Luɔi 19
19
Paulo anu ë Epetho
1Na wën, të ŋoot Apolo ke tɔ̈u ë Korinth, ke Paulo bɔ̈ Epetho, të cï en bɛ̈i rɛɛr caath yiic, ku yök kɔc töktöök ëtɛ̈ɛ̈n kɔcpiööcë: 2go ke thiëëc an, “Cäk Wëidït ɣer nööm wään gäm wek?”
Gokï yɔ̈ɔ̈k an, “Ei, ciɛk an, de Wëidït ɣer nu akënku piŋ ayadäŋ.”
3Goke thiëëc an, “Ku ye baptith ŋö cï we baptith?”
Gokï lueel an, “Ee baptith ë Jɔn.”
4 #
Math 3:11; Mak 1:4,7,8; Luk 3:4,16; Jɔn 1:26,27. Go Paulo lueel an, “Jɔn aaye kɔc baptith ë yic në baptith de puŋdepiɔ̈u, ku ye kɔc yɔ̈ɔ̈k an, bïk raan gam raan bɔ̈ ë yecök, yen aye Kërtho Yecu.”
5Na wën, aa cïk kënë piŋ, ke ke baptith në rin ke Bɛ̈nydït Yecu. 6Ku të cï Paulo yecin thany ë kegup, ke Wëidït ɣer ke ke bɔ̈ ë kegup, agokï jam gɔl në thook lei, ku guiirkï wël ke Nhialic. 7Kuën ee kɔckë acït thiëër ku rou kedhie.
8Go Paulo lɔ luaŋ ë Nhialic, ku ye wël guiir ke ye nyin riɛl ë pɛ̈i kadiäk, aaye käŋ wɛ̈ɛ̈r yiic kɔc, ku wëët keek apiɛth në këde ciɛɛŋ de Nhialic. 9Na wën, aacï kɔc kɔ̈k nïïm riɛl, ke ke reec gäm, ku luelkï kërac në biäk de Kueer në akutnɔm ë kɔc nïïm, go Paulo jäl ë keyiic, ku tɛ̈ɛ̈u kɔcpiööcë pei, go jam wɛ̈ɛ̈r kɔc ë aköölnyïïn kedhie luaŋ de guiëër ë wël, luaŋ de raan cɔl Turano. 10Ee kënë looi ë run kaarou, ago kɔc rɛ̈ɛ̈r ë Athia ëbɛ̈n gokï jam ë Bɛ̈nydït piŋ, Judai ayï Girikii.
Wɛ̈ɛ̈t ke Thekewa
11Go Nhialic göök tɔ loi në cin ë Paulo, göök bï kɔc ke gäi. 12Aɣɔ̈l lupɔɔ ke abiɔ̈ɔ̈r ayï lupɔɔ ee cieŋ, acï ke bɛ̈ɛ̈i bei ë yeguöp, leerëke tëde kɔc tök gup, go juäi jäl ë kegup, ku bɔ̈ jɔɔk rac bei ë kegup ayadäŋ. 13Ku ade kɔc ke Judai ariëëu, kɔc ee jɔɔk rac cieec. Na wën, ke kɔckë ke ke ye rin ke Yecu cɔɔl ë kɔc nïïm kɔc de gup jɔɔk rac, ayek lueel an, “Wek yöökku në rin ke Yecu, raan guiirë Paulo rinke.” 14Ade kɔc kadhorou kɔc ee kënë looi, kek ayek wɛ̈ɛ̈t ke raan tök cɔl Thekewa, ee Judai, ku ye bɛ̈nydïït ë kake Nhialic.
15Go jɔŋ rac bɛ̈ɛ̈r an, “Yecu aŋiɛc, ku ŋiɛc Paulo, ku week yak yïŋa?”
16Na wën, ke raan de guöp jɔŋ rac kɛɛc ë keyiic, wit keek, ago ke tiaam, adhil kek kat ee ɣönë ke ke cïn kɔ̈ɔ̈th lupɔɔ, ku cï ke dui aläl. 17Go kɔc tɔ̈u ë Epetho kedhie, Judai ayï Girikii, agokï kakë piŋ, gokï piɔ̈ɔ̈th päu kedhie, go rin ke Bɛ̈nydït Yecu aa leec. 18Na wën, ke kɔc cï gam ke ke bɔ̈, ku gamkï cä wööc, luelkï karɛc cïk looi. 19Go kɔc juëc kɔc ee thuëth gokï awereekken bɛ̈ɛ̈i tëtök, ku jɔkï ke nyop ë kɔc nïïm kedhie. Gokï ɣööc de awereek kueen, ku yökkï agum kadhïny de ateek. 20Go jam de Bɛ̈nydït lɔ ke ŋuak rɔt aya, ku tiëm arëët.
Kiɛɛr Rac ë Epetho
21Na wën, aacï kakë thök, ke lueel Paulo e yepiɔ̈u an, bï lɔ Jeruthalem, të cï en tëëk Makedonia ku Akaya, alueel an, “Na ëlëmiäk, të cän lɔ tɛ̈ɛ̈n, ke yɛn bï Roma dhil tïŋ aya.” 22Go kɔc kaarou tuɔɔc Makedonia ë kɔc yiic kɔc ee yen kony, Timotheo kekë Erathato, ku döŋ guöp Athia ë aköölkë.
23Ku ë aköölkë gup, anuɔɔn dït acï rɔt cak në këde Kueer ë Bɛ̈nydït. 24Ade raan cɔl Demeturio, atën ee ateek thɔ̈ɔ̈th, raan ë kathii ye ke Diana lam cuëëc ë ateek, ku ye atëët kɔ̈k tɔ yök wëu juëc. 25Na wën, ke cɔl atëët kedhie, kekë atëët ke luɔi cït ee kënë, ku yöök keek an, “Week wäthii, thäthë aŋiɛckï nɔn ee yen ee wëukuɔ bɛ̈ɛ̈i, wëu bï wok ke pïïr. 26Ku tiëŋkï aya ku piɛŋkï, nɔn cï Paulo kɔc juëc wëŋ ku yɛl keek wei, acie Epetho etök, ee piny de Athia nɔm ëbɛ̈n, aye keek yɔ̈ɔ̈k an, ka ye cuëëc ë kɔc cin, acïkï ee Nhialic. 27Ku ënɔɔnë riɔ̈ɔ̈c anu, nɔn bï tëëtda tɔ cïn naamde, ku acie en etök, riɔ̈ɔ̈c anu aya, luɔi bï luaŋdït ë Diana biɔɔn, ku tɔ cïn naamde, yen gök dïït ë yanh ë tik, ago dhuëëŋdɛn dït riɔ̈ɔ̈k ëbɛ̈n, ku yen aye lam në piny de Athia ëbɛ̈n, aɣet piny nɔm ëbɛ̈n!”
28Na wën, aa cïk jamë piŋ, ke ke göth aläl, ku jɔkï cööt an, “Diana de Epetho yen adït!” 29Go pänydït a wënwën ëbɛ̈n. Gokï Gayo dɔm kekë Aritharko, kɔc ke Makedonia, kɔc ee cath ë Paulo, ku lek ë riaaŋdïtic ke ke riŋ ë piɔ̈n tök, riaaŋ wën ee kɔc guëër thïn. 30Na wën, ke Paulo de piɔ̈u luɔi bï en lɔ thïn të nu kɔc, ku jɔ pëën ë kɔcpiööcë. 31Go kɔc kɔ̈k në röördït ke Athia, kɔc määth ë Paulo, gokï thɔn ku läŋkï an, du rɔt lɔ kuɔɔn ë riaaŋdïtic. 32Ku kɔc aake ye cööt, kɔ̈k ayek kënë lueel, ku luel kɔ̈k kënë: amatnɔm wën cï guëër acïk nïïm liääp kedhie, tëdït ë kɔc akuckï kë ë guëër kek. 33Gokï Alekandaro tuɛɛl ë kut ë kɔc nïïm, ee Judai kek aa tɛ̈ɛ̈u en tueŋ. Go Alekandaro kɔc nieu ë yecin, akɔɔr luɔi bï en këde lueel ë kut ë kɔc nïïm. 34Na wën, aa cïk e ŋic nɔn ee yen Judai, ke ke cöt aläl në röl tök, ku cötkï ë kë cït thaar kaarou, luelkï an, “Diana de Epetho yen adït.”
35Na wën, ke raan ee kake pänydït gɔ̈ɔ̈r ke jɔ kut ë kɔc tɔ lɔ diu, ku jɔ lueel an, “Week, kɔc ke Epetho, de raan kuc pänydït Epetho, nɔn ee yen tïn ë luaŋ de Diana, gök de yanh ë tik, ku nɔn ee yen tïn ë kë cï lööny piny tënhial në Dhio? 36Ku ënɔɔnë, luɔi cïn en raan duëër kake jɔ̈ɔ̈ny, aŋuän të päl wek wepiɔ̈ɔ̈th piny, ku duökï käŋ ee looi ëruprup. 37Kɔckë acäk keek bɛ̈ɛ̈i ee tënë, kɔc kën ka nu ë luëk yiic kual luëk ke lam, ku kënkï yanhduön ë tik lat aya. 38Ku ënɔɔnë, të de Demeturio kë bï en gööny kekë raan ayï atëët cath në yen, të de kek kë bï kek gööny, gɔny aye ke tääu piny, ku nu bäny ke luk, tɔkï keek gɔɔny röt. 39Ku na thiëëc week në kɔ̈k, abï dhil lueel ë gɔny yic ë kööldɛn cï amatnɔm tääu piny. 40Wok riɔ̈c ënɔɔnë, ë cɔ̈t bï wo cɔɔl në këde anuɔɔn de ee köölë, acïn kë ë guëër ë kɔc, ku acïn kë duëërku lueel an, kë ë guëër wok, kï.” 41Na wën, aacï kake lueel, ke tɔ amatnɔm cï guëër jël.
Iliyochaguliwa sasa
Luɔi 19: dip-JPB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Bible in Jieeng de Padang © The Bible Society in South Sudan, 2011.
