1 Kor 4
4
Tuny de Kërtho
1Tɔ lueel raan në këde wook nɔn ye wok kɔc ee ka ke Kërtho looi, kɔc cïï ka ke Nhialic tääu ë kecin, kacïmoony ɣɔn. 2Ku ënɔɔnë, raan cïï käŋ tääu ë yecin, abï dhil aa raan adöt. 3Ku në yɛn, ee kë cïn naamde nɔn bä wek a thiëëc në ka cä looi, ku nɔn bï kɔc a thiëëc aya: yeka, ayïk ɛn guöp, yɛn cïï rɔt ee thiëëc. 4Acïn kë ŋiëc rɔt, ku acie kënë yen a tɔ yɛn ë raan piɛthpiɔ̈u: Raan ë ya thiëëc, en aye Bɛ̈nydït. 5Yen cïn en kë yak jɔ̈ɔ̈ny të ŋoot akööl dït wei, të ŋootë Bɛ̈nydït ke kën bɛ̈n, raan bï ka cï thiaan tëcol bɛ̈ɛ̈i tëɣer, ku bï lööŋ ee lueel ë kɔc piɔ̈ɔ̈th tɔ tiëc, ee köölë yen abïï raan ëbɛ̈n lɛc yök tëde Nhialic.
6Ku kakë, wek mïthëkɔckuɔ, acä ke lueel në këdï wokë Apolo në baŋdun week, luɔi bän week wɛ̈ɛ̈t an: Duökï kɔc ee riëëu awär këcïgɔ̈ɔ̈r, ku ë cïn raan ë dït ë ŋɛk tɛɛr, an, dïït awär ŋɛk. 7Eeŋa ë yï tɔ tɔ̈u pei? Ku eeŋö cath ke yïn kë kënë gäm yïn? Ku na cï gäm yïn, ka eeŋö ee yïn rɔt leec, acït man ë kë kënë gäm yïn?
8We ë guɔ kuɛth ëtaiwei, wek juëc ë kakun ënɔɔnë, wek ë piny cieŋ cït man ë bäny, ke wok liu thïn: ku adï ya piɔ̈u miɛt, tëë we ceŋ piny ë yic, ke wo duëër piny ceŋ në week ëtök. 9Ku në yapiɔ̈u, wo cïï Nhialic tääu ciëën wok tuuc, cït man ë kɔc cï gäm thuɔɔu: wo cï tɔ ye kë bï aa woi piny nɔm, bï tuucnhial aa woi, ayï kɔc. 10Wok ee dhän në baŋ de Kërtho, ku wek ee kɔc pelnïïm ë Kërtho yic! Wok kɔ̈c gup, ku wek ril! Wok cïn naamda, ku wek de nïïm dhuëëŋ! 11Aɣet cï ënɔɔnë, wok ee cɔk nɔ̈k ayï rou, ku cïnku kɔ̈ɔ̈th lupɔɔ, ku biëkkë wook ë kɔc cïn, wok ee tai, wo cïn nïïm wut, 12#Luɔi 18:3. wok ee cool ë loi luɔi ë wocin: lat wo, ke luelku, an, thieithieei, yɔŋ wo, ke gumku, 13lëkë wo kërac, ke wo läŋ kɔc: wo cï tɔ ye nuöön ë piny nɔm, ku tɔ wook ee ayil ë käŋ kedhie aɣet cï ee köölë.
14Yɛn cïï kake gäär luɔi bän we tɔ yäär, ku wek a nen cït man ë mïthkiën nhiaar gup. 15Ku na cäk dɛ agum de kɔc kathiëër nu, kɔc ee week wɛ̈ɛ̈t ë ka ke Kërtho, ku acïn wärkun juëc nu: we cä dhiëëth ë Kërtho yic në guiëër ë wëlpiɛth. 16#1 Kor 11:1; Pil 3:17. Yen a yɔ̈ɔ̈k ɛn week, an: Yak täudï dɔmic. 17Yen aa tuöc ɛn Timotheo week, ee wëndiën nhiaar ku ee raan adöt ë ka ke Bɛ̈nydït, en abï week tɔ tak wenïïm në täu aa yen tɔ̈u ë Kërtho yic, acït man wɛ̈ɛ̈t ɛn baai ëbɛ̈n në ɣööt ke Nhialic yiic ëbɛ̈n.
18Ku kɔc kɔ̈k ë weyiic acïk nïïm dham, ayek lueel, an, cä bï bɛ̈n tëde week. 19Ku yɛn bï dap bɛ̈n tëde week, të nu en ë Bɛ̈nydït piɔ̈u, aguɔ riɛl ë kɔckë ŋic, kɔc wën cï nïïm dham, acie jamden tei. 20Ciɛɛŋ de Nhialic acie jam tei, ee riɛldït. 21E wepiɔ̈ɔ̈th wäkdï? Bä bɛ̈n tëde week ke ya muk thieny duöi ɛn week, ku bä bɛ̈n wokë nhiëër ku piɔ̈n ril.
Iliyochaguliwa sasa
1 Kor 4: dip-JPB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Bible in Jieeng de Padang © The Bible Society in South Sudan, 2011.