ꠁꠘ꠆ꠎꠤꠟ ৩: ꠟꠥꠇ 4
4
ꠢꠎꠞꠔ ꠁꠍꠣꠞꠦ ꠁꠛꠟꠤꠍ-ꠡꠄꠔꠣꠘꠦ ꠙꠞꠤꠇ꠆ꠇꠣ ꠇꠞꠟ
1ꠁꠍꠣ ꠙꠣꠇ ꠞꠥꠢꠦ ꠇꠣꠝꠤꠟ ꠅꠁꠀ, ꠎꠞ꠆ꠖꠣꠘ ꠉꠣꠋꠉꠅ ꠕꠣꠇꠤ ꠃꠑꠤꠀ ꠝꠞꠥꠜꠥꠝꠤꠔ ꠉꠦꠟꠣꠉꠤ। ꠉꠤꠀ ꠙꠣꠇ ꠞꠥꠢꠥꠞ ꠁꠡꠣꠞꠣꠄ ꠄꠇꠟꠣꠉꠣ ꠌꠣꠟ꠆ꠟꠤꠡ ꠖꠤꠘ ꠝꠞꠥꠜꠥꠝꠤꠔ ꠊꠥꠞꠤꠟꠣ। 2ꠀꠞ ꠁꠛꠟꠤꠍ ꠀꠁꠀ ꠔꠣꠘꠞꠦ ꠙꠞꠤꠇ꠆ꠇꠣ ꠌꠣꠟꠣꠁꠟ। ꠅꠃ ꠌꠣꠟ꠆ꠟꠤꠡ ꠖꠤꠘ ꠄꠇꠟꠣꠉꠣꠞꠦ ꠞꠥꠎꠣ ꠀꠍꠟꠣ, ꠇꠥꠘꠥꠎꠣꠔ ꠈꠣꠘꠣ ꠈꠣꠁꠍꠂꠘ ꠘꠣ। ꠄꠞꠛꠣꠖꠦ ꠔꠣꠘ ꠙꠦꠐꠅ ꠜꠥꠇ ꠟꠣꠉꠟ।
3ꠔꠦꠃ ꠁꠛꠟꠤꠍꠦ ꠔꠣꠘꠞꠦ ꠇꠁꠟ, “ꠔꠥꠝꠤ ꠎꠥꠖꠤ ꠁꠛꠘꠥꠟ꠆ꠟꠣ, ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠅꠅ, ꠔꠦ ꠅꠃ ꠙꠣꠔ꠆ꠔꠞꠞꠦ ꠇꠅ ꠘꠣ ꠞꠥꠐꠤ ꠅꠁꠎꠤꠔ।” 4ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠟ꠆ꠟꠣꠞ ꠇꠣꠟꠣꠝꠅ ꠛꠣꠔꠣꠁꠟ ꠅꠁꠍꠦ, ꠈꠣꠟꠤ ꠞꠥꠐꠤ ꠈꠣꠁꠟꠦꠃ ꠝꠣꠘꠥꠡ ꠛꠣꠌꠦ ꠘꠣ।” 5ꠛꠣꠖꠦ ꠁꠛꠟꠤꠍꠦ ꠔꠣꠘꠞꠦ ꠈꠥꠛ ꠃꠌꠣ ꠄꠇ ꠎꠣꠉꠣꠔ ꠟꠁꠀ ꠉꠦꠟ, ꠘꠤꠀ ꠢꠣꠞꠤ ꠄꠇ ꠙꠟꠇꠦ ꠖꠥꠘꠤꠀꠞ ꠔꠣꠝꠣꠝ ꠝꠥꠟ꠆ꠟꠥꠇ ꠔꠣꠘꠞꠦ ꠖꠦꠈꠣꠁꠟ ꠀꠞ ꠇꠁꠟ, 6“ꠁ ꠔꠣꠝꠣꠝ ꠝꠥꠟ꠆ꠟꠥꠇꠞ ꠛꠣꠖꠡꠣꠁ ꠀꠞ ꠎꠣꠇ-ꠎꠝꠇ ꠀꠝꠤ ꠔꠥꠝꠣꠞꠦ ꠖꠤꠟꠣꠁꠝꠥ। ꠁꠔꠣ ꠢꠇ꠆ꠇꠟꠔꠣꠞ ꠝꠣꠟꠤꠇꠣꠘꠣ ꠀꠝꠣꠞꠦ ꠖꠦꠅꠀ ꠅꠁꠍꠦ। ꠀꠝꠤ ꠎꠣꠞꠦ ꠈꠥꠡꠤ ꠔꠣꠞꠦ ꠖꠤꠔꠣꠝ ꠙꠣꠞꠤ; 7ꠈꠣꠟꠤ ꠔꠥꠝꠤ ꠀꠝꠣꠞꠦ ꠍꠁꠎꠖꠣ ꠇꠞꠤꠟꠣꠅ, ꠔꠦꠃ ꠁ ꠢꠇ꠆ꠇꠟꠔꠣ ꠔꠥꠝꠣꠞ ꠅꠁꠎꠤꠛ।” 8ꠁꠍꠣꠄ ꠔꠣꠞꠦ ꠇꠁꠟꠣ, “ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ, ꠔꠥꠝꠤ ꠈꠣꠟꠤ ꠀꠙꠘ ꠝꠣꠛꠥꠖ ꠀꠟ꠆ꠟꠣꠞꠦ ꠍꠁꠎꠖꠣ ꠇꠞꠛꠣꠄ, ꠈꠣꠟꠤ ꠔꠣꠘ ꠄꠛꠣꠖꠔ ꠇꠞꠛꠣꠄ।” 9ꠔꠦꠃ ꠢꠦ ꠁꠍꠣꠞꠦ ꠟꠁꠀ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠉꠦꠟ, ꠉꠤꠀ ꠙꠛꠤꠔ꠆ꠞ ꠇꠣꠛꠣ ꠊꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠝꠤꠘꠣꠞꠣꠞ ꠃꠙꠞꠦ ꠔꠣꠘꠦ ꠃꠛꠣ ꠇꠞꠤꠀ ꠇꠁꠟ, “ꠔꠥꠝꠤ ꠎꠥꠖꠤ ꠁꠛꠘꠥꠟ꠆ꠟꠣ, ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠅꠅ, ꠔꠦ ꠖꠦꠈꠤ ꠌꠣꠁꠘ, ꠅꠘ ꠕꠣꠇꠤ ꠚꠣꠟ ꠖꠤꠀ ꠟꠣꠝꠣꠔ ꠙꠠꠅ। 10ꠇꠤꠔꠣꠛꠅ ꠔ ꠟꠦꠈꠣ ꠀꠍꠦ,
ꠀꠟ꠆ꠟꠣꠄ ꠔꠣꠘ ꠚꠤꠞꠤꠡ꠆ꠔꠣ ꠅꠇꠟꠞꠦ ꠢꠥꠇꠥꠝ ꠖꠤꠛꠣ,
ꠀꠞ ꠔꠣꠞꠣ ꠔꠥꠝꠣꠞꠦ ꠛꠣꠌꠣꠁꠛꠣ।
11ꠔꠣꠞꠣ ꠘꠤꠎꠞ ꠀꠔꠖꠤ ꠔꠥꠝꠣꠞꠦ ꠗꠞꠤꠟꠤꠛꠣ,
ꠎꠣꠔꠦ ꠔꠥꠝꠣꠞ ꠙꠣꠅꠔ ꠇꠥꠘꠥ ꠙꠣꠔ꠆ꠔꠞꠞ ꠌꠥꠐ ꠘꠣ ꠟꠣꠉꠦ।”
12ꠁꠍꠣꠄ ꠔꠣꠞꠦ ꠇꠁꠟꠣ, “ꠇꠤꠔꠣꠛꠅ ꠟꠦꠈꠣ ꠀꠍꠦ, ꠔꠥꠝꠤ ꠔꠥꠝꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠙꠞꠤꠇ꠆ꠇꠣ ꠇꠞꠣꠔ ꠟꠣꠉꠤꠅ ꠘꠣ।”
13ꠁꠛꠟꠤꠍꠦ ꠔꠣꠞ ꠢꠇꠟ ꠘꠝꠥꠘꠣꠞ ꠙꠞꠤꠇ꠆ꠇꠣ ꠡꠦꠡ ꠇꠞꠤꠀ, ꠀꠙꠣꠔꠔ ꠔꠣꠘ ꠉꠦꠍ ꠕꠣꠇꠤ ꠢꠞꠤꠀ ꠉꠦꠟꠉꠤ।
ꠉꠣꠟꠤꠟ ꠎꠤꠟꠣꠔ ꠢꠎꠞꠔ ꠁꠍꠣꠞ ꠇꠦꠞꠣꠝꠔꠤ ꠀꠞ ꠔꠛꠟꠤꠉ (৪:১৪-৯:৫০)
ꠘꠤꠎꠞ ꠉꠣꠃꠔ ꠢꠎꠞꠔ ꠁꠍꠣ
14ꠛꠣꠖꠦ ꠙꠣꠇ ꠞꠥꠢꠥꠞ ꠇꠥꠖꠞꠔꠦ ꠁꠍꠣ ꠉꠣꠟꠤꠟ ꠄꠟꠣꠇꠣꠔ ꠉꠦꠟꠣ, ꠉꠤꠀ ꠢꠣꠞꠟꠦ ꠔꠣꠘ ꠘꠣꠝ ꠌꠣꠁꠞꠅꠛꠣꠄ ꠞꠐꠤꠉꠦꠟ। 15ꠔꠣꠁꠘ ꠢꠘꠞ ꠝꠍꠤꠖꠅ ꠝꠍꠤꠖꠅ ꠉꠤꠀ ꠛꠄꠀꠘ-ꠔꠣꠟꠤꠝ ꠖꠤꠟꠣ, ꠔꠦꠃ ꠢꠇꠟ ꠝꠣꠘꠡꠦ ꠔꠣꠘ ꠔꠣꠞꠤꠚ ꠇꠞꠟ।
16ꠀꠞ ꠁꠍꠣ ꠢꠃ ꠘꠣꠍꠣꠞꠔ ꠉꠣꠃꠔ ꠀꠁꠟꠣ, ꠎꠦ ꠉꠣꠃꠔ ꠔꠣꠁꠘ ꠢꠥꠞꠥ ꠕꠣꠇꠤ ꠛꠠ ꠅꠁꠍꠂꠘ। ꠅꠘꠅ ꠀꠁꠀ ꠔꠣꠁꠘ ꠘꠤꠎꠞ ꠘꠤꠅꠝ ꠝꠣꠚꠤꠇ ꠎꠥꠝ꠆ꠝꠣꠛꠣꠞꠦ ꠝꠍꠤꠖꠅ ꠉꠤꠀ ꠈꠥꠔꠛꠣ ꠙꠠꠣꠔ ꠃꠛꠣꠁꠟꠣ। 17ꠁꠡꠣꠄꠀ ꠘꠛꠤꠞ ꠍꠢꠤꠚꠣꠈꠣꠘ ꠔꠣꠘ ꠀꠔꠅ ꠖꠦꠅꠀ ꠅꠁꠟ। ꠔꠣꠁꠘ ꠇꠤꠔꠣꠛ ꠈꠥꠟꠤꠀ ꠅꠃ ꠀꠄꠀꠔ ꠛꠣꠞ ꠇꠞꠟꠣ, ꠎꠦ ꠀꠄꠀꠔꠅ ꠟꠦꠈꠣ ꠀꠍꠦ,
18ꠀꠝꠣꠞ ꠖꠤꠟꠅ ꠝꠣꠛꠥꠖꠞ ꠞꠥꠢꠥ ꠛꠡꠔ ꠇꠞꠂꠘ,
ꠔꠣꠁꠘꠃ ꠀꠝꠣꠞꠦ ꠈꠦꠟꠣꠚꠔꠤ ꠖꠤꠀ ꠛꠦꠎꠤꠍꠂꠘ,
ꠉꠞꠤꠛ ꠅꠇꠟꠞ ꠉꠦꠍꠦ ꠈꠥꠡ-ꠈꠛꠞꠤ ꠎꠣꠘꠣꠘꠤꠞ ꠟꠣꠉꠤ।
ꠀꠞ ꠛꠘ꠆ꠖꠤ ꠅꠇꠟꠞ ꠉꠦꠍꠦ ꠀꠎꠣꠖꠤꠞ ꠇꠕꠣ,
ꠀꠘ꠆ꠖꠣ ꠅꠇꠟꠞ ꠉꠦꠍꠦ ꠌꠃꠈꠦ ꠖꠦꠈꠣꠞ ꠇꠕꠣ,
ꠎꠦꠞꠣꠞ ꠃꠙꠞꠦ ꠎꠥꠟꠥꠝ ꠅꠞ ꠔꠣꠞꠣꠞꠦ ꠛꠣꠌꠣꠘꠤꠞ ꠇꠕꠣ
ꠄꠟꠣꠘ ꠇꠞꠣꠞ ꠟꠣꠉꠤ ꠛꠦꠎꠤꠍꠂꠘ।
19ꠀꠞ ꠅꠃ ꠇꠕꠣ ꠄꠟꠣꠘ ꠇꠞꠣꠞ ꠟꠣꠉꠤꠅ ꠛꠦꠎꠤꠍꠂꠘ,
ꠅꠈꠘ ꠝꠣꠛꠥꠖꠞ ꠞꠢꠝꠔ ꠖꠦꠈꠣꠘꠤꠞ ꠡꠝꠄ ꠅꠁꠉꠦꠍꠦ।
20ꠈꠥꠔꠛꠣ ꠔꠤꠟꠣꠅꠔ ꠇꠞꠤꠀ ꠢꠣꠞꠟꠦ, ꠔꠣꠁꠘ ꠇꠤꠔꠣꠛꠈꠣꠘ ꠀꠐꠣꠁꠀ ꠝꠍꠤꠖꠞ ꠝꠔꠟ꠆ꠟꠤꠞ ꠀꠔꠅ ꠖꠤꠀ ꠛꠁꠟꠣ, ꠝꠍꠤꠖꠞ ꠢꠇꠟ ꠝꠣꠘꠡꠦ ꠔꠣꠘ ꠛꠣꠄ ꠗꠤꠀꠘ ꠗꠞꠤ ꠌꠣꠁ ꠞꠁꠍꠦ। 21ꠔꠣꠁꠘ ꠇꠁꠟꠣ, “ꠀꠍꠝꠣꠘꠤ ꠇꠤꠔꠣꠛꠞ ꠁ ꠀꠄꠀꠔ ꠈꠣꠘꠣꠁꠘ, ꠀꠁꠎ ꠀꠙꠘꠣꠞꠣ ꠢꠥꠘꠣꠞ ꠟꠉꠦ ꠟꠉꠦꠃ ꠚꠟꠤꠉꠦꠟ।” 22ꠢꠇꠟ ꠝꠣꠘꠡꠦ ꠔꠣꠘ ꠔꠣꠞꠤꠚ ꠇꠞꠟ, ꠔꠣꠘ ꠝꠥꠈ ꠕꠣꠇꠤ ꠅꠔ ꠡꠥꠘ꠆ꠖꠞ ꠛꠄꠀꠘ ꠢꠥꠘꠤꠀ ꠔꠣꠁꠎ꠆ꠎꠥꠛ ꠅꠁꠉꠦꠟ। ꠔꠣꠞꠣ ꠇꠁꠟ, “ꠄꠁꠘ ꠁꠃꠍꠥꠚꠞ ꠙꠥꠀ ꠘꠣꠄ ꠘꠤ ꠛꠣ?”
23ꠄꠞꠝꠣꠎꠦ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠀꠙꠘꠣꠞꠣ ꠘꠤꠌꠄ ꠀꠝꠣꠞꠦ ꠅꠃ ꠍꠤꠟ꠆ꠟꠦꠈ ꠢꠥꠘꠣꠁꠛꠣ, ‘ꠒꠣꠇ꠆ꠔꠞ ꠍꠣꠛ, ꠘꠤꠎꠞ ꠛꠦꠝꠣꠞ ꠡꠤꠚꠣ ꠇꠞꠅ। ꠇꠚꠞꠘꠣꠃꠝꠅ ꠛꠥꠟꠦ ꠛꠃꠔ ꠇꠦꠞꠣꠝꠔꠤ-ꠝꠥꠎꠦꠎꠣ ꠖꠦꠈꠣꠁꠍ, ꠔꠦ ꠅꠈꠘ ꠘꠤꠎꠞ ꠉꠣꠃꠔꠅ ꠅꠔꠣ ꠖꠦꠈꠣꠅ ꠘꠣ।’ 24ꠢꠥꠘꠃꠇ꠆ꠇꠣ, ꠀꠝꠤ ꠀꠙꠘꠣꠁꠘ꠆ꠔꠞꠦ ꠢꠇ ꠇꠕꠣ ꠇꠁꠞꠣꠝ, ꠇꠥꠘꠥ ꠘꠛꠤꠞꠦꠃ ꠔꠣꠘ ꠘꠤꠎꠞ ꠉꠣꠃꠞ ꠝꠣꠘꠡꠦ ꠝꠣꠘꠂꠘ ꠘꠣ। 25ꠀꠞ ꠁꠈꠣꠘꠅ ꠢꠣꠍꠣ ꠇꠕꠣ, ꠁꠟꠤꠀꠍ ꠘꠛꠤꠞ ꠎꠝꠣꠘꠣꠔ ꠄꠇꠟꠣꠉꠣ ꠡꠣꠠꠦ ꠔꠤꠘ ꠛꠍꠞ ꠇꠥꠘꠥ ꠝꠦꠊ ꠅꠁꠍꠤꠟ ꠘꠣ, ꠀꠡ꠆ꠔꠣ ꠖꠦꠡꠅ ꠛꠦꠎꠥꠁꠔꠣ ꠘꠤꠖꠣꠘ ꠀꠍꠤꠟ। ꠢꠃ ꠡꠝꠄ ꠔ ꠁꠍꠞꠣꠁꠟ ꠖꠦꠡꠅ ꠛꠃꠔ ꠠꠣꠠꠤ ꠛꠦꠐꠤꠘ ꠀꠍꠟꠣ, 26ꠅꠁꠟꠦ ꠁꠟꠤꠀꠍ ꠘꠛꠤꠞꠦ ꠄꠞꠣ ꠇꠦꠃꠞꠞ ꠉꠦꠍꠦ ꠘꠣ ꠛꠦꠎꠤꠀ, ꠈꠣꠟꠤ ꠍꠤꠖꠘ ꠖꠦꠡꠞ ꠍꠣꠞꠤꠚꠔ ꠉꠣꠃꠞ ꠄꠇ ꠠꠣꠠꠤ ꠛꠦꠐꠤꠞ ꠉꠦꠍꠦ ꠛꠦꠎꠣ ꠅꠁꠍꠤꠟ। 27ꠀꠞ ꠀꠟꠤꠀꠡꠣ ꠘꠛꠤꠞ ꠀꠝꠟꠅ ꠁꠍꠞꠣꠁꠟ ꠖꠦꠡꠅ ꠛꠃꠔ ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤ ꠀꠍꠟꠣ, ꠅꠁꠟꠦ ꠄꠞꠣ ꠇꠦꠃꠞꠞꠦ ꠜꠣꠟꠣ ꠘꠣ ꠇꠞꠤꠀ, ꠈꠣꠟꠤ ꠡꠤꠞꠤꠀ ꠖꠦꠡꠞ ꠘꠣꠝꠣꠘꠞꠦ ꠜꠣꠟꠣ ꠇꠞꠣ ꠅꠁꠍꠤꠟ।”
28ꠁꠈꠣꠘ ꠢꠥꠘꠤꠀꠃ ꠝꠍꠤꠖꠞ ꠡꠛ ꠝꠣꠘꠥꠡ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠟꠣ। 29ꠔꠣꠞꠣ ꠃꠑꠤꠀ ꠔꠣꠘꠞꠦ ꠑꠦꠟꠤꠀ ꠈꠦꠖꠣꠁꠀ ꠉꠣꠃꠞ ꠛꠣꠞꠦ ꠟꠁꠀ ꠉꠦꠟ, ꠉꠤꠀ ꠉꠣꠃꠞ ꠇꠥꠘꠣꠞ ꠈꠣꠠꠣ ꠐꠤꠟ꠆ꠟꠣꠞ ꠃꠙꠞꠦ ꠘꠤꠀ, ꠗꠣꠇ꠆ꠇꠣꠖꠤ ꠔꠟꠦ ꠚꠣꠟꠣꠁꠔ ꠌꠣꠁꠟ। 30ꠅꠁꠟꠦ ꠜꠤꠠꠞ ꠝꠣꠎ ꠕꠘꠦ ꠔꠣꠁꠘ ꠀꠐꠤꠀ ꠢꠞꠤꠀ ꠉꠦꠟꠣꠉꠤ।
ꠀꠟ-ꠝꠍꠤꠄ ꠛꠃꠔ ꠛꠦꠝꠣꠞꠤꠞ ꠡꠤꠚꠣ ꠇꠞꠟꠣ
31ꠛꠣꠖꠦ ꠁꠍꠣ ꠉꠣꠟꠤꠟ ꠄꠟꠣꠇꠣꠞ ꠇꠚꠞꠘꠣꠃꠝ ꠐꠣꠃꠘꠅ ꠉꠦꠟꠣ, ꠉꠤꠀ ꠎꠥꠝ꠆ꠝꠣꠛꠣꠞꠦ ꠝꠣꠘꠡꠞꠦ ꠅꠀꠎ-ꠘꠍꠤꠅꠔ ꠇꠞꠟꠣ। 32ꠔꠣꠘ ꠅꠀꠎ ꠢꠥꠘꠤꠀ ꠝꠣꠘꠥꠡ ꠔꠣꠁꠎ꠆ꠎꠥꠛ ꠅꠁꠉꠦꠟꠣ, ꠔꠣꠁꠘ ꠔ ꠙꠥꠞꠣ ꠢꠤꠝ꠆ꠝꠔ ꠀꠟꠣ ꠎꠘꠞ ꠟꠣꠈꠣꠘ ꠔꠣꠟꠤꠝ ꠖꠤꠔꠣ।
33ꠢꠃ ꠝꠍꠤꠖꠅ ꠎꠤꠘꠞ ꠀꠍꠞ ꠀꠟꠣ ꠄꠇ ꠛꠦꠐꠣ ꠀꠍꠤꠟ। ꠢꠦ ꠎꠥꠞꠦ ꠎꠥꠞꠦ ꠌꠤꠟ꠆ꠟꠣꠁꠀ ꠇꠁꠟ, 34“ꠅ ꠘꠣꠍꠣꠞꠔꠞ ꠁꠍꠣ, ꠀꠝꠞꠣꠞ ꠉꠦꠍꠦ ꠇꠦꠘꠦ ꠀꠁꠍꠂꠘ? ꠀꠝꠞꠣꠞꠦ ꠛꠤꠘꠣꠡ ꠇꠞꠣꠔ ꠀꠁꠍꠂꠘ ꠘꠤ? ꠀꠝꠤ ꠎꠣꠘꠤ ꠀꠙꠘꠦ ꠇꠦ, ꠀꠙꠘꠦꠃ ꠀꠟ꠆ꠟꠣꠞ ꠢꠃ ꠙꠣꠇ-ꠙꠛꠤꠔ꠆ꠞ ꠎꠘ।” 35ꠁꠍꠣꠄ ꠔꠣꠞꠦ ꠗꠣꠝꠇꠤ ꠖꠤꠀ ꠇꠁꠟꠣ, “ꠌꠥꠙ, ꠄꠞ ꠜꠤꠔꠞꠦ ꠕꠣꠇꠤ ꠛꠣꠞ ꠅꠁ ꠎꠣ।” ꠎꠤꠘꠦ ꠟꠉꠦ ꠟꠉꠦꠃ ꠔꠣꠞꠦ ꠀꠍꠣꠠ ꠝꠣꠞꠤ ꠢꠇꠟꠞ ꠝꠣꠎꠈꠣꠘꠅ ꠚꠣꠟꠣꠁꠀ, ꠇꠥꠘꠥꠎꠣꠔ ꠈꠦꠔꠤ ꠘꠣ ꠇꠞꠤꠀ ꠍꠣꠠꠤꠀ ꠉꠦꠟꠉꠤ। 36ꠁꠔꠣ ꠖꠦꠈꠤꠀ ꠝꠣꠘꠥꠡ ꠔꠣꠁꠎ꠆ꠎꠥꠛ ꠛꠘꠤꠀ ꠝꠣꠔꠣ-ꠝꠣꠔꠤ ꠟꠣꠉꠣꠁꠟꠣ, “ꠁꠔꠣ ꠇꠤꠔꠣ ꠖꠦꠈꠟꠣꠝ? ꠔꠣꠁꠘ ꠢꠤꠝ꠆ꠝꠔ ꠀꠞ ꠈꠦꠝꠔꠣ ꠈꠣꠐꠣꠁꠀ ꠎꠤꠘ ꠅꠇꠟꠞꠦ ꠢꠥꠇꠥꠝ ꠖꠦꠁꠘ, ꠔꠣꠞꠣꠅ ꠖꠦꠈꠤ ꠛꠣꠞ ꠅꠁꠀ ꠎꠣꠄꠉꠤ।” 37ꠛꠣꠖꠦ ꠢꠤꠘꠞ ꠢꠇ꠆ꠇꠟ ꠎꠣꠉꠣꠔ ꠁꠍꠣꠞ ꠇꠦꠞꠣꠝꠔꠤꠞ ꠈꠛꠞ ꠞꠐꠤꠉꠦꠟ।
38ꠝꠍꠤꠖ ꠕꠣꠇꠤ ꠛꠣꠞ ꠅꠁꠀ ꠔꠣꠁꠘ ꠍꠣꠁꠝꠘꠞ ꠛꠣꠠꠤꠔ ꠉꠦꠟꠣ। ꠍꠣꠁꠝꠘꠞ ꠢꠠꠤꠞ ꠈꠥꠛ ꠛꠦꠡꠤ ꠔꠣꠙ ꠃꠑꠍꠤꠟ, ꠄꠞꠖꠣꠄ ꠢꠇꠟꠦ ꠁꠍꠣꠞꠦ ꠈꠥꠛ ꠝꠤꠘꠔ ꠇꠞꠟꠣ। 39ꠔꠣꠁꠘ ꠍꠣꠁꠝꠘꠞ ꠢꠠꠤꠞ ꠇꠣꠘ꠆ꠖꠣꠔ ꠃꠛꠣꠁꠀ ꠔꠣꠙꠞꠦ ꠗꠝꠇ ꠖꠤꠟꠣ। ꠗꠝꠇꠞ ꠟꠉꠦ ꠟꠉꠦꠃ ꠔꠣꠙꠦ ꠍꠣꠠꠤꠖꠤꠟ। ꠛꠦꠐꠤꠄ ꠃꠑꠤꠀ ꠔꠣꠞꠣꠞ ꠝꠦꠝꠣꠘꠖꠣꠞꠤꠔ ꠟꠣꠉꠟꠣ।
40ꠢꠣꠁꠘ꠆ꠎꠣ ꠛꠣꠟꠣ ꠝꠣꠘꠡꠦ ꠛꠃꠔ ꠎꠣꠔꠞ ꠛꠦꠝꠣꠞꠤꠞꠦ ꠟꠁꠀ ꠁꠍꠣꠞ ꠉꠦꠍꠦ ꠀꠁꠟꠣ। ꠁꠍꠣꠄ ꠔꠣꠞꠣ ꠢꠇꠟꠞ ꠉꠔꠞꠅ ꠀꠔꠣꠁ ꠖꠤꠀ ꠛꠦꠝꠣꠞ ꠜꠣꠟꠣ ꠇꠞꠟꠣ। 41ꠎꠤꠘꠞ ꠀꠍꠞ ꠀꠟꠣꠅ ꠛꠃꠔ ꠛꠦꠝꠣꠞꠤ ꠀꠍꠟꠣ, ꠔꠣꠞꠣꠅ ꠜꠣꠟꠣ ꠅꠁꠟꠣ। ꠎꠤꠘ ꠅꠇꠟꠦ ꠎꠥꠞꠦ ꠎꠥꠞꠦ ꠌꠤꠟ꠆ꠟꠣꠁꠀ ꠇꠁꠟꠣ, “ꠀꠙꠘꠦꠃ ꠁꠛꠘꠥꠟ꠆ꠟꠣ, ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ।” ꠅꠁꠟꠦ ꠔꠣꠁꠘ ꠁꠔꠣꠞꠦ ꠗꠣꠝꠇꠤ ꠖꠤꠀ ꠝꠥꠈ ꠛꠘ꠆ꠖ ꠇꠞꠟꠣ। ꠔꠣꠞꠣꠞ ꠔ ꠎꠣꠘꠣ ꠀꠍꠤꠟ, ꠔꠣꠁꠘꠃ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ।
42ꠛꠤꠀꠘꠦ ꠃꠑꠤꠀ ꠢꠣꠞꠤ, ꠁꠍꠣ ꠢꠤ ꠉꠣꠃ ꠍꠣꠠꠤꠀ ꠄꠇ ꠘꠤꠞꠣꠁ ꠎꠣꠉꠣꠔ ꠀꠁꠟꠣ। ꠝꠣꠘꠡꠦ ꠔꠣꠘꠞꠦ ꠔꠥꠇꠣꠁ ꠔꠥꠇꠣꠁ ꠔꠣꠘ ꠗꠣꠞꠅ ꠀꠁꠟ, ꠀꠁꠀ ꠝꠤꠘꠔ-ꠇꠣꠎ꠆ꠎꠤ ꠇꠞꠟ ꠎꠣꠔꠦ ꠔꠣꠁꠘ ꠔꠣꠞꠣꠞ ꠉꠦꠍꠦ ꠞꠂꠘ। 43ꠅꠁꠟꠦ ꠔꠣꠁꠘ ꠎꠥꠀꠙ ꠖꠤꠟꠣ, “ꠀꠝꠤ ꠀꠞꠅ ꠛꠃꠔ ꠎꠣꠉꠣꠔ ꠉꠤꠀ ꠀꠟ꠆ꠟꠣꠞ ꠛꠣꠖꠡꠣꠁꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣ ꠎꠞꠥꠞ, ꠅꠃ ꠇꠣꠝꠞ ꠟꠣꠉꠤꠃ ꠀꠟ꠆ꠟꠣꠄ ꠀꠝꠣꠞꠦ ꠛꠦꠎꠤꠍꠂꠘ।” 44ꠛꠣꠖꠦ ꠔꠣꠁꠘ ꠀꠡ꠆ꠔꠣ ꠁꠢꠥꠖꠤ ꠖꠦꠡꠞ ꠝꠍꠤꠖꠣꠁꠘ꠆ꠔꠅ ꠉꠤꠀ ꠔꠛꠟꠤꠉ ꠇꠞꠟꠣ।
Iliyochaguliwa sasa
ꠁꠘ꠆ꠎꠤꠟ ৩: ꠟꠥꠇ 4: sylN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Ahle Kitab Society. All rights reserved.
