1 BaKorinti 2
2
1Ábaruneng, izen fi in kin bɛ́ ishara ifɛ̀ azɔng ni yin, in kin bɛ́ ni itang anu ke ni kutsitsɛng kukak fi in kin ki taas yin mo ikyɛng fɛ́ Adakunom nye fi i se ni nɛt awo. 2Nek in rosom fok nkum kusot hom nate yin, in da shim in rēn ikyikak awo, tit kucɛɛt naton aYeso Kristi ni itekak wu. 3Imi kin bɛ́ ni yin gbɛrɛk ni nnyim, ni itiim irɔm. 4Itom hom ni ishara ifɛ̀ hom kin se ni irèn kutsitsɛng ni ikɔk nhwyɛ awo, tit i kin se ni itonoso agap kutomong abik, 5kɔn ishan atsak yin bi sot naton kutsitsɛng banet awo, tit ni kukyem Adakunom.
Kutsitsɛng na Abik
6Ngma ne anɔng, in cɛɛt yit kucɛɛt kutsitsɛng sak na bayɔng fɛ́ ba mi kyem, awɛt kutsitsɛng e yet kufi ayɛ nang ke kufɛ́ bágwɔm ayɛ nang fi kurat bà mi bɛ́ awo. 7Awey yo, iyit cɛɛt yit naton kutsitsɛng Adakunom fi ku se ni nɛt, kutsitsɛng fɛ́ ba kin nɛt iko, kuyɔng fɛ́ Adakunom mang sak gyam dang na ba nye kazatse nek ízɔk yit. 8Vit akak ayɛt bágwɔm ayɛ nang kyem a rēn iko, nek ba kin fɛ́ ba rēn, ke ba kin tekak aTisa ízɔk awo. 9Ngma na anɔng, i se ni jɛk,
“Vit ayisi fɛ́ a ki mang di,
vit kuto fi ku ki mang fok,
vit iyɛ fi i ki mang yiring,
ikyɛng fɛ́ Adakunom mang nye
nek bayɔng fɛ́ ba kushim.”
10Awɛt Adakunom mi ki tonong yit ina ayɛt abik wu.
Nek Kabik tsɛsɛk kaakyɛ, ngma nkyɔrɔk Adakunom fi in se tsik-tsik. 11Nek akyɛ anet fɛ́ a rēn kuyiring anet akak ɛ tit kabik fɛ́ ka se ayɛt anet e awɛ? Kpaf anɔng, vit anet fɛ́ a rēn kuyiring Adakunom tit Kabik Adakunom e. 12Iyit shan yit kabik azatse awo, tit Kabik fɛ́ a ne na Adakunom, nɔng in di ki rēn yit ikyɛng fɛ́ Adakunom nɔɔk ni mbɔk washak. 13Ikyɛng deng fi in di cɛɛt yit naton e, da ni ncɛɛt fɛ́ banet ki tees yit awo tit ncɛɛt fɛ́ Kabik ki tees yit, in cɛɛt yit atsak abik sak na bayɔng fɛ́ ba se na abik. 14Anet fɛ́ a se vit Kabik, a shashang nkyɔrɔk fi in nes na Kabik Adakunom awo, nek in yet nkyɔrɔk abap ni wu, ama anɔng, da a kyɛm a rēn ina awo, nek a yɛrɛ ina na ayisi abik. 15Awɛt anet fɛ́ a se na abik, a tsɛɛm kaakyi ikyɛng, awɛt iwu ice wu, a se nawop ishɔk akak awo,
16“Angan wu a ki mang rēn
kuyiring aTisa yɛ?
Angan da kyɛm a ku tees ɛ?”
Awɛt iyit, bɛ́ yit kuyiring Anet-Isheshek.
Iliyochaguliwa sasa
1 BaKorinti 2: IbaasNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2019 The Nigeria Bible Translation Trust and © 2019 Wycliffe Bible Translators, Inc.