Exodus 25
25
Hay kinalin APU DIOS an iappit nadan holag Israel an mausal nah Tabernacle
1Kanan APU DIOS ke Moses di 2“Kalyom hanadah holag Israel ta iappitanak ke dida. Dawatom dadiyen iappit dan ha-on mipuun hi pinhod dan idat. 3Datuwey damanan iappit da: Hay balituk, silber ya giniling, 4hay tinulid an blue, purple ya maka-ingit, hay makaphod an luput ya hay luput an nakapyah dutdut di gulding, 5hay lalat di lakin kalneron numbalin hi maingit, hay lalat di matagun wadah baybay, hay kaiw di akasia, 6hay lanan di oliban mihuduh kingke, nadan makapyah lanan miduyag hi ulu, hay bangbanglun insenso, 7hay onyx ya nadan udum an nungkanginan batun mitakap hi ephod nan padi ya nah luput an mitakap nah pagona.
8Ya mahapul an ikapyaanak hi abung an tuldan kiha-adak ta makibobleyak ke dakayu. 9Kapyaon yuh tuwen Tabernacle an miunnud nah itudduk an pangapya yu.”
Hay kinalin APU DIOS an pangapya da nah kahon an kiha-adan nan nitudok an tuguna.
10Kanan bon APU DIOS ke Moses di “Umala kah kaiw an akasia ta mangapya kayuh kahon an nap-at ta liman pulgaday kadukke na, duway pulut pitun pulgaday kabilog na, ya duway pulut pitun pulgaday katag-e na. 11Amhon yuh balituk an namahma, takon nan dallomna. Ya takapan yu boh balituk hi nunlinikkod ta milibod ketuwen kahon. 12Ya ikapya yu boy opat an natuligonggong an balituk kediyen kahon an hindudwah numbinah-el. 13Ya mangapya kayuh pun-attang hi kaiw an akasia an takapan yuh balituk. 14Iduduk yu datuwe ke dadiyen natuligonggong an nitakap nah Kahon ta pun-attang. 15Datuwen pun-attang ya miathidin adi mabalin an e makaan. 16Nagibbu ke ya ihudum kediyen Kahon nan idat kun he-an duwan batun nitudokan nadan Tugun ku.
17Mangapya kah hukap tuwen Kahon#25:17 Mipuun hi pangulug nadan holag Israel ya kulugon dan inumbun hi APU DIOS nah tap-on nan hukap diyen Kahon. Ya hidiy pangipatib-anah homok nah tataguna. an hay kapyaom ya namahman balituk. Hay kadukkena ya nap-at ta liman pulgada ya duwampulut pitun pulgaday kabilog na. 18,19Mangapya kah duwan anghel hi numbinongwa ketuwen hukap an miohhay kapyana. 20Munhinnangga dan mabokyag di payak dat hophopan dah tuwen hukap. 21Ihukap mu kediyen Kahon an kapyaon yun pangiha-adam hanadah duwan batun ahik idat ke he-a. 22Ahiyak umali nah tap-on nan hukap an numbattanan dadiyen duwan anghel ta idat kun he-an am-in nadan Tugun kun un-unudon yun am-in an holag Israel.”
Hay kinalin APU DIOS an pangapya da nah lamesaan an kiha-adan di tinapay an miappit ke hiya
23Kanan bon APU DIOS ke Moses di “Umala kah tablan akasia ta mangapya kah lamesaan. Hay kadukkena ya tulun piye, ohat godwan piyey kabilog na ya duwan piye ya tulun pulgaday katag-ena. 24Oddahan yuh balituk ya takapan yu boh balituk di nunlinikkod nan pingngit na. 25Da-itan yuh tulun pulgaday pipingngit nan lamesaan ya tinakapan yuh balituk. 26Kapyaan yuh hin-oh-an natuligonggong an balituk nadan opat an hukin diyen lamesaan hanadah duguna. 27Ikapya yu datuwen natuligonggong nah da-ul di pingngit nan lamesaan. 28Ya mangapya kayuh akasian pun-attang nah lamesaan an amohon yuh balituk. 29Mangapya kayuh namahman balituk an duyu, basu, buwod ya malukung an pangiduyagan yuh mainum an iappit yu. 30Mahapul an wadat nangamung di tinapay an iha-ad yuh hinangngab ku nah lamesaan an kapyaon yu.”
Hay kinalin APU DIOS an pangapya da nah kipattukan di kingke
31Kanan bon APU DIOS di “Mangapya kayuh namahman balituk an pangipattukan hi dilag. Pandayon yuy puuna ya palat na. Iohha yuy pangapya yun dadiye nadah kay basun kiha-adan nadan dilag ya nadan palawer an al-alkus na. 32Hidiyen pangipattukan hi kingke ya onom di hapang nan hintutluh numbinah-el. 33Nip-ong ke dadiyen onom an hapang di basun kay habung di almond di pormana. 34Hanan adol nan pangipattukan hi kingke ya naal-alkusan hi opat an kay damdama habung di almond di pormana. 35Ya ip-ong yuy hin-oh-an habung an ugge nabokyag an ikapya yu nah da-ul di nundammuwan nadan hindudwan hapang nan pangipattukan hi kingke. 36Datuwen habung an ugge nabokyag ya nadan hapang ya miohhan kapyaon yu nah kipattukan di kingke. Am-in datuwe ya makapyah namahman balituk. 37Mangapya kayuh pitun kingket ipattuk yu ketuwen kapyaon yun kipattukan dat madilagan di hinangngab na. 38Mahapul an namahman balituk di kapyaon yu nadah ipit ya ambilog an duyun pangiha-adan hi bala. 39Umeh tulumpulut opat an kiloy dam-ot nadan balituk an kapyaon yu ketuwen pumpattukan hi kingke ya nadan kapkapya na.
40Mahapul an paka-i-un-unud yun kapyaon datuwe nah impatibok ke dakayu tuh bilid.”#25:40 Hebrews 8:5
Iliyochaguliwa sasa
Exodus 25: ifkWB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2004, Wycliffe Bible Translators, Inc. All rights reserved.