BaRoma 2
2
Ishɔt Adakunom se kpaf
1Nek anɔng, ngɔn anet fi iyɛrɛ inɛn akak, vit ngɔn ni ihwyet, ki ni i yet angan ɛ. Nek izen fi i tsin ras bakak ishɔt, i tsin ras ice ngɔn e yɔng, nek ngɔn anet ishɔt e, i tsin ras nggɔn nzining e yɔng. 2Iyit rēn yit fok ishɔt Adakunom se kpaf naton bayɔng fɛ́ ba ras nkyɔrɔk e nang. 3Ngɔn anet! Ngɔn di ti ngɔn fi i tsin ras bayɔng fɛ́ ba ras nkyɔrɔk e yɔng ishɔt, ni ngɔn tsin ras ina bà, ngɔn di ti i bi shorop ishɔt Adakunom ɛ? 4Kì ngɔn byɛs kudot itek Adakunom nɛ akabɔk fɛ́ a nyes ni iyɛsɛp iyɛ fɛ́ a nye ni ngɔn ɛ? Kì ngɔn rēn fok itek fɛ́ Adakunom tonoso yet nek ngɔn di tirik sak ishan atsak awɛ?
5Awɛt nek kugbarak ice ngɔn ni kugbarak iyɛ fi ngɔn bɛ̀, ngɔn se ni itusung ice ngɔn ishɔt fi i tsin da tot, atuk fɛ́ Adakunom bi tonong kafa kawe wu, atuk e yɔng wu Adakunom bi bɛ́ a da tonong ishɔt wu fi i se tabat. 6Nek Adakunom bi nɔɔk kaangan izang wu kpaf ni kutomong wu. 7Sak na bayɔng fɛ́ ba se ni iras ntomong ntek ayɛt akabɔk, ba se ni itsɛt iratek ni itere ni kutset vit nkum, Adakunom bi ka ba nɔɔk kutset vit igang. 8Awɛt bayɔng fɛ́ ba tsin tsɛsɛk ifi ice bá, bayɔng fɛ́ ba raba atsak, wɔn iras anyas, ba bi nyim ne kafa kawe ni mgbang Adakunom. 9Izot ni mgbang tsin tot ngma banet fɛ́ ba ras anyas, ba bi tumung na baYahuda ni Ícɛn-iduk di kuus. 10Awɛt ngma ayɔng fɛ́ a ras ntomong ntek, a bi sɛ iratek ni ízɔk ni kusonong kukyang, ba bi tumung na baYahuda ni Ícɛn-iduk di kuus. 11Nek Adakunom tonoso ishim ice awo.
12Ngma bayɔng fɛ́ ba ras inɛn dang isɛ irēn ntsi aMusa, ba bi ka ba tabak dang ntsi aMusa, awɛt ngma bayɔng fɛ́ ba ras inɛn, iba ni irēn ntsi aMusa, ba bi ka ba ra ishɔt ni ntsi aMusa. 13Kusot kutabat ashon Adakunom se na bayɔng fɛ́ ba ifoos ikyɛng fi Ntsi fɛ̀ kyɛk awo, tit na bayɔng fɛ́ ba ras ikyɛng fi Ntsi me fɛ̀, iba ba ba fɛ̀ tabat ashon Adakunom. 14Nek ki Ícɛn-iduk fɛ́ ba se vit ntsi, ngma na anɔng ayɛt kuyiring bá, ba kyem ba ra ikyɛng fi ntsi fɛ̀, a sot ba rēn ntsi me ayɛt ayɛ bá, ngma ne avit ntsi bá. 15Ba tonong fok ikyɛng fi ntsi fɛ̀ se ni ijɛk na ayɛ bá, kayɛt iyɛ bá run kama anɔng, ni kuyiring bá ka ba ras ishɔt. 16Atuk e yɔng, kpaf ti ifɛ̀ itek deng fi in tsin shara me, Adakunom bi ra ishɔt nanu Anet-Isheshek aYeso naton nkyɔrɔk fi in se ni nɛt na ayɛ banet.
17Awɛt ki ngɔn yes ice ngɔn, afɛ́ aYahuda, i nesek agap ni ntsi aMusa, ni tsot kukaa ayɛt ifidang na Adakunom, 18ni nye fok ngɔn rēn ikyɛng fi iwu shim, ngɔn rēn idɔng fi i se kpaf nek ntsi da tonong anɔng, 19ngɔn bi inɔɔk atsak fok, ngɔn yet akɔk-ashon bakpatɔn, i yet mgbey sak na bafɛ́ ahwyi. 20Anet itees bayɔng fɛ́ ba se vit itsɛ́ng, anet itees bayɔng fɛ́ ba bɛ̀ kuyiring nnon, nek ayɛt ntsi aMusa wu fi irēn nɛ atsak di se. 21Wat ngɔn fi itees bakak, itees ice ngɔn bà awɛ? Ngɔn fi ishara fok, da ba bi yising awo, ngɔn yising awɛ? 22Ngɔn fi i nye fok da ba bi ras kujang awo, ngɔn ras kujang awɛ? Ngɔn fi i rangɔn nabannom, ngɔn yising nkyɔrɔk iya ntong nabannom e awɛ? 23Ngɔn fi itsot kukaa ni ntsi aMusa, ngɔn beseng Adakunom iyɛ fi ibeseng ntsi me awɛ? 24Nek i se ni ijɛk, “Nek iyin baYahuda, i mi sak yin Ícɛn-iduk mi beseng iyerek Adakunom.”
25Iya katse se yɛɛt, ki i kuus yin ntsi aMusa, awɛt ki rayin dang kuus ntsi aMusa, i mi sot yin tɛ bayɔng fɛ́ ba se vit iya katse. 26Nek anɔng, ke anet fɛ́ da ba mi ku ya katse awo, a ras ikyɛng fi Ntsi fɛ̀, ba da ku sok tɛ ayɔng fɛ́ ba mi ku ya katse awɛ? 27Nek anɔng, ayɔng fɛ́ ba mi ku ya katse awo, ngma na anɔng, na ras ikyɛng fi Ntsi fɛ̀, a bi da barak ni ishɔt, ngɔn ayɔng fi i bɛ̀ ntsi ni ijɛk, ba mi da ya katse, awɛt ni rangɔn dang ras ikyɛng fi ntsi me fɛ̀.
28Nek anet kyem a sot atitup afɛ́ aYahuda ni irɔm kɛ nek iya katse kyɛk awo, 29Koba! Atitup anet aYahuda se ayɛt iyɛ, iya katse yet ifi iyɛ, fɛ́ Kabik ras, da ifi ijɛk awo. Itere anet e yɔng, nes na banet awo tit na Adakunom.
Iliyochaguliwa sasa
BaRoma 2: IbaasNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2019 The Nigeria Bible Translation Trust and © 2019 Wycliffe Bible Translators, Inc.
