Ntomong Batom 20
20
ABulus tɛ a bun sak ni mben aMasedoniya nɛ aGiris
1Ama fi idorok nhwyɛ me nyeseng, aBulus yes bafi ikuus e, ama fɛ́ a mi ka ba barang mo agap iyɛ, a te a tɔ ni iba, a ma yit irèn sak na aMasedoniya. 2A teng a kat ni mben e yɔng, na di barasa bafi ikuus agap iyɛ ni ncɛɛt wu, a tse a ta na aGiris. 3A nye nfen ntaat azɔng, ni izen fɛ́ a se ni i kana nye a da nɔ kukyɛ ashi sak na aSiriya, baYahuda se ni ite agunung fɛ́ ba da ku fɛt mo, nek anɔng, a tɛ a bun sak na aMasedoniya. 4Banet fɛ́ ba kin ku kuus mo sak azɔng, kin yet ba aSopata arim aPirius fɛ́ a yet anet aBeriya, nɛ Aristakus nɛ aSekundus afi iwɔp aTesaloni, nɛ aGayus afi iwɔp aDerbe, nɛ aTimoti, nɛ bafi mben Asiya aTikikus, nɛ aTurofimus. 5Banet bang kin tung tseng ashon, ba tse ba ki tot yit na aTorowas. 6Iyit kin ni in won yit kuwɔp aFilipi ayɛt kukyɛ ashi ama igang Amok Akpam Vit Ayist e, ama nkɔs ntoon, in tsi in ka ba sɛ yit na aTorowas. In nye yit nkɔs kanakataat azɔng.
Inyim ifi igang e fɛ́ ba ra na aTorowas
7Ni kunom imɛsɛng inyis-nnom baYahuda, in nyis yit ni in yas yit. ABulus cɛɛt ni iba, nek a bi won azɔng akatson, a ya kashon ni kucɛɛt sak kate atuk. 8Agaramun kin se dot ni kutu ari aton, fi in kin di nyim yit e. 9Acam akak fɛ́ ba ku yes ye aYutikus a kin sɛ ni isonong ni iwere, a mi sok nda ntsik makiyi na aBulus tsin rēn cɛɛt. Ni nda mi tseng ni iwu, a ne azɔng na agubuk ataat afi kutu aton e sak aben, ba tse ba sɛ a mi ku. 10Awɛt aBulus tik sak aben, a men naton acam e, a ku kunung ni nbɔk wu, a fɛ̀ ni iba, “I bi daam yin awo, a sɛ ni kutset!” 11A tɛ a ngarak ni itu aton e, a but akpam, a ya. A di fit kucɛɛt ma kadiding weshek, a da ne tseng. 12Banet e sok acam e ni kutset sak ari, ba shining ni ifeng gyet awo.
ABulus te bashɔn Afisa a tɔ
13Iyit kin no yit kukyɛ ashi, in tseng yit ashon aBulus sak ni wop Asos, narɔ fi in da wat ku sok yit mo. Iwu kin won anɔng, nek iwu kin tseng na atak. 14Ni izen fɛ́ a tse a ki sɛ yit na Asos, in ku sok yit, in ma yit yit irèn sak ni wɔp aMitilin. 15Akatson, in wɔk yit, in tat yit ni wɔp izek aKiyos, ni kunom kufɛ́ afaa, in tsin in ta yit ni wɔp izek aSamos, in tin ikoso yit kutseet, akatson iyit bang na aMiletus. 16Na aBulus mi sok ayɛt iyɛ wu na tun a di ki berem karak vit ite rɛɛt na Afisa kɔng ba bi fɛt izen ni mben Asiya. Nek a kin se na ziri, nyen na a tse a ta na aRushelima aTuk aPɛntɛkɔs.
17A kin nat a nyeseng na aMiletus, a da tom na ba yes bashɔn ikuus Afisa. 18Izen fɛ́ ba bɛ́, a fɛrɛng ni ba ye, “Iyin rēn yin kuri kusot fi in nye, neme fi in di se ni yin, nkum kunom imɛsɛng fi in kin di nɔ ni mben Asiya. 19In tik ni ice hom, in ra Adakunom kutomong ayɛt nayisi, ngma ni kuri izot fɛ́ baYahuda di mara ne. 20Iyin rēn yin fok imi mang won dang ki tak yin ngma ikyɛng fi i se gyat ni yin awo, in ki tees yin ni dɛt, nɛ na nasa. 21Imi mi tonong baYahuda nɛ bafi ilem aGirik fok i se gbingbing na ba wosong anɛn, na ba tirik na Adakunom ni inɔɔk atsak na aYeso aTisa yit.
22“Yɔkɔnɔng ana, Kabik di te mo nyɛng, in se ni irèn sak na aRushelima, in rēn ikyɛng fi i da te ni imi azɔng awo. 23Nkum ikyɛng fi in rēn yet, na kaakyi kuwɔp, Kabik aJɛrɛ nye ni imi fok, izot ni inyang tsin di tot. 24Ngma na anɔng, imi sok kutset hom nanu ikikak awo, ki in da kyem in gang i tsi fi in se ne, ni in gang kutomong fɛ́ aTisa hom aYeso mi di nɔk kyɛk. Kutomong e yet ishara ifɛ̀ itek ifi itek Adakunom.
25“Yɔkɔnɔng in rēn fok vit azining ayɛt yin fi imi mi kat ishara ifɛ̀ igwɔm Adakunom fɛ́ a da tɛ a di di. 26Nek anɔng, in tsin ki tak yin atut fok, nasok akak se naton ice min awo. 27Nek imi mi won dang ki tak yin ngma ikyɛng fɛ́ Adakunom fɛ̀ awo. 28Tosok yin ace yin, ne banet fɛ́ Kabik aJɛrɛ mi ki sak yin bafi iyɛrɛ ba. Sot yin banek bafi ikuus Adakunom#20:28 Afumung akak afɛ́ ashon kin bɛ́: bafi ikuus aTisa., bayɔng fi iwu shan na nasok ari wu. 29Nek imi rēn fok, ama fi in mi tseng, aduk anet fɛ́ a se tɛ agbayɔrɔ, bi bɛ́ a nɔ ayɛt yin, a bi won bafi ikuus e awo. 30Bakak ayɛt yin ace yin, bi dorok nek ibeseng atsak e, nek ba di kɔrɔk nhwyɛ bayɔng fɛ́ ba bi ka ba kuus mo. 31Nek anɔng, tosok in ace yin, yiring yin ayɛt ayɛ ataat fi in ra ni yin, imi won dang in ki kɔk yin ato, kunom nɛ katuk ayɛt nayisi awo.
32“Yɔkɔnɔng, in tsin ki won yin ni bɔk Adakunom. Won ifɛ̀ Adakunom fi i nesek itek, ni i ki nok yin, ni i ki nɔɔk yin iya itekari gung na bayɔng fɛ́ ba mi ka ba te jɛrɛ. 33Imi mi te kuhwye ni kutsɔm kukan, kɛ kutsɔm kuseng, kɛ ares akak awo. 34Iyin ice yin i rēn yin fok, mbɔk hom nang na fi in ya ni imi, na banet fɛ́ ba se gung ni imi. 35Ayɛt ikyɛng fi in ras, in ki tonoso yin fok i se gbing-gbing ni in taat kutsin ni tomong, in di se yit in di gyerep yit bayɔng fɛ́ ba se vit agap. Won ni in yiring yit ni ifɛ̀ aTisa yit aYeso ye, ‘Awɛng se naton inesek aza ishashang.’ ”
36Ama fɛ́ a mi gang kucɛɛt, a sak akut aben ni iba, ra awon. 37Ngma ba ba tos na ba yisik aBulus na ba ku nyes ashow isak anu. 38Ikyɛng fi idung ka ba ra iyɛ yet ifɛ̀ dɔng fɛ́ a fɛ̀ ye da ba bi tɛ ba ku di awo. Ama anɔng, ba tse ba ku tsa sak ayɛt kukyɛ ashi me.
Iliyochaguliwa sasa
Ntomong Batom 20: IbaasNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2019 The Nigeria Bible Translation Trust and © 2019 Wycliffe Bible Translators, Inc.
