ꠁꠘ꠆ꠎꠤꠟ ৫: ꠍꠣꠢꠣꠛꠤ ꠘꠣꠝꠣ 22
22
ꠎꠦꠞꠥꠎꠣꠟꠦꠝꠅ ꠢꠎꠞꠔ ꠙꠣꠃꠟꠥꠍꠞ ꠎꠛꠣꠘꠛꠘ꠆ꠖꠤ
1ꠙꠣꠃꠟꠥꠍꠦ ꠇꠁꠟꠣ, “ꠅ ꠛꠣꠛꠣ ꠅꠇꠟ, ꠜꠣꠁ ꠅꠇꠟ, ꠀꠝꠤ ꠅꠈꠘ ꠀꠝꠣꠞ ꠘꠤꠎꠞ ꠎꠛꠣꠘꠛꠘ꠆ꠖꠤ ꠖꠤꠞꠣꠝ, ꠀꠙꠘꠣꠞꠣ ꠢꠥꠘꠃꠇ꠆ꠇꠣ।” 2ꠔꠣꠁꠘ ꠁꠛꠞꠣꠘꠤ ꠜꠣꠡꠣꠄ ꠝꠣꠔꠞꠣ ꠖꠦꠈꠤꠀ ꠝꠣꠘꠥꠡ ꠄꠇ꠆ꠇꠦꠞꠦ ꠘꠤꠞꠣꠁ ꠅꠁꠉꠦꠟꠣ। ꠅꠃ ꠔꠣꠁꠘ ꠇꠁꠟꠣ,
3“ꠀꠝꠤ ꠄꠇꠎꠘ ꠁꠢꠥꠖꠤ। ꠇꠤꠟꠤꠇꠤꠀꠞ ꠔꠣꠞ꠆ꠡ ꠡꠢꠞꠅ ꠀꠝꠣꠞ ꠎꠘꠝ ꠅꠁꠍꠦ; ꠅꠁꠟꠦ ꠅꠃ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠀꠁꠀ ꠀꠝꠤ ꠝꠣꠘꠥꠡ ꠅꠁꠍꠤ, ꠀꠟ꠆ꠟꠣꠝꠣ ꠉꠝꠟꠤꠄꠟꠞ ꠙꠣꠅꠞ ꠇꠣꠘ꠆ꠖꠣꠔ ꠛꠁꠀ ꠀꠝꠤ ꠀꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠅꠇꠟꠞ ꠡꠞꠤꠅꠔ ꠀꠞ ꠇꠣꠄꠖꠣ-ꠇꠣꠘꠥꠘꠞ ꠡꠥꠟ꠆ꠟꠀꠘꠣ ꠔꠣꠟꠤꠝ ꠙꠣꠁꠍꠤ। ꠀꠞ ꠀꠁꠎ ꠀꠙꠘꠣꠞꠣ ꠎꠦꠟꠣ ꠀꠟ꠆ꠟꠣꠅꠀꠟꠣꠉꠤꠞꠤ ꠖꠦꠈꠣꠁꠞꠣ, ꠀꠝꠤ ꠘꠤꠎꠦꠅ ꠀꠉꠦ ꠅꠃꠟꠣ ꠀꠟ꠆ꠟꠣꠅꠀꠟꠣ ꠀꠍꠟꠣꠝ। 4ꠀꠝꠤ ꠁꠍꠣꠞ ꠙꠕꠤ ꠅꠇꠟꠞꠦ ꠎꠣꠘ-ꠙꠞꠣꠘ ꠡꠙꠤꠀ ꠎꠥꠟꠥꠝ ꠀꠞ ꠎꠣꠘꠦ ꠝꠣꠞꠔꠣꠝ, ꠛꠦꠐꠣꠁꠘ-ꠛꠦꠐꠤꠘꠞꠦ ꠛꠣꠘ꠆ꠖꠤꠀ ꠘꠤꠀ ꠎꠦꠟ ꠈꠣꠘꠣꠔ ꠢꠣꠞꠣꠁꠔꠣꠝ। 5ꠁꠔꠣ ꠔ ꠙꠞꠗꠣꠘ ꠁꠝꠣꠝ ꠍꠣꠛ ꠀꠞ ꠖꠦꠡꠞ ꠚꠔꠥꠀ ꠇꠝꠤꠐꠤꠞ ꠢꠇ꠆ꠇꠟ ꠝꠄ-ꠝꠥꠞꠛ꠆ꠛꠤ ꠅꠇꠟꠦꠅ ꠜꠣꠟꠣ ꠇꠞꠤ ꠎꠣꠘꠂꠘ। ꠀꠝꠤ ꠔꠣꠞꠣꠞ ꠉꠦꠍ ꠕꠣꠇꠤ ꠌꠤꠑꠤ ꠟꠁꠀ, ꠖꠣꠝꠦꠡ꠆ꠇ ꠡꠢꠞꠞ ꠀꠝꠞꠣꠞ ꠜꠣꠁꠀꠁꠘꠞꠦ ꠖꠤꠛꠣꠞ ꠟꠣꠉꠤ ꠞꠅꠀꠘꠣ ꠅꠁꠍꠟꠣꠝ। ꠢꠘꠅ ꠎꠦꠞꠣ ꠁꠍꠣꠞ ꠔꠞꠤꠇꠣꠔ ꠀꠁꠍꠟꠣ, ꠔꠣꠞꠣꠞꠦ ꠛꠘ꠆ꠖꠤ ꠇꠞꠤꠀ ꠎꠦꠞꠥꠎꠣꠟꠦꠝꠅ ꠀꠘꠤꠀ ꠡꠣꠎꠣ ꠖꠦꠅꠀꠞ ꠟꠣꠉꠤ ꠢꠘꠅ ꠎꠣꠅꠀꠔ ꠀꠍꠟꠣꠝ। 6ꠎꠣꠁꠔꠦ ꠎꠣꠁꠔꠦ ꠖꠣꠝꠦꠡ꠆ꠇꠞ ꠇꠣꠘ꠆ꠖꠣꠔ ꠉꠤꠀ ꠢꠣꠞꠟꠦ ꠛꠦꠁꠟ ꠖꠥꠁꠚꠞ ꠅꠁꠉꠦꠟ, ꠀꠈꠔꠣꠃ ꠀꠝꠣꠞ ꠌꠣꠁꠞꠅ ꠉꠣꠟꠣꠛꠣꠄ ꠀꠍꠝꠣꠘꠤ ꠚꠞ ꠌꠝꠇꠣꠁꠀ ꠃꠑꠟ। 7ꠀꠝꠤ ꠝꠣꠐꠤꠔ ꠙꠠꠤꠉꠦꠟꠣꠝ ꠀꠞ ꠢꠥꠘꠟꠣꠝ, ꠀꠝꠣꠞꠦ ꠇꠦꠃ ꠒꠣꠇꠤꠀ ꠇꠁꠞꠣ, ‘ꠡꠃꠟ, ꠡꠃꠟ, ꠔꠥꠝꠤ ꠀꠝꠣꠞꠦ ꠇꠦꠘꠦ ꠔꠇꠟꠤꠚ ꠖꠤꠞꠣꠄ?’ 8ꠀꠝꠤ ꠎꠤꠇꠣꠁꠟꠣꠝ, ‘ꠢꠥꠎꠥꠞ, ꠀꠙꠘꠦ ꠇꠦ?’ ꠔꠣꠁꠘ ꠇꠁꠟꠣ, ‘ꠀꠝꠤ ꠘꠣꠍꠣꠞꠔꠞ ꠁꠍꠣ, ꠎꠦꠘꠞꠦ ꠔꠥꠝꠤ ꠔꠇꠟꠤꠚ ꠖꠤꠞꠣꠄ।’ 9ꠎꠦꠞꠣ ꠀꠝꠣꠞ ꠟꠉꠦ ꠀꠍꠤꠟ ꠔꠣꠞꠣ ꠢꠇꠟꠦꠃ ꠁ ꠚꠞ ꠅꠁꠍꠦ ꠇꠞꠤ ꠖꠦꠈꠟꠣ, ꠅꠁꠟꠦ ꠎꠦꠁꠘ ꠀꠝꠣꠞ ꠟꠉꠦ ꠛꠣꠔꠌꠤꠔ ꠇꠞꠍꠤꠟꠣ, ꠔꠣꠘ ꠛꠥꠟꠤ ꠔꠣꠞꠣ ꠢꠥꠘꠟꠣ ꠘꠣ। 10ꠛꠣꠖꠦ ꠀꠝꠤ ꠇꠁꠟꠣꠝ, ‘ꠝꠣꠟꠤꠇ, ꠔꠦ ꠀꠝꠤ ꠇꠤꠔꠣ ꠇꠞꠔꠣꠝ?’ ꠔꠣꠁꠘ ꠇꠁꠟꠣ, ‘ꠃꠑꠅ, ꠖꠣꠝꠦꠡ꠆ꠇꠅ ꠞꠅꠀꠘꠣ ꠖꠦꠅ, ꠔꠥꠝꠣꠞ ꠎꠦꠔꠣ ꠎꠦꠔꠣ ꠇꠞꠣꠞ ꠉꠞꠎ ꠀꠍꠦ, ꠁꠔꠣ ꠔꠥꠝꠣꠞꠦ ꠢꠘꠅ ꠎꠣꠘꠣꠁꠟ ꠅꠁꠛ।’ 11ꠀꠞ ꠢꠤ ꠌꠝꠇꠣꠘꠤꠄ ꠀꠝꠣꠞ ꠌꠃꠈ ꠀꠘ꠆ꠖꠣ ꠅꠁꠉꠦꠍꠤꠟ ꠉꠔꠤꠇꠦ, ꠀꠝꠣꠞ ꠟꠉꠤ ꠅꠇꠟꠦ ꠀꠝꠣꠞ ꠀꠔꠅ ꠗꠞꠤꠀ ꠖꠣꠝꠦꠡ꠆ꠇꠞ ꠛꠣꠄ ꠟꠁꠀ ꠞꠅꠀꠘꠣ ꠖꠤꠟꠣ।
12“ꠢꠘꠅ ꠅꠘꠘꠤꠅ ꠘꠣꠝꠞ ꠄꠇꠎꠘ ꠝꠣꠘꠥꠡ ꠀꠍꠟꠣ, ꠔꠣꠁꠘ ꠢꠎꠞꠔ ꠝꠥꠍꠣꠞ ꠡꠞꠤꠅꠔ ꠝꠣꠚꠤꠇ ꠈꠥꠛ ꠙꠞꠦꠎꠉꠣꠞ ꠝꠣꠘꠥꠡ। ꠢꠤꠈꠣꠘꠞ ꠢꠇꠟ ꠁꠢꠥꠖꠤꠞ ꠉꠦꠍꠦ ꠔꠣꠁꠘ ꠈꠥꠛ ꠁꠎ꠆ꠎꠔꠤ ꠎꠘ। 13ꠔꠣꠁꠘ ꠀꠁꠀ ꠀꠝꠣꠞ ꠇꠣꠍꠣꠔ ꠃꠛꠣꠁꠀ ꠇꠁꠟꠣ, ‘ꠜꠣꠁ ꠡꠃꠟ, ꠔꠥꠝꠣꠞ ꠖꠦꠈꠣꠞ ꠔꠣꠇ꠆ꠇꠔ ꠚꠤꠞꠔ ꠀꠃꠇ।’ ꠀꠞ ꠟꠉꠦ ꠟꠉꠦꠃ ꠀꠝꠤ ꠔꠣꠘꠞꠦ ꠖꠦꠈꠟꠣꠝ। 14ꠅꠃ ꠔꠣꠁꠘ ꠇꠁꠟꠣ, ‘ꠀꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠞ ꠀꠟ꠆ꠟꠣꠄ ꠔꠥꠝꠣꠞꠦ ꠙꠍꠘ꠆ꠖ ꠇꠞꠍꠂꠘ, ꠔꠥꠝꠤ ꠎꠣꠘꠥ ꠔꠣꠘ ꠝꠞ꠆ꠎꠤ ꠎꠣꠘꠔꠣꠄ ꠙꠣꠞ, ꠀꠞ ꠢꠃ ꠝꠣꠍꠥꠝ ꠛꠘ꠆ꠖꠣ ꠢꠎꠞꠔ ꠁꠍꠣꠞꠦꠅ ꠖꠦꠈꠔꠣꠄ ꠙꠣꠞ, ꠀꠞ ꠔꠣꠘ ꠎꠛꠣꠘꠞ ꠛꠥꠟꠤꠅ ꠢꠥꠘꠔꠣꠄ ꠙꠣꠞ। 15ꠔꠥꠝꠤ ꠔꠣꠘ ꠡꠣꠇ꠆ꠇꠤ ꠅꠁꠛꠣꠄ, ꠎꠦꠔꠣ ꠎꠦꠔꠣ ꠖꠦꠈꠍ ꠀꠞ ꠢꠥꠘꠍ ꠁꠔꠣ ꠢꠇ꠆ꠇꠟꠔꠣ ꠔꠣꠝꠣꠝ ꠖꠥꠘꠤꠀꠞꠦ ꠎꠣꠘꠣꠁꠛꠣꠄ। 16ꠅꠈꠘ ꠀꠞ ꠖꠦꠞꠤ ꠇꠞꠞꠣꠄ ꠇꠦꠘꠦ? ꠃꠑꠅ, ꠔꠣꠘꠦ ꠒꠣꠇꠅ, ꠀꠞ ꠔꠃꠛꠣꠞ ꠉꠥꠍꠟ ꠇꠞꠤꠀ ꠔꠥꠝꠣꠞ ꠢꠇꠟ ꠉꠥꠘꠣ ꠗꠁꠀ ꠚꠣꠟꠣꠅ।’
17“ꠛꠣꠖꠦ ꠀꠝꠤ ꠎꠦꠞꠥꠎꠣꠟꠦꠝꠅ ꠚꠤꠞꠔ ꠀꠁꠀ ꠢꠣꠞꠟꠦ ꠄꠇꠖꠤꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠜꠤꠔꠞꠦ ꠖꠥꠀ ꠇꠞꠣꠔ ꠀꠍꠟꠣꠝ, ꠅꠃ ꠡꠝꠄ ꠃꠋꠉꠣꠘꠤꠞ ꠢꠣꠟꠔꠅ ꠀꠈꠔꠣꠃ ꠔꠣꠘ ꠖꠞꠡꠘ ꠙꠣꠁꠟꠣꠝ। 18ꠀꠝꠤ ꠖꠦꠈꠟꠣꠝ, ꠔꠣꠁꠘ ꠀꠝꠣꠞꠦ ꠇꠁꠞꠣ, ‘ꠎꠟꠖꠤ ꠇꠞꠤ ꠃꠑꠅ, ꠅꠈꠘꠃ ꠎꠦꠞꠥꠎꠣꠟꠦꠝ ꠍꠣꠠꠤꠀ ꠛꠣꠞꠅ, ꠇꠣꠞꠘ ꠀꠝꠣꠞ ꠛꠦꠙꠣꠞꠦ ꠔꠥꠝꠣꠞ ꠝꠥꠈꠞ ꠇꠥꠘꠥ ꠡꠣꠇ꠆ꠇꠤ ꠁꠘꠞ ꠝꠣꠘꠡꠦ ꠢꠥꠘꠔ ꠘꠣꠄ।’ 19ꠀꠝꠤ ꠇꠁꠟꠣꠝ, ‘ꠝꠣꠟꠤꠇ, ꠁ ꠢꠇꠟ ꠝꠣꠘꠡꠦꠃ ꠔ ꠎꠣꠘꠂꠘ, ꠎꠦꠞꠣ ꠔꠥꠝꠣꠞ ꠃꠙꠞꠦ ꠁꠝꠣꠘ ꠀꠘꠔꠣ, ꠄꠞꠣꠞꠦ ꠎꠦꠟꠅ ꠢꠣꠞꠣꠘꠤ ꠀꠞ ꠝꠣꠁꠞ-ꠗꠁꠞ ꠇꠞꠣꠞ ꠟꠣꠉꠤ, ꠀꠝꠤ ꠢꠇ꠆ꠇꠟ ꠝꠍꠤꠖꠣꠁꠘ꠆ꠔꠅ ꠎꠣꠁꠔꠣꠝ; 20ꠔꠥꠝꠣꠞ ꠡꠣꠇ꠆ꠇꠤ ꠡ꠆ꠔꠤꠚꠣꠘꠞꠦ ꠎꠦꠛꠟꠣ ꠝꠣꠞꠣ ꠅꠁꠍꠤꠟ, ꠢꠤ ꠡꠝꠄ ꠀꠝꠤ ꠘꠤꠎꠦ ꠢꠤꠈꠣꠘꠅ ꠃꠛꠣꠁꠀ ꠡꠣꠄ ꠖꠦꠅꠀꠔ ꠀꠍꠟꠣꠝ, ꠀꠞ ꠎꠦꠞꠣ ꠔꠣꠘꠞꠦ ꠝꠣꠞꠍꠤꠟ, ꠀꠝꠤ ꠔꠣꠞꠣꠞ ꠇꠣꠙꠠ-ꠌꠥꠙꠠ ꠙꠣꠞꠣ ꠖꠤꠍꠟꠣꠝ।’ 21ꠔꠦꠃ ꠝꠣꠟꠤꠇꠦ ꠀꠝꠣꠞꠦ ꠇꠁꠟꠣ, ‘ꠔꠥꠝꠤ ꠞꠅꠀꠘꠣ ꠖꠦꠅ, ꠀꠝꠤ ꠖꠥꠞꠁꠞ ꠜꠤꠘ ꠎꠣꠔꠤ ꠅꠇꠟꠞ ꠉꠦꠍꠦ ꠔꠥꠝꠣꠞꠦ ꠛꠦꠎꠤꠝꠥ।’ ”
22ꠝꠣꠘꠡꠦ ꠅꠔ ꠡꠝꠄ ꠗꠞꠤ ꠙꠣꠃꠟꠥꠍꠞ ꠛꠄꠀꠘ ꠢꠥꠘꠣꠔ ꠀꠍꠟꠣ, ꠛꠣꠖꠦ ꠅ-ꠁꠢꠥꠖꠤꠞ ꠘꠣꠝ ꠢꠥꠘꠤꠀꠃ ꠔꠣꠞꠣ ꠌꠤꠟ꠆ꠟꠣꠁꠀ ꠇꠁꠟꠣ, “ꠅꠉꠥꠞꠦ ꠖꠥꠘꠤꠀ ꠕꠣꠇꠤ ꠢꠞꠣꠁ ꠖꠦꠅ, ꠁꠉꠥ ꠛꠣꠌꠤꠀ ꠞꠅꠀꠞ ꠎꠥꠇꠣ ꠘꠣꠄ!” 23ꠝꠣꠘꠡꠦ ꠎꠦꠛꠟꠣ ꠌꠤꠟ꠆ꠟꠣꠘꠤ ꠗꠞꠟꠣ ꠀꠞ ꠇꠣꠙꠠ-ꠌꠥꠙꠠ ꠚꠣꠟꠣꠁꠀ, ꠀꠍꠝꠣꠘꠅ ꠗꠥꠁꠟ ꠃꠠꠣꠘꠤꠔ ꠟꠣꠉꠟꠣ, 24ꠅꠃ ꠡꠝꠄ ꠙꠞꠗꠣꠘ ꠅꠚꠤꠡꠣꠞꠦ ꠙꠣꠃꠟꠥꠍꠞꠦ ꠇꠦꠘ꠆ꠐꠘꠝꠦꠘ꠆ꠐꠅ ꠟꠁꠀ ꠎꠣꠅꠀꠞ ꠢꠥꠇꠥꠝ ꠖꠤꠟꠣ, ꠀꠞ ꠇꠁꠟꠣ, “ꠄꠞꠦ ꠌꠣꠛꠥꠇ ꠝꠣꠞꠤꠀ ꠎꠦꠞꠣ ꠇꠞꠅ, ꠇꠦꠘꠦ ꠝꠣꠘꠡꠦ ꠔꠣꠞ ꠛꠤꠞꠥꠖ꠆ꠖꠦ ꠁꠟꠣ ꠌꠤꠟ꠆ꠟꠣ-ꠌꠤꠟ꠆ꠟꠤ ꠇꠞꠦꠞ।” 25ꠙꠣꠃꠟꠥꠍꠞꠦ ꠎꠦꠛꠟꠣ ꠌꠣꠛꠥꠇ ꠝꠣꠞꠣꠞ ꠟꠣꠉꠤ ꠛꠣꠘ꠆ꠖꠤꠟꠣ, ꠁ ꠡꠝꠄ ꠡ-ꠍꠤꠙꠣꠁꠞ ꠄꠇ ꠍꠥꠛꠦꠖꠣꠞ ꠢꠤꠈꠣꠘꠅ ꠃꠛꠣꠔ ꠀꠍꠟꠣ, ꠔꠦꠃ ꠙꠣꠃꠟꠥꠍꠦ ꠔꠣꠘꠞꠦ ꠇꠁꠟꠣ, “ꠅꠈꠘꠅ ꠎꠣꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣ ꠅꠁꠍꠦ ꠘꠣ, ꠁꠟꠣ ꠄꠇꠎꠘ ꠞꠥꠝꠣꠘ ꠝꠣꠘꠡꠞꠦ ꠌꠣꠛꠥꠇ ꠝꠣꠞꠣ ꠀꠙꠘꠣꠁꠘ꠆ꠔꠞ ꠟꠣꠉꠤ ꠑꠤꠇ ꠅꠞ ꠘꠤ?” 26ꠁꠈꠣꠘ ꠢꠥꠘꠤꠀ ꠢꠤ ꠍꠥꠛꠦꠖꠣꠞꠦ ꠙꠞꠗꠣꠘ ꠅꠚꠤꠡꠣꠞꠞꠦ ꠉꠤꠀ ꠇꠁꠟꠣ, “ꠍꠣꠞ, ꠀꠙꠘꠦ ꠁꠔꠣ ꠇꠤꠔꠣ ꠇꠞꠣꠔ ꠟꠣꠉꠍꠂꠘ? ꠁ ꠛꠦꠐꠣ ꠔ ꠞꠥꠝꠣꠘ ꠝꠣꠘꠥꠡ।” 27ꠔꠦꠃ ꠔꠣꠁꠘ ꠙꠣꠃꠟꠥꠍꠞ ꠗꠣꠞꠅ ꠉꠤꠀ ꠎꠤꠇꠣꠁꠟꠣ, “ꠇꠅ ꠌꠣꠁꠘ, ꠔꠥꠝꠤ ꠞꠥꠝꠣꠘ ꠘꠤ?” ꠙꠣꠃꠟꠥꠍꠦ ꠇꠁꠟꠣ, “ꠎꠤꠅꠄ।” 28ꠅꠚꠤꠡꠣꠞꠦ ꠇꠁꠟꠣ, “ꠀꠝꠤ ꠛꠃꠔ ꠐꠦꠇꠣ-ꠙꠄꠡꠣ ꠈꠞꠌ ꠇꠞꠤꠀ ꠞꠥꠝꠣꠘ ꠍꠤꠐꠤꠎꠦꠘ ꠅꠀꠞ ꠡꠥꠎꠥꠉ ꠟꠁꠍꠤ।” ꠙꠣꠃꠟꠥꠍꠦ ꠇꠁꠟꠣ, “ꠀꠝꠤ ꠎꠘꠝ ꠡꠥꠔ꠆ꠞꠦꠃ ꠞꠥꠝꠣꠘ।” 29ꠁꠈꠣꠘ ꠢꠥꠘꠤꠀꠃ ꠎꠦ ꠍꠤꠙꠣꠁꠄ ꠔꠣꠘꠞꠦ ꠎꠦꠞꠣ ꠇꠞꠣꠔ ꠎꠣꠅꠀꠔ ꠀꠍꠟꠣ, ꠟꠉꠦ ꠟꠉꠦꠃ ꠔꠣꠞꠣ ꠢꠘ ꠕꠘꠦ ꠢꠞꠤꠀ ꠉꠦꠟꠣꠉꠤ। ꠀꠞ ꠔꠣꠁꠘ ꠞꠥꠝꠣꠘ ꠝꠣꠘꠥꠡ ꠅꠁꠟꠦꠅ ꠔꠣꠘꠞꠦ ꠛꠣꠘ꠆ꠖꠤꠍꠟꠣ ꠇꠞꠤ ꠙꠞꠗꠣꠘ ꠅꠚꠤꠡꠣꠞꠦꠅ ꠒꠞꠣꠁꠉꠦꠟꠣ।
30ꠅꠁꠟꠦ ꠛꠣꠖꠞ ꠖꠤꠘ ꠢꠤꠞꠛꠣꠞ ꠙꠣꠃꠟꠥꠍꠞꠦ ꠎꠤꠇꠣꠁꠔꠣ ꠌꠣꠁꠟꠣ, ꠇꠤꠔꠣꠞ ꠟꠣꠉꠤ ꠁꠢꠥꠖꠤ ꠅꠇꠟꠦ ꠔꠣꠘꠞꠦ ꠖꠥꠡ ꠖꠤꠞꠣ, ꠔꠦꠃ ꠙꠞꠗꠣꠘ ꠅꠚꠤꠡꠣꠞꠦ ꠙꠣꠃꠟꠥꠍꠞ ꠛꠣꠘ꠆ꠖ ꠈꠥꠟꠤ ꠖꠤꠟꠣ, ꠛꠠ ꠁꠝꠣꠝ ꠅꠇꠟ ꠀꠞ ꠚꠔꠥꠀ ꠇꠝꠤꠐꠤꠞ ꠢꠇꠟꠞꠦ ꠄꠇꠈꠣꠘꠅ ꠖꠟꠣ ꠅꠀꠞ ꠢꠥꠇꠥꠝ ꠖꠤꠟꠣ। ꠛꠣꠖꠦ ꠙꠣꠃꠟꠥꠍꠞꠦ ꠟꠣꠝꠣꠁꠀ ꠔꠣꠞꠣꠞ ꠍꠣꠝꠘꠦ ꠀꠎꠤꠞ ꠇꠞꠟꠣ।
Iliyochaguliwa sasa
ꠁꠘ꠆ꠎꠤꠟ ৫: ꠍꠣꠢꠣꠛꠤ ꠘꠣꠝꠣ 22: sylN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Ahle Kitab Society. All rights reserved.
