AYohana 11
11
Iku aLazarus
1Anet akak fɛ́ ba ku yes aLazarus kin se ni irɔk. A yet aBetani, kaban wɔp fɛ́ aMarya nɛ anganyining aMata di se. 2AMarya me wu fɛ́ arunyining aLazarus ku rɔ, iwu me yɔng fɛ́ a kin korok aYeso name nkɔn ntek nɛ atak, yɛs atak e nɛ akwoy ice wu. 3Nek anɔng, banganyining te itom sak narɔ aYeso, “ATisa, icɛk iyɛ ngɔn se ni irɔk.”
4Ni izen fɛ́ aYeso fok anɔng, a fɛ̀, “Kurɔk e kang yet kufi iku awo. Awɛy, ku yet kuyɔng fɛ́ Adakunom di ki sɛ iratek, nɔng Arim Adakunom di ki sɛ iratek ayɛt e.” 5AYeso shim aMata nɛ anganyining nɛ aLazarus. 6Ngma nɛ anɔng, izen fɛ́ a fok, yɛ aLazarus ku rɔ, a ban nye nkɔs nfaa azɔng narɔ fɛ́ a di se.
7Ama anɔng, a nɛ a fɛ̀ nɛ bafi mɛɛs wu, “Won in bun yit sak na aJudiya.”
8Wɛt bafi imɛɛs wu fɛ̀ ni wu, “Ka! Anet Itees, ni nkɔs nang, fɛ́ bakɔk-ashon baYahuda tsɛt ba da bara nɛ ata, ngma nɛ anɔng i shim in bun yit azɔng ɛ?”
9AYeso fɛ̀ ni ba, “Kaakyɛ kunom bɛ́ mgbɛy nfɛ́ agyip kusɔk abe afaa awɛ? Ngma ayɔng fɛ́ a tsees ni mgbɛy, a turuk kutak awo, nek a yɛrɛ mgbɛy azatse nang. 10Ngma ayɔng fɛ́ a tsees ni irèn, vit mgbang nɛ a turuk kutak nek vit iwu ni mgbɛy.”
11Ama fɛ́ a mi gang ifɛ̀ me dɔng, a fɛ̀ ni ba, “Afidang yit aLazarus mi men nda; Imi shim in tsin ku shemeng.”
12Bafi imɛɛs wu fɛ̀ ni wu, “ATisa, kɛ a se ni nda, a da te kyang kɔ.” 13AYeso se ni cɛɛt naton iku aLazarus, nɛ bafi mɛɛs wu sok fok a se ni nda.
14Nek anɔng aYeso kaba tak wɛshɛk fok, “aLazarus mi ku, 15imi bi iyɛ ikan nek ikyɛng e te imi vit azɔng, nɔng i da nɔɔk yin atsak. Dorok yin in tseng yit narɔ wu.”
16AToma, fɛ́ ba ku yes aDidimus#11:16 aDidimus: Ni ilem aGirik yet kafɛrɛs., fɛ̀ ni ishɛrɛp bafi kuus e, “Dorok yin, in tseng yit, in da tsin kus yit gung ni iwu.”
AYeso yet idoro bafaben sak kutset
17Izen fɛ́ a tsɛ ta azɔng, aYeso tsɛ sɛ aLazarus mi nye nkɔs nnaas ni rɛk. 18ABetani se bakat amɛl afaa#11:18 Ke: Bakat akilo ataat. sak nɛ aRushelima, 19nek anɔng, baYahuda dot tse akɔk ba aMata nɛ aMarya nek iku arunyining bá. 20Nizen fɛ́ aMata fok fok aYeso wuruk, a dorok a tsɛ a ku shan ni irèn. AMarya di wey ari. 21AMata fɛ̀ nɛ aYeso, “ATisa, ngɔn fi i se azeng, kɛ arunyining yit ku awo. 22Awɛt in rēn yɔkɔnɔng ana, Adakunom da ka nɔɔk ngma ikyɛng fi i rip.”
23AYeso fɛ̀ ni wu, “Arunyining da tɛ dorok.”
24AMata fɛ̀ ni wu, “Imi rēn fok a bi tɛ dorok ni izen idoro bafaben atuk igang azatse.”
25AYeso fɛ̀ ni wu, “Imi wu in yet idoro bafaben, imi wu in yet kutset. Ngma ayɔng fɛ́ a nɔɔk atsak ni mi, kɛ a ku a bi sɛ kutset; 26ngma ayɔng fɛ́ a se ni kutset, fɛ́ a nɔɔk atsak ni mi, a bi ku awo. Ngɔn nɔɔk atsak nɛ anɔng ɛ?”
27AMata fɛ̀ ni wu, “Ey, aTisa, imi nɔɔk atsak fok ngɔn wu i yet Anet-Isheshek, Arim Adakunom e, yɔng fɛ́ ba fɛ̀ a bi bɛ́ na azatse.”
28Ama fɛ́ a fɛ̀ anɔng, a bun a yes anganyining aMarya ni fam, a ku tak fok, “Anet Itees e mi bɛ́, a tsin da risim.” 29Izen fɛ́ aMarya fok anɔng, a wat a dorok ziri sak narɔ wu. 30Na aYeso resek mo dan nɔ ayɛt kaban wɔp e, ni wu resek narɔ fɛ́ aMata di nyim ni wu. 31Nizen fɛ́ baYahuda fɛ́ ba se gung nɛ aMarya nek akɔk, di fɛ́ a wuruk amatse ziri, ba ku kuus mo, ba yes fok nyan, a tse tos ni irɛk e.
32Ni izen fɛ́ aMarya tsɛ ta narɔ fɛ́ aYeso di se, fɛ́ a ku di, a kpa natak wu, a fɛ̀, “ATisa, ki ngɔn fi i se azeng, kɛ arunyining hom ku awo.”
33Nizen fɛ́ aYeso ku di a tsin tos, gung nɛ baYahuda fɛ́ ba tse gung ni wu, ikyɛng e ku ra iyɛ makiyi. 34A ka ba rip, “I ku nɛt in akɛ?”
Ba fɛ̀ ni wu, “ATisa, bɛ́ i da tsi di.”
35AYeso tos.
36BaYahuda fɛ́ ba se azɔng fɛ̀, “Di yin fɛ́ a kushim!”
37Wɛt bakak ayɛt ba fɛ̀, “Iwu fɛ́ a kin tarak ayisi akpatɔn yame, akyɛ ku rone, inye ikyɛng fi i da rone iku anet yɔng ɛ?”
AYeso donong aLazarus ni irɛk
38Ikyɛng e ban ra aYeso iyɛ, a serek bakat ni kurɛk e. Kurɛk e kin yet kusɔs fɛ́ ba fam kanu me ni kuta. 39AYeso fɛ̀ ni ba, “Bingiring in kuta me sak ni fam.”
AMata, anganyining akaku me, fɛ̀ ni wu, “Ka, aTisa! Yɔkɔnɔng a mi te nkɔn, nek a mi nye nkɔs nnaas atut.”
40AYeso tɛ fɛ̀ ni wu, “Imi mi fɛ̀ ni ngɔn, ki i nɔɔk atsak, i da di ízɔk Adakunom awɛ?”
41Nek anɔng, ba bingiring kuta me. AYeso ma yɛrɛk sak naton, a fɛ̀, “Ada, imi da tere fi i mi di fok. 42Imi rēn fok ngɔn di foos kaaki izen, wɛt in tsin fɛrɛng anɔng mok banet bang fɛ́ ba se ni nyeseng azeng, da nɔɔk atsak fok ngɔn wu i di tom.”
43Ama fɛ́ a mi fɛrɛng anɔng, aYeso yes ni kutɔ kuratek, “aLazarus, wuruk amatse!” 44Akaku me wuruk amatse, ni mbɔk nɛ atak ni karam nɛ alinɛn, nɛ ayisi ni karam ni kudun ikpin.
AYeso fɛ̀ ni ba, “Ku bisik in ares irɛk e, nɔng a da tseng!”
Ba tsɛt irén ifɛt aYeso
45Nek anɔng, baYahuda hwyɛt fɛ́ ba tse ite ashow aMarya, fɛ́ ba di ikyɛng fɛ́ aYeso nye, ba di nɔɔk atsak ni wu. 46Awɛt bakak ayɛt ba, tsɛ ba tak BaFarasi ikyɛng fɛ́ aYeso ra. 47Nek anɔng, agbat àware, nɛ BaFarasi, yes inyim kazumung karatek.
Ba kpa tɔ wɔɔn ba yɛ, “Akyɛ fi in se yit ayɛt e yɛ? Di yin fɛ́ anet yɔng tsin raas ntomong ajingjing. 48Ki in ku won yit na a ya kashon anɔng, banet kusum da nɔɔk atsak ni wu, nɛ banet aRoma bɛ́ ba shan mben yit nɛ Karɔ Iya Adakunom Ntong yit.”
49Wɛt azining ayɛt ba, fɛ́ ba ku yes aKayafas, fi iwu wu ayɛt agbat àware afi iyɛ me dɔng, fɛ̀ ni ba, “Vit ikyɛng fi iyin rēn yin! 50Iyin rēn yin fok I wat fɛ́ anet azining da ku nek banet, aza fi mben ngma da wey awɛ?”
51Kucɛɛt kang fɛ́ aKayafas fɛrɛng da ayet kuyiring ice wu awo, tit tɛ agbat àware afi iyɛ me dɔng, a se ni taas ibes fok aYeso da ku nek mben baYahuda kusum, 52iku wu yet nek mben baYahuda kyɛk awo, iyet ifi nnon Adakunom fɛ́ na se kaakɛ, bin di sot bazining. 53Nkum atuk e yɔng, ba kpa tsɛt irèn isok kutset aYeso.
54Nek anɔng, aYeso da a tɛ tsees ni dɛt ayɛt baYahuda awo. Nek anɔng, a tsɛ te myak ice wu nɛ kaban wɔp fɛ́ ba yes ika yɛ aIfrayim karɔ me yet katse, a tsɛ a sonong azɔng nɛ bafi imɛɛs wu.
55Fi izen amok baYahuda fɛ́ ba yes aPasova bɛ́ bakat, banet dot wosong nɛ ban wɔp bá, sak nɛ aRushelima ba tsɛ ba kana kusu gyam nek amok aPasova me. 56Ba woso itsɛt aYeso, fɛ́ ba nyeseng narɔ iya Adakunom ntong, ba woso risim banet, “Iyin di yin tɛ a da bɛ́ amok e nang ɛ?” 57Wɛt agbat àware nɛ BaFarasi, mi tsang tak banet fok ngma ayɔng fɛ́ a di karɔ fɛ́ aYeso di se, na tsɛ tak ziri, nɔng ba da tsɛ ba ku tekap.
Iliyochaguliwa sasa
AYohana 11: IbaasNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2019 The Nigeria Bible Translation Trust and © 2019 Wycliffe Bible Translators, Inc.
