GALUEGA 7
7
Ko te Lauga a Setefano
1Muna a te Faitaulaga Pule ki a Setefano, “E a, e tonu te muna tenei?” 2#Kene 12.1Muna a Setefano: “Faka'logo mai e taina mo tamana. Ne fakaasi atu te Atua tela e o ia te 'malu ki te tou tupuga ko Apelaamo i tena nofoga i Mesopotamia, ka koi tuai a ia o fano o nofo i Halana. 3Muna a te Atua ki a Apelaamo, ‘Tuku tou kaiga mo tou fenua, kae fano o nofo i te fenua ka fakaasi atu ne au ki a koe.’ 4#Kene 11.31; Kene 12.4Tela, tuku eiloa ne ia te fenua ko Kaletaia, kae fano o nofo i Halana. I te matega o te tamana o Apelaamo, fai ei ne te Atua Apelaamo ke na vau o nofo i te fenua tenei e 'nofo ei koutou. 5#Kene 12.7; 13.15; 15.18; 17.8Ne seki tuku eiloa ne te Atua se vaega io me ne mo laukele o te fenua tenei ke fai mo manafa o Apelaamo; kae ne folafola ne te Atua ki a ia me tuku atu eiloa ne ia ki a ia, ka fai foki mo ona fenua fakatasi mo ana fanau; ka ko Apelaamo e seki iai ne ana tama i te taimi tena. 6#Kene 15.13,14Tenei te muna a te Atua ne fai, ‘Ka fai ana tama mo fai a tino fakaalofa i se fenua fakaatea, tela ka fakapologagina kae fai maseigina latou ne tino i kona i te fa selau tausaga. 7#Eso 3.12Ka fakamasino ne au a te fenua tena ka tavini ki ei latou; kafai ko teka atu a mea konei, ko olo ei latou keatea mai te fenua tena, kae ka tapuaki mai ki a au i te koga tenei.’ 8#Kene 17.10-14; Kene 21.2-4; Kene 25.26; 29.31—35.18Tela, tuku ei ne te Atua ki a Apelaamo te faifaiga o te pilitome ke fai mo fakailoga o te feagaiga tenei. Tena te mea ne pilitome ei ne Apelaamo a Isaako, e tasi te vaiaso i te otiga ne fanau. Ne pilitome ne Isaako a Iakopo, ka ko Iakopo ne pilitome ne ia o'tou tupuga e tinoagafulu mo te tokolua.
9 #
Kene 37.11;
Kene 37.28;
Kene 39.2,21 “E loto masei a tupuga konei ki a Iosefa, tela 'togi atu ei ne latou a Iosefa ki Aikupito. Ka ko te Atua e fakatasi faeloa mo ia. 10#Kene 41.39-41Ne fakasao foki a ia ne te Atua mai mea faiga'ta katoa ne fepaki mo ia i te aumaiga o Iosefa ki mua o Falao, te tupu o Aikupito, ne tuku atu ne te Atua ki a ia te poto mo te amio fakafiafia loto i mua o te tupu. Tela, 'tofi ei a ia ne Falao ke fai mo kovana o te fenua katoa, pela foki te kaiga tupu. 11#Kene 42.1,2E isi se oge ne poko i Aikupito katoa, pela foki mo Kanana, kae uke foki a mea faiga'ta ne pogai mai ei. Ko se mafai ne o'tou tupuga o maua ne olotou meakai. 12Tela la, i te lagonaga ne Iakopo me maua a saito i Aikupito, uga atu ei ne ia o'tou tupuga ke olo ki kona, kae tena foki eiloa te lotou malaga muamua ki Aikupito. 13#Kene 45.1; Kene 45.16I te lotou oloatuga i te fakalua ki Aikupito, ne fakaasi faka'lei ei a Iosefa ki ona taina, iloa ei foki ne Falao a te tupumaiga o Iosefa. 14#Kene 45.9,10,17,18; Kene 46.27Ne avatu te fekau a Iosefa ki a Iakopo tona tamana, pela foki mo ona kaiga, ke o'mai ki Aikupito. E tusa mo te tino fitu mo te tokolima te aofaki o latou katoa. 15#Kene 46.1-7; Kene 49.33Tela, fano ei a Iakopo o nofo i Aikupito, i te fenua ne mate ei a ia fakatasi mo o'tou tupuga. 16#Kene 23.3-16; 33.19; 50.7-13; Iosu 24.32Ne ave katoa o tanu i Sekema, i te tānuga tela ne 'togi ki tupe ne Apelaamo mai te matakaiga o Hamola i Sekema.
17 #
Eso 1.7,8 “Ka ko pili ki te taimi e fakataunu ei te folafolaga a te Atua ne fai ki a Apelaamo, ko na gasolo ei o tokouke a te aofaki o'tou tino i Aikupito. 18Ko sopo te tupu fou ki te nofogaaliki, kae se iloa ne ia Iosefa. 19#Eso 1.10,11; Eso 1.22Ne fakaloiloi ne ia o'tou tino, kae fakasaua foki ki a latou, kae fakatonu malosi ne ia ke tuku tiakina keatea olotou pepe mai olotou fale, ko te mea ke 'mate. 20#Eso 2.2Ko te vaitaimi tonu eiloa tenei ne fanau ei a Mose, kae se tamaliki tinogali. Ne puti ake eiloa a ia i te fale o tona tamana i te tolu masina. 21#Eso 2.3-10I te taimi ne ave ei keatea mai te fale, ne puke ne te tama fafine a Falao, kae putiputi ake eiloa ne ia e pela eiloa mo sena tama tonu. 22Ne tauloto ne ia a poto katoa faka Aikupito, kae se tagata e iloga i ana pati mo ana faiga.
23 #
Eso 2.11-15
“I te katoaga o te fa sefulu tausaga o tona olaga, ne oko ifo ki a ia te lagona o asiasi atu ki ona taina Isalaelu. 24Ne matea ne ia a te tino Isalaelu e tokotasi e fai masei ne te Aikupito, fanatu ei a ia o fakasao te ola o te tino tena, i te tamate ne ia te Aikupito. 25Ne leake eiloa a ia me maina 'lei ona taina, i te Atua ka fakaaoga ne ia a ia o fakasaoloto latou; kae tela la, e se maina foki i a latou. 26I te sua aso, ne maua atu foki ne ia a tino Isalaelu e tokolua e 'fusu, taumafai ei a ia o faka'lei laua, ana muna, ‘Kiloke, a koulua e taina. Ai a e taua ei koulua?’ 27Ka ko te tino tela ne fakasaua ki tona tuakoi ne 'tule ne ia keatea a Mose, kae fai atu ki ei, ‘ko oi ne fai ne ia koe ke fai mo pule mo famasino ki a matou?’ 28‘E manako foki koe o tamate au e pela mo tau tamatega i te Aikupito anafi?’ 29#Eso 18.3,4I te pokoga a Mose i te pati tenei, sola eiloa a ia o nofo pela mo se fakaalofa i te fenua ko Mitiana, tela ne fai ei ana tama tagata e tokolua.
30 #
Eso 3.1-10
“I te tekaga o te fa sefulu tausaga i te 'tupuga o mea konei, fakaasi atu ei ki a Mose te agelu a te Aliki i te ulaga o te afi i te lakau e ka i te vao e pili ki te Mauga o Sinai. 31Ne ofo a Mose i te mea ne matea ne ia, kae i tena piliatuga o kilo faka'lei ki te vao ka tena, ne lagona ne ia te leo o te Aliki e faipati penei, 32‘Au ko te Atua o otou tupuga, ko te Atua o Apelaamo, Isaako mo Iakopo.’ Ne polepole a Mose i te mataku, ka ko se toe fia kilo eiloa ki te vao 'ka. 33Muna a te Aliki ki a ia, ‘Tapale ou taka keatea, me i te koga tena e tu ei koe, se laukele tapu. 34Ko oti ne matea tonu ne au te fakaalofa o oku tino i Aikupito. Ko oti foki ne lagona ne au te lotou tagi fi'ta, ka ko vau nei au o fakasao latou. Vau la, ke uga atu ne au koe ki Aikupito.’
35 #
Eso 2.14
“A Mose tenei ko ia tela ne 'teke ne latou i olotou muna penei, ‘Ko oi ne fai ne ia koe ke fai mo pule mo famasino ki a matou?’ Ko ia eiloa tenei ne fakaasi atu ki ei te agelu a te Atua i te vao ka, tela ne uga mai ne te Atua ke fai mo pule mo fakaola. 36#Eso 7.3; Eso 14.21; Nume 14.33Ne takitaki ne ia tino keatea mai Aikupito. Ne fai foki ne ia a vavega, mo mea fakaofoofogina i Aikupito mo te Tai Kula, pela foki i te koga lavaki i te fa sefulu tausaga. 37#Teu 18.15,18Ko ia foki tenei ne fai atu ki tino Isalaelu, ‘Ka uga mai ne te Atua se pelofeta ki a koutou, kae se tino eiloa mai i a koutou, e penei foki mo au ne uga mai ne ia ki a koutou.’ 38#Eso 19.1—20.17; Teu 5.1-33Ne fakatasi foki a ia mo tino Isalaelu ne potopoto i te koga lavaki; ne fakatasi mo o'tou tupuga; ne iai foki i kona mo te agelu ne faipati atu ki a ia i te Mauga o Sinai. Ne maua foki ne ia a muna o te ola ke tuku mai ki a tatou.
39“Ne ita o'tou tupuga o faka'logo ki a ia; ne 'fuli atu olotou tua ki ei mo te loto fia foki ki Aikupito. 40#Eso 32.1Muna a latou ki a Alona, ‘Fai ake ne atua mo tatou, ke 'taki ne latou tatou. Ko se iloa ne tatou me se a te mea ne tupu ki a Mose, tela ne aumai ne ia tatou mai i Aikupito.’ 41#Eso 32.2-6Tela, fai ei ne latou i taimi kona se tupua e fakatusa ki te tamā pulumakau, kae tuku atu a taulaga ki ei; fai ei ne latou se fakafiafiaga lasi ki fua o galuega o olotou lima. 42#Amo 5.25-27Ne fulitua atu te Atua ki a latou, kae fai ne ia latou ke tapuaki ki fetu o te lagi, e pela eiloa mo muna a pelofeta ne tusi:
‘Tino Isalaelu! E se ko au
Ne ala ei o 'ta otou manu,
Kae tuku mai mo fai otou taulaga
I te fa sefulu tausaga i te koga lavaki.
43Ne ave sale ne koutou a te fale o Moloka,
Mo te fakatusa o te fetu ko Lefana te otou atua,
Ko fakatusa kola ne faite ne koutou, o tapuaki atu ki ei.
Tela la, ka fakasalalau valevale ne au koutou ke silia atu i tuakoi o Papelonia.’
44 #
Eso 25.9,40 “Ne 'nofo eiloa otou tupuga mo te fale tapuaki ave sale i malaga i te koga lavaki. Ne faite eiloa ki te ata ne fakaasi atu ne te Atua ki a Mose, e pela eiloa mo te mea ne matea ne ia. 45#Iosu 3.14-17Fakamuli ifo a te fale tela ne maua ne omotou tupuga mai i olotou tamana, ne ave eiloa ne latou i te lotou ologa mo Iosua, kae puke malo ne latou a laukele o nisi malo mai i olotou mua, kola ne afuli ne te Atua. Ne tuku i kona ke oko eiloa ki aso o Tavita. 46#2Samu 7.1-16; 1NTupu 17.1-14Ne alofagina a ia ne te Atua, fakatagi atu ei a ia ki te Atua, ke talia mai a ia ke fakatu ne ia se fale e nofo i ei te Atua o Iakopo.#7.46: te Atua o Iakopo; i nisi o lomiga e isi iei ko tino Isalaelu. 47#1Tupu 6.1-38; 2NTupu 3.1-17Ka ko Solomona ne fai ne ia te fale mo te Atua.
48“A te Atua Tafa Sili i te Maluga, e se nofo i fale e faite ki lima. E pela mo muna a te pelofeta,
49 #
Isa 66.1,2 “Muna a te Aliki,
‘A toku nofogaaliki ko te lagi,
Ka ko te lalolagi ko te mea e tuku ei oku vae.
Se a te vaega fale ka fai ne koutou mo oku?
Tefea foki te koga mo oku malolo?
50E seki fai katoa ne au a mea konei?’
51 #
Isa 63.10
“Ko oko eiloa i te otou loto make'ke, mo te loto pouliuli mo te faka'tuli otou taliga o talia te muna a te Atua! E pau eiloa koutou mo otou tupuga; ne 'teke foki ne koutou a te Agaga Tapu! 52Ko oi se tino mai te kau pelofeta e seki fakasaua ne otou tupuga? Ne tamate ne latou a pelofeta kola ne 'valo ne latou te oko mai o te Tavini amiotonu. Kae nei ko oti ne fakalata kae tamate foki ne koutou. 53A koutou ko tino kola ne maua ne koutou a te tulafono a te Atua e alatu i ana agelu, kae se tausi eiloa ne koutou.”
Ko Peipei ne tino a Setefano ki Fatu
54Ka koi fakalogo'logo a tino o te Fono Maluga ki a Setefano, ko u fua olotou nifo i te kaitaua ki a ia. 55Ka ko Setefano i mo taimi kona, ko fonu eiloa i te Agaga Tapu. Ne kilo ake ona mata ki te lagi, matea atu ei ne ia te 'malu o te Atua mo Iesu e tu i te feitu taua, ko te fakaatamai o te Atua. 56Fai ake ei ana muna penei, “Kiloke, ko matea ne au te lagi e matala, mo te Tama a te Tagata e tu i te feitu fakaatamai o te Atua!” 57Ne paka'laga latou ki luga kae 'pono olotou taliga, kae 'tele fakatasi atu katoa ki a ia, 58soso malo ei ne latou ki tua o te fa'kai, kae peipei ki fatu. Ne tuku atu foki a gatu o tino molimau ke tausi ne te tamatane e igoa ki a Saulo. 59Ka koi peipei ne latou a Setefano, ne kalaga atu a ia ki te Aliki, ana muna, “Te Aliki ko Iesu, ke talia mai ne koe toku agaga.” 60Ne totuli kae kalaga malosi ki luga, ana muna, “Te Aliki, ke fakamagalo ne koe te lotou agasala.” I te otiatuga o ana pati konei, ko te mea eiloa ko mate.
Iliyochaguliwa sasa
GALUEGA 7: Tusi Tapu
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Tuvalu Revised Bible © Bible Society in the South Pacific
