Math 24
24
Yecu Ajam në Biäk de Riääk de Luaŋdït
(Mak 13:1-2; Luk 21:5-6)
1Na wën, aacï Yecu lɔ biic, ke jël Luaŋdït, go kɔckɛn ë piööcë bɛ̈n të nu yen, bïk ë bɛ̈n nyuöth ɣööt ke Luaŋdït. 2Go Yecu ke yɔ̈ɔ̈k an, “Cäkï kakë woi kedhie? Wek yɔ̈ɔ̈k ëyic an, acïn kuur töŋ bï döŋ ë kuur däŋ nɔm ee tënë, kuur cï bïï dɛɛny piny.”
Nuan ku Yaaŋdït
(Mak 13:3-13; Luk 21:7-19)
3Na wën, të rëër en ë kuur ë Olip nɔm, ke kɔcpiööcë ke ke bɔ̈ të nu yen kapäc, bïk ku luelkï an, “Lɛ̈kë wook, bï kake röt looi nɛn? Ku kë bï kɔc bɛ̈ndu ŋic ee käŋö, ayï thök de piny?”
4Go Yecu pɔ̈k nɔm keek an, “Tiɛtkï röt ke cïn raan bï week math. 5Kɔc juëc abïk bɛ̈n ë rinkï, bïk ku luelkï an, ‘Yɛn Kërtho kï, agokï kɔc juëc math. 6Ku we bï tɔɔŋ piŋ ku piɛŋkï jam de tɔɔŋ, tiɛtkï röt ke we cïï bï diɛɛr, kakë abïk dhil tïc kedhie, ku ŋoot thök de piny. 7Jurë abï tɔŋ yiɛ̈n jurë, ku yïn ciɛɛŋë tɔŋ ciɛɛŋë, ku cɔŋdït abï nu, ayï jɔɔk ë kɔc thöl, ayï nieŋ ye piny rɔt niɛŋ, abïk nu tɛ̈ɛ̈n ku tɛ̈ɛ̈n. 8Ku kakë kedhie acïtkï kɛ̈c ee tik käc të kɔɔr en dhiëth.
9 #
Math 10:22. E aköölkë ke we bï yiɛ̈n kɔc, kɔc bï we luöi kërac, ku näkkï week abäk thou, ku we bï maan ë juöör ëbɛ̈n në baŋ de rinkï. 10Kɔc juëc abïk piɔ̈ɔ̈th diu ë aköölkë, agokï röt nyiɛɛn kapäc, ku mankï röt kapäc. 11Ku tït aluɛth abïk röt jɔt ke ke juëc, agokï kɔc juëc math. 12Ku nhiëër nu ë kɔc juëc piɔ̈ɔ̈th abï liɛɛr, në ŋuëŋ bï kërac enyin ŋuak. 13#Math 10:22. Ku raan bï epiɔ̈u ruut aɣët të bï käŋ thök, yen abï kony wëi. 14Ku wëlpiɛthkë wël ke Ciɛɛŋ abï ke guiëër kɔc ke piny nɔm ëbɛ̈n, agokï aa cäätɔɔ ë juöör nïïm kedhie, ku jɔ thök de käŋ bɛ̈n.
Kënhiɛɛny ee Käŋ Riɔ̈ɔ̈k
(Mak 13:14-23; Luk 21:20-24)
15 #
Dan 9:27; 11:31; 12:11. Të cä wek kënhiɛɛny ee käŋ riɔ̈ɔ̈k tïŋ, kë cï lueel ë tiët Danyel, të cä wek e tïŋ akääc tëɣeric (raan kuen jam tɔ yökic apiɛth). 16Ke kɔc nu ë Juda ë ke kɔt lekï ë kur yiic. 17#Luk 17:31. Ku raan nu ë ɣöt nɔm nhial ë cïï bɔ̈ piny bï käŋ bɛ̈n bɛ̈ɛ̈i bei ɣönde. 18Ayï raan nu ë domic, ë cïï enɔm dɔk le lupɔɔke diëc. 19Ku amawoou ë diëër liac ayï diëër thuat ë aköölkë! 20Yak lɔ̈ŋ ë baŋ ë kat kat wek, ke cïï bï nu rut, ku cïï bï nu ë kööl ë Thabath aya! 21#Dan 12:1; Nyu 7:14. Ë aköölkë këtuc dït abïï kɔc yök këtuc cïn kë kït ke ye, gɔl të ɣɔn ciɛkë piny aɣët cï ënɔɔnë. Ku acïn kë bï ciët en bï lɔ̈ɔ̈k nu aɣet athɛɛr. 22Ku të kënë aköölkë teem kɔ̈ɔ̈th, ka cïn kɔc duëërë luök, ku në baŋ de kɔc cï lɔc, aköölkë abï ke teem kɔ̈ɔ̈th.
23“Ë aköölkë, të de yen raan yöök week an, ‘Tiëŋkï, Kërtho kï eenë! Ku an, Yeka ëtɛ̈ɛ̈n! Ke duökï gam. 24Kërtho aluɛth abïk röt jɔt kekë tït aluɛth, ku abïk göök dït aa nyuöth kɔc, ayï kagɛ̈iyë ke dït, ku aduëërkï kɔc cï lɔc gup cɔ̈k nïïm wei, të cï kek e lëu.
25Tiëŋkï! Acä guɔ lɛ̈k week ke kaam ë ŋoot.
26 #
Luk 17:23,24. Ku ënɔɔnë, të lëk kek e week an, “Tiëŋkï ye ka, ë jɔ̈ɔ̈ric, ke we duökï lɔ, ku na luelkï an, ‘Tiëŋkï ye ka, ë ɣötic thïn ya,’ ke duökï gam. 27Acït man de wilëdeŋ ee piny riaau ëbɛ̈n, gɔl të lɔ aköl amiäk ɣet të lɔ aköl athɛ̈i, yen abï ciët bɛ̈n ë Wën ë Raan aya. 28#Luk 17:37. Të nu kë cï thou, yen ee të bï cuɔɔr guiëër thïn.
Bɛ̈n de Wën ë Raan
(Mak 13:24-27; Luk 21:25-28)
29 #
Yith 13:10; Jol 2:10,31; 3:15; Nyu 6:12;
Yith 13:10; Edh 32:7; Jol 2:10; 3:15;
Yith 34:4; Nyu 6:13. Na ëlë ënɔnthiinë, të cï këtuc ë aköölkë thök, ke akɔ̈l abï cuɔl, ku pɛɛi acïï bï ruɛl, ku kuɛl abïk löny nhial, ku riɛl dït ke tënhial abï ke niɛŋ. 30#Dan 7:13; Dhek 12:10-14; Nyu 1:7. Na ëlë, ke gök bï Wën ë Raan ŋic abï jɔ tïc tënhial, ago dhiëën ke piny nɔm ëbɛ̈n, agokï keyöth biɔ̈ɔ̈k ke ke dhiau, ku abïk Wën ë Raan tïŋ abɔ̈ ë luäät yiic nhial ke cath ke riɛl dït ku dhuëëŋ dït. 31Na ëlë, abï tuuckɛn nhial tooc në kaaŋ kök arëët, lek kɔc cï lɔc kut nïïm, kɔc nu të lɔ rut, ku wöuwic, ku të lɔ aköl amiäk, ku të lɔ aköl athɛ̈i, gɔl ë nhial baŋ tök aɣët nhial baŋ tui.
Kääŋ de Tim ë Ŋaap
(Mak 13:28-31; Luk 21:29-33)
32Jakï kääŋ piŋ apiɛth, kääŋ de tim ë ŋaap, të cï këërde guɔ aa tiëu, ke nyok, yen aya wek e ŋic nɔn cï deŋ amäi thiɔ̈k. 33Yen acït ee kënë ayadäŋ, të tiëŋ wek kakë kedhie, ke jakï ŋic nɔn cï en guɔ thiɔ̈k, acï ɣëët ë ɣööt thook. 34Wek yɔ̈ɔ̈k ëyic an, Rem de ënɔɔnë acï bï thök, të ŋootë kakë kedhie ke ke kën tïc. 35Tënhial abï nyai ayï piny, ku wëlkï acïkï bï nyai ananden.
Raan Ŋic Akööl ku Thaar
(Mak 13:32-37; Luk 17:26-30,34-36)
36Ku në këde ë köölë ayï ee thaarë acïn raan ŋic en, cakaa tuuc nu paannhial acïkï ŋic, ee Wäär etök, en aŋic e. 37#Cäk 6:5-8. Ku acït man ë akööl ke Nowa ɣɔn thɛɛr, yen abï ciët bɛ̈n de Wën ë Raan aya. 38Acït man ɣɔn thɛɛr ŋoot amooldït wei, kɔc aake ye cam ku dëkkï, ku thiëkkï ku tɔkï duetken thiak, aɣet akööl ë le Nowa ë abëlic, 39#Cäk 7:6-24. ku kuckï aɣët bɛ̈n cï amooldït bɛ̈n, bï ku jɔt keek wei kedhie, yen abï ciët bɛ̈n ë Wën ë Raan aya. 40Ëköölë kɔc kaarou abïk nu domic, tök abï jɔt, ku nyiëëŋë tök piny. 41Diëër guär kaarou, tök abï jɔt, ku nyiëëŋë tök piny. 42Yen aa wek röt tiit, wek kuc thaar bï Bɛ̈nydun bɛ̈n thïn. 43#Luk 12:39,40. Jakï kënë ŋic an, Të ë bɛ̈ny de baai ŋic thaar bï cuɛ̈ɛ̈r bɛ̈n thïn wakɔ̈u, adï cï yïn, ku adï kën ɣönde pɔ̈l abï thuur kɔ̈u. 44Ku week, yak röt coc aya, thaar yak lueel an, cïï en bɔ̈, en abï Wën ë Raan thïn.
Kɔc Adööt ku Kɔc cie Adööt
(Luk 12:41-48)
45Eeŋa ye lïm ŋic käŋ döt, lïm pelnɔm, lïm cïï bɛ̈nyde tääu ë dhiënde nɔm, bï kɔc aa yiɛ̈n këdɛn ee cam ë aköölnyïïn? 46Thieithieei ë lïmë, lïm bïï bɛ̈nyde yök ke lui aya, të cï en bɛ̈n. 47Wek yɔ̈ɔ̈k ëyic an, abï tääu ë kake nïïm kedhie. 48Ku të ee yen lïm rac, en ee lïmë, go lueel ë yepiɔ̈u an, Bɛ̈nyda ë gääu ë bɛ̈nde, 49go wɛ̈ɛ̈tkɛn ee kek lïïm jɔ aa dui, ku jɔ aa cam ku dëk kekë kɔc ye mɔ̈u wit ëtök, 50ke bɛ̈ny de lïmë abï bɛ̈n ëkööl cïï ye tit thïn, ku abï bɛ̈n ë thaar kuc, 51ago nyaai ë käŋ yiic, ku tɔ yök këdɛn tuc kekë kɔc de yäc aguk ëtök, dhiëëu abï nu ëtɛ̈ɛ̈n kekë ŋëny de lec.
Iliyochaguliwa sasa
Math 24: dip-JPB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Bible in Jieeng de Padang © The Bible Society in South Sudan, 2011.
