Матта 27
27
Иса Пилатдихьна хуб
1ГвачӀин улубкьиган, вари аьхю маллйирина аьхюдари, уч духьну, Иса йикӀуз къарар адабгънийи. 2Дугъан хилар-ликар йитӀуз гъитну, Думу духну, Римди Ягьудияйиъ гьюкумдар вуди дерккнайи Понтий Пилатдин хилиз тувру. 3Гьадмуган Иса масу туву Ягьудайи, Думу йикӀуз ккайиб аьгъю дубхьну, чав гъапӀубдиин швумал духьну, сумчӀур арсран манат аьхюну маллйирихьна ва аьхюдарихьна кьяляхъ тувнийи. 4Дугъу дурариз гъапнийи:
– Тахсирсуз кас масу тувну, гунагь шлу ляхин гъапӀунза.
Дурарира гъапнийи:
– Ич дидихъ фу хъа? Думу яв гъайгъу ву.
5Ягьуда, арсар Аллагьдин хулаз гатӀахьну, душну, чав учв ккирхну йикӀуру. 6Аьхюну маллйири, арсран пулар гъадагъну, гъапи:
– Мурар Аллагьдин хулан хазнайиъ дивуз хай шулдар, фицики дурар ифдихъ туву кьимат ву.
7Мясляаьт дапӀну, яд агьалйир кивбан бадали, арсран пуларихъ, сар гъабар апӀру устайин хутӀил гъадабгънийи. 8Гьаддиз гьадму хутӀлиз гьамусра «Ифдин хутӀил» кӀури ими. 9Гьамци Еремия пайгъамбрин мелзналан гъапи гьаму гафар кӀулиз удучӀвну:
«Израилин халкьди
Дугъан кьимат вуди дебкку
сумчӀур арсран манат гъибиснийи
10ва, узуз Агъайи апӀин гъапиганси,
сар гъабар апӀру устайин
хутӀлихъ тувнийи».
Иса Пилатдин улихь
11Иса гьюкумдрин улихь деркку, гьюкумдри Исайихьан гьерху:
– Уву «жугьдарин Паччагь» вуна?
Исайи гъапи:
– Уву гьаци кӀурава.
12Маллйирина аьхюдари Исайик тахсрар кирчруган, Дугъу дурариз саб жавабра тувундайи. 13Гьадмуган Пилатди Дугъаз кӀуру:
– Увуз къаршу вуди фукьан шагьидвалар апӀураш, ебхьурадарнуз?
14Исайи саб гафнииндикьан жавабра тувундайи, хъа гьюкумдар мидʼин гизаф мюгьтал гъахьнийи.
15Пасхайин машкварган, гьюкумдри, халкьди тӀалаб гъапӀган, сар дидиснайир деетру аьдат ади гъабхьнийи.
Пилатдин Иса йикӀбан къарар
16Гьадму вахтна дустагъдиъ Варава кӀуру вардин мелзниин али чӀуру кас айи. 17Вари уч гъашиган, Пилатди дурарихьан гьерхру:
– Узу фуж деетну ккундучвуз: Варава, дарш Месигь ву кӀурайи Иса?
18Пилатдиз дурари Иса бахилвалиан масу тувнайиваликан аьгъяйи.
19Пилат суд апӀру йишвʼин деънайи вахтна, дугъан хпири дугъаз гьамци пуз гъуллугъчи гьаънийи:
– Гьадму марцци Касдин суд апӀбахьан ярхла йихь, гьаз гъапиш узуз сан Дугъкан гучӀ ккапӀру нивкӀ гъябкъюнзуз.
20Хъа маллйирина аьхюдари халкь, Варава ккадаъну, Иса пуч апӀуб ккун апӀинай, кӀури, алауру. 21Гьадмуган Пилатди гьерхру:
– Гьамрарикан узу фуж деетну ккундучвуз?
Дурари: «Варава», – гъапнийи.
22Пилатди дурарихьан гьерхру:
– Хъа Месигь ву кӀурайи Исайикан гьапӀза?
Варидари: «Думу дариз зиг», – кӀуру.
23– Фу чӀуруб гъапӀнухъа Мугъу? – кӀуру дурариз Пилатди.
Амма дурари имбубсан артухъ чӀигъар апӀуйи:
– Думу хачрак карс!
24ФтикӀа кюмек дарапӀрайиб ва халкьдик гъалабулугъ кабхърайиб дябкъну, Пилатди, шид хуз гъитну, чан хилар дижикӀну, кӀуру:
– Узу Му марцци Касдин ифи удубзбан тахсиркар дарза, учвуз ккуниси апӀинай.
25Дугъаз жаваб вуди вари халкьди гъапи:
– Дугъан ифи учʼин ва ич веледариин гъубзри.
26Гьадмуган Пилатди дурарихьна Варава деетуру. Иса кӀуруш, гъирмажарихьди дурччвну, хачрак карсуз эскрарин хилиз тувру.
Эскрарин аьрвалар
27Гьадмуган эскрари Иса гьюкумдрин гьяятдиз гъахуру, Дугълан вари эскрарин десте илтӀибшуру. 28Думу гъяцӀал дапӀну, Дугъʼин аку-элвен халат алабхьуру. 29Зазарикан тажсиб дапӀну, Дугъан кӀулʼин улубкӀуру ва Дугъан арччул хилиъ маргъ ивру, хъа Дугъан улихь кьамкьариина ис духьну, «Яшамиш ишри жугьдарин Паччагь» кӀури, бегьем кялхъюз хъюгъру. 30Хъасин, тутйир алатӀури, хилʼан маргъ уьчӀюбгъну, Дугъан кӀуллан йивуз хъюгънийи. 31Исайиина бегьем аьрвалар хублан кьяляхъ, Дугъхъан халат хъидибтну, Дугъʼин Чан палтар алахьуру ва хачрак карсуз гъахуру.
32Шагьриан удучӀвурайиган, дурариз Симон кӀуру сар Киринеяжви алахъуру. Думу Иса дариз зигру хачсиб дарагъаж гъабхуз мажбур апӀуру. 33«Келле» мяна айи Голгофа кӀуру йишвʼина гъафиган, 34Дугъаз убхъуз сиб кипнайи чяхир тувру. Дугъаз, думу дадмиш дапӀну, убхъуз ккун гъабхьундайи. 35Иса дариз гъизигхъан, эскрари, тупут ипри, Дугъан палтар чпин арайиъ пай гъапӀу. 36Дурар Иса гъаравлиъ уьрхюри деъну, гъузу. 37Исайин кӀулихъ, Дугъан тахсир улупнайи гьамциб кьул кебху: «Му Иса, жугьдарин паччагь ву». 38Исайихъди хъана кьюр гъачагъра – сар Дугъан арччул, тмунур гагул гъвалхъанди – дариз гъизигнийи. 39-40Душвхьантина гьудучӀвну гъягърудари Дугъаз люкьнар апӀуйи, намуссуз кӀуруганси кӀулар тӀурччвуйи ва кӀуйи:
– Эй Аллагьдин хал дабгърур ва шубуд йигъан диврур! Уву Аллагьдин Бай вуш, Уву уьрх ва хачракан кудучӀв.
41Гьаму саягъниинди аьхю маллйирира, къанунчйирихъдина аьхюдарихъди сатӀиди Исайик кялхъри, кӀуйи:
42– Жарадар уьрхюйи, гьамус Чахьан Учв уьрхюз шуладар! Думу Израилин Паччагь дарин? Гъит гьамус хачракан кудучӀври, ва гьадмуган Дугъахъ хъугъархьа! 43Дугъу Аллагьдик миж кивнайи. «Узу Аллагьдин Бай вуза», – КӀурайир, Думу, Аллагьдиз Гирамир вуш, Аллагьди уьрхри.
44Гьацира Дугъахъди дариз дизигнайи гъачгъарра Дугъак кялхъюйи. 45Лисунган вари жилар мучӀушну ккаъру. Гьамци шубуб сяаьтнаъ гъубзнийи. 46Хъа сяаьт шубубдихьна Исайи зарбди чӀигъ апӀуру:
– Эли! Эли! Лама савахфани? – яна: «Я Адаш! Я Адаш! Уву Узу гьаз гъитунва?»
47Душвахь хьайидарикан бязидариз му гафар ерхьуру ва кӀуру:
– Дугъу Илʼяс пайгъамбриз дих апӀура.
48Гьадмусяаьт дурарикан сар, жаргъну дуфну, бамбагсибдиин учӀвру чяхир улубзну, думу маргълиинди, убхъуз кӀури, Дугъан ушвнихьна гьачӀабккуру. 49Тмундари гъапи:
– Гъит Думу Чан гьялнаъ, гьеле Думу уьрхюз Илʼяс гъюруш, лигурхьа.
Исайин аьжал
50Исайи хъанара зарбди чӀигъ апӀуру, ва Дугъу Чан жан тувру. 51Сабпну Аллагьдин хулаъ гьебхнайи перде, зиълан исина дячӀябгъну, кьюб швур шулу, жилар дутӀурччвну, гъарзар-гъванар тӀуркӀуру. 52Накьвар ачмиш духьну, гизаф марцци касар чӀиви шулу.
53Иса чӀиви хьублан кьяляхъ, накьвариан удучӀву марцци касар Ерусалимдиз гъафнийи ва душваъ дурар гизафдариз гъяркънийи.
54Исайин гъаравлиъ айи юзбашийина дугъахъди хъайи эскрари, жилар тӀурччвувал ва мушвʼин гъаши жара гьядисйир гъяркъиган, бегьем гучӀ кабхъну, гъапи:
– Му дугъриданра Аллагьдин Бай вуйиштӀан.
55Гьацира, Исайиз гъуллугъ апӀуз кӀури, Дугъахъди Галилейиан дуфнайи гизаф дишагьлийирра, ярхлаан лигури, дийигънайи. 56Дурарин арайиъ Магдалайиан вуйи Марʼям, Якьубдинна Юсуфдин дада вуйи Марʼям ва Зеведейин хпирра айи. 57Хябяхъ гъабшиган, Исайин ученик Аримафейиан вуйи Юсуф кӀуру сар девлетлу кас гъюру. 58Дугъу, Пилатдихьна дуфну, Исайин беден чахьна тувуб тӀалаб гъапӀу. Пилатдира Думу тувуз амур апӀуру. 59Юсуфди Исайин беден кадабгъну, думу марцци ирин кафнигъян гъидиржуру. 60Хъасин гъарзариъ утӀубкнайи чан хусуси таза накьвдиъ Дугъан беден ивнийи ва, душваз учӀврушвахь аьхю гъван гьипну, гъушнийи. 61Магдалайиан вуйи Марʼямна тмуну Марʼям накьвдин гъаншариъ деъну гъузру.
62Хъайигъан – му султ йигъ вуйи – аьхюну маллйирина фарисйири, Пилатдихьна дуфну, 63гьамци кӀуру:
– Ич аьхюр, гьадму КучӀляхри, Чав чӀивиди имиди: «Узу гъачӀихъан шубуд йигълан чӀиви хьидиза», – гъапиб кӀваина гъафнийич. 64Гьаци вуйиган, шубуд йигъ улдубчӀвайиз, накьв ужуди уьбхюз амур апӀин, даршиш Дугъан ученикари беден жин дапӀну, хъасин халкьдиз: «Думу гъачӀихъан чӀиви гъахьну», – пиди, хъа му кучӀал сабпибтӀан писуб хьибди.
65Пилатди дурариз гъапи:
– Магьа учвуз гъаравлар, учвуз аьгъюганси накьв уьбхяй.
66Дурарира, душну, гъаравлар дерккнийи. Дидихъ хъайи гъван мюгькам дапӀну, дидʼин пичат алабснийи.
Iliyochaguliwa sasa
Матта 27: ТабГК
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Институт перевода Библии, 2010, 2013, 2016, 2018, 2023
