुगु केवो मंदीर बणावहु? मालीक पुसे,
मारी जुगु अराम करवा नो एसवो कानो जागो से, तां मे अराम करु?
50ह़ु आहयु आखु मारा हात सी बणावलु नी हय ह़ु?
51“ए एकहेट्या, अने मन अने कान्टा ना चोखा नी करला माणहु, तमु जलम चोखली आत्मा नो वीरोद करे। जेम तमारा आड़ा-बुड़ा करता हता, तेमेत तमु बी कर र्या। 52तमारा आड़ा-बुड़ा काना भगवान वगे गेथी वात केण्या माणेह ने वेला नी पाड़्या? पण तीहया ते तीमने मार नाख्या, जे पेले गेथात तीहया धरमी माणेह ना बारा मे केता हता, जे आव्वा वाळो हतो। 53तमने ह़रगदुत ना लारे पुगाड़लो कायदो ते जड़्यो, पण तमु तीहया कायदा ने पाळ्या नी।”
स्तीफनुस ने दगड़ाटवा
54तीहया स्तीफनुस नी वात ह़मळीन घण-जबर रीहवाय ज्या, अने तीनी पोर दात ककड़ाव्वा बाज ज्या। 55पण स्तीफनुस चोखली आत्मा मे पुरोन-पुरो भराय्न ह़रग भणी एकडीट्यु भाळ्यो, अने भगवान नी बड़ाय ने अने ईसु मसी ने भगवान नी जमणी धेड़े उबो हय रेलो देख्यो। 56अने तीहयो की पड़्यो, “ह़मळो! मे ह़रग ने उगड़लु, अने मनख्या ना बेटा ने भगवान नी जमणी धेड़े बह रेलो देख र्यो।”#दानीयल 7:13
स्तीफनुस नु मरनु
57तीनी वात ह़मळीन तीहया तीमना कान्टा बुज लेदा, अने आखा एक्को करीन तीनी भणी हुहड़ीन आया। 58अने तीने ह़ेर मे गेथा बारा ली ज्या, अने गवा देण्या माणहु आह़फा ना लुगड़ा नीकाळीन साउल नाम ना जुवान माणेह अगळ मेल देदा। अने तीहया माणहु स्तीफनुस ने दगड़ाट्या। 59तीहया माणहु स्तीफनुस ने दगड़ाटता र्या, अने तीहयो आसम करीन वीन्ती कर्यो, “मालीक ईसु! मारी आत्मा ने आवरी ले।” 60ता तीहयो मांडा ना भरहे पड़ ज्यो, अने आड़्यो, “मालीक! आहया पाप ईमनी पोर नी लगाड़जे।” अने आहयु कीन तीहयो मर ज्यो।
Iliyochaguliwa sasa
नेवताळा ना काम 7: PPt2025
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Paliya Bible © The Word for the World International and Yisu Por Bherho Karanya Paliya Mandli, Rajpur, Barwani, MP, 2025
