ALuka 8

Igorok Icɛɛt naton anet inas ija

1Ama anɔng, aYeso tseng sak ni nwɔp nratek ni nban e, na shara ifɛ̀ itek ifi igwɔm Adakunom. Bafi imɛɛs wu tsees gung ni iwu, 2nɛ banyining bakak fɛ́ ba kin ka ba turung itséng ni rɔm, nɛ bafi nrɔk zizɛɛt. Ayɛt bá kin yet: aMarya afɛ́ aMagadala, ayɔng fɛ́ ba kin tun itséng kanakataat ni rɔm wu; 3aJoana abin aCuza fɛ́ amatek kin yet akɔk-ashon bafi ntomong ari igwɔm aHiridus; nɛ aSuzana, nɛ ishɛrɛp banyining dot. Banyining e bang, kin di sɛs aYeso nɛ bafi imɛɛs wu, ni inesek ikyɛng ibɔk bá.

4Nɛ banet tsin kana tusung, fɛ́ ba nes ni nwɔp zizɛɛt nek inyim ni iwu, aYeso ka ba nye igorok icɛɛt yɛ: 5“Anet ikap akak kin tsɛ a nas ija wu. Ni izen fɛ́ a se ni inas e, ikak kpas ni irèn, banet shesh ide azɔng, nanon aza ya ide. 6Ikak kpas naton agbondong, ama fi i kpa tang, i wat i koot, nek vit ashi aben. 7Ica me ikak kpas ayɛt atsitsan, i rasak gung ni itsitsan e, i kut ide, i ki di ro ni i rasak. 8Ikak ayɛt de kpas ni ntong ntek. I rasak gyat, ites ica, anakat dot fin nwat ija me dɔng fɛ́ ba kin nas.”

Ama fɛ́ a mi gang kucɛɛt e, a tarak kutɔ, yɛ, “Ngma ayɔng fɛ́ a bɛ̀ kuto ifok, na fok ifɛ̀ deng.”

Ikyɛng fi igorok icɛɛt e tonong

9Bafi imɛɛs wu ku rip yɛ, akyɛ fi igorok icɛɛt e yeng tonong ɛ. 10AYeso fɛ̀ ni ba, “Ba mi ki nɔɔk yin iyin irēn irén narɔk igwɔm Adakunom, wat ishɛrɛp banet, imi cɛɛt ni iba ni igorok icɛɛt,

‘Nek ba yɛrɛ akabes,

ba kyem ba di awo;

ba foos akabes,

ba nɛ ba kyem ba rēn awo.’

11“Ikyɛng de fi igorok icɛɛt e tonong, ija me yet ifɛ̀ Adakunom. 12Idɔng fi i kpas naton irèn yet banet fɛ́ ama fɛ́ ba fok ifɛ̀ me, na aShetan bɛ́ na shan ifɛ̀ me na yɛ bá, kɔn ba bi shan atsak na ba sɛ isheshek. 13Idɔng fi i kpas naton agbondong, yet bayɔng fɛ́ kɛ ba fok ifɛ̀ me, na ba wat ba shan ide ni ifeng, awɛt vit iba nɛ aney asɔp. Ba nɔɔk atsak nfi kizen gyeet, ki imara ka ba bɛ́, na ba wat ba kpa. 14Ija me dɔng fi i kpas ayɛt atsitstan, nyeseng naton bayɔng fɛ́ ama fɛ́ ba fok ifɛ̀ me, wat hwyɛ-hwyɛ ni ndaam kusot azatse, ni nta kurúm, ni ikuus nta nkyɔrɔk azatse kang shining ayɛ bá, ni nbeseng ifɛ̀ me, awɛt vit ikyɛng fɛ́ ba kyem ba sɛ ni ba kong. 15Wat ica me dɔng fi i kpas ni ntong ntek, i nyeseng naton bayɔng fɛ́ ba bɛ̀ kuyiring kutek, izen fɛ́ ba fok ifɛ̀ me, na ba bereng ide yɛɛt, nɛ ba di fit ma ba di sɛ ikyɛng itek ni ba.

Agaramun fɛ́ ba sak garang naton ikyɛng kak

(AMarkus 4:21-25)

16“Vit anet fɛ́ ata kurong na agaramun, na ma sak iwu ayɛt kuwang, kɛ na sak iwu nasɔs ameneng ayi. Tit na sak iwu narɔ kagarang, nɔng bayɔng fɛ́ ba nɔ da bin di karɔ gbey. 17Nek vit ikyɛng fi i se ni nɛt, fɛ́ da ba bi tun ide ni idɛt awo, vit ikyɛng fi i se ni faam, fɛ́ da ba bi rēn ide awo, fɛ́ da ba bi tarak ide awo. 18Nek anɔng, nye yin yɛɛt ni ikyɛng fi ifoos yin. Nek ngma ayɔng fɛ́ a bi ikyɛng, ba bi ku barang mo; ayɔng fɛ́ a se vit ikyɛng, igyet e dɔng fi iwu di tɛ a bɛ̀, ba bi shan ide ni wu.”

Nggɔ aYeso nɛ barunyining

(AMatiyu 12:46-50; AMarkus 3:31-35)

19Nggɔ aYeso nɛ barunyining tsɛ ba ku di, awɛt nek kudot banet, ba kyem ba sɛ kawat idi wu awo. 20Akak tsɛ a fɛ̀ ni wu yɛ, “Nggɔ ngɔn nɛ barunyining yɔng amatse, ba shim ku di ngɔn.”

21AYeso fɛ̀ ni ba, “Nggɔ min, nɛ baruneng hom yet bayɔng fɛ́ ba foos ifɛ̀ Adakunom, na ba di ras kutomong ni ide.”

AYeso nyeseng ni itsombos

(AMatiyu 8:23-27; AMarkus 4:35-41)

22Atuk akak, aYeso kin fɛ̀ na bafi imɛɛs wu, “Won in tat yit sak ni nyi kuya kufi kudúng e.” Ba nɔ ayɛt kukyɛ ashi, ba kpa wɔk. 23Na ba rēn se ni kutseet, aYeso kpa nda. Itsombos iratek kpa fɛsɛm kudúng e, wat ashi kpa nɔɔs ni kukyɛ ashi me, ishɛrɛp gyeet kɛ kawɛy ka ba sɛ.

24Bafi imɛɛs aYeso tsɛ ba ku shemeng, ba fɛ̀ ni wu, “Akɔk-ashon, Akɔk-ashon! Nda wey yit!”

AYeso dorok tsik, a gyɔng itsombos na ashi fɛ́ a doro me, itsombos e wat i men, izek ti bun yuu. 25A fɛ̀ na bafi imɛɛs wu, “Wat inɔɔk atsak yin e se kɛ?”

Nnyim ka ba yit makiyi, a ka ba te yɔɔt, ba kpa ka na risim yɛ, “Angan yong a yet ayong fɛ́ a gyɔng itsombos ni idoro ashi, ni i ku foos ɛ?”

AYeso te Anet kurɔk itséng Kyang

(AMatiyu 8:28-34; AMarkus 5:1-20)

26AYeso nɛ bafi imɛɛs wu, ba woso wɔk ma ba tsɛ ba ta ni mben aJɛrasen, fi in se ni kunyi kudúng aGalili. 27Fɛ́ aYeso tsin tik ni ice ibanang, anet iwɔp e akak, fɛ́ a bɛ̀ itséng ni irɔm, a nyim ni wu. Anet e, mi fɔɔn na kat vit ares ni rɔm, a kyem a sot ari awo, a kɔs na arɛk kyɛk. 28Ni izen fɛ́ a di aYeso, a ta kukun, a kpa ashon aYeso, a ta kukun gbɛrɛy yɛ, “AYeso, Nggon Azɔk-Bazɔk Adakunom, ngɔn tsɛt akyɛ ni imi yɛ? Imi tsin ra awon ni ngɔn, i bi di nɔk iyɔm awo!” 29Nek aYeso mi tsang fɛrɛng ni itséng e, ni iwuruk ni irɔm wu. Nek izen dot, itséng e, mi sɔ ni i ku kok ni ibara aben, na tɛsɛng anyang fɛ́ ba mi di mɛɛ na ba ku rosom mo mbɔk na atak, ni itséng e ku tsaas sak atse. 30AYeso ku rip yɛ, “Iyerek ngɔn yet angan ɛ?”

Anet e, fɛ̀ ni wu, “Jɔshɔk” nek itséng fi i se ni rɔm wu se dot. 31Itséng e woso tsot akabɔk ni wu fok yɛ da a bi ka ba barak ni bong fi ku se vit nkum awo. 32Ni izen e yɔng, kukpara áza akak kin tsin yas aben kuhwyanang kukak bakat azɔng. Itséng e ra awon fok aYeso na a ki di won, ni i nɔ ayɛt áza me. AYeso ki de nɔk irèn. 33Ni izen fi itséng e wuruk ayɛt anet e, i tsi inɔ ayɛt áza me, ngma kukpara áza me di berem a tisik ni ice ibanang sak ayɛt ashi, a nye rep ná.

34Fɛ́ banek áza me di ikyɛng fi ite, ba teng sak ayɛt iwɔp, nɛ naban wɔp, ba tsɛ ba te kukun ikyɛng e, 35banet wuru sak ba tsɛ ba di ikyɛng fi ite. Izen fɛ́ ba tsɛ ba ta narɔ aYeso, ba tsɛ ba sɛ anet e yɔng fi itséng e wuruk ni rɔm wu, na a mi sonong bakat nɛ atak aYeso, na mi te ares, ayɛt nhwyɛ wu. Ngma bá nnyim ka ba yit. 36Bayɔng fi ikyɛng e te na ayisi bá, taas bafidang ikyɛng fɛ́ aYeso nye fɛ́ anet kurɔk itséng e di sɛ kukyang. 37Awɛt ngma banet mben aJɛrasen e kusum, ba fɛ̀ na aYeso yɛ, a ka ba won mben bà, nek ba fok nnyim makiyi. Wat aYeso dorok a nɔ ni kukyɛ ashi, ba yit irèn.

38Anet e yɔng fɛ́ ba ku tun itséng ni rɔm wu me, a ra awon na aYeso fok na a ku won, na ku kuus mo, awɛt aYeso ku ro mo, a fɛ̀ ni wu, 39“Ti bun ari, i da tsi tak banet, agbat ikyɛng fɛ́ Adakunom mi da nye ne.” Nek anɔng, anet e tseng, a tsɛ shara ifɛ̀ agbat ikyɛng fɛ́ aYeso ku nye ne sak na banet iwɔp wu.

Kanamang fɛ́ ka ku, nɛ abining fɛ́ a se ni irɔk

(AMatiyu 9:18-26; AMarkus 5:21-43)

40Ni izen fɛ́ aYeso bɛ́s wu, akazik banet ku shan ni irèn, nek ngma bá, ba se ni itot wu. 41Wat anet akak fɛ́ ba ku yes aJairus, akɔk-ashon karɔ inyis baYahuda, a ne, a bɛ́ a kpa na atak aYeso, na tsot akabɔk ni wu yɛ, na a ku kuus mo sak ari wu, 42nek, ngak kangas wu kazizining fɛ́ a bɛ̀, fɛ́ ka mi kyem ayɛ kusɔk abe afaa, ngmash na ka ka ka ngasang.

Na aYeso se ni irèn sak azɔng, akazik banet ku nyɔ na kaakyɛ kabak. 43Abining akak kin se azɔng fɛ́ a mi sot ayɛ kusɔk abe afaa na bɔrɔng ni kurɔk iteng asok, awɛt vit akak fɛ́ a mi kyem a ku te kyang. 44Abining e, tsɛ a ne ama wu, a bɛ́ a ku ra kanu ikpin, ayɛt izen izining iteng asok wu wat inyeseng.

45AYeso nye ku rip yɛ, “Angan wu a di ra yɛ?”

Fɛ́ kaangan tone, yɛ da iwu awo, aBitrus fɛ̀ ni wu, “ATisa, di akazik banet fɛ́ ba da te nate, kaangan a tsin da nyɔ.”

46AYeso tɛ ban fɛ̀, “Anet akak mi di ra; nek imi fok, kukyem wuruk ni rɔm hom.” 47Fɛ́ abining e di vit irèn inɛt ice wu, a tse ni itiim irɔm, a bɛ́ a kpa ashon atak aYeso. Azɔng ashon banet, abining e, kpa taas ikyɛng fi i sak a ku ra mo, ni ikyɛng fi ite, fɛ́ a wat a sɛ kukyang ama fɛ́ a ku ra. 48AYeso fɛ̀ ni wu, “Angas hom, inɔɔk atsak ngɔn ni mi, mi da te kyang. Tsi tik kyang.”

49Na aYeso tsin rēn cɛɛt, anet akak ne ari aJayirus, akɔk-ashon karɔ inyis baYahuda me, a bɛ́ a fɛ̀ ni wu. “Angas ngɔn e mi ka na ngasang, i bi ka ka nɔɔk Anet Itees iyɔm awo.”

50Ni ifok anɔng, aYeso fɛ̀ na aJayirus, “Ngɔn bi fok nnyim awo, nɔk atsak kyɛk, angas ngɔn da te kyang.”

51Ni izen fɛ́ a tsɛ ta ari aJayirus, da awon akak na a nɔ gung ni wu awo, tit aBitrus, nɛ aYohana nɛ aYakubu nɛ ada ni nggɔ anamang e kyɛk. 52Ni izen e yɔng, banet se nɛ nanak, na kafa kawe nek iku ka. AYeso fɛ̀ ni ba, “I bi tos yin awo, a mi ku awo, a se ni nda.”

53Banet e kpa ku mas, nek iba rēn fok ka mi ku. 54AYeso ka ka yit kubɔk, a fɛrɛng na agap yɛ, “Angas in, dorok!” 55Nsong ka wat in bɛ́s na, ni izen izining ka dorok tsik. AYeso fɛ̀ ni iba, na ba ka ka nɔk ikyɛng iya. 56Ada ni nggɔ anamang e, ayɔɔt ka ba yit makiyi, aYeso fɛ̀ ni ba yɛ da na ba tak akak ikyɛng fi ite awo.

Iliyochaguliwa sasa

ALuka 8: IbaasNT

Kuonyesha

Shirikisha

Nakili