ᓭᑲᕒᐋᔭ 14
14
1ᒫᑎᑲ, ᐅ ᑭᓯᑳᒼ ᑳ ᑎᐯᔨᐦᒋᑫᐟ ᐹᐸᔨᔨᐤ, ᐃᐢᐱ ᑭ ᒪᓂᐊᐧᑖᑎᑯᐃᐧᐣ ᑫ ᒫᑎᓇᒫᑐᕽ ᒣᑳᐧᐨ ᐃᑕ ᑳ ᐊᔮᔭᐣ. 2ᒋᑫᒫ ᓂ ᑲ ᒫᐊᐧᓴᑯᓈᐊᐧᐠ ᑲᐦᑭᔭᐤ ᐁ ᓇᓈᑐᑯᐢᑳᓀᓯᒋᐠ ᐊᔨᓯᔨᓂᐊᐧᐠ ᒉᕒᐅᓴᓬᐊᒥᕽ ᑭᑕ ᓄᑎᓇᐦᑭᐠ; ᐁᑯᓯ ᐅᑌᓇᐤ ᑭᑕ ᐅᑎᓂᑳᑌᐤ, ᒥᓇ ᐋᐧᐢᑳᐦᐃᑲᓇ ᑭᑕ ᒧᓴᐢᑯᓂᑳᑌᐊᐧ, ᒥᓇ ᐃᐢᑫᐧᐊᐧᐠ ᑭᑕ ᑯᑕᑭᐋᐊᐧᐠ; ᒥᓇ ᐋᐱᑕᐤ ᐅᑌᓇᐤ ᑭᑕ ᓯᐯᐧᑕᐋᐊᐧᐠ ᐊᐊᐧᑳᑎᑯᐃᐧᓂᕽ, ᐁᑯᓯ ᐁ ᐃᐢᑯᓂᐦᒋᐠ ᐊᔨᓯᔨᓂᐊᐧᐠ ᓇᒪᐃᐧᔭ ᑭᑕ ᒣᐦᒋᐋᐊᐧᐠ ᐁᑯᑕ ᐅᑌᓈᕽ ᐅᐦᒋ. 3ᐁᑲᐧ ᑳ ᑎᐯᔨᐦᒋᑫᐟ ᑫ ᐱᒥ ᓯᐯᐧᑌᐟ, ᒥᓇ ᑭᑕ ᓄᑎᓀᐤ ᐊᓂᐦᐃ ᓇᓈᑐᑯᐢᑳᐣ ᐊᔨᓯᔨᓂᐊᐧ, ᑖᐱᐢᑯᐨ ᐁ ᓄᑎᓂᑫᐟ ᐁ ᓄᑎᓂᑐᐃᐧᑭᓯᑳᐠ.
4ᐁᑯᓯ ᑭᑕ ᓂᐸᐃᐧᐤ ᐁᐊᐧᑳᐧᓂᒪ ᑭᓯᑳᑭ ᐋᓬᐃᑊᐢ ᐊᐧᒋᕽ, ᑎᐱᐢᑯᐨ ᒉᕒᐅᓴᓬᐊᒥᕽ ᑳ ᐊᔮᐠ ᐋᐧᐸᓄᑖᕽ ᐃᑌᐦᑫ. ᐁᑯᓯ ᐋᓬᐃᑊᐢ ᐊᐧᒋ ᑭᑕ ᑖᐢᑭᐸᔨᐤ ᑖᐋᐧᔨᕽ ᐋᐧᐸᓄᑖᕽ ᐃᓯ ᒥᓇ ᓀᑳᐯᐊᓄᑖᕽ ᐃᓯ, ᑭᑕ ᒥᐢᑕᐦᐃ ᐋᐧᔭᑎᓈᐤ ᒫᑲ; ᐋᐱᑕᐤ ᒫᑲ ᐊᓂᒪ ᐊᐧᒋ ᑭᐁᐧᑎᓄᑖᕽ ᑭᑕ ᐃᐢᐸᔨᐤ, ᐁᑯᓯ ᐋᐱᑕᐤ ᓵᐊᐧᓄᑖᕽ ᐃᓯ. 5ᐁᑯᓯ ᑭ ᑲ ᐊᑎ ᐃᑖᒧᓈᐋᐧᐤ ᐁ ᐋᐧᔭᑎᓈᑭ ᓂ ᐊᐧᒋᒪ; ᒋᑫᒫ ᐁ ᐋᐧᔭᑎᓈᑭ ᐊᓂᐦᐃ ᐊᐧᒋᔭ ᐁᓯᓬ ᐃᐢᑯ ᑭᑕ ᐊᔮᐊᐧ; ᐁᐦᐁ, ᑭ ᑲ ᑕᐸᓯᓈᐋᐧᐤ, ᑖᐱᐢᑯᐨ ᑳ ᑭ ᐃᓯ ᑕᐸᓯᑖᔦᐠ ᒣᑳᐧᐨ ᑳ ᐊᔮᐟ ᐊᓵᔭ ᒍᑕ ᑭᐦᒋ ᐅᑭᒫᐤ; ᐁᑯᓯ ᑳ ᑎᐯᔨᐦᒋᑫᐟ ᓂ ᑭᓭᒪᓂᑐᒼ ᑭᑕ ᐯ ᐃᑐᐦᑌᐤ, ᒥᓇ ᑲᐦᑭᔭᐤ ᑳ ᑲᓈᑎᓯᒋᐠ ᐁ ᐯ ᐃᐧᒉᐢᑭᐠ. 6ᑭᑕ ᐊᔨᑭᐣ ᒫᑲ ᐁᐊᐧᑳᐧᓂᒪ ᑭᓯᑳᑭ, ᓇᒪᐃᐧᔭ ᑭᑕ ᐸᑲᐢᑭ ᐋᐧᓭᔮᐤ ᒥᓇ ᓇᒪᐃᐧᔭ ᑭᑕ ᐊᐧᓂᑎᐱᐢᑳᐤ; 7ᒫᑲ ᑭᑕ ᐯᔭᑲᐧᐣ ᑭᓯᑳᐤ ᑳ ᑭᐢᑫᔨᑕᕽ ᑳ ᑎᐯᔨᐦᒋᑫᐟ; ᓇᒪᐃᐧᔭ ᑭᓯᑳᐤ ᒥᓇ ᓇᒪᐃᐧᔭ ᑎᐱᐢᑳᐤ; ᒫᑲ ᑭᑕ ᐊᔨᑭᐣ ᐊᑎ ᐅᑖᑯᓯᑭ ᑭᑕ ᐋᐧᓭᔮᐤ. 8#ᐃᓯᑭᐁᓬ 47:1; ᒑᐣ 7:38; ᑭᐢᑫᔨᐦᑖᑯᐦᑫᐃᐧᐣ 22:1ᑭᑕ ᐃᐦᑭᐣ ᒫᑲ ᐁᐊᐧᑳᐧᓂᒪ ᑭᓯᑳᑭ, ᐱᒫᑎᓯᐃᐧᓂ ᓂᐱᔭ ᑭᑕ ᐊᐧᔭᐃᐧᒋᐊᐧᓇᐧ ᒉᕒᐅᓴᓬᐊᒥᕽ ᐅᐦᒋ; ᐋᐱᑕᐤ ᑭᑕ ᐃᐢᐸᔨᐊᐧ ᑭᐁᐧᑎᓄᑖᕽ ᑭᐦᒋᑲᒥᕽ ᐃᓯ, ᒥᓇ ᐋᐱᑕᐤ ᓀᑳᐯᐊᓄᑖᕽ ᑭᐦᒋᑲᒥᕽ ᐃᓯ; ᐁ ᓂᐱᕽ ᒥᓇ ᐁ ᐱᐳᕽ ᑭᑕ ᐃᓯ ᐊᔮᐤ.
9ᐁᑯ ᑳ ᑎᐯᔨᐦᒋᑫᐟ ᑭᑕ ᑭᐦᒋ ᐅᑭᒫᑲᑕᒼ ᒥᓯᐁᐧ ᐊᐢᑭ; ᐁᐊᐧᑳᐧᓂᒪ ᑭᓯᑳᑭ ᑭᑕ ᐯᔭᑯ ᑳ ᑎᐯᔨᐦᒋᑫᐟ ᒥᓇ ᑭᑕ ᐯᔭᑲᐧᓂᔨᐤ ᐅ ᐃᐧᔪᐃᐧᐣ. 10ᒥᓯᐁᐧ ᐊᐢᑭ ᑭᑕ ᒪᐢᑯᑌᐊᐧᐣ, ᑭᐸ ᐅᐦᒋ ᕒᐃᒪᐣ ᐃᐢᑯ ᓵᐊᐧᓄᑖᕽ ᒉᕒᐅᓴᓬᐊᒥᕽ; ᐁᑯᓯ ᑭᑕ ᐅᐦᐱᓂᑳᑌᐤ ᒥᓇ ᑭᑕ ᐊᔮᐤ ᐅᐟ ᐃᐦᑖᐃᐧᓂᕽ, ᐯᐣᒋᒪᐣ ᐅ ᑭᐦᒋᐃᐢᑳᐧᑌᒥᕽ ᐅᐦᒋ ᐱᔨᐢ ᐃᑕ ᓂᐢᑕᒼ ᑭᐦᒋᐃᐢᑳᐧᑌᒼ ᑳ ᐊᔮᐠ, ᐃᐢᑯ ᑫᔮᕽ ᑭᐦᒋᐃᐢᑳᐧᑌᒼ, ᒥᓇ ᐊᓂᒪ ᐦᐁᓇᓀᓬ ᐅᐟ ᐊᓴᐊᐧᐱᐃᐧᑲᒥᑯᕽ ᐅᐦᒋ ᐃᐢᑯ ᑭᐦᒋ ᐅᑭᒫᐤ ᐅ ᓱᒥᓈᐳᐃᐧ ᒫᑯᐃᑲᓇ. 11#ᑭᐢᑫᔨᐦᑖᑯᐦᑫᐃᐧᐣ 22:3ᐊᔨᓯᔨᓂᐊᐧᐠ ᒫᑲ ᐁᑯᑕ ᑭᑕ ᐊᔮᐊᐧᐠ, ᒥᓇ ᓇᒪᐃᐧᔭ ᓈᐢᐱᒋ ᓂᓯᐊᐧᓈᑎᓯᐃᐧᐣ ᑭᑕ ᐃᐦᑕᑲᐧᐣ; ᒫᑲ ᒉᕒᐅᓴᓬᐊᒼ ᑭᑕ ᐊᐱᐢᒋᑳᑌᐤ ᐁᑳ ᐁ ᐊᐢᑖᓯᐸᑲᕽ.
12ᐁᐊᐧᑫᐧᔨᐤ ᒫᑲ ᐅᒪ ᐋᔨᒫᐢᐱᓀᐃᐧᐣ ᑳ ᑎᐯᔨᐦᒋᑫᐟ ᑫ ᐅᐦᒋ ᓂᓯᐊᐧᓈᒋᐦᐋᐟ ᑲᐦᑭᔭᐤ ᓈᓇᑐᕽ ᐊᔨᓯᔨᓂᐊᐧ ᑳ ᑭ ᓄᑎᓇᒥᔨᐟ ᒉᕒᐅᓴᓬᐊᒼ; ᐅ ᐃᐧᔮᓯᐋᐧᐤ ᑭᑕ ᒣᐦᒋᐸᔨᔨᐤ ᐁ ᒣᑳᐧ ᓂᐸᐃᐧᒋᐠ, ᒥᓇ ᐅᐢᑭᓯᑯᐋᐧᐊᐧ ᑭᑕ ᓂᓯᐊᐧᓈᑕᓂᔨᐊ ᐅ ᐃᐧᐦᐱᑲᓇᑳᐱᐃᐧᓂᐋᐧᕽ, ᒥᓇ ᑭᑕ ᒣᐢᑕᑕᑎᓂᔨᐤ ᐅᑌᔭᓂᐋᐧᐤ ᐅᑐᓂᐋᐧᕽ. 13ᑭᑕ ᐊᔨᑭᐣ ᒫᑲ ᐁᐊᐧᑳᐧᓂᒪ ᑭᓯᑳᑭ, ᒥᐢᑕᐦᐃ ᐊᐧᐋᐧᓀᔨᑕᒧᐃᐧᐣ ᑭᑕ ᒥᔨᑲᐧᐠ ᑳ ᑎᐯᔨᐦᒋᑫᔨᐟ; ᐁᑯᓯ ᑭᑕ ᐊᐧᔪᑎᑎᓇᒫᑐᐊᐧᐠ ᐅᒋᐦᒋᐋᐧᐊᐧ, ᒥᓇ ᑭᑕ ᐊᐧᐁᐧᐱᓂᐢᑫᑐᑖᑐᐊᐧᐠ. 14ᒍᑕ ᒥᓇ ᑭᑕ ᓄᑎᓂᑫᐤ ᒉᕒᐅᓴᓬᐊᒥᕽ; ᐁᑯᓯ ᐅ ᐁᐧᔪᑎᓯᐃᐧᓂᐋᐧᐤ ᑲᐦᑭᔭᐤ ᓇᓈᑐᑯᐢᑳᐣ ᐊᔨᓯᔨᓂᐊᐧᐠ ᐋᐧᓴᑳᒼ ᑭᑕ ᒫᐊᐧᓴᑯᓂᑳᑌᐤ ᐁᑯᑕ, ᐅᓵᐃᐧᓱᓂᔮᐤ, ᒥᓇ ᐋᐧᐱᐢᑭᓱᓂᔮᐤ, ᒥᓇ ᑭᑭᐢᑳᒋᑲᐣ ᒥᓴᑲᒥᐠ. 15ᐁᑯᓯ ᒥᓇ ᑫ ᐃᓯ ᐊᔮᔨᐠ ᐅ ᑯᑕᑭᑖᐃᐧᐣ ᒥᐢᑕᑎᒼ, ᒥᓇ ᓱᓱᐃᐧᒥᐢᑕᑎᒼ, ᒥᓇ ᐱᐢᑳᐧᐃᐧᑲᐣ, ᒥᓇ ᓱᓱᐊᐧᐢᑎᒼ, ᒥᓇ ᑲᐦᑭᔭᐤ ᐱᓯᐢᑭᐊᐧᐠ ᑫ ᐊᔮᒋᐠ ᐁᑯᑕ ᑲᐯᓯᐃᐧᓂᕽ, ᑖᐱᐢᑯᐨ ᐅᒪ ᑯᑕᑭᑖᐃᐧᐣ.
16 #
ᓬᐃᐱᑎᑲᐢ 23:39-43
ᑭᑕ ᐊᔨᐢᐸᔨᐤ ᒫᑲ, ᑲᐦᑭᔭᐤ ᐊᐃᐧᔭᐠ ᑫ ᐃᐢᑯᐃᐦᐟ ᑲᐦᑭᔭᐤ ᐊᓂᑭ ᓇᓈᑐᑯᐢᑳᐣ ᐊᔨᓯᔨᓂᐊᐧᐠ ᑳ ᑭ ᒪᐃᐧᓀᐢᑲᑭᐠ ᒉᕒᐅᓴᓬᐊᒼ, ᑭᑕ ᐃᑐᐦᑌᐊᐧᐠ ᑕᐦᑐ ᐊᐢᑭ ᑭᑕ ᐊᔭᒥᐦᐋᐃᐧ ᐊᑐᐢᑲᐋᐧᒋᐠ ᑭᐦᒋ ᐅᑭᒫᐊᐧ, ᑳ ᑎᐯᔨᐦᒋᑫᐟ ᒥᓯᐁᐧ ᓯᔪᑳᑎᓯᐟ, ᒥᓇ ᑭᑕ ᑎᐱᑐᑕᑭᐠ ᐊᓂᒪ ᐃᐧᐦᑯᐦᑐᐃᐧᐣ ᑳ ᒧᐦᒋ ᒫᓄᑫᕽ. 17ᑭᑕ ᐊᔨᐢᐸᔨᐤ ᒫᑲ ᐊᐃᐧᔭᐠ ᑲᐦᑭᔭᐤ ᑳ ᑕᐦᑐᑌᐃᐧᓯᒋᐠ ᐊᐢᑭᕽ ᐁᑳ ᐃᑐᐦᑌᒋ ᒉᕒᐅᓴᓬᐊᒥᕽ ᑭᑕ ᐊᔭᒥᐦᐋᐃᐧ ᐊᑐᐢᑲᐋᐧᒋᐠ ᑭᐦᒋ ᐅᑭᒫᐊᐧ, ᑳ ᑎᐯᔨᐦᒋᑫᐟ ᒥᓯᐁᐧ ᓯᔪᑳᑎᓯᐟ, ᐁᐊᐧᑯᓂᐠ ᓇᒪᐃᐧᔭ ᑭᑕ ᑭᒥᐊᐧᓂᓯᐊᐧᐠ. 18ᐁᑯᓯ ᑭᐢᐱᐣ ᐁ ᐱᐢᑭᑐᑌᐃᐧᓯᐟ ᐃᒋᑊᐟ ᐁᑳ ᐃᑐᐦᑌᒋ, ᒥᓇ ᐁᑳ ᑕᑯᓯᑭ, ᐁᐊᐧᑯᓂᐠ ᒥᓇ ᓇᒪᐃᐧᔭ ᑭᑕ ᐊᔮᐊᐧᐠ; ᑭᑕ ᐊᔮᐊᐧᐠ ᐋᔨᒫᐢᐱᓀᐃᐧᐣ, ᐊᓂᒪ ᑳ ᑎᐯᔨᐦᒋᑫᐟ ᑫ ᐃᐢᐸᔨᑐᐋᐧᐟ ᐊᓂᐦᐃ ᓇᓈᑐᑯᐢᑳᐣ ᐊᔨᓯᔨᓂᐊᐧ ᐁᑳ ᑫ ᐃᑐᐦᑌᔨᐟ ᑭᑕ ᑎᐱᑐᑕᒥᔨᐟ ᐊᓂᒪ ᐃᐧᐦᑯᐦᑐᐃᐧᐣ ᑳ ᒧᐦᒋᒫᓄᑫᕽ. 19ᐁᑯᓯ ᐅᒪ ᑫ ᐃᓯ ᑲᑫᐢᑭᒧᐃᐦᐟ ᐃᒋᑊᐟ, ᒥᓇ ᑫ ᐃᓯ ᑲᑫᐢᑭᒧᐃᐦᒋᐠ ᑲᐦᑭᔭᐤ ᓇᓈᑐᑯᐢᑳᐣ ᐊᔨᓯᔨᓂᐊᐧᐠ ᐁᑳ ᑫ ᐃᑐᐦᑌᒋᐠ ᑭᑕ ᑎᐱᑐᑕᑭᐠ ᐃᐧᐦᑯᐦᑐᐃᐧᐣ ᑳ ᒧᐦᒋᒫᓄᑫᕽ.
20ᐁᐊᐧᑳᐧᓂᒪ ᑭᓯᑳᑭ ᑭᑕ ᐃᐦᑕᑲᐧᓂᔨᐤ ᐅ ᓭᐁᐧᐅᔮᑭᓂᐋᐧᕽ ᒥᐢᑕᑎᒪᐧᐠ, ᑲᓈᑕᐣ ᑳ ᑎᐯᔨᐦᒋᑫᐟ ᑭᑕ ᐊᔮᐟ; ᐁᑯᓯ ᐊᐢᑭᑲᐧᐠ ᑳ ᑎᐯᔨᐦᒋᑫᐟ ᐅ ᐋᐧᐢᑳᐦᐃᑲᓂᕽ ᑭᑕ ᐃᓯ ᐊᔮᐊᐧᐠ ᑖᐱᐢᑯᐨ ᐊᓂᐦᐃ ᐳᓯᐢᑭᔮᑲᓇ ᐅᐦᑎᐢᑲᐤ ᐸᑭᑎᓈᓱᐃᐧᓈᐱᐢᑯᕽ. 21ᐁᐦᐁ, ᑲᐦᑭᔭᐤ ᐊᐢᑭᕽ ᒉᕒᐅᓴᓬᐊᒥᕽ ᒥᓇ ᒍᑕᐃᕽ ᑭᑕ ᑲᓈᒋᑕᒪᐋᐧᐤ ᑳ ᑎᐯᔨᐦᒋᑫᐟ ᒥᓯᐁᐧ ᓯᔪᑳᑎᓯᐟ; ᐁᑯᓯ ᑲᐦᑭᔭᐤ ᐊᓂᑭ ᑳ ᐸᑭᑎᓈᓱᒋᐠ ᑭᑕ ᐯ ᓇᑕᐃᐧ ᐅᑎᓀᐊᐧᐠ ᐁᐊᐧᑯᓂ, ᒥᓇ ᑭᑕ ᐸᑳᑖᑯᑫᐊᐧᐠ ᐁᑯᑕ: ᐁᐊᐧᑳᐧᓂᒪ ᒫᑲ ᑭᓯᑳᑭ ᓇᒪᐃᐧᔭ ᒥᓇ ᑭᑕ ᐃᐦᑖᐤ ᑫᓇᓇᐃᐟ ᐅ ᐋᐧᐢᑳᐦᐃᑲᓂᕽ ᑳ ᑎᐯᔨᐦᒋᑫᐟ ᒥᓯᐁᐧ ᓯᔪᑳᑎᓯᐟ.
Iliyochaguliwa sasa
ᓭᑲᕒᐋᔭ 14: KKMs
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
This Bible text is a corrected edition of the 1908 Western Cree Bible; it is in the public domain.