Aesea 11
11
Iahova hesan asuv houlu tai houmon meatin keil onen ito en tomat lisenges
Aesea 11:1-10
1Iahova selus ka en provet Aesea vit,
“Kosa, losilkatien koa ka en vatiamal onen asuv houlu Deved mai rokol keite teni
suval vatiai tai koa ara lati.
Ka avaseini, asuv houlu hau tai hekistal rani,
hesuval silite mul vitehiteh ran vatte.#Rev 5:5; 22:16
2Ninin Votut onen Iahova hesieni
ka hesan meteisauen ka ileilien mini.
Hekatauni vailea en sise koa mal
ka hesan keihoen mini keke voum eni.
Ninin Votut koanek hesakini heilea revi Iahova
ka hehouhou mini.
3Asuv houlu enek hesi kei mok
vahouhou min Ahi ka helong kati.
En avong ten kot, kei houmoni hemal en meatin keil.
Hermusiltei asas koa kei lesi mal en meten,
vuo asas koa longe en ralingen.
4Vuo. Navong heles usite onen meatin keil en out netan, houmoni housil sakien ten maluen enges.#2Tes 2:8
Anatin, houmoni hemal en koakeil tounah one tovuol ka hekataun koakeil arkeihtei.
Ral min selusien onen, helei rahit en usite onen meatin vasi keil ten out netan.
Anatin, hetal min selusien takeih onen, heta koteh moulien onen koakeil amum kalkali.
5Vatte ten losilkatien onen
hehi maluen ka anatinien.#Efes 6:14
6En hen, tounah vasi keil koa amoul en out netan ito en tomat.#Aes 65:25
Huli rendan keil ito out hetas en tomat hetal min titi sipsip keil.
Taegar keil emun imatil out hetas hetal min nani keil koa avi havivi.
Ka laeon keil ito hetal min titan buluk keil koa ave musising ka irkantei keil,
ka keil imah revi keke titiali keil enges akilea avalamun keil.
7Buluk keil ianian ruai hetal min bear keil,
ka titae keil imatil ruai en tomat.
Ka laeon keil ian oumunai
hesuval buluk keil.
8Titiali keil koa akea veah
ilea ipilei vesesal en out koa tetal tisa keil amul ien.
Anatin, keil itokol tetal keil,
ka tounah sakras vamai vapurun keil.
9En out vasi keil koa mul rahit Hou Saeon koa vi vatihou votut onen Ahi,
tounah tovuol hel ien koa kilea vapurun etai meatin vuo voum vatisa.
Ka ileilien usil Iahova hemai hesien revi out netan,#Hab 2:14
hesuval atas mul sien revi vulin.
10Avong hemai keke asuv houlu hau tai koa hekistal en vatiamal onen Deved hemai helomal.
Meatin keil vasi ten out netan koa amul soutin iha ilesi ka usili.#Rom 15:12
Anatin, keil imai veni en out kati onen
koa hehi moreite vis hehi moreite mok.”
Iliyochaguliwa sasa
Aesea 11: pma
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Copyright © 2011 Wycliffe Bible Translators, Inc.