APOSTOLMI 21

Paul no Jerusalem lo Wu

1Kughou ninguno panongu qhive puzu ashukakilo chevekeno, vejoyi katha susu Kos tolu, eno tishiwo thoghiuno Rhoda tolu eno tileno wo Patara tolu. 2Ashukaki lakhi Fonika lo wunikeu shi aghi, ikehu ninguno tile ilo puzu wuve. 3Ninguno putouno Kupra ithulu puzu tipau apeu kudauno Siriya lo wu eno Tur lo quqhie, kughengu tileno ashukakilo akho tinhemgha puchekeu quqhinikeu shiake. 4Tile kupulumiqo phuwu puzu panongu sasu kusholuno atsala tsuni ngove. Aghungu kuka vechewo kupulumiqono Paul vilo Jerusalem lo iqho kevilo pi, 5ikemu ningu kihithapuakeu tsala tove kethiu, ninguno panongu qhive puzu nishelo cheve. Panonguno panongu nipu-anuli sasu aphughi kubala kutolo ningu sawu. Ningu kumtsu azughi mukulo qhoqhunheno inikhu. 6Tithiu ningu kinikileve, nino ashukakilo ikuve eno panonguno akilo idewove.

7Tur lono nighuzu ashekha shiveno ninguye Ptolemai lo wo tolu eno tile athikuzumi sasu kushokilelu puzu panoqo gholo atsala lakhi ngove. 8Tishiwo thoghiuye ninguno cheve puzu Kaisaria lo ighi, tilehi ninguno Filip atsakiviu pikulha chekeu kilo wuno pa gholo ngoe. Paye Jerusalem lo mitsuni kishelukeqo gholo lakhike. #Aposto 6.5 9Pa nga ilimi bidi akeqono tungkuptsa piche. 10Ninguno tile atsala hami ngove kethiu Judia lono Agabu ipikeu tungkupmi lakhi iqighi. #Aposto 11.28 11Pano ningu gholo ighi puzu Paul pokha ikhipe pa likhi pa phi-au pheda puzu pi, “Aghungu Kimthe no hishi pi anie, apokha hipau mipeuye Jerusalem lo Judami qono hitoi pheda puzu pa kughape Judakumomi ulo phesuve tsunanie.” 12Kughou ninguno hi chilukeno, tile akemi eno ninguno Jerusalem lo iqho kevilo pi Paul hakhaju. 13Ikemu Paul no ishi ningu khochile, “Nonguye kiu shiepi hitoi shi puzu imlo shikighimetsu kya? Kughengu niye Ampeu Jisu je ghenguno Jerusalem lo akughushi ke likhi kumono thive nikeu kutolo khe anie.” 14Ninguno pa hakhaju puhaveno, “Ampeu pulou shipeniae” ipi puzu kiumu pimlave.

15Tile ngotave kethiu ningu nhemgha kuto-kugho pesu Jerusalem lo iqhoniye cheve. 16Kaisaria lo kutsukulumi khami ningu sasu iqho eno ninguno ngonikeu shi akeuno kilo sawu. Aki ampeu jeye Mnason, paye Kupra yeghi lono ighikemi inahuu huthu tughu lono kupulumi shiluvekemi lakhi.

Paul no Jems Putsawu

17Kughou ninguno Jerusalem tolu keno tile athikuzumiqono alokivishi ni sasulu. 18Tishiwo thoghiu Paul no ningu sasu Jems lau wuke akukuholo kichimiqo kumtsu aghi. 19Panoqo sasu petha shipuzu Paul no panoqo vilo Alhou no pa vechewo kishi Judakumomi gholo kiu mlatsu anikeno apasu shi lhepiye. 20Timiqono hi chilu puzu panongu kumtsuno Alhou sheqhe. Tishieno panonguno Paul vilo pi, “Athikuzuu, nono hi ithilo, Judamiqo gholono pululuvekemi qhethonhe kumzapu ani eno Ayezahlo azukini ihulokeu akhanie. 21Panongu vilo timino pipuakeuno Judami khije Judakumomi gholo acheni keno tipaqo vilo nono Muse yezah qhivelopi picheni pike, tipaqo vilo panongu nuli aphighu yiko ghakevilo momu Judami khu ayeh pekevilo ipi picheniepike. 22No ighiva pikeu panonguno chiluni apuatsa, ike kiu kishiveni kela chho! 23Tighenguno ninguno kiu ovilo pinikeno ti shilo. Hilau timi bidino ashoqhi lakhi shipesu ani. 24Ike timi hipaqo sasu ngolo eno panoqo gholono noghi olikhi oshikimithe keu chine shilo eno panongu me ghi nono sutsu puzu panongu pelo akutsusa miyelu pelo. Hitoi shiaye timino oghili kughape panongu vilo pipuakeu hu kumukumo ake, no ampino Muse yezah jukutoghi xucheni kena ipi timi kumtsuno ithiniae. #Akiki 6.13-21 25Ikemu Judakumomi khunoqono pululuve akeno ninguno panoqo lau yesu lakhi tsuva eno panoqo vilo ninguno kughathalukeuno panonguye asu atu pesu ajulho shisuno achuqupu pesu tipau mllakeu chumoni, ahji ngo tsuqu-qhi pithikeu lhoxu shi chumoni eno salhashupu moni ishikeu pivae.” #Aposto 15.29

26Ike Paul no timi mibidi hu sasu wu eno thoghiuye panoqo gholono pa phi shikimthekeu chine shie. Tishi puzu pano Judami chinekilo ilono shikimithekeu chine do kiu tsala lono kishekha eno kughono panongu lakhikhi ghenguno akumllagho tsukepu shinani ishikeno kimchive ake.

Achinekilo Paul Kughaluve

27Atsala tsuni hu shikhani chekelo, Asia yeghiqhalo Judamino Paul no achinekilo aghikeu ithulu. Tipaqono timi kumzapu akeqo xukutho puzu Paul tsuquluveno ighamuku pi, 28“Israilmiqo, kumtsuno ighilo! Timi hipauno aqha kumtsulo wupuzu timi kumtsu vilo Israilmi ngo Muse yezah eno achineki hipau lhoksa pi achenike. Tinguno alauno pano Grikmi sasu achinekilo sailoghino pano akimthe-a hipau kitiqeve anie.” 29Hi pikeuye kutau lono kumo puzu Efesia ghami Trofima no Paul sasu aphughilo chekeu puzuuno panonguno ithulu puake eno Paul no tipau sasu achinekilo ighi kughashiveke. #Aposto 20.4 30Aphughi qha kumtsu qheghuyive eno timiqo kumtsu koha ighikhae. Panonguno Paul tsuquluve puzu achineki lono pa sunhe sasu ipeve. Eno mtazu ahukikhaqo khaluve. 31Timiqono Paul pithiveniye pukaputsauve kelo, asutsa lakhi Rom ghushimi shou zahtsuu lau peiqhoghi keuno Jerusalem kumtsulo mubu- mghu akeu pia. 32Zahtsuu huno mtazu kijemi ngo ghushimi ishi sasu timiqono akeulo po-iqighie. Kughou timiqono zahtsuu ngo ghushimiqo ithulu keno panonguno Paul hemove. 33Tileno ighi puzu Paul kughaluve eno ayikichhe kighi kini pesu pa tshulopi ahza tsu. Zahtsuuno paye khuu eno pano kiu shive keno iniju thu. 34Timiqo gholo khamino lakhi piaye kutamino kutau pi ae eno mubu- mughu kehu, kiu shivekeu lono keno zahtsuuye mtsuqheyi phumlave, ikehu pa sasu ghushimi kungo-a bocholo sawuvelopi ahzatsuve. 35Panonguno pa sasu anepa pukachekeu tokelo ghushimino pa kuho pesu wue kughengu timiqoye shishe ghughushi itha akehu. 36Timiqo kumtsuno pa papesu, “Pa pithivelo” ipi ighache.

Paul no Pasaphukeu Tsa

37Ghushimino Paul sasu ghushimi kungo-a bocholo iloniye akelo, pano zahtsuu putsa ghi pi, “Ipelo ovilo kiuala pilu penima?” Zahtsuuno khochile pi, “Noye Grik tsa ithi ani kesha? 38Tishiaye, noye ishi thoghilo Ijipmi huno timi xukutho puza puzu ghikiqhimi 4000 shou sakipheu shisusu asayeqhalo wukeu hu kumo kesha?” 39Paul no khochile pi, “Niye Judami lakhi, eno Kilikia lo Tarsus ghami eno inapughakemi ghami kumoe. Kimiyeno ipelo timiqo putsalu pelo.” 40Kughou zahtsuuno tishilu nanipi pikeno, Paul no anepalo puthugho puzu pa-u chhope timiqo itha-piye. Kughou timiqono iquneive keno Paul no Ibri tsauno panongu vilo ishi pi.

Iliyochaguliwa sasa

APOSTOLMI 21: SUMIBSI

Kuonyesha

Shirikisha

Nakili